النقيع

[منقاش]

عميد منتدى الحياه الفطريه , الشيخ سلام سلمه الله وأبقاه : الحقيقه يا شيخنا أن أبو نقشه مستعد يبصم معك بالعشره على أي أسم تبغيه , لأن درىء الفتنه مقدم عندنا على الحق والحقيقه , ولا ودنا يا ابن عمي بالعلوم اللي تشقر عصانا وتسعد عدانا , ومثلك يعرف أن ما علينا ألا شمات , وأولهم الخبيث المخاوي ...
بخصوص أسم الفصيله , أنا مجرد مشرف لأني لا أقرا ولا أكتب , وابن ابي محمد كان يملي والمخاوي الزفت يكتب , ودوبي هالحين سعلت ابن ابي محمد من وين خم لنا هالأسم المهيا ؟, وكان جوابه أنه نقله من معجم حليفنا الدكتور قشاش اللي نسب فصيلة السحاه للفصيله المظيه .
لكن قليل الخاتمه المخاوي زود من عنده حرف اللام بعد الظه لحاجة في نفسه , وأنتم ما يخفى عليكم مدى حقد المخاوي وحنقه علينا دام ظلنا الشريف وأن رغمت أنوف وأولها أنف المخاوي , عدمته وعدمت أنفه اللي مثل أنف الناقه المصابه بفلوالنياق ..
ويبدو أن حليفنا الدكتور قشاش قش لنا المظيه , وكفى بمثله نبلا أن تعد معائبه , وزاد كاتبنا المخاوي مع سبق الترصد والأصرار زود حرف اللام , وحرف الكلم عن مواضعه وحولها من مظيه لمظليه , وزاد التايهين توهان على ما هم تايهين.
لبينما الحقيقه هي أنها من الفصيله الشوكيه (بالعربيه) ,, وباللاتينيه من الفصيله الأكانثيه اللي تفضلتم بذكرها ..
والختام نشكركم على هاللفته المهمه والكريمه , واللي أن شاء الله نصرها لكم , وربي يقدرنا نرد مقابلها الصاع صاعين , والليالي وألأيام بيننا , ولا يضيع حق ووراه طلاب .
أقول نشكركم على هاللفته اللي نرجي من حليفنا الدكتور قشاش أن قرا ما كتبنا أخذ ما جا فيها من ملاحظه في الحسبان في الطبعات الجايه لمعجمه العظيم الفايده والنادر ألأخطاء , ولا نقول ألا حسبنا الله ونعم الوكيل على المخاوي المنحرف المحرف , وعلى اللي يوم شافوا ما شافوا ما ستروا الخله وخلوا المياه تمشي في مجاريها ..