مدونة سهيل الأدبية ..~..

[سهيل2012]

بسم الله الرحمن الرحيم

أبيات وجهت لأحد أصدقائي يدعى ( منقاشا ) وأقصد بها آخر وهو أخي
الشاعر الشهير ( أبو سيفين ) .. ومعناها حول موضوع يخصنا نحن الثلاثة ...



عسى منقاش يعطينا النصيحه دامها ببلاش = ويظهر مع حماره طيب السيره على الشاشه

حصل علم ٍ مكدِر خاطري جا للعتيبي كاش = من الصاحب وأنا ضيف الله الجالس على فراشه

هروج ٍ جات بين ثنين تشبه رشّة الرشاش = بغيناها مزوح وكل واحد جاب رشاشه

يصك الباب ما بيني وبينه ما يريد نقاش =وأنا رجال مدمن صحبته ما أتعب من نقاشه

لحقني من مطركم يا ثقيف الطيبين رشاش = ورأس الظبي يا منقاش ما أحد يدور عراشه

صحيبي قلبه الطيّب نظيف أبيض سواة الشاش = تراه أخوي ابن عمي صديقي جار والباشه



وهذا رد أخي وصديقي الشاعر : ابو سيفين /


انا البارح على دربي وصلت لشيخنا منقاش
لزوم نزور راس العلم ألا يا محلا نقاشه

لقيته في طرف خدره على رجله لفا يف شاش
وفي ايدينه معى كبر العمر خطله ورعّاشه

تحوفز راعي الهمه ودق النجر والمهباش
وقهوانا وجاب علوم من عامين جيّاشه

وقال اسمع انا بانصحك حذرا تصحب الغشاش
ترى درب المراجل ماتعرفه ناس غشاشه

وحذرا باب بيتك تغلقه وتركب الدفاش
وكم واحد من البخله ذبحه الجوع بفراشه

ليا منه نصاه الــعـلم سوى سالفة ماطاش
وقام يصيح وينادي وخلاّ الروس منداشه

يصيح مع العرب ياناس فكوني وهو بكاش
يبي بعض العلوم تضيع في بكشه وف/هواشه


وسلامتكم جميعا ..

[سهيل2012]

وهذه أبيات موجهة لأخي منقاش طبعا .. ولن أفصح عن معناها .. علما بأن الشيخ ( أبو سيفين ) طرفا في القضية كالعادة !
فعداوتنا .. أقصد " صداقتنا " مزمنة !! ليس لها دواااااااء !!


يقول سهيل /

يقول الشيخ خنقه فــ/السفل لا كف عند الناس = وخنقه فــ/السِفل ما ظني الشيخ يتحمّلها

وصدقنا ورحنا السِفل لا مشرف ولا حُراس = وأكلناها على الصابر هوى بدري من أولها

وصاب سهيل يامنقاش بعد الخنقه الوسواس = ما أقول ألا عسى الله معكم اليومه يجمّلها

أحسّب فــ/السِفل دلّة وهيل وبن فــ/المحماس = وشبّة نار ووجار ورجاجيل ٍ نجاملها

وأثر ما فــ/السفل غير السلاسل في يد الحبّاس = ليا جاه الغشيم يداه في رجله يسلسلها

هنيّه غلطته في صاحبه محمود بن عبّاس = ألا ياكبرها والله ما صدقت يعملها

ألا ياشيخنا ماجور فيما صابكم لا باس = من العثرات والطيحه عسى ربك يبدلها

[سهيل2012]

بسم الله الرحمن الرحيم

السلام عليكم ورحمة الله وبركاته ..
بدون مقدمات .. قصيدة تحكي شيئا من واقع سهيل ..
" خارج المنتديات .. وبعيدا عن أعضائها "

أنا أفرح لا جلست مع الرفاقه والقلوب نظاف
وقالوا يا سهيل ابن اليماني هات سولافه

وكل (ن) ناظر سهيل وعيونه كنّها الكشّاف
يبون من السواليف الدقاقه ما اني بتافه

وأنا طيّب ولا أرضى للرجال الطيبين خلاف
عيون الذيب وحده للأمام وحده خلافه

يقولون الرجال الأولين إن الجميل أسلاف
ترى سهيل اليماني يحفظه ويسدد أسلافه

إمام المسجد اللي زعلك يا مشرف الأوقاف
نعرفه باسمه الطيّب وكن أوصافك أوصافه

تغيّب عن صلاة الفجرما شفناه في الميقاف
بعد كبّر مخدّة رأسه وغطّوه بلحافه

صديق سهيل في هذا الزمن بطاقة الصراف
تراها أوفى صديق يشرفك وتشوفْ ميقافه

ليا سمّنتها تشبعك لا جات السنين عجاف
تسد الرجل وعياله في مرواحه ومنكافه

وشربة ما من يدين البخيل أظنها تنعاف
تشوم النفس عن زاد البخيل وماه وتعافه

يقولون الخبر يسمع بالآذاني ولا ينشاف
وذلحينه على الشاشات كل ٍسمعه وشافه

بعد شابت عوارضنا عسى تتحقق الأهداف
ياربي ساعد سهيل الطموح وحقق أهدافه

وأختمها بذِكر الله بعد تمّت وشاب القاف
عساكم تشكرون سهيل صح لسان محرافه

وسلامتكم جميعا ..
أخوكم / سهيل .

