مشروع هدم المحاجي (ح3).

[منقاش]

مشروع هدم المحاجي (ح3). مشروع هدم المحاجي (ح3). مشروع هدم المحاجي (ح3). مشروع هدم المحاجي (ح3). مشروع هدم المحاجي (ح3).

بسم الله الرحمن الرحيم
قاطعت ساري وقلت , يبن العم , هم أهل المحاجي اللي سدحوا بالمسكين ولد كندي من أي القبايل ؟ , ووين ربعه الكنود عنه ما ياخذون بثاره ؟ , رد عليه بضيق كان واضح على وجهه وصوته , وقال , صدق المخاوي الكذوب , صدق أنكم يا أهل الطايف عجلين, ويحتاج رجالكم لرقاب بعارين , وحريمكم لرقاب زرافات , حتى الواحد منكم أمديه يتلحق الكلمه النازيه قبل تخرج من فمه مثل الطلقه الطايشه.
أنت وراك يا بدر الدجى دايم تقاطعني بسعالات مثل هذا؟ , وراك , وانا قايل لكم في بداية كلامي أن المسرفين اللي يفسدون في الأرض ولا يصلحون تبون تعرفونهم في نهاية كلامي , وتبون تعرفون اللي يوقفونهم عند حدهم ويقطعون دابر فسادهم؟.
ياااابدر , الربع اللي ما يقدر لا صحفي ولا سياسي ولا شيخ من شيوخ المريكان ولا بني الأصفر ولا بني الأسود ولا بني القمحي يتكلم عن جرايمهم , هم أهل المحاجي اللي يفسدون في الأرض ولا يصلحون, وباقي صفاتهم رايحه تجيكم في نهاية علومي .
قلت أبشر وسمح خاطرك , وكمل باقي علومك عن الكندي(كندي), وقل لنا بربك , ويش ذنب المسكين اللي ساقه لحتفه ؟, قال , الثقه الزايده في النفس هي اللي تورد أصحابها أحيان موارد الهلكه , خصوصا بعد كسر الرجل لشوكة الدببه السوفيت في أزمة الصواريخ الكوبيه , وبعد طارت شعبيته في السماء على ماهي طايره من قبل .
حينها يبدو أن كيندي ظن أن كل غراء شحمه , وأن العدو الداخلي أقل شراسه من العدو الخارجي , وكذه أخطا في حساباته , وغلطة الشاطر أحيان بمية غلطه , أخطا يوم حسب أنه يقدر يسخر خيرات أمريكا للأمه ألأمريكيه , ويوم وضع في أعتباره ألأخلاص لوطنه وشعبه قبل أي أعتبار آخر , وأبتدا يتجاوز الخطوط الحمراء , ويلوح بنيته في تطبيق الدستور واسترداد ألأمه لحقها السليب في أصدار النقد(الدولار) وحق تسعيره وسن قوانينه, وهذا بموجب الدستور ولا هو بموجب كلام من راسه ولا من روس مستشارينه , وهذي النوايا لوحدها كانت كفيله بتصفيته جسديا أو سياسيا .
لكنه زاد أتبعها بقاصمة الظهر , وأصر على تفتيش مفاعل ديمونا في صحراء النقب لمنع بني عمومتنا الطيبين من أمتلاك السلاح النووي , وكان هدفه التأكد من سلمية مشروعهم النووي , مع تقديم الضمانات الكافيه لهم اللي تكفل فيها المظله النوويه ألأمريكيه بحمايتهم حتى لا يفتحون ثغره لسباق تسلح نووي تدخله دول جديده وتنظم للنادي النووي اللي من السياسات العليا للقوى الكبرى أحتكاره .
وهنه خان كنيدي ذكاه , وتغلبت الشجاعه عنده على الخوف من أصحاب المحاجي , وبهالسياسه اللي أنتهجها طفح الكيل عند الخصوم , وصدرت الأوامر على وجه السرعة ببناء المحجاه وتصفية الكاثوليكي الناكر للجميل حالا قبل ينفذ نواياه , وحبكت الخطه حتى يضيع دمه بين القبايل, وحتى يسير في قصته عبره لأولي النهى من الزعامات ألأمريكيه والأوربيه .
