يا دافع البلا .

[منقاش]

يا دافع البلا . يا دافع البلا . يا دافع البلا . يا دافع البلا . يا دافع البلا .

بسم الله الرحمن الرحيم
قبل ليالي عزمني فقيه الجماعه ساري الليل , وكان من ضمن المعازيم حليفي الغايب الحاضر الدكتور مشعان الله يرده علينا من الطيبين , والشيخ ملاطم ذبان حشمه , وبايعها بقرشين وغيرهم .
وجاء في ساقتي عدو نفسه وعدو الأنسانيه وعدو القبايل كلها ,عدو بدر الدجى البعيد عني وعنكم مخاوي منقاش , جاء معي بعد أشترطت عليه أنه يركد ويلزم مقعده والهاده ويترك عنه الخباله والتخيبل , ويخليني قدوه له يقتدي بي في كل حركاتي وسكناتي حتى يدخل قلوب الناس ويحترمه العدو قبل الصديق .
وكنا يالحضور مشدوهين وحاطين الرادي على أذاعة لندن ومصغين لها بكل أسماعنا , عسى ولعل يجينا فيها ولو لبهة خبر نشم فيه رايحة من الصدق عن أخبار ألأسلام المسلمين , خصوصا عن أولى القبلتين وغزة العزه المحاصره من ألأقربين قبل الأبعدين .
وكانت المذيعه اللي تذيع ألأخبار حرمه غنوجه متغنجه غنجاء تكلم عن الخنازير ومرضها , وسحرت المخاوي بصوتها , وصوتها فقط ولا غيره , وليته فهم من كلامها شي والا عمره شافها حتى يفعل ما فعل , لا , لا هذا ولا ذاك , مجرد صوتها وبس وكما قال وقع في حبها , وكان طيلة ما نحنا جالسين مقر أذانيه جنب الرادي وفاتح فمه للحشرات والخنافس اللي ترامى في ليل أليل على الضو اللي جنبه , وأحيان يبغم بشوية كلمات فهمت منها أنه يتمنى ويقول , يا ليت هالمذيعه تقبل تزوجن (تزوجن بلهجة ربع المخاوي تعني تزوجني) .
تهمست أتناول الشون وأعتلي بها مقفاه من الكتف الى الكتف , لكن رويعي الكلاب أعترض عصايه بواحده من أيديه يوم شافني أهوب بها والشر يتقادح من عيوني وقال : عيب عليك يا بدر الدجى تنفض فراش معزبك ومعزبنا , وتبثن عصاك في واحد ما يستاهل تبثنها فيه , وليته كفو حتى يكون خصم لهامور مثلك .
واللي بعدها يا أمام المتبحثين , ترى باين من عيون خويك المخاوي أنها زايغه , وان قلبه صاغي ويرقل ولا هو على كراسيه , ولو هو على كراسيه ما نزا نزوته اللي نزاها لتركيا ووسط آسيا في بداية ربيع هالعام وترك مرابع الوطن اللي زار بعضها الدكتور مشعان وخوياه .
والحقيقه أن هالنوعيه من المخففين من أمثال المخاوي اللي خفت به مذيعه بصوتها عبر ألأثير من لندن يصدق فيهم كلام الشاعراللي يقول:
يا قوم أذني لبعض الحي عاشقة @@@ والأذن تعشق قبل العين أحيانا .
تدخل معزبنا ساري الليل وقال , أتركوا المخاوي وخلوه يخلي لحاله ويتوحل في أحلامه , وأن كان بينكم غيره من يفهم من كلام المذيعه شي يعلمني به ويعلم به بقية الحضورع ؟, رديت عليه وقلت , أنت يا ولد تدور عند المره علم وخاتمه ؟, سمعنا بربرتها عن الخنازير , وخلها تهرج حتى باكر , وشرهتك على اللي يعيرها أذن صاغيه , والا يعطي كلامها أدنى قدر من أهتمامه .
ويا ساري هو ناقصنا خنزره ؟, الدعوه مخنزره معنا من يوم نحنا ورعان , ومخنزره من كل الجهات, وهذي نعالي (حذايه) أكرمكم الله اللي حاطها في كراعي من أربعين سنه مصنوعه من خنزير كفرات الشاحنات, وكفرات سياراتكم القديمه والجديده من الخنزير , والدليه (جمع دلو) اللي كنتم تجبدون بها الماء من قيعان بياركم من الخنازير , ومكاتلكم خنازير , وووو , هذا أن ما أنمسخ بعضكم في يوم من ألأيام وعودوا خنازير .
قاطعني ساري ومعه بعض السامعين بضحكة فيها القليل من التعجب والكثير من ألأنتقاد لكلامي وقال , أثرك يبو نقشه مثل مخاويك , أثرك في وادي والناس في وادي ثاني . وكان ساري يكلمني والمخاوي من بينهم يا غافل لك الله , فاتح فمه ولا يدري عن السالفه .
ثم تنهد بعدها ساري وقال , مادريت يا شريف منقاش أنك مثل مخاويك ما أنت فاهم الطبخه , وأكيد أن المخاوي أشغلك حتى دخل الخبر من أذنك اليمنى وخرج من اليسرى .
كنت أعتزي واقول , أفااااا , أني أبو نقشه اللي يفهمها وهي طايره , ويش الكلام يا ساري اللي قلته عن عرعرة المنتدى وتاج راسك وروس ثماله وروس الروس والعالم كلها ؟.