[سهيل2012]

بسم الله الرحمن الرحيم

أيها الاخوة أعضاء منتدى ثمالة :
السلام عليكم ورحمة الله وبركاته ..
يسعدني أن أقدم لكم هذه القصيدة الجديدة وهي - صراحة - على النيّه ؛
وغير موجهة لأحد ، وتعبر عن نفسها وكل متابع يقرأها حسب مزاجه ..
أرجو تقبلها كما جات بدون رتوش ومقدمات مملّه .....

سهيل من بعد الثريا لا رفيـق ولا صديق
غابت وغاب الصدق بعد غيابها والأصدقا

جلست وحداني وضيّعت المسافه والطريق
بين الرجا واليأس لا ماتت ولا حان اللقاا

غديت ويّا الهمّ صاحب صار أخويه الشقيق
عسى الله لا يعود الصحبه اللي يا نقا شقا

وقتٍ مضى كنت الوحيد اللي لحضرتها عشيق
مابيــننا غير السـلام ومرحبـابك والبـقا

بيني وبين الترفه الغرنوقه السد الوثيق
والشاهد الله سلمنا كله على وضح النقا

واليوم حُسّاد الهوى قد شكّلوا ضدي فريق
والكبتن اسمه تعرفونه في الصدور موثقا

صديقي اللي ذاخره لا شب في قلبي حريق
لكنّه ضيّـع الصحبه وضاعت هقوة من هقاا

عساك يا سهيل اليمـاااااني بعد هذيّه تفيق
بعض الصداقه قامحه في ذمة سهيل محقا

حظي كما حظ النصر النادي الحُر العريـق
أحد ٍ رقى حظه وأحدْ ف الأرض حظه ما رقا

اكبر طموحه يوم يتمكمك على صحن السليق
ما همّـه الا جوع بطنه غير هـذي ما لقى

أهل المزارع يزرعون ويأكلون من السويق
والبدو عند الخـَلـْفه إن درّت يملون السقا

عزّ الخوي والجار والضيف المسيّر والرفيق
يالله ثبـّتهم على المعروف وعلوم التقى


وسلامتكم ....
أخوكم المُحب / سهيل

[سهيل2012]

بسم الله الرحمن الرحيم

هذه قصيدة للشاعر / جبران العتيبي ..

يقول فيها /


ياوجودي وجد عودٍ جبروا كتفه وساقه
بعد مامرت عليه أيام من عمره مريره

راحوا إعياله عنه بالهجر ساقه بعد ساقه
يوم جفت ديرته راحوا شتات بلا بصيره

مابقى إلا واحدٍ حارس على لمّ الرفاقه
والرفاقة مالقوا مجلس يضم أهل العشيره

كل مادارت رحاهم زاد بالجو إصطفاقه
مالهم مرسى جويد ولالهم بالأمر شيره

وكل يوم يزيد حمل العود ويزيد إحتراقه
مادروا عن علّة المغبون في جوف السعيره

مستغلين التحكم فيه ووجود الإعاقه
والجمل لاطاح ضاعت عدته في كل ديره

لين روّح عودهم ماعاد فيه إلا صفاقه
مايفيد علاج لو حطوا جبيرة في جبيره

وانت ياراع الوفاء الي تدرج ذوق ولباقة
خلهم في دار ساكنها الحسد والشك سيره

لو بدت شمسٍ جديدة ماسفرت فيهم شراقة
والليال السود تستر عيبهم وتشق غيره

قسمة الله حطها مابين باب وبين طاقة
والذرائع طاغية والفكر مثقال الشعيره

ياعقول النور ثوري ماعلى المقسوم فاقة
جددي عرش الولاء بعقول قومٍ مستنيره

وانقذي عودٍ رعى إسمك وانكتب في وسط باقة
قبل مايفنى وتفنى سيرته ويموت حيره

والقصيدة مُلغمة من صدق ومشفرة .. ولم يستطع فك شفرتها سوى سهيل ومقدام العتيبي
وبعض جماعة العربان ذوي الخبرة ..
ولها معنى خاص بيننا صراحة .. وقد حاولت أهدئ نبض الضي شوي وأمتص حماسه وأبتعد عن ( العود ) قدر الإمكان ليس خوفا

ولكن تقديرا لوجيه بعض الرجاجيل من ربعنا الطيبين .. واللي مهما صار نعزهم ونغليهم .. خارج أروقة العمل والروتين ..

