هُنا محاورات سهيل مع شعراء المحاورة في المنتديات ..

[الحاج سلام]

رد: هُنا محاورات سهيل مع شعراء المحاورة في المنتديات .. رد: هُنا محاورات سهيل مع شعراء المحاورة في المنتديات .. رد: هُنا محاورات سهيل مع شعراء المحاورة في المنتديات .. رد: هُنا محاورات سهيل مع شعراء المحاورة في المنتديات .. رد: هُنا محاورات سهيل مع شعراء المحاورة في المنتديات ..

يا هلا يا سهيل ومرحبا عودا حميدا يا ابو احمد عدتم والعود احمد . اليوم مصادفة دخلت لهذا المنتدى ووجدتك تشارك في جوانب عدة وكم هي فرحتي بعودتكم .
لانني فقدت مشاركاتكم وتغريداتكم في تويتر فاذا بكم انتقلتم الى هنا تصدحون بهذه المشاركات الجميلة فحق لي ان افرح بذلك .

[سهيل2012]

المشاركة الأصلية كتبت بواسطة الحاج سلام

يا هلا يا سهيل ومرحبا عودا حميدا يا ابو احمد عدتم والعود احمد . اليوم مصادفة دخلت لهذا المنتدى ووجدتك تشارك في جوانب عدة وكم هي فرحتي بعودتكم .

لانني فقدت مشاركاتكم وتغريداتكم في تويتر فاذا بكم انتقلتم الى هنا تصدحون بهذه المشاركات الجميلة فحق لي ان افرح بذلك .

وأنا كذلك أيها الحاج .....

اشتقنا للسواليف مع الطيبين شرواك عبر المنتديات .. ولنا أصدقاء في المنتديات وواجب علينا
أن نتواصل معهم .. ولكن صراحة باقي الشيخ منقاش من يجيب لسهيل خبره ؟؟
والله له وحشه ما تتصورها !!!!!!!!!

[سهيل2012]

بسم الله الرحمن الرحيم

المحاورة رقم (26 )
بويتات عـــــــ/ السريع قبل يومين بين سهيل والشاعر / نظام ساهر .. ( حول الثريا ) ما غيرها !!!

سهيل
سلام الله سلام سهيل يا أهل المنتدى وأقول
عساكم طيبين وداركم بالخير معموره

من الطائف تراني جايكم يا ربعنا مرسول
وأبشركم بخير وعافيه في دار أخو نوره



نظام ساهر

هــلا يــامــرحبـــا باللي غيابه دار فيه الحول

وحنــا بعـافـيــة دام الـديــر بالـرزق ممطوره

من الطائف لفيت ألنا بعلمك وأله عشر حلول

عساك بخير دايـــم مايجيلك فالردى صـوره


سهيل

يدوم الك البقا وتقول يا ساهر سنه وتطول
طويت البيد واليوم الجمل وقّع على زوره

بعدها يالعتيبـي والله إني ماني بمسؤول
عساها للذهاب تروح وسهيل انتهى دوره


نظام ساهر
أنا لاقلــت طلت سنينــي اللي تبذل المعقــول
وأذا وقـــع جمـلــكم ياولد موجـــــود دكتوره

بعد ماأجهدت نفسك مالقينالك ولا محصول
ليا راحت تعلق من قهـــر حبــك بماصوره


سهيل
جملــنا حافته صكــّات بقعا بالســرا والدول
صبر لين الصبر غلــّق وعبر لك عن شعوره

أخذنا ما كتبه الله لو انه صحنْ سمنْ وفول
تراها خيرْ منْ لقمهْ تقفْ في وسطْ حنجوره



نظام ساهر

جملــكم من بلـــى جمالـــه اللي بالعناء مقتـول

طفح كيله ولا أشعل في ظلامه شي من نوره

أخــذتــو شــي مالــه قيمتــنً فالمجتمــع يازول

لـكـــن الخيــــر راحــت بـه ثريا وأنتهى شوره

سهيل


أخذناها من الحرّة ليا العارض بعرض وطول
مرار نغني هجيـــني ومره نلعـب الكـوره

فدا رأسك يا أبو شاربْ يقولون العرب مفتول
ترى ينبـع تشــابه للجبيــل وراس تنوره

[سهيل2012]

بسم الله الرحمن الرحيم

المحاورة رقم / 27

سهيل

من الطائف مصيف المملكة والشِعر والشعار
يا هل .... الحروف استقبلوا شِعرِه وشِعّاره

سلام الله عليكم يا هل الــ.... ومسا الأنوار
وأخص الشاعر المقدام ودي نسمع أخباره

مقدام
هلا يا مرحبا من مملكتنا هلت الاسرار
لاجل الـ .... واهل الضى نبث الشعر واسراره