رد عليه وقال , يا بدر الدجى وسع صدرك واحلم علينا , يا بدر ما عمرك سمعت عن آيات التخويف والنذر اللي أرسلها الله لآل فرعون ؟, ما سمعت عن الطوفان والجراد والقمل والضفادع والدم , ألآيات المفصلات اللي أرسلها الله نذر لفرعون والمتفرعنين معه من ربعه وأتباعه ؟.
رديت عليه وقلت , يا ساري , ويش علاقة اللساتك والخنازير بضفادع وجراد وقمل الفراعنه ؟.
رد عليه بعد وجه نظره وكلامه للحضور وقال , قولوا يا ربعي , يا دافع البلاء , تكشف عنا البلاء وعن كل مبتلا من خلقك , قولوا آمين , قلنا , آمين .
ثم التفت عليه من بين السامعين وقال , يا شيخ منقاش , الظلم في زمانك كثر والعدل فقد والفحش شاع والحق ضاع , والمعاصي جاهر بها العصاه , وشرعوها بعد حطوا لها قوانين تحمي العاصي والمعصيه , واصبح المعروف منكر والمنكر معروف , والصادق كاذب والكاذب صدوق .
يا منقاش , كنت أحسب فرعون زمانك هو اللي ساكن في البيت ألأسود في وشنطن دي سي من أمثال بوش وغيره من المبوشين , لكني بعد قريت حلقات ما وراء ألأكمه (1) اللي كتبها المستعين بالله ابو عبدالله أتضح لي أن فرعون زمانك فراعنه كثيرين ولا هو فرعون واحد , وهم زعماء الصهيونيه العالميه من اليهود اللي محتجبين عن ألأنظار ولا يبي يكشفون ألأقنعه عن وجوههم ألا أذا خرج زعيمهم المسيح الدجال .
واتضح لي أن مصر فراعنة زمانك ماهي مصر واحده , وأنها كل أمصار الدنيا في كل نواحي الكره ألأرضيه ,واتضح لي أن قوم فرعون هم أمريكا وحلفاها وحلف الناتو وكل من مشى في ركابهم وأطاعهم ووافق هواه هواهم من باقي العالم .
والنذر اللي جات لفراعنة زمانك كثيره , من طوفان وأعاصير وغلا ووبا وحروب وأحن ومحن وتفكك , لكن هيهات , وكيف تنتبه قلوبهم وأبوابها موصده وعليها أقفالها ؟.
النذر يا بدر الدجى تتابعت وكان من آخرها العقوبه اللي كان سببها الربا اللي حرمه الله وشنع في تحريمه , الربا اللي كان هو السبب في ألأزمه الماليه العالميه والأنهيارات اللي أصابت الأقتصاد العالمي , واللي بسببها ضيعت الملاين المملينه وظايفها ومصدر رزقها , وحل عليهم بسببها هموم وغموم أبتدت ولا أنتهت الى وقتك , والله أعلم ويش مقبل , وويش يبي يصيب البشريه بسببها من معاناه ومتاعب ومجاعات ؟ .
وبعد آية الربا , هذي آية الخنازير دوبها تطل عليكم براسها , الخنازير الحيوانات اللي حرم الله لحومها , واللي ثبت أن أبدانها (هي وحدها) من بين كل الحيوانات محطه تهجين لجراثيم وفيروسات ألأمراض اللي تنتقل بعد تهجينها من صنف لبقية ألأصناف الحيه من الحيوانات والأنس والطيور بعد كانت محجوزه في جنس واحد ما تعداه , وربما تسببت في وباء يقتل من البشر بالملاين خصوصا من الشباب ألأصحاء , لأن ألأجسام اللي ما عندها مناعه للفيروسات والجراثيم العابره لصنف غير صنفها يفتك بها المرض بسهوله وبسرعه مهوله , ويقتك أول ما يفتك بأقواها مناعه وهم الشباب .
يا بدر الدجى , فنزولا الخنازير المرض اللي تسمع المذيعه تكلم عنه سبق أنه فتك في العالم قبل تسعين عام تقريبا (1918) وقتل في أسبانيا لوحدها أكثر من عشرين مليون , يا بدر , هذي بعض جنود ربك , وما يعلم جنود ربك ألا هو .
يبو نقشه توب أنت والسامعين أجمعين الى الله , توبوا توبة نصوحا وبعدها تيقنوا أنه لن يصيبكم ألا ما كتب الله لكم , رفعت ألأقلام وجفت الصحف .
كان المخاوي يفغر ويهطش بهاك البكوه وهو يردد , وابليتك يانا بالبليه , لا بالله جاك الموت يا تارك الصلاه , ولا سكت وريحنا من غواثه وتهللت أساريره ألا بعد شاف الصحون الطايره مقبله علينا بعشانا , تهللت أساريره يوم شاف الرز بعد البكى والتبكبك , وقبلها السرحان مع صوت المذيعات ,وبعدها كلها يبطل الجبان من علوم الزواج بالغانجات بعد عود لرشده وراحت السكره وجات الفكره , بعد جاه الرعب من مخلوقات صغيره صغر متناهي ومن صغرها ما يراها بشر بعين البشر, وهي فيروسات فنزولا الخنازير , وسلامتكم .
.................................................. ............
(1) حلقات ماوراء ألأكمه على هذا الرابط :
http://www.thomala.com/msta3en/index.htm