إليكم القصيدة وهذا االرد /





هذا ردي المتواضع على أخي جبران العتيبي :

هاضني جبران نبض الضي ما فيه إندراقه
حضّر البلجيــك شاعرنا وصندوق الذخيــره

يتوجد ويتوعد زااااد للحرب اشتيـــاقه
من طناخةراس بِيدِه فصّل سلوك الظفيره

باني ٍ قصره على ساس المعزّه والوثاقه
والبيوت اللي جواره كلها طلعت صغيره

قصر شامخ من شموخ الشاعر مزيّن رواقه
كل ٍ يروووده من الشّــعار من شبه الجزيره

اجتمعنا فيه من حولك ووثقنا العلااااقه
دامك أنته صاحبه والشيخ بندر هو مديره

بيننا المعروف دايم والمحبه والصداااقه
صادقين وربنا اللي فوق عالم بالسريره

لا تقول سهيل نجم الليل جا فيه انطرااااقه
جانح(ن) للسلم كاسر في حساب ابن عميره

تو نجم سهيل باقي مابدا بالانطلااااقه
مانبي ضدّ الرفيق يراعي الشاعر ضميره

والعسل معروف طعمه يالعتيبي بالذواقه
لو طعمه مختلف في ها السنوات الأخيره

والختام الله يحفظ ربعنا كل الرفاااااقه
جعلهم في خيـــر دائم والذي قدْصارخيـــره

وسلامتكم جميعا وأعتذر إن قصرت أبياتي
عن ما كنتم تتأملونه من العبد الفقير إلى
الله سهيل العتيبي ...

ريلااااكس .. ريلااااكس ... ريلاااكس ..
ريلاكس ياجماعةالعربان .. ريلااااكس .. .

[سهيل2012]

بسم الله الرحمن الرحيم


بدووون مقدمات .. هي جات سسسسذا /



عسى من لامني في حُب ليلى ياعرب بالعوق
........... عساه العوق في دنياه ..لايسمع ولا يوحي

لأن العامرية حلوة لسان ودلال وذووق
............ عطاه الله رها ف الجسم ويا وجه مملوحي

ثقافتها من الجيل الجديد وحلوة المنطوق
............ تراها يادكاترة الهوى هي سبة جروحي

وتفتن بالعيون الناعسه وحجاجها من فوق
............ رسمه المجرم اللي ناوي ٍ يقضي على روحي

وخلقة ربنا ........ بصدرها المفروق
............ ورد ......... والخصر كنّه خط ممسوحي

ثقه برقا خذتها ثم حلم الطيبه من روق
............ لها مبسم سواة البرق يوم يرف ويلوحي

ليا فاقت وراقت كل عُشاق البنات تروق
............ لكنْ ان ليا تعكر جوّها تتعب بعد روحي

ابوها الشيخ راع المرجله تاجر بوسط السوق
............ ليا مره فقير القوم يقضي كل مصلوحي

وخال البنت راعي بل معروف ويحب النوق
............ ليا جا الضيف ينحر من حداها كل منقوحي

واخوها الفارس اللي ما يعرف الغدر وياالبوق
............ يواجه للخصوم مواجهه والخصم مطروحي

مادام انه سسذا يستاهلون إلْهم علي حقوق
............ ابا اكتبها وافندها وأفقطها على اللوحي

..


وسلامتكم ..

وياليت صاحب الدعم اللوجستي .... يدعم حليفه سهيل ..
ولو معنويا .. في وقت قلّ فيه الصديق .. وأضعنا الطريق !

[سهيل2012]

بسم الله الرحمن الرحيم

زرت سوق عكاظ هذا العام مرتين رغم تحفظاتي التي ذكرتها .. وتغنيت ببعض الأبيات .. خارج السوق طبعا ؛ لتعارضها مع شعر الفصحى وبضاعة السوق الأدبية الثمينه
فإليكوها كما كتبتها بدوون رتوش /


يالالاله يالاله .. يالالاله يالاله .. مايريس النجوم الا سهيل اليماني ..