بعدها يالمسلم هات ما عندك من الاخبار
ترى مقدام حاضر لك يعرف البيت وادواره

سهيل

يدوم لك البقى يا صاحبي فــ/ بداية المشوار
خوي سهيل ابن عمّه وتبراله فــ/ مشواره

عيّنت الشايب اللي مات قبل أسبوع يا عمّار
ما بين أخوانه السبعه لِفاه الموت واختاره

مقدام
على وضح النقا يا صاحبي لو طالت الاسفار
ترى خوة رجال الطيب ندفع دونها ابشاره

هذك الشايب اللى صار عند الناس ماله كار
بعد كانوا يزورونه كبار القوم فى ادياره

سهيل

عسى الله يرحمه يا صاحبي مقدام لا تحتار
إبه شايـب مكـانه واعرفوا حقـّه ومقداره

لبس ثوب النصارى واليهود اللي تجيك قصار
سعودي نخلة ابن سعود والسيفين بـِشـْعَاره


مقدام

غدى شايب وجا شايب ولا لك فـ/الحياه اخيار
وكل فى بلاده يا عميلي ينصب الشاره

لبس ثوب النصارى والمذاهب كلهن اكبار
يبيع ويشترى فالسوق كنه عمدة الحاره

سهيل

أخذ طبعْ النصارى واليهود ومذهب الكفّار
وهو مسلمْ ورجل ٍ ملتحي ما ينقصْ وِقاره

عطاه السيف أبو متعب ملكنا وافي الأشبار
بعدهـــا كلنـــا راضيـــن والأيـــام دوّاره


مقدام

حشى لـلـه ما يتبع طريق ابليس والفجار
حماه الـلـه يعرف الدين ولاهو راعى الباره

بعــد صدِر قراره نحسبه من جملة الاخيار
ابو متعب نطيعه كلنا والنفس مختاره



سهيل
أنا ما أدري من أهل الجنـّة أو يصلى لهيب النار
مع أشكـاله يطير الطيـر ونعرفه بمنقــاره

ولو انك مدحت الشايب نعرفه غريب الدار
غريب بلاد لابس من على العينين نظــّاره


مقدام

تهيض يالعتيبي والحذر من سيفنا البتار
ترى قبلك طيور روحوا فى طعم سناره

وانا لو امدحه يا صاحبي مثلي بعيد انظار
لكن المشكلة فى اعيونك انت (ه) ليش محتاره


سهيل

على وضح النقى مرّه وأعيد القول عشر مرار
أبا أكسْر عظم ساقه ثم أنا الدكتور جبّاره

أبو متعب قراره صح والله ما عليه غبار
ملكنا اللي نحبّه فااارس الميدان والغاره



عسى الله يدفع الهيه ويقبل شايبك معذار
لكن قدم لشايبك السمينه عقب معذاره

حكومتنا الرشيدة عزها المولى بــ/صقور احرار
على راس الملك حامى دياره وحامٍ جاره


والآن بإمكانكم حل لغز المحاورة والذي يتمحور حول ( الشيبان الثنين ) !!!


فمن هو الشايب الأول ؟

ومن هو الثاني ؟


فسر يا مفسر !!

والحل أيها الإخوة / حتى ما يروح فكركم قريب !!

الشايب الأول : يوم الخميس

والشايب الثاني : يوم السبت

[سهيل2012]

بسم الله الرحمن الرحيم

المحاورة رقم ( 28 )

محاورة جديدة جرت أحداثها ليلة البارحة 9 - 9 - 1434

وهاهي بين أيديكم الآن نرجو لكم طيب المتابعة ..


