طعام الخردة..!!

[منقاش]

خلوها على الله , الدعوه كلها أصبحت خربانه , وكما يقول المثل , ما أخس من المخاوي ألا ابن عمه (بداح) .
بعباره ثانيه , الجنك أهون من بقية العلوم المجنكه , والمكدانلد والبيزه وغيرها ماهي أول ولا آخر العلوم الخربانه ..
الخضره اللي للزلطات من كزبره وبقدونس وجرجير وغيرها يسقونها بموية المجاري وتعلق بأوراقها وسيقانها جراثيم وفيروسات يا دافع البلا , وهذا غير المبيدات اللي تنرش بها .
والخيار والقوطه والباميه والكوسه وبقية العلوم المنكوسه كلها يرشها المزارعين بمبيدات حشريه سامه ما يجوز تسويقها بعدها ألا بأسابيع , لكن المزارعين ما بين الجهل وضعف ألأمانه يجيبونها لك ثاني والا ثالث يوم , وفوق هذا كله يرشون بدال المره عشر مرات حتى تكدس عليها السموم ..
والفواكه مثل الخوخ والعنب والمشمش وغيرها بالمثل , تنرش وتنزل السوق ولا من حسيب ولا من رقيب , مع العلم أن الغسل قبل ألأكل مهما حرصتم ما يزيل كل العوالق الكيماويه السامه ..
والمشكله أن السموم تباع بدون ضوابط ولا رقابه ولا توعيه , تباع من قبل أصحاب المحلات المختصه في هالمهنه .
يذكر لي (قبل أكثر من عشرين سنه) واحد من أهل الديره , أن واحد من المبيدات كانوا يحطونه في الماء وهو رايح مع الفلج للشجره والخضره , وبعد يوم والا يومين تخرج الديدان من الطين وتموت , ثم تاكلها الطيور وتموت جنبها ...
اللحوم والحليب أغلب حيواناتها مغذاه بهرمونات وكيماويات تنتقل أضرارها للمستهلكين .
وبالمناسبه , ما دمتم بصدد الحديث عن أضرار نوع من الزاد والشراب , أحب ألفت أنتباهكم لخزانات الماء الحديد اللي على أسطح بعض البيوت ومواصير الماء الحديد , ترونها أذا دخلها الصدا تصبح سبب مباشر من أسباب الفشل الكلوي .
ونصيحه , أذا كانت المويه اللي تستهلكونها تمر مع هالنوع من التجهيزات , تجنبوا الشرب أو الطبخ منها , وخلوها للتنظيف فقط , وتقدرون اليوم اللي تصب فيه المويه من التحليه تعبون مواعين وجيكات خاصه للشرب والطبيخ ..
والخلاصه : العلوم مجنكه كلها حتى الخبز اللي تاكلونه أحيان فيه من البلاوي ما فيه , لكن الشكوى على الله , ويش تبونا نسوي؟, ما باليد حيله , والدنيا رايحه تنقضي باللي تبي تنقضي به , واللي يجي من السما تستقبله ألأرض..