طلبناكم يبو عبدالرحمن

[منقاش]

طلبناكم يبو عبدالرحمن طلبناكم يبو عبدالرحمن طلبناكم يبو عبدالرحمن طلبناكم يبو عبدالرحمن طلبناكم يبو عبدالرحمن

قبل ساعات كنت مشغول أتفرج على كناة الجزيره وعلى المعتمر الصحفي حق أصحابي بوش واولمرت , وليتهم ما تعبوا الصحفيين ولا سوو معتمر صحفي , كل حكيهم كان كذوب في كذوب في كذوب بعضها فوق بعض مثل أكوام الزبايل أذا أضرب عنها عمال النظافه ويحسبون أن نحنا ورعان تمشي علينا أكاذيبهم وورعنتهم.
وكنت وانا أتسمع عليهم أقول في نفسي ماركة زعماء الدول في هالزمان مثل ماركة شيوخ القبايل عندنا اللي تسولف مع الواحد فيهم أشهر ويجي بينك وبينه زاد وملح ولا يفتح لك قلبه والا يعطيك كلمه واحده صادق فيها , مع فارق بسيط وهو أن رؤسا الدول تلقى كل أسرارهم عند نسوانهم وشيخ القبيله ما يطلع اللي في قلبه الا عند ورعه , لأجل كذه أذا بغيت تعرف ويش تحتك يا وغيفه تعلم حرمة الريس ولا تعلم الريس نفسه , وتعلم ورع الشيخ ولا تعلم الشيخ نفسه .
أتركونا منهم ما هذا موضوعنا ,,, العلم وما فيه أني كنت مشدوه مع معتمر بوش وخويه واستغفالهم للمغفلين , وانا فاتح فمي أتسمع عليهم دق عليه الجوال مرتين وسكرته في وجه المتصل وزاد دق الثابت مرتين وقفلت السماعه في وجه المتصل . وبعد المعتمر زاد دق الجوال الا وهو مخاوي منقاش على التلفون بشحمه ولحمه يشكي ويبكي ويلتمس شفاعتي عند أبو عبدالرحمن والمشرفين ,, ويدعي أنه أتصل بي هاليوم لوحده أكثر من عشر مرات واني كنت أسكر السماعه في وجهه كل مره .
أعتذرت منه حتى آخذ بعقله وأبغيها حيله حتى يقصرها ويوجز علومه لكن ما نفع وزاد رغيه ما نقص , ويوم شفته يبي يطولها قلت له : أسمع , تبي تقلل حكيك يا مخاوي وتعطيني علومك من آخرها والا تبي توجبني أزيد أسكر التلفون في وجهك .
رد عليه يوم شافها حمضت وقال : أنا داخل على الله ثم عليك يا شيخ منقاش أنك تشفع لي عند مشرفنا العام وبقية المشرفين يرفعوني من نجمه لنجمتين يحطونها تحت أسمي أتمتع بها باقي عمري مثلك ,, رديت عليه وقلت : أبشر , أني ابو نقشه اللي يشفع في هذي واكبر منها ويورد القول الفعل ,, ولعلمك يا مخاوي , أدري أن كنت بعد ما تدري أنه عندي عشر نجمات , ثم ادري ياللي ما تدري أني أنا اللي طلبت من المشرفين لا يحطونها كلها ويكتفون منها بثنتين تحت أسمي تواضع مني وتخلي عن جبروتي وجبر لخواطر المحرومين من النجوم .
النهايه وبدون تطويل.............
تراني ناصيك يبو عبد الرحمن وناصي بقية اعوانك من المشرفين الظلمه وطالبكم طلب بسيط وهين عليكم ,, طالبكم أنكم تاخذون من نجومي العشر نجمه وتحطونها للمسكين مخاوي منقاش حتى يسير عنده نجمتين بدال نجمه واحده , خلوه يتمجعص بها وينفش ريشه كما الديك الرومي ويكبر بها راسه , وكما يقول المثل اعطوا المجنون على قدر عقله ,, وظني فيكم أنكم ما تخيبون شفاعتي في مخاويه , وسلامتكم أنتم والأعضاء والقراء أجمعين, وعليكم السلام ورحمة الله وبركاته .