أبغي رايكم في مشكلة الفاس والراس ؟؟(الجلسه ألثالثه).

[منقاش]

أبغي رايكم في مشكلة الفاس والراس ؟؟(الجلسه ألثالثه). أبغي رايكم في مشكلة الفاس والراس ؟؟(الجلسه ألثالثه). أبغي رايكم في مشكلة الفاس والراس ؟؟(الجلسه ألثالثه). أبغي رايكم في مشكلة الفاس والراس ؟؟(الجلسه ألثالثه). أبغي رايكم في مشكلة الفاس والراس ؟؟(الجلسه ألثالثه).

بسم الله الرحمن الرحيم
السلام عليكم ورحمة الله وبركاته ,وعيدكم سعيد , وبعد :
http://www.usdebtclock.org/
http://www.usdebtclock.org/

قبل تقرون أي سطر من سطور هذي الروايه , من فضلكم أطلعوا أول على الرابط اللي تشوفونه أعلاه واللي عرضه علينا ساري الليل على شاشه كبيره , وعلق عليه قايل :
شوفوا يا ربعي , شوفوا ساعة ديون أمريكا , شوفوا كيف الربا يا دافع البلا يرعى وينهش في زعيمة(بالكذب) النظام الرأسمالي , طالعوا وتأملوا كيف يهرش فيها هرش بالدقيقه والثانيه ...
وأن بغيتم الحقيقه , أمريكا ماهي زعيمه ولا بيدها شي من الغنيمه , والزعماء الحقيقين هم سادة وقادة ألأمبراطوريه الربويه العالميه , وأمريكا وشعبها المسكين هي وهم الضحيه رقم واحد للرأسماليه الربويه المتوحشه .
وشعبها المضلل والمغلوب على أمره عباره عن قطعان بشريه مستعبده للمرابين , يكدون ويكدحون الليل مع النهار لعلهم يوفون بألتزاماتهم ويسددون فواتيرهم وديونهم وفوايدها الربويه وليتهم ملحقين .
والعجيب الغريب , أنهم مع أستعبادهم هذا مستغفلين الى درجه يتوهمون معها أنهم ينعمون بحريات ما ينعم بها أحد غيرهم , وناسين أن الحريات اللي منحت لهم بعضها حريات في المجالات اللي تضرهم ولا تنفعهم , وناسين أنهم عباره عن جحافل من الكتل البشريه من الرقيق ألأبيض والأسود رجال ونساء يكدون ويكدحون وفي النهايه يروح كدهم وكدحهم وعرقهم الصابر للمرابين , وكل ما أستلمته اليمين يرتده اللصوص المرابين بالشمال .
والأسوأ من كدحهم وكدهم الضايع هو جرجرتهم للموت مثل الخرفان من قاره للثانيه يقاتلون ويقتلون ويعوقون ويصابون بالصدمات النفسيه والعقليه في جبهات وحروب متعدده على أمتداد الكره ألأرضيه تحت شعارات زايفه مثل حماية المصالح الأمريكه , لبينما أمريكا ما لها مصلحه حقيقيه في الحرب ولا لها فيها ناقه ولا جمل , وكل نوق الحرب وجمالها تعود للأمبراطوريه الراسماليه الربويه العالميه اللي شغلتهم كمخلب قط بالنيابه عنها .
الرأسماليه المتوحشه اللي تنهش في الشعب ألأمريكي من كل ألأتجاهات , مره بأسم الخصخصه ومره بأسم فوايد الديون ومره في قمار التأمينات المتنوعه ومرات بحيل وحيل ثانيات , نهش متواصل بلا شفقه أو رحمه الى آخر يوم من أيام الحياه وأول يوم من أيام الآخره الى درجة أن ألأمريكي ما يكفيه هموم المعيشه وهو حي ويحمل فوقها هم التوفير من دخله بالقدر اللي يكفيه لشرا قبره وتجهيز جنازته ودفنها , وأن كانت التكاليف فوق أقتداره يلقى نفسه مرغم على توفير مبلغ يغطي به على الأقل تكاليف حرق جثته حتى تحول لرماد في فرن من أفران حرق الموتى .
أما أذا لقيوه ميسور الحال فهذي الفرصه السانحه لتسويق وهم العوده للحياه الدنيا بعد الممات, وأيهامه بأمكانية عودته للحياه من جديد مع تقدم الطب في المستقبل , ويستحثونه ويشجعونه حتى يدفع تكاليف فرزنة جثته أو على ألأقل فرزنة جمجمته ..
وخذ يا ألاعيب وخذ يا نصب لأكل أموال الناس بالباطل , وخذ يا استغلال يلاحقهم في الحياة وفي الممات .....((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنْكًا وَنَحْشُرُهُ يَوْمَ الْقِيَامَةِ أَعْمَى)) ...