يا سلامي على السوق العكاضي مدبّل
مثل طعم العسل والزيت فوق المتبّل
لو ف/ السوق صاحي مع خبول ومهبّل
ما يريس النجوم الا سهيل اليماني

ناجح السوق مهما شككوا في نجاحه
والحمى ما أحد جاه ونجسه واستباحه
ما علينا من الحاسد ولا من صياحه
مايريس النجوم الا سهيل اليماني

احيوا السوق باسمه والخطب والقصايد
والسلوم القديمه ... للعرب والعوايد
يسعدون الحضور ويبدعون الفرايد
مايريس النجوم الا سهيل اليماني

امرؤ القيس ناظرْ في سهيل وغمزله
علق اسم الثريا بين طلعهْ ونزله
يا عسى الناابغه يصدر قراره وعزله
ودهم يقهرونك يا سهيل اليماني

بلغوا صاحبي حمدان راع الحميه
وصلوه السلام وبلغوه التحيه
بعد كب ْ الحجاز وراح نجد العذيه
ما يريس النجوم الا سهيل اليماني

يم نجد العذيهْ يمكن ألقى الثريا
حول برج الوليدْ وفي قصور العليا
لا تقولون حظ سهيل ميّل وعيّا
ما يريس النجوم الا سهيل اليماني

يا هلْ العاصمه بالله لا تحسدونه
ماش غير الثريا شي يملا عيونه
افزعوا بالدراهم وافزعوا بالمعونه
ما يريس النجوم الا سهيل اليماني

والذي ما تساعده الظروف يتعذرْ
نقبل العذر والخاطر عسى ماتكدّرْ
راضي سهيل بالمقسوم ويا المقدّرْ
ما يريس النجوم الا سهيل اليماني

نختم أبياتنا تمت حروف القصيده
نذكر الله مدبر حكمته في عبيده
يا عسى أيامكم حلوه ودايم سعيده
ما يريس النجوم الا سهيل اليماني


ما يريس النجوم الا سهيل اليماني

مايريس النجوم الا سهيل اليماني

وسلامتكم والعذر والسموحه والشك زائل
والسلام عليكم ورحمة الله وبركاته ..

أخوكم / سهيل العتيبي ..

[سهيل2012]

وحول الموضوع الآنف صرح الشاعر الكبير / عيد بن شده المرشدي العتيبي قائلا :


ياسهيل الحجازي من عتيبه جدودك
الك مني تحيه بالكلام الجميل

يالسواط المعلم شف بالي وجودك
عندنا في ثنايا نجد هيلً وحيل

لو تسير شكرنا يالعتيبي جهودك
نكرم الضيف لاجانا ونحمى الدخيل


وكان ردي عليه :


يا ابن شدّه كفؤ والضيف دائم يرودك
كان ضيفْ متعني .. كان عابرْ سبيل

صاحبْ سهيل وافي صادق ٍ في وعودك
هيل نجد العذيّة يبري اللّي عليل

صبرك شوي وأشرفك داخل حدودك
خبّر ألاد مرشد باسمي إني سهيل

[سهيل2012]

الله على النادر من شعراء ( منتدى ثمالة ) يقول في رده
على سهيل في موضوع ( مايريس النجوم إلا سهيل اليماني )
على الرابط /
http://www.thomala.com/vb/showthread...436#post612436


من صغرتي ماحب دوواج الاسواق
واليوم دوج بي سهيل اليماني

عرجب بنا من فوق عوصٍ بلا ساق
داست على عرق الزمن والمحاني

من شان عذراً عندها سرب عشاق
وكلٍ لمح منها بصيص الاماني

عذراً بلا ذمه ولا عندها اخلاااق
كم عذبت في عشقها مودماني


اما الرياسه فلي فيها وجهة نظر وان تغنابها شعراء المحاوره بغرض المناورة

واسمح لي في مرور المستعجل


وكان ردي عليه /

من صغرتي مغرم وعاشق وصداق
شاعر وأميّز في رموز المعاني


للعوص ركابه واهل بل ونياق
تاطا الحثاث وتقطعه في ثواني


من شان عذرا راحت قلوبنا حراق
مجهولة العنوان ويّا المكاني


ما عاد به يالنادر اليوم مدراق
صاحبك عشرهْ ما تعوّد ثماني


سهيل .......



خطيييييييير جدا هذا النادر .. والله خطييييييير !!!

[سهيل2012]

بيني وبين الشاعر / عيد بن بجاد العتيبي .. وأظنها الأخيرة !!!

عيد بن بجاد /

وجودي على اللي خدها مثل نور البيت
على كشن لكزز مع خطوط القويعيه

يحوفه غلامً في سلوم العرب عنتيت
يبى جادلن تلعب بقلبه عتيبيه

عيد بن شده



.............................




توجدْ يالعتيبي وأنا مثلك ويا ليت
تحقق للعتيبي سهيل "العامريّة"

أقول الحي يا عيد أظنْ أبدى من الميت
وش تقولون يا أهل الوفا وأهل الحميّة ؟

سهيل العتيبي ..