مشروع هدم المحاجي (ح1).

[منقاش]

مشروع هدم المحاجي (ح1). مشروع هدم المحاجي (ح1). مشروع هدم المحاجي (ح1). مشروع هدم المحاجي (ح1). مشروع هدم المحاجي (ح1).

وجيه الرفاقه والعواني , السلام عليكم ورحمة الله وبركاته , أما ما قبل :
تعرفون أن شيخكم أبو نقشه الله يديم ظله من المعتنقين بل المتعصبين لمذهب هدوا المحاجي وابنوا الملاجي , وهذا المعتقد مذهب براقماتي همامي سلامي هلامي , يومن أتباعه بحق الطيور والأرانب والوبران وحتى الخنافس والحشرات وهوام ألأرض وسباعها أنها تعيش معنا بسلام ودعه وأمان وأطمئنان في هذا العالم المضطرب بسبب تنكبه عن السراط المستقيم , وعلى هذا الجزء الغالي من كوكب الأرض المسمى بلاد ثماله من مجرة التبانه .
وحتى لا نطيل عليكم في الشروح , وتروحون على قول المخاوي في قريح (والله ما أدري ويش هو قريح؟) ,, ننصح الجهله الراغبين في زيادة معرفتهم عن هذا المبدا أنهم يتوجهون لمنتدى الحياه الفطريه , ويقرون الموضوع اللي عنوانه هدوا المحاجي .
وتلقونه على هالرابط : http://www.thomala.com/vb/showthread.php?t=38104
المهم , أن أعتناقي لهذا المذهب الهدام للمحاجي , دفعني الحماس والتعصب له أني أحاول أحول مذهبي من عقيده الى شريعه ومنهج عملي , ومن النظريه الى التطبيق ,,, ومن أجل كذه قررت في يوم من ألأيام أني أقوم بجوله أمسح فيها كل نواحي وحواشي بلاد ثماله , جوله أهدم فيها كل المحاجي اللي ألقاها على دربي ,,, وخصصت لهذا المشروع ميزانيه بحوالي 250 ريال , أشتري منها كم مد من الدقيق , وبكم ريال صربة سمن , وشوية عسل من عسل وسط آسيا اللي يورده المخاوي (جيد ورخيص) , مع باقي الحوايج من سكر وشاهي وبن وهيل وغيرها .
طبعا , المواصلات بلاش , وهي حمار أبو نقشه , والحراسه بلاش , بعد كلفت بها مخاوي منقاش , والتمر والزيت بلاش لأنها من بقايا هدايا قليل الخاتمه ما غيره (المخاوي) .
موكب المرافقين كان مكون من الحمار اللي أركبه , ومن مخاوي منقاش اللي بحكم خلفيته القياديه تشرف بقيادة العير بخطامه وأحيان برشمته , سواء كان ابو نقشه مترجل أو راكب عليه ,,, وكان معنا في المهمه كم واحد من أعضاء هالمنتدى المبارك أحب أحيط أسماهم بالسريه, وربما أبيح بها (فيما بعد) لو أبدوا أقل تهكم أو أدنى مطنزه بكلام بدر الدجى وعرعرة المنتدى , هاالكم نفر اللي أحطت أسماهم بالسريه أصطحبتهم معي للخدمات مثل عجن العجينه وغسيل الفناجيل ومواص الخمره وسواة القهوه ,الخ...
أبو غريب أو قوانتانامو المعتقلين , أو سموه معتقل المخالفين من أصحاب المحاجي , حطيناه في خرايب حصن غياظ تحت أشراف خبراء التعذيب من أنصار مذهب هدم المحاجي ألأخوان عقاب ونايبه حاكم الشوق , وهذا المعتقل الداخل فيه مفقود والخارج منه مولود , لأن فريق التحقيق في هالمعتقل الرهيب يؤمن بالرحمه للطير والحيوانات والحشرات , ويفرغ كل قسوته وجبروته بساديه عجيبه وغريبه ورهيبه على بني البشر من أخوانه في ألأنسانيه بأستثناء ذراريهم, ويتلذذ في تعذيبهم وتذويقهم أشد أصناف الهوان واقسى الوان العذاب نسأل الله السلامه .
خط سير المهمه , خط عجيب , على شكل لولبي حلزوني زمنبركلي , يسير في عكس أتجاه عقرب الساعه على أطراف ديارنا , مثل وادي الضيق وقواسي وعورش وعلق وذلاله والأصيفر وانت رايح , وتضيق الدايره مع أستمرار المسح حتى تدور آخر وأصغر الدواير على منتجع ابو عبدالرحمن في وادي ألأعرج .
