حملة مليون رد

[حسن عابد]

الله اكبر وش على الدنيا تجيب اللي تجيبه
مابقالـي فـي لياليهـا طمـع ولا ملامـه

الفرح في ودها يحمل علامـات المصيبـه
والمصيبه عندها تحمل تباشيـر السلامـه

تبتعد عمن طلبها والا هي اصـلا قريبـه
وان كسبها من كسبها ما يشد بها حزامـه

ينصر المهزوم فيها بعد امر ربي نصيبـه
والله اعلم كم يذوق المنتصر مر انهزامـه

لو تجيك بلا مشاكل تعتبر حالـه غريبـه
والطبيعي لو تجي والوانها مثـل الغمامـه

عيشة الانسان فيـه بالاساليـب العجيبـه
كيف يلقى في متاهتها طريـق الاستقامـه

دام صارت قيمة الرجال عند الناس جيبـه
والكرامه حصلوها الناس في هدر الكرامه

المريض يموت واثر اسباب موته من طبيبه
والبنا يبنيه واحـد ويتسبـب فـي هدامـه

والليالـي كـل ماجتبـه تعـود وتغديبـه
خلت السيد يصيـر اليـوم خـدام لغلامـه

كل طيب ماكثر اللـي يستغلونـه بطيبـه
والجمل ماطمع الجـزار فيـه الا سنامـه

من لبس حسن النوايا لبسوه النـاس ريبـه
والشكوك تخلي الطيبه تجي مثـل اللئامـه

والقريب اليا تعافى واغتنى ينكـر قريبـه
يقطع ارحامه وينكـر واجباتـه والتزامـه

والله انها ميسم بالكبـد وطعـون عطيبـه
لو تجيك من القرايب تذبحك هـم وندامـه

والرفاقه ماتجـي بالمـال والا بالغصيبـه
ناس تقدرها وناس تردهم عنها الرخامـه

ياهني الضلع شامخ فوق واحجاره صليبـه
والزمان اللي يضيم الناس ماقد يوم ضامه

والسنين السرمديه ماتعجـل فـي مشيبـه
والاوادم كلبوهـا ماتنقـص فـي مقامـه

الاوادم بعضهم لولا المجامـل وش نبيبـه
مير تجبرنا السلوم ووقتنا يفـرض نظامـه

والمجامل مايخلص به طليب مـن طليبـه
بس لاجل مساير الاحداث يلزمك احترامه

والحياه اللي لها عند البشر قيمـه وهيبـه
من زمان ادم وحوا لين ساعـات القيامـه

منهو اللي باجتهاده حصل اكثر من نصيبه
يجتهد في ودها ونهايتـه تحـت العدامـه

الفرح في ودها يحمل علامـات المصيبـه
والمصيبه عندها تحمل تباشيـر السلامـه

الله الله وش عليها لو تجيب اللـي تجيبـه
مابقالـي فـي لياليهـا فـرح ولا ندامـه