من التاريخ قصة

[حسن عابد]

يهيضْني يا سـبّاع دارٍ ذكرتها=ولاعاد منها إلا مواري حيودها
سبّاع تبكي أمّك بعينٍ ودمعَهَا=من عينها يحفي مذاري خدودها
ولكن وقود النار بأقصى ضميرها=هاضَ الغرام و بيّحَ الله سدُودها
ولكن حجر العين فيها مليلة=ولكن ينهش موقها مع برودها
دمعٍ يشادي قربةٍ شُوشليّة=بعيدٍ معشّاها زعُوجٍ قعودها
زِعبيـّةٍ يا عم ماني هَفيّة=ماني من الليّ هافياتٍ جدودها
أنا من زِعب وزعب إلى أوْجَهوا=على الخيل عجْلاتٍ سريعٍ ردودها
أهل سربةٍ لا دْبرَت كِنّها مهجّرة=وِإنْ أقبلت كنَّ الجوازي وُرودها
لا طاح طايحهم بشوفي ترايعوا=تقول فهودٍ مخطياتٍ صيودْها
لا صاح صياحٍ بالسّبيب تِفازَعوا=عزيِّ لغمرٍ ثبَّرت بهْ بلودها
لحقوا على مثل القطا يوم وردته=متغانمٍ عينٍ قراحٍ برودها
خيلٍ تغذّا للبلا والمعارك=ترهِق صناديد العِدا في طرودها
لا تلقّحونَ الخيل يا زعب يا هلي=ترى لقاحَ الخيل يردي جهودها
إن جَـتْ سماحَ الخدّ ما يلحقن=وإن جت مع السّنْداء لزومٍ يكودها
جينا الشّريف بديرتِه وإلتقانا=كل القبايل جامعٍ به جنودها
طَلَبْ علينا الخُور هجمت قصيرنا=متمَوّلٍ يبغي حنازيب سودها
ياما عطينا دونها من سبيـّه=تسعين صفرا إحسابها ومعدودها
تمـامها شعيطان خيالة مهوّس=أصايل صنع النصارى قيودها
إقطع قبيلةٍ ضفها ما يذرّي=تشري جمالٍ غطها في بدودها
قصيرنا في رأس عيطاً طويلة=بحجى ذراها من عواصيف نودها
عيـّوا عليها لابِتي واحتمـُوها=بمصقّلات مِرهفاتٍ حدودها
حَرَبنا العدا والبنت نشوٍ بها أمها=واليـوم قده منوة العين عودها
تسعين ليلة والعرابا معقـّلة=شمـخ الذراء ومحجزاتٍ عضودها
شقح البكار الليّ زهن الدباديب=قامت تضالع من مثاني زنودها
خيلٍ تناحيهـا وتضرب بالقنا=مثل التهامي يوم أحلى جرودها
بنات عميّ كلّهن شقّن الخبا=بيضِ الترايب ناقضات جعودها
على الحنايا ناقضاتِ الجدايل=سمرِ الـذّوايب كاسيات نهودها
وجيهٍ تشادي مزنةٍ عقربيّة=أقبل مطرهـا يوم حنت رعودها
منهن نهارَ الهوش تنخَى رجالها=ستر العذارى ما حضر من فهودها
لباسةٍ بالهوش للدّرْع والطاّس=وعلى سروج الخيل كودٍ سنودها
مِن صنع داود عليهم مشالح=تجيبه رجالٍ مِن غنايم فهودها
ياما طعنوا من حربةٍ عولقيّة=شلفا تلظى يَشرَب الدّم عودها
الليّ أيتموا في يوم تسعين مُهرة=ما منهن الليّ ما تلاوي عمودها
تسعين مع تسعين وألفين فارس=تحت صليب الخدّ تطوي لحودها
تسعين منهن بين أبويه وعزوتي=وتسعين عنانٍ واللواحي شهودها
قبيلةٍ كم أذهبت مِن قبيلة=لا عدّت الجودات ينعدّ جودها
زِعب هُم أهلَ المدح والمجد والثنا=من الربع الخالي للحجاز حدودها
إن أجْنبوا فالصّيد منهم تحوّز=وضيحيها ومن الجوازي عنودها
وإن أشملوا تهجّ مِنهم قبايل=ودارٍ يجونه ضدهم ما يرودها
لامِن نووا في ديرةٍ ياهَلونها=تقافت الظّعان عجلٍ شدودها
اركابهم يمّ العِدى مِتعبينها=بيضَ المحاقب فاترات لهودها
يَامَا خذوا من ضدّهم مِن غنيمة=ولا صاوُغوه بلطمةٍ ما يعودها
بنمرٍ تشادي للجراد التهامي=ما تطاوع الحكام من عظم زودها
أشوف بالحرة ضعون تقللّت=وابوي حمّاي السرايا يذودها
شفي معه صقر تباريه عندل=مرٍّ يباريه و مرٍّ يقودها
أنا فتاة الحي بنت بن غافل=كم من فتاةٍ غرّ فيها قعودها
شرشوح ذودٍ ضاربٍ له خَريمة=ما ودّك يشوفه بعينه حسُودها
حوّلت من نظوى ورقيت سرحه=حطيّت رفٍ في مِثاني فنودها
وجوني ركيبٍ ونوّخوا في ذراها=وشافني عِقيدَ القوم زيزوم قودها
قال انزلي يا بنت وانتِ بوجهي=ولا جيته ألاّ بالوثْق من عهُودها
أمرٍ كِتبه الله وصار وتكوّن=تسبّب علينا من الأَعادي قرودها
بكونٍ شِديدٍ ما تمنّاه عارف=تعدّه عيالٍ عادها في مهودها
ذكرت وقتٍ فايتٍ قِد مضى لهم=ويومٍ علينا من ليالي سعودها
ضوٍّ زمت للمال من غب سرية=وضوٍّ زمّت عيدان الأرطىَ وقودها
لكن قرون الصّيد بأطراف بيتنا=هشيم الغضا يدني لحامي وقودها
تسعين عينا صيدنا في عشيّة=وضيحيّة نجعل دلانا جلودها
قنّاصنا يذهب شريقٍ وينثني=ويجيب الجوازي دامـياتٍ خدودها
وروّاينا يروح يومٍ وينثني=ويجيب القلاصي لاحقاتٍ حدودها
ومدّادنا يأخذ حديد وينثني=ويجيب الجلادي ضايماتٍ هبودها
وغزّاينا يغزي حديد وينثني=ويجيب العرابا حافلاتٍ ديودها
لنا بين حَبْر وغْرابا منزلٍ=لِهن في زين العرابا قعودها
حنّا نزلنا الحزم تسعين ليلة=وغلّ الأعادي لاجيٍ في كبودها
لامن حجى معنا عليمٍ ولا ذرى=إلاّ شخوص العين قب نقودها
ِقليبنا غزيرةَ الجمّ عيلم=ما ينشدون صدورها من ورودها
طوله ثمانٍ مع ثمانٍ مع أربع=وسطٍ من الصفرا وقبلت نفودها
أهل عقلةٍ بحدّ الحاذ من الغضى=ما دارها الزرّاع يبذر مدودها
ألفين بيتٍ نازلين جباها=وألفين بيتٍ بالمظامي ترودها
تخالفوا في يوم تسعين لحيه=عشان وقفت أجنبي بنفودها
دارٍ لِـنا مـاهيب دارٍ لغيرنا=ما حدّها الرّمله وما ورد عدودها