يعني دوره تبدأ في ألأطراف والحواف مثل دوران الكواكب والنجوم في غياهب ودياجي ظلمات الفضاء الخارجي , وينتهي بها المطاف في مركز الدايره في وسط الثقب ألأسود مرورا بالشعب ألأسود وبالمسالح والخبيثاء وغيرها .
والمختصر , تلقينا شعب ورد في مسنادنا لوادي علق , ويوم طلينا على حمى القبيله ألا وهاك المحجاه اللي متنحبش فيها عمكم أقزوز منسم , داهمناه وقفصناه بترقوبه , وهدينا محجاته وصادرنا سلاحه , ثم كلبشناه بقياد حماري بعد ضبطناه وهو متلبس بالجرم المشهود , وفي حوزته قمريتين تنزف دماها بعد قتلها عديم الضمير قاسي القلب قتال القتلاء .
وعلى طاري القماري , هالفقيدتين فيما بعد أستعجلت وأصدرت أوامري الحكيمه لخويايه حتى يشونها لبو نقشه , ويوم قربوها مني ما لقيت عليها لحم , ولا وجدت ألا جلد متفحم على عظم , ولا هو بعيد أنها كانت حامله لأنفلونزا الخنازير, ويوم عفتها عدلت عن علمي وأصدرت أمر ما خلا من بعد النظر عمدت فيه الخويا حتى يعطونها لبساس ثماله .
وبعد مسافه ما طالت لقينا محجاه ثانيه محتجي فيها قليل الخاتمه خبير مركز الحياه الفطريه السفاح ابو تركي , ويدعي أن صدق أنه مسويها حتى يصيد ذيب ويبيع مخه على واحد من أثرياء الخليج حتى يتعالج به الخليجي من زهايمر البترول .
هدينا محجاته وصادرنا سلاحه وفلوسه وغتره وطاقيه لقيناها جدد على راسه , وقرناه مع ألأقزوز في القياد , وأرسلناهم على أبو غريب عقاب وخوياه , وكتبت لهم ملاحظه قلت فيها , رفيقي عقاب قواه الله , عسى ربي يجعلك عقاب على كل من يوذي هالسوارف المساكين اللي ما بقي منها في ديارنا ألا القليل , يا عقاب عذبوا هالأثنين عذاب الهداهد ماهو عذاب هدهد واحد ..
واستمرينا على هالحال حتى غص معتقل حصن غياظ بالمعتقلين , وحتى أضطرينا نفتتح معتقل جديد في وادي ألأعرج تحت أشراف جار ابو عبدالرحمن , حليفي الشيخ عباد كثر الله من أمثاله .
الخلاصه , يوم وصلنا أم العراعر عند الجبل أبو نوره اللي زمان أفتتنت القبيله على الثروات الطبيعيه الموجوده فيه واجهنا هناك حليفي ساري الليل , وبعد تعلمنا وعلمنا له , أبتسم وقال : يا شيخ منقاش محاجيك اللي هديتها من أصغر المحاجي , وملاجيك اللي بنيتها من أصغر الملاجي .
يا بدر الدجى , خط سيرك اللي أبتديته من ألأطراف القريبه وتبي تنتهي منه في وسط الديره يدل على ضعف البصيره , والمفروض هو العكس , وتستمر على مستوى الكره ألأرضيه , والا نسيت أنكم في زمن العولمه ؟.
رديت وقلت , يا ساري , كلامك اللي قلته مبهم , وكأنك تقول أن ابو نقشه ما يفهم ,,, رد وقال , كمل شغلك , واللي سويتوه يبيض الوجه , والصيد اللي تضبطونه مع الجناه من وبران وارانب وقهادي وغيرها هاتوه وروحوا لبيتي نتعشى معكم عليه , وعلى العشى أفهمك بالمحاجي اللي غابت عن بالك , واعلمك باللي بنوها , واعلمك باللي رايحين يهدمونها ويريحون البلاد والعباد منها ومن بناتها (اللي بنوها) , أنتهى كلام ساري.
ويريحون البلاد والعباد منها ومن بناتها ,,,,, من هم البناه ؟ , ومن هم هالرجال اللي يبون يريحون البلاد والعباد منها أن ما كانوا أبو نقشه نفسه ؟؟؟؟.
جواب هالسعال والمسعله رايحين تعرفونه في الحلقه الثانيه أن وجدت منكم تفاعل وردود وقراء , تابعوا مع بدر الدجى وعرعرة المنتدى حتى تعرفون أجابة هذا السؤال الكبير , وترونه جواب عظيم وحقيقي , ولا يدخل أحد منكم في أي أشكال ,, وسلامتكم ......