من المفردات القديمة ج4(( الملبوسات ومسمياتها))

[منقاش]

بنتنا الكريمه السنافيه : الحقيقه أني يوم أكثر في المشاركات , ماهو من باب الهوايه , لكن من باب الحرص على تدوين (ولو أيسر اليسير) من تراث أهلنا وأجدادنا , التراث الغريب على ألأكثريه هذي الأيام , واللي أبتدا يغرب ذكره بعد أختفى من حياة الناس ..
يا بنتي يا سنافيه , يعز عليه تراث أهلي وربعي اللي عشت معهم فتره ثمينه من حياتي , يعز عليه أنه يندثر ولا يكتب عنه شي, والمسأله , كلها عشرين والا ثلاثين عام , ولا تجدون أحد من الأحياء يروي لكم عن مشاهده شي عن هذا الماضي ..
وليتك تبحثين عن بعض الثياب القديمه المخيطه باليد , وتستعينين بكبيرات السن حتى يسمون لك أسماء كل شكل من أشكال الخياطه اليدويه وتصورينها ثم تنزلينها على هذا الموضوع اللي تكرمت بطرحه ...
ملاحظه : الخياطه , والخرازه , والنسيج , كلها كانت من مهن النساء ....
.................................................. .................................................. .......
ثامنا , ثوب الرجل كانوا يسمونه صدره (بضم الصاد وتسكين الدال وفتح الراء , وجمعها صدر بفتح الدال) , والصدر منها المكمم اللي يسمونه المحرد (بضم الميم وفتح الحاء وفتح وتشديد الراء) , ويميز هالصدرطول ووسع أكمامها, ومنها الصدر العاديه اللي أكمامها عاديه , ومنها نوع ثالث يسمونها الحويسي , وتميز بوسعها من تحت الحزام , والصدره أن وضع فيها جيب , يخفى داخل الحثل , وتدخل له اليد مع خلال فتحات الزبازير.
وكان أبهال الثياب عيب من كبار العيوب , وفيه تشبه بالنساء (المتزوجات) , وكانت الحزم الرجاليه متنوعه , منها الكمر , والجديل , والعمامه (غير عمامة الراس) , والدسمال , وحزام الصفر (من الجلد ومعبا ذخيره حيه) .
وهذا غير مجند الصفر , والمجند (بضم الميم وفتح الجيم وفتح وتشديد النون) عباره عن وشاح من الجلد المطرز يعبى بالذخيره على أمتداد الصدر والظهر , وغير سبتة طاسة البارود .
والجديل يلبس من تحت هالحزم , حتى يجود الجنبيه مثل الجنبيه اللي كانت مشهوره بجنبية القديمي , ويجود السكين بخباها اللي(الخبى) عادة يكون من الجلد المطرز , يخفي نصل السكين ويبرز منه نصابها .
ومن السكاكين اللي كانت مشهوره , سكين الراجس اللي كانوا يعتقونها بغرز نصلها في الطين أسبوع أو يزيد , ثم يستخرجونها ويحدونها , وبعدها تصبح مرهفه الحد الى درجه تقترب من موس الحلاقه , وتصلب لدرجة أن حدها يبقى على رهافته لفتره طويله قبل يلاحظ عليه صاحبه أدنى نسبه من الكلل اللي يوجب أعادة تحديدها ...
ملاحظه : العمامه , ما تطلق ألا على القماش المربع المقرون , والضافي الى درجة أنها أذا فردت ألحفت راعيها , أما أغطية الراس اللي أصغر من العمامه , فهذي يسمونها الصماده(بكسر الصاد , وفتح الميم) , والصمايد كانت أنواع كثيره , مثل ما كان يعرف بصمايد الغبانه والشوربان .