والشاذليه شرب الاجواد .

[منقاش]

والشاذليه شرب الاجواد . والشاذليه شرب الاجواد . والشاذليه شرب الاجواد . والشاذليه شرب الاجواد . والشاذليه شرب الاجواد .

بسم الله الرحمن الرحيم .
كلكم تعرفون الدله والقهوه وحوايجها , لكن أغلبكم يجهل أن الشاذليه هي الدله بطبختها (ببنها) , والشباب منكم ربما جهلوا بقية معاميل القهوه , ولا يعرفون عنها ألا بالسمعاء , المعاميل اللي منها المحماس , والهوند أو الهاون أو النجر , ويد الهوند , وغيرها..
ومقابل هذي المعرفه المنقوصه عند البعض من أجيال اليوم (لعوزة ومعاميل القهوه) , مقابلها الكل يعرفون براد الشاهي وملحقاته .
ولا أظنكم تجهلون أن للقهوه رفعه في مقامها , رفعه خلت بعض قبايل العرب تبالغ في حبها حتى سمت بعض وجيه ربعها ببعض أسامي معاميلها مثل ألأسامي نجر ومحماس وغيرها .
ولا أعتقد أنكم تجهلون أن للقهوه جلالها ,اللي خلى كثير من مظاهر الكرم والتكريم تستظل في ظلالها , من أجل كذه أذا دعا الكرام من يعزونهم وقالوا , يا فلان , لعلك تسير علينا وتشرب لك فنجال قهوه , يصبح معناها عزيمه سفاط وموديه على السمن والسمينه .
ولا أظنكم تجهلون كذلك , أن المعزوم أذا تحشد , ومع حشاده أجاب دعوة داعيه وقال , تكرم يا فلان , حشمه لك نلبي دعوتك , لكن بذيك (يمين) ما يقسم لنا عندك ألا دله وبراد ما يقفاها قافيه , تعني أن المعزوم حاصرألأجابه على الدله والبراد وتوابعها اللي تعرفونها وخاتمتها الطيب والعلم العجيب , يعني كما يقول المثل , يا بخت من زار وخفف .
هذا بعض من واقعكم مع القهوه ومعانيها اليوم , أو هذا جزء من عرف ألأكثريه على ألأقل في محيطكم المحلي ,,, لكن من سبقكم من ألأجداد كان لهم مع القهوه شان واشوان وأشجان , من تحريم وجلد لشاربها وطابخها وبايعها, الى تحولها فيما بعد لشعار يرمز للكرم والرجاله والتكانه والأصاله .
كيف ؟ , القصه طويله , ولا يتسع المقام ولا المقال ألا لمختصر مختصرها , وفي الحدود اللي يوصلكم فيها أبو نقشه لعنوان موضوعكم , الشاذليه شرب الاجواد ...
والزبده : لا حاتم الطائي , ولا أمرؤ القيس الثمالي , ولا حسان بن ثابت ألأنصاري ألأزدي رضي الله عنه , ولا المتنبي , ولا الحطيأه من قبله , يعرفون عنك يالقهوه ومعاميلك شي , ولا الشاهي وبراريده وفناجيله شي , البته .