[أبو عبدالرحمن]

الله المستعان...اللهم اكفنا شر هذه الأوبئة والأمراض ..

اللهم تب علينا..

واش احل ..لمن به هذا المرض وجاء للعمرة والحج!!

[مخاوي منقاش]

انا دخلت على موقع الببي سي وطلبت صورة المذيعة وتحسفت على الوقت الي قضيته اتخيل ملامحها هذا اولا اما ثانيا فالحمدلله الي فكني من عينك ولحقني ابو عبد الرحمن بغسال كاسه الشاي الي بعدك ولا رحت فيها وانارجال احب العشاء ولا يسد نفسي الا طريقة اكلك ثالثا انت ماكتبت الحكي عن صخنة الخنازير الا من الرعب والذي تغلفه بالايمان والنصائح الكاذبة0
رابعا- وزراء الصحةالخليجين بيون يتجمعون بكرى يتدارسون الموضوع لئن امس واليوم عطلة ولا يمكن يفوتون الاجازة والوباء ينطق الين السبت على ايه مستعجل وبعدين وش موقعنا بالنسبه لمراكز الابحاث في العالم المتقدم والذي تعمل ليل نهار منذ ان اعلن عن المرض والحامي الله

[منقاش]

ابو عبدالرحمن : الحل تشتري لك تموين سنتين وتروح في شعب خالي من شعاب تهامه وتعتزل فيه, وتمتنع من الروحه للناس وتمنع الناس لا تجيك , وتسلمني الشرافه العامه بدالك , وسلامتك .....