ويواصل ساري في تعليقه , ويواصل ضيوفه معه في ألأستماع والأنصات وهو يقول :وهالحين بعد شفتم الساعه اللي قامت على ألأمريكان قبل قيام الساعه ويش رايكم ؟ .
شفتم قد أيش مقدار الدين الوطني (على الحكومه الفدراليه) اللي زاد حتى وقت كتابتي لهالأسطر على اربعة عشر ترليون ونصف الترليون دولار (14,666,400,000,000$) ؟..
شفتم مقدار أجمالي الدين العام الشامل للدوله والمواطنين والمؤسسات الخاصه والعامه , واللي أقترب من خمسه وخمسين ترليون دولار تقريبا (55,000,000,000,000$) ؟ .
شفتم حجم الفوايد الربويه اللي تدفع على خدمة الديون واللي تزيد على ثلاثه ترليون ونصف الترليون دولار تقريبا (3,700,000,000,000$) ؟, وشفتم كيف أن الربا يتصاعد بتسارع مخيف ومتزايد دقيقه بدقيقه وثانيه بثانيه , ويتصاعد بتصاعده حجم المديونيه ؟.
شفتم كم يتحمل كل أمريكي فقير او غني ذكر أو أنثى لو وزع أجمالي الدين العام (حكومي وشخصي)عليهم بالسويه؟,(ميه وخمسه وسبعين الف دولار تقريبا) (175,877$) ..
وحتى تخرجون بتصور لضخامة الفوايد الربويه وفداحتها , الفوايد الربويه اللي تلتهمها الأمبراطوريه الربويه , قارنوا من فضلكم على الساعه بين رقمين , ألأول نفقات الدفاع اللي تزيد بقليل على نصف ترليون دولار(698,303,000,000) , والثاني مجمل الفوايد الربويه اللي تدفعها أمريكا وشعبها للمرابين العالميين واللي تزيد على ثلاثه ونصف ترليون دولار(3,657,909,000,000) .
وتصوروا وأنتم تقارنون معي يا ساده ضخامة القواعد البريه والجويه والبحريه ألأمريكيه اللي في كل ركن من أركان المعموره , وتذكروا ألأساطيل والفيالق والحروب في العراق وأفغانستان ونفقات الصيانه والطبابه والأبحاث والتدريب والرواتب والأعاشه ووو الخ .
تذكروها كلها وشوفوا كم يلهف المرابين من مبالغ من أمريكا والأمريكين , مبالغ لو أنفقت على الدفاع وهو في ذروة أنفاقه الحاليه كان كفته سبع سنوات تقريبا ..
شفتم ضخامة دخل ألأمبراطوريه الربويه في أمريكا وحدها من الربا ؟؟, وشفتم كم هو النصيب اللي تحمله كل عايله أمريكيه فقيره كانت أوغنيه بالسويه من الدين العام(حكومي وشخصي) ؟.
يعني لو وزع الدين على ألأسر المقتدره والمعدمه بالتساوي , كان توجب على كل أسره تسديد ست ميه وسبعه وستين الف دولار( (667,320$) , وأذا تبغيها بالريال تبي تقرب من المليونين ريال ..
شفتم حجم الكارثه اللي حلت بأمريكا والأمريكين ؟, الكارثه اللي تسببت فيها الأمبراطوريه الربويه الرأسماليه العالميه لشعب بلاده غنيه غنى عظيم ,,, بلاد ما أكثر من أنهارها وسهولها الزراعيه وأشجارها وخيراتها ومواردها الطبيعيه والبشريه , ومع هالوفره العظيمه والغنى الكبير شوفوا كيف هم يرزحون تحت أثقال الديون الطايله والفوايد الربويه المجحفه ؟ ..
شفتم كيف الربا يحول عمار الديار مهما كان غناها الى خراب , والعباد مهما كانوا أحرار الى عبيد ؟.