سهيل

وش حصل في مصر يا صاحبي عمران
بين مرسي واخوه الزيــن ضيف الله

والله أكلـوا هوا جمــاعة الإخواااان
ما نكب مرسي ألا الشيخ نصر الله


مقدام

ليش تسأل بعــد ما شفت يا حوران
راح مرسي وحكمه وعزنا بالله

الخطا وان مشوبه ضنوة الشيطان
مفتى القوم ناكب شعبهم كله


سهيل

نكبة الشيخ مرسي جات من لبنان
جاته مفـلفـله من عند حـزب الله

شفت مليون مصري داخل الميدان
كـل واحد شـهر بالسيـف ويسلـّه



مقدام

يا سهيل انتبه البندق ام نيشان
والبلا والجلا جاهم من الحله

كيف لو شافت اعيونك اهل ايران
يوم مرسي بغى يضيع هل المله


سهيل

أبك أنا أطب وسط النار والدخان
وأنته متكي وتشرب من الدلـّه

جاك "عدلي" يعدّل شوكة الميزان
فارس (ن) يا ولد مايعرف الذلـّة



مقدام

ابلع العافية وسم بالرحمان
وانتبه لا ترًوح طعـم هالشله

حزة الصفر ما حانت يا كحالان
حزة نحتريها بامر عبد الله


سهيل

ترخي سموعك الثنتين في طهرااان
للـمعمعم شـهر وأنته تعمـعمله

وآخرتها مكلبش من ورى البيبـان
وابن منصور "عدلي" داخل الفله



مقدام

اتسمع انا فى اذاعة الظهران
والمعمعم ما حنا زباين له

راعى الحق ما يغدى ورى القضبان
وانت كانك كما اللى تابع ظله


سهيل

وضّح الاسم يا مقدام والعنوان
يفزع سهيل بأمر الله وياصلـّه

راعي الحق لا حجّه ولا برهان
كان تعرف محلـّه علـّمه قلـّه




مقدام

مانت ياصاحبي ابمحمل السلطان
انت واحد من العالم وحيالله

كن بعض المعانى مالها سيسان
كم كلام يقول لصاحبه خله

سهيل

العوّر شيخوه بحارة العميــان
يا خسارة من يقديه ويدلــّه

لا تحاقرْ سهيل وتنكب يافلان
بعد لفيّت عن معناه هيبله



مقدام

العور واحد منكم يالعوران
انتبه ياسهيل ليدك من الخله

وانت رجال لا شكة ولا نقصان
الحذر مار واجب وانت تفطن له


سهيل

يا الله إني دعوتك تسعه رمضان
تصلح أحوالنا وتداوي العلـّه

ما لحقكم شكوك ولاني بزعلان
شاعر ٍ مثلك وشرواك ما أملـّه



مقدام

يالله انى طلبتك يا رفيع الشأن
تغفر اذنوبنا وتدمح الزله

يا عليم بكونك وكل مابه كان
مثل اخونا سهيل نعزة ما نذله


وسلامتكم .. واسمحولنا على القصور ..

[سهيل2012]

بسم الله الرحمن الرحيم

المحاورة رقم ( 29 )

جديدة ليلة البارحة بين سهيل والشاعر ( سافر بن مسفر )

ومعناها غريب شوي !!!!!!!!!!!!


سافر

سلام الله لبواحمد سلام(ن) والعرب توحيه
بعد صمت رمضان وذقتلك شربه وسنبوسه
اسلم واتسلى سامعن علمك انا واخفيه
وبو دبوس في الأوطان ماشيلك بدبوسه


سهيل

يدوم إلك البقا في المنتدى ياربي تحيّيه
وشربتنا نظيفه ما خلطناها مع الكوسه
تبا تخفيــه ولا للعرب يا صاحبي تبديــه
أبو دبوس عند سهيل إله ثنتين مدسوسه


سافر

يزين العلم ياصاحب بعد ماجيت انا بطريه
وشربتكم نظيفه ولسبب في اعلام منكوسه
يدينك لامست راسك مرار ومرة(ن)تخطيه
دبابيسك على حدك واشوف الحب مع سوسه


سهيل

أقول الخال لو إنه صدق ساعه مع بناخيه
يزيـن العلم وبناخيــه يتعلم من دروسـه
يدين سهيل وصلت للسما وش دخلك في يديه
صليب الرأس ويدينه بفضل الله محروســه


ساهر

بناخيه معه اعلوم وبليس الذي يغويه
يجيب العلم الي مره ومره اعلوم معكوسه
ونا ياسهيل ماودي ذراعك ياخوي الويه
صليب الراس في راسه علوم(ن)دوم منحوسه


سهيل

من البحرين ياصل للهفوف يهف في واديه
جبل قارة بلشنا يا زميل سهيل بنجوسه
ترى من لا يعرف الصقر ياسافر يبا يشويه
تباه يجيك بالعلم الوكاد وظني يحوســه


سافر

تبدي خطر تخفي خطر والعلم الي كانيه
بلشتو في جبل قاره واجاب العلم محبوسه
يجي ويروح راع العلم وراوي الي راويه
وراع الموس جهز شفرته ومجهز(ن)موسه


سهيل

ما أقول ألا عسى الله يصلحه ولا عسى يهديه
قبل نعطيــه ضربة راس ونكسّرله ضروســه
يجي ويروح يطلعلك يا سافر مرخي آذانيــه
قصير شبور تفجع قلبه المسكين ناموسه

سافر
بعد بدى صحيح القول صحيح القول انا راضيه
وبو ناقوس خله في بلاده يدق ناقوسه
ومريض(ن)في العياده نطلب الله العلي يشفيه
وانا لو جيتله من قبل اطفي نور فانوسه


سهيل

صحيــح القول مثلك يالعتيــبي نفرح بطاريـــه
محبتكم من سنين (ن) مضتْ في القلب مغروسه
ختــام القـاف يا ســافر بذكر الله نبا ننهيــه
مدير البنك في بنكه عساه يزكي فلوسه



وسلامتكم وإلى اللقاء في المحاورة رقم ( 30 ) إن شاء الله .

[zqrat hantgulw]

حلو المتصفح

ليه ما تدخل محاوراتك مع الشاعر العلم زقراط

هنا في ها المتصفح ؟

ولا موقد المقام