[منقاش]

مخاوي الزفت : يا رجل أعقل وأعطى اللي يقرون علوم رحلتك لوسط آسيا , غرضك ؟, ويش شفت ؟ , ويش أستغربت ؟, ويش أنطباعاتك قبل وبعد ؟ , حال المساجد والمصلين ؟ , عندهم مناقيش (جمع منقاش) والا لا؟.
أقول اعقل , وهات علومك , وسلامتي , وشكرا لبدر الدجى ....

[الحاج سلام]

الله يسعد مساكم جميعا .

اسأل نفسي دائما لماذا تقسو ياشيخ منقاش على المخاوي .
والرجل ما رأينا منه الا كل خير , ودائما نجد عنده الصراحة والوضوح .

وانا اخشى ان تصيبك ياشيخ عقوبة بسبب قسوتك على الرجل .

وانت ترى ان شاعرك المفوه النجم الساهر قد افل نجمه .

وحليفك الصميدع الذي لا يشق له غبار الدكتور مشعان خرج ولم يعد , فاعتبر يارعاك الله واترك الرجل وشأنه .

هذه نصيحة محب والسلام .

[منقاش]

يا شيخ سلام هذا الرجل تربطني به علاقه من عام 1393 هجريه , شايف قديش ؟ . درسنا الليليه مع بعضنا , وجمعتنا ألأسفار في الخارج والداخل مع بعضنا , وقبل سفرته ألأخيره ترجاني أخاويه وزعم أن التذاكر رايح يجيبها على الدرجه ألأولى بلاش , وفوقها جمعنا العمل مع بعضنا , وأذا سافرت للرياض ألقاه متصلب قدامي في المطار , ومع كل اللي سمعت , ثبت لي بعد كل هالعمر المديد والتجربه الطويله أني أن ما تغديت به رايح يتعشى بي , خاين ما يومن له جانب .
من أجل كذه دايما آخذ زمام المبادره وأفتري فيه , هذا أولا.
وثانيا , الرجل عنده فوبيا المرمطه , يعني قدر ما تمرمطه وتبهذله بقدر ما يتعلق بك ويحبك ويتقرب لك ويهدي عليك , وبقدر ما تحسن عليه , بقدر ما يتنمرد عليك ويلوي ذيله مع أن ذيله ملتوي بطبيعته , ويتنكر لك , ويتأبلس ويتفلسف , بأختصار , الرجل ينطبق عليه المثل اللي يقول , البس يحب خانقه .
وين المنطق ؟, التجربه أكبر برهان , وأي كلام ثاني تسمعه أعتبره حكي فاضي ....
أما غياب حلفايه المؤقت , وأهمهم الدكتور مشعان والنجم الساهر فهم ماهم بعيد عنا , أرواحهم معنا واجسامهم غايبه .
وأرجح أن ما جزمت أنهم مسوين غيابهم بالونات أختبار حتى يشوفون الشقي اللي يغلط عليه حتى يقومون عليه القيامه ولا يقعدونها , هذا غير حلفايه الخافين مثل ابو دومه ومحماس واخو محماس وولد محماس وابو محماس وتيس القراره وحمار القايله .
وغير حلفايه المشمرين عن سواعدهم للتدخل وقت اللزوم مثل ابن ابي محمد وابن فنحاص وراعي السواني وكل من يده له, وغيرهم كثير .
بأختصار , ما يغلب بدر الدجى وعرعرة المنتدى من قله , ويا ويل وسواد ليل عاثر الحظ اللي يرفع راسه ويناظر فيه .
مع أني أعتبرك يا شيخ سلام من حلفايه اللي يلعبون على الحبلين , على قاعدة , أني أمرؤ أخشى الدوائر , وعلى مبدأ سياسة ألأحتواء .. وسلامتك ....