طيب , أذا كانت هذي هي الحاله الكلابيه لزعيمة الرأسماليه العالميه ,,,, ويش ضنكم بالعالم اللي يدور في فلكها ؟.. الجواب , اللي منهم بعد ما أصطلى بلهيب جشع الراسماليه الربويه , لا شك أنه في طريقه للشرب من نفس الكاس المترعه اللي تجرع منها ألأمريكان طال الزمن أو قصر ...
ولا تنتهي حبايل وشباك أمبراطورية الرأسماليه الربويه عند هذا الحد ,ماتنتهي أبد وتظل تقول هل من مزيد , مثل جهنم أعاذني الله وأياكم منها..
بعباره ثانيه , كل الناس تقريبا(ألا ما ندر) بما فيهم المواطنيين ألأمريكيين يظنون أن الدولار أمريكي , والحقيقه أنه كان في يوم من أيام التاريخ أمريكي , وكان دستور امريكا ولا زال يمنع منعا باتا منح صلاحية طباعة الدولار وألأشراف على طبعه وتحديد كمية المطبوع منه لأي جهه غير الحكومه ألأمريكيه والكونقرس ..
لكن أمبراطورية الربا أختطفته من عقود كثيره عنوه وبالقوه والحيله والأبتزاز مجتمعه, ولا زال مختطف حتى هاللحظه ويطبع منه المختطفين كما يحبون ويحلي لهم , ويضطرون دول العالم أضطرار أخو ألأجبار على حفظ أحتياطياتهم النقديه بالدولار , وعلى تبادل السلع التجاريه بالدولار وفي مقدمتها البترول والغاز ..
وفوق هالأحابيل والحيل كلها زادوا الطين بله بعد نزعوا عن الدولار غطاه من الذهب في سبعينيات القرن الميلادي الماضي , وأصبح عباره عن صناعه ورقيه ما تلزمهم بشي ولا يكلفهم دولارها ألا سنتات معدوده (أقل من عشره سنت) هي قيمة ألأحبار والورق واليد العامله , ويبيعونه على أمريكا وعلى العالم بمية سنت , ومن هو طويل الشارب والملحى اللي يقدر يقول لهم كفايه نصب يا نصابين وممنوع تطبعون بعد اليوم ورق بلا غطا وتبيعونه على العالم وعلى ألأمريكان ؟ .
شفتم الى أي درجه يا أخواني هالمرابين يختلقون الأموال من لا شي وبدون تعب ولا جهد يذكر , ويأكلون أموال الناس بالباطل على حساب ألأمريكي وغير ألأمريكي ؟ , مجرد قطعة ورق سموه الدولار يطبعونه ويسوقونه على ألأمم , ويبي يستمر مكسبهم فيه طالما بقيت كلفة طباعته أقل من ثمنه في ألأسواق , , واللي منكم يبي يعرف كيف أختطف الدولار ومن قبله الجنيه ألأسترليني يرجع لحلقات ما وراء ألأكمه للمستعين بالله اللي سبق وأشرنا لكم عنها في جلسه مضت ..

تلقف المخاوي المخفوع وقاطع ساري وهو يقول : يا ساري سرى علينا الليل والصبح أقبل يسفر , وكلامك هذا طال وتشعب ونحنا ناس فهمنا محدود وعلى قد حالنا ومشاغلنا على عدد شعر روسنا وورانا أشطان كثيره مشطنتنا وورانا ورعان وكرعان مجننتنا وحلال يبي له من يسرحه من غبيش , وبعدين ويش لنا وللدولار ؟؟, خلهم يسون بدولارهم اللي يبون طالما أن العالم راضي والعلوم ماشيه وروسنا سالمه وعلومنا غانمه ؟؟ ..
كنت أعدي بالمخاوي وأسكته بعد قلت له , أخرم ولا عاد أشوفك تنبس ولا بكلمه ولا بنت شفه , أنطم وخلي ساري يسري علينا بباقي العلوم الزينه , وأن كنت ما ترغب في هرجتنا ولا تبي درجتنا , هذا الباب شوفه قدامك ياسع جمل ...

علت لجبة ألأصوات بين الحاضرين اللي ينهرون معي في المخاوