اكتب اجمل قصيدة قرأتها

[سهيل2012]

مما راق لسهيل //

ماكل دخان في المجلس يجيله قبول..
من قال دخان عود الطيب مثل البكت ؟

ولا كل قافٍ سمعته قلت ليته يطول..
قيفان ماهزت احساسي ولا حرّكت

ما كل راعي سوالف ملتزم بالأصول..
كم سالفه من خيال الراوي تفبركت..

يامضحك الناس مايطري عليك الفضول ؟
الناس تضحك معك ولا عليك ضحكت

ان كان منت بقايل شي يملى العقول..
الصمت خيرً لك من ترديد بعض النكت

محد بقايل لراعي الصمت ليته يقول..
لكن كم قيل للهرّاج ليته سكت

لو القصايد تقدم للقضايا حلول..
ماكل ساعه نزف جرحك وعينك بكت ..

في سكة الوهم ماتلقى محطة وصول..
كم ضيّعت ناس قدامك وناس اهلكت

قبلك ترانا مشيناها طلوع ونزول..
سقنا الركايب بدرب الجهل لين بركت..

حتى وصلنا بعد مرت علينا الفصول..
لنهاية الصيف وأيام الخريف أوشكت

من هرجنا وش مكسبنا بعد مانزول ؟؟
ياما حكينا وياما الناس عنّا حكت..

الهرج من دون قال الله وقال الرسول..
جسماً بلا روح لو ان العقول ادركت

م/ن