[الحاج سلام]

ياشيخ منقاش الله يسلمك .

ترى رفيقك المخاوي انا ما اعرفه بسلامته . وانت ادرى به وبطباعه وما يحب وما يكره .

ولكنني اشفقت عليه من تسلطك وقلت كلمة خير .

والرجل ما شفنا منه الا علوم غانمة وانا ما ادري ليش احس انه قريب من نفسي . تصور اذا ضاعت نظارتي وجلست اتلمس الارض ابحث عنها اذكره الله يذكره بالخير واذا حسيت البرودة في صلعتي اقول الله يستر عليه كنه قدامي ما ادري ليش اتصور انه مشابه لي .
واحيانا اتنبأ بانه يبي يرد عليك برد واذا به يجيب نفس الافكار اللي كانت عندي .

من اجل هذالا تلومني ياشيخ لو قلت كلمة طيبة في حقه ...

[منقاش]

يا شيخ سلام , الله يسلمك , ويكثر من أمثالك , ويعطيك خير المخاوي ويكفيك شره .
والرجل آخر مؤامراته كانت أمس اللي ما تلاه ألا اليوم , أمس القريب كان يتآمر ضدي مع واحد سويد وجه مثله أسمه جابر .
لكن يا شيخ أذا كنت قادر أنك تكفله وتؤدبه وتعلمه يحترم الشيوخ وشيخ الشيوخ ابو نقشه , أذا كنت مقتدر على ما ذكرت , وقادر تاخذه في حلفك المحايد فحشمه لك أعلن وقف أطلاق نار من جهه واحده .
ولا أخفي عليك أن الفار أبتدا يلعب في سروالي , وأخشى ما أخشاه أن تمره لقي طريقه لك , أو زيوته وصلت لصلعتك كما وصلت لصلعة ابو عبدالرحمن من قبلك .
وأن صحت هالظنون ما أقول وقتها ألا حسبي الله ونعم الوكيل .
والزبده , مساعيك الحميده على الراس , وشروطي بينتها لك , وان قدرت تنجح في هالمهمه أعتبرك عرعره مثلي , وسلامتك .

[الحاج سلام]

المشاركة الأصلية كتبت بواسطة منقاش

يا شيخ سلام , الله يسلمك , ويكثر من أمثالك , ويعطيك خير المخاوي ويكفيك شره .
والرجل آخر مؤامراته كانت أمس اللي ما تلاه ألا اليوم , أمس القريب كان يتآمر ضدي مع واحد سويد وجه مثله أسمه جابر .
لكن يا شيخ أذا كنت قادر أنك تكفله وتؤدبه وتعلمه يحترم الشيوخ وشيخ الشيوخ ابو نقشه , أذا كنت مقتدر على ما ذكرت , وقادر تاخذه في حلفك المحايد فحشمه لك أعلن وقف أطلاق نار من جهه واحده .
ولا أخفي عليك أن الفار أبتدا يلعب في سروالي , وأخشى ما أخشاه أن تمره لقي طريقه لك , أو زيوته وصلت لصلعتك كما وصلت لصلعة ابو عبدالرحمن من قبلك .
وأن صحت هالظنون ما أقول وقتها ألا حسبي الله ونعم الوكيل .
والزبده , مساعيك الحميده على الراس , وشروطي بينتها لك , وان قدرت تنجح في هالمهمه أعتبرك عرعره مثلي , وسلامتك .

الله يسلمك يا شيخ منقاش .
وانت ما قصرت . وادعو المخاوي من على هذا المنبر ان يتقدم بتنازلات ملموسة .
واقول له ترى الشيخ قريب من كل علم طيب .