وحتى لا يجي من بعده واحد ينسى فضل أسياده اللي وصلوه لكرسي الحكم , أو يظن في نفسه أنه زعيم فعلي لأمريكا وللعالم ويخرج عن الخط المرسوم له , وفعلا راح فيها ولد الكنود روحه مثل روحة هنود أمريكا من قبله بقبول , راح فيها وفهمها كل رئيس جاء من بعده , وهذا حال الدنيا ظالم ومظلوم حتى في علية القوم , وما من ظالم ألا سيبلى بأظلم .
وعمت الموس على كثير من الروس , وهذي من مزايا هالعصابه , وهو أن الظلم عندهم بالسويه عدل في الرعيه , مافيه عندهم واحد أغلا من الثاني , ولا فيه لحيه أكرم من لحيه .
عمت الموس على كل الروس واستمر نصب المحاجي كما كان من قبل في كثير من البقاع , وطارت كوافي زعماء , وطارت روس آخرين في أمريكا الجنوبيه وآسيا وافريقيا وغيرها , ولا طيرها ألا سبب واحد وهو أنهم حاولوا في يوم من الأيام يدافعون عن حقوق شعوبهم , وحاولوا يحدون من مصالح ظاهرها أمريكيه وفرنسيه وبريطانيه , وحقيقتها الباطنيه لعصابه دوليه ما سألت لا عن الشعب الأمريكي ولا البريطاني ولا الفرنسي ولا غيرهم من شعوب ألأرض .
وآخر المحاجي نصبت لأبو عدي الله يرحمه , ولا شفع له الخدمات الجليله والكثيره اللي قدمها لهم في سالف العصر والأوان, وليتهم أكتفوا به وبذراريه , لكنهم حطموا معه كل شي في بلده , واتلفوا مياه وتربة العراق وسمموها باليورانيوم اللي يبي يفتك للأسف بالأجيال المقبله , وحطوا اليد من جديد على ثروات العراق , مره بأسم الخصخصه ومره بأسم أعادة هيكلة ألأقتصاد , وتعددت الذرايع والنتيجه واحده وهي النهب , وعود البترول اللي كان بالأمس مؤمم لصالح الشعب العراقي , عود اليوم للعصابه اللي خرج من يدها قبل أمس .
والعجيب أن الخرفان (الجنود) ألأمريكيه والفرنسيه والبريطانيه والأستراليه تجي من سد البحار وتموت في مهمه مالها فيها لا ناقه ولا جمل ألا خدمة لهذي العصابه اللي تستخدمها هي وغيرها تحت شعارات مظلله منها الديني وغير الديني , وهم مثل البهايم اللي ما تفهم وين مصلحتها ولا تدري أحيان أنها تقاد لحتفها , وأنها مظلومه في ديارها من العصابه نفسها .
والأغرب يا ربعي والأعجب أن ألخراف العراقيه المنهوبه بلادها , والمقتول أهلها وذويها , والمسمم مياهها وتربة وهواء بلادها , تلقى هواها ومبتغاها في خدمة عداها , وخدمة العصابه نفسها اللي باعت في خدمتها نفسها وكرامتها ودينها ودنياها وآخرتها بثمن بخس دراهم معدوده وكان فيها من الزاهدين , هذا غير الصحفين ونخبه المتشدقين اللي يسمونهم المثقفين , وغير السياسين , وغير وغير ,,ألخ , كلهم يطبلون ويزمرون على ما قال المصريين , ويدورون في نفس الفلك .
شفتم يا ربعي حجم هالمحجاه وكبرها ؟ , وشفتم كيف أن حجارتها اللي بنيت بها من غواصات وبارجات وطايرات ودبابات , وحتى من مصادر أستخباراتيه يتحول فيها الشريف اللامع حامي ألأقصى الى مستر بيف مقابل راتب شهري((1))؟, ويخون ألأمانه ويخون الله ورسوله .