لكن في ألأزمان اللاحقه في فترة حكم الاتراك فانت القهوه ودلالها , ثم بعدها بوقت فان الشاهي وبراريده ,,, لكن القهوه بقي لها مقامها الرفيع وحصنها المنيع مقابل غيرها , لأنها كيف عربي أصل ومنشا وولاده , وخوية التمر , حلوى المقيم وزاد المغترب , ما فيها كلام , أما الشاهي فهو كيف عابر للقارات , ودخيل على هذي المجتمعات , وشاربه ما يغليه , لكنه ما يرغب في تركه .
ومع رفعة مقام القهوه اللي أول ما تباشرون بها على ضيوفكم , وتناولونها كأول مشروب في وجبة فطوركم , وبالذات في شهر صيامكم , مع هذا كله لا تحسبون أن مجتمعات أجدادكم تقبلتها بكل سهوله , لاآآآآآآآ.
قبل (400) عام تقريبا كانت القهوه محرمه , ويجلد كل من يثبت عليه طبخها أوشربها أو بيعها , والكميات اللي تضبط منها كانت تحرق أو ترمى في عرض البحر, والسبب هو الشبهات والظنون اللي حوطتها , والتعجل في الحكم على ألأمور بدون عقل ولا كتاب منير.
لكن ما طال الوقت حتى دار الزمان دورته , وتجاوزت الناس ظنونها وفتحت عيونها, وأصبحت القهوه عنوان الجود والكرم , ومصدر من مصادر الفخر , وأصبحت الشاذليه (الدله بطبختها) شرب الاجواد , وأصبح للشاذليه قانونها ونورزتها في حملها وصبتها ومدتها والتكريم منها , وأصبح الشاب مهما صغر سنه , يكبر في عين أبوه وعيون ربعه , أذا أجاد الطبخه (القهوه) , من مبتداها حتى آخر منتهاها , من حمسها ولمسها حتى سحقها ودقها في هوندها بدنه لها صنه ورنه , الى تلقيمها ثم تقديمها للرجال في صدور المجالس .
وأصبحت القهوه رمز من رموز الشيمه والقيمه والشهامه والكرم , يطرون أجوادها وتمشي بذكرهم العرب في ركابها , ويقولون فلان بن فلان , الرجال اللي حلاله مريوده وناره مشبوبه وقهوته مشروبه , وأذا ذموا فاقد شي من هالمعاني , قالوا فلان طافي النار .
ثم فيما بعد وفد الشاهي , وسار البراد يزاحم الشاذليه , لكنه يجي بعدها ببعود , ولا يدرج على الحضور حتى يكرم منها كل القعود , وربما لقي من البعض الصدود .
وهذا (الصدود)هو اللي عنده مربط الفرس , المربط اللي يبي يردكم على عنوان موضوعكم , وهو بيت من أبيات واحده من الزهم (بكسر وتشديد الزاء, وفتح الهاء) .
والزهم كما يعرف الكثير منكم , نوع من الشعر اللي له أيقاعه الخاص , واللي كاتبكم يعد لحنه من أجمل اللحون , أبيات الزهم قليله ومحدوده مثل أبيات الحدايا , وكان ينشدها الركبان على ركابهم والرعاه في مفالي حلالهم .
والختام , الزهمه اللي تبون تقرونها, بادع قيفانها واحد من أجيال أجدادكم اللي كانوا ممتغصين من مزاحمة البراد للدله حتى لو جاء من بعدها ببعود , من أجل كذه يقول فيها :
حلفت لاكسر البراد , وأرمي فناجيله في الابعاد
ما عاد له عندنا مقعاد , والشاذليه شرب الاجواد
أخترت لكم هالزهمه لأنها مرتبطه بتاريخ القهوه والشاهي , وفيه غيرها كثير من الزهم اللي أحسن منها مبنى ومعنى , ومنها :
ونيت ونه خفيه , أعلقت سهمها والشيب فيه .
والدمع روح ذريه,واغرق الثوب هذا اللي عليه .
ومنها :
هذي النهارين يخواني , وجمع الرفاقه والعواني .
جاني سبب من زماني,واخلف الروح من ليلة ضواني
ومنها :
الله يا من تعداني وهو بالنظر ما لد فيه
مدري في باله زريه لابدت لي ولا خفيت عليه

. وختام الختام , هذا المقال كتبته بعد لقيت منكم أقبال وتشجيع في المقال السابق اللي كان تحت عنوان , واتشاييب الاعيان بالشيب , وخصوصا المديح اللي كاله لي حليفي الشيخ سلام الله يسلمه , وحليفي الشاعر الكبير سنا الهجره الله يؤيده .
ولا أخفيكم أن الطاقه والقوه الدافعه اللي تدفع بدر الدجى وعرعرة المنتدى حتى يستمر في الكتابه لكم مصدرها هو المديح اللي يطرب أبو نقشه وربما أحيان أسكره .
لكن حذاري من المديح اللي ماهو مليح , وشكرا .....