بطل التطبيع /الحلقه الخامسه.

[منقاش]

بطل التطبيع /الحلقه الخامسه. بطل التطبيع /الحلقه الخامسه. بطل التطبيع /الحلقه الخامسه. بطل التطبيع /الحلقه الخامسه. بطل التطبيع /الحلقه الخامسه.

تذكرون في الحلقه اللي راحت ألأوامر الصارمه اللي أعطيتها للأسد قايد الطابور لأقتلاع الخونه والعملاء من جذورهم ,, وتذكرون الوداع الحار والدموع المدراره اللي ذرفتها في وداع الصهاينه ,, وتذكرون من قبل (في الحلقه الثانيه) أني تكدر خاطري ولعبت الفيران في سروالي من يوم طب علينا الرويعي وابتدا يحشر نفسه في عملية السلام ..
الزبده : أن الرويعي ما قر له قرار , وقعد يزن عليه يوم ورا الثاني يلولس عندي ويترجاني أدخله في وفد السلام ,, ويقول يا شيخ منقاش قطع الرقاب ولا قطع الأرزاق ,, يا شيخ خليني أترزق الله معكم وادخل التاريخ من أوسع أبوابه كما دخله دحلان وابو مازن والرجوب..
ويوم شفته زودها ولا هو ناوي يعذر ويكب عني الزنين بحلقت فيه بعيوني ورفعت عليه صوتي وقلت : هو أيات من أذانيك اللي تسمع العلم يا رويعي ؟ , جاوبني وقال : كلها الثنتين تسمع دبيب النمل ,, رديت عليه وقلت : السلام اللي تحضره الله يغنينا عنه ,, ومستعد آخذ الناكس المشاكس ومية ناطس من أمثاله ولا آخذك أنت ,, هيه قم قم ووريني عرض أكتافك .
لوى بوزه وأعطاني مقفاه ومشى ,, وكنت عارف أنه ما رايح يقر له قرار حتى يشوشر على عملية السلام ,, وبعد أيام ما طالت أبتدا ألغطيط يطلع من هنه ومن هناك ,, وابتدت ألأشاعات المغرضه تفوح , والكذوب المنكره اللي بكبر الجبال تزيد وتكبر, وكلها كان وراها شخص واحد لا غير وهو العقل المدبر لها وهو رويعي الكلاب ,, وآخر ملعوب سواه راح فيه لفقيه الجماعه وعبى راسه باللي سار واللي ما سار.
وهاك اليوم وانا أحول في السواني ألا وقايد الطابور مقبل عليه حتى دنا مني وانثنى عليه وخافتني بكلام خلاني من الزعل أقوم واقف وأرمي بالمسحاه من يدي واوقف سوانيه .
يقول قايد الطابور أن فقيه الديره خطب الجمعه الماضيه وقبل يتم خطبته أنحرف وقلبها غيبه ودعا وردى على المساكين الصهاينه ,, والرويعي الخبيث كان في أول الصف , وراد وجهه للقبله ورافع كفوفه في السما متر فوق راسه ويأمن (يقول آمين) على دعا الفقيه بأعلا صوته يسمعه حتى اللي برى المسجد ,, ما هي نجوى عن تقوى منه ,, لا لا ,, الرجال يبغي يشقر عصا القبيله ويوقض الفتنه النايمه ويحرض الرعاع ويدغثر الما , وكله أنتقام ليش ما حطيناه في وفد السلام .
قلت لقايد الطابور : الرويعي واللي هم على شاكلته مثل الفيران اللي تحفر الجدران وتنخر تحت سيسانها حتى تهدم السدود ,, لكن أنت ويش رايك يا قايد الطابور , ما عندك حل لهالمشكله اللي تبي تشكلنا ؟.
رد عليه وقال : الرويعي سوسه منحوسه , واشوفه طفح معه الكيل ولا نبغي نضيع معه الوقت كما ضيعناه مع غيره وندور تهمه نلبسه أياها ,, لا لا, خليني أقفصه وأكروته في خربان حصن غياظ , وأذا سعلني ويش ذنبه ؟ , أقول له يا رويعي كلك ذنوب من أسفل قدمك الى قلة راسك , وكلك آثام حتى تثبت براءتك , يا نمام يا حرامي يا أكال لحوم عباد الله المسلمين واليهود ..
شكرت القايد على أخلاصه ونباهته وقلت له : لا لا , لا تزيد تعجنها على ما هي معجونه ,,, أفضل نبتدي خطة ذر الرماد في العيون وسياسة فرق تسد ..
بلغ الجماعه كبيرهم وصغيرهم أنهم معزومين عندي ليلة الجمعه الجايه على عشر من الغنم وحسيلين (عجلين) وحاشي بمناسبة نجاتي من طيحه من على حماري بعد عنفص بي وأنا راكب عليه وطرحني وتعلقت واحده من كراعيني في التبع واستحبني بها على ظهري حتى ضوى بي البيت .
رد عليه وقال : حرام تكلف على نفسك وتخسر يا شيخ منقاش ؟ , وويش خطة ذر الرماد وفرق تسد ؟.. رديت عليه وقلت : أطمئن ما أنا ناوي أخسر من جيبي ريال واحد , وعندي باقي فرقة الجماعه للحمى بس أني شاح فيها أبغيها لقرى (زفاف) ولدي .
لكن أبغيك أذا دخل الرويعي والمشاكس المسجد تخليهم حتى يكبرون ورا الأمام وتنسحب من الصلاه وتسرق مداس الرويعي الزينه اللي دايم يتبختر بها , وتزيد تسرق كنترة المشاكس المروحه .
بعدها تسري بليل أظلم وتسرق حسلان (عجول) الفقيه وترمون واحده من مدس الرويعي في حوشها حتى تركب عليه التهمه , ثم تبقون أحسن أثنين فيها للعزيمه والباقيه تبيعونها وتشترون من ثمنها عشر من الغنم للمناسبه , وباقي ثمنها وزعوه في سبيل الله صدقه عني على الضعفاء والمساكين .
وفي ليلة الغزوه المباركه على حسلان الفقيه تغزون شبك أباعر المخاوي وتسرقونها وترمون واحده من كناتر المشاكس في شبكها حتى تجي التهمه فيه , ثم تعزلون أحسن حاشي فيها وتبقونه للعزيمه وتجلبون الباقيه وتجيبون ثمنها أعطيكم ربعه والباقي نخليه عندي أنفق منه على الضعفا والمساكين اللي ينصوني .
رد عليه قايد الطابور وقال : كلك حكمه وعدل واحسان يا شيخ منقاش , ومنك الأمر ومنا السمع والطاعه ,, لكن ويش بعد ؟.
قلت له : ثم أذا أجتمعت القبيله ومعهم الفقيه على فراشي ليلة المناسبه أخليهم حتى يتعشون واللي عليهم بالخير ثم ابتدي أتكلم وأصب غضبي على اليهود واقول فيهم كلام ما قاله مالك في الخمر , واطلب من الفقيه يزيد يخصص خطبة الجمعه الجايه للتحذير من اليهود وأعوانهم الخونه المندسين بين القبيله .
الى عند الخونه المندسين بين القبيله أتوقف بكم , وفي الحلقه الجايه تجيكم باقي علومي , وسلامتكم .