وشفتم كيف أن أدواتها جنرالات وساسه ومثقفين وصحافه ولقافه ؟ , وشفتم كيف أن وقودها الناس والحجاره , والأبرياء اللي يروحون في الرجلين من الأطفال والنساء والعجزه اللي تهدم بيوتهم فوق روسهم بدون ذنب , ولا يستخرجهم من تحتها رجال ألأنقاذ ألا أشلاء متقطعه أو متفحمه, هذا غير الدمار والهلاك اللي يلحق بالبهايم والطبيعه؟.
فساد كبير في البر والبحر والجو , ومشكله عظيمه سببها المحاجي العملاقه اللي لو تكلم فيها أهل الخبره أشهر ما أوفوها حقها من الكلام , فتنه عرجنا على ذكرها حتى المسلم يكون فيها كيس فطن , ولا يضع لسانه أو يده أو قلمه أو فكره أو ماله في خدمتها في أي يوم من ألأيام .
ويش الحل ؟, أستقم كما أمرت , وقل , أن صلاتي ونسكي ومحياي ومماتي لله رب العالمين , وبذلك أمرت وأنا أول المسلمين .
سكت ساري ثواني خيم فيها الصمت ألا من شخير يجي من طرف المجلس , ونعيب بومه خافت يجي من على شجره جوار الدار , ناظرت جهة الشخير والنخير ألا وهو المخاوي يغط الغبي في سابع نومه , وأحيان يجغمد بهنهنه وونونه يبدو أنها أحلام الله العليم بها , ولا هو داري المغفل عن المحاجي ولا الحجاه ولا عن الوارده ولا المصدره , ما باله ألا من الصيعه والضيعه والحفلات الماجنه اللي يسويها .
ثم أرخيت نظري على ساعتي في ضو سراج كان جنبي ألا والليل قد سرى , عودت قاطعت ساري وقلت :
يا معزبنا , الليل سرى والصبح دنا , وخويايه بعضهم رقد عن علومك مثل مرقاده عن عشاه , واراك تبي تطول في علوم كلها مهمه وزينه ولا تنمل , لولا أن مجيك فيها على ذكر المحاجي الكبار ربما يفهم منه البعض أنك تقلل من أضرار المحاجي الصغار, ورايي أنك تخلي باقي علومك للقابله عندي وعلى فراشي الله يحيكم تحية همال المطر, قل تم ..
رد وقال , تم أن كان الله قسم , أما ذكري لأضرار كبار المحاجي فلا يقلل من ضرر صغارها , ولا من ضرورة الأستمرار في هدم صغار المحاجي , ونصح أخواننا الصيادين بالكف عن الصيد .
والفساد يظل أسمه فساد , كبر أو صغر , وألأحسان اللي منه الرحمه بالطير والحيوان والأنسان يظل أسمه أحسان ورحمه , كبر أو صغر , والنار دخلتها أمرأه في هره حبستها , والجنه دخلتها بغيه من بني أسرائيل في كلب أطفت لهاثه بشربة ماء جلبتها في خفها من بير , فغفر الله لها وأدخلها الجنه...
وعند هالخاتمه اللي فيها ذكر لصغار أعمال ودت أصحابها للجنه والنار نختتم هالحلقه , جعل الله خير أعمالنا خواتيمها , وخير أيامنا يوم لقائه .
تابعوا معي الحلقه الجايه حتى تشوفون المحاجي العملاقه كيف تلتهم الديار والمقدسات والأمبراطوريات , وتعرفون فيها على صفات بناة المحاجي اللي يفسدون في ألأرض ولا يصلحون , وتعرفون على الأمه المرشحه لهدم محاجيهم وتقليم أظافرهم وكف شرهم عن البلاد والعباد , والسلام عليكم ورحمة الله وبركاته ....

((1)) , http://forum.montadayat-bh.net/archi...p/t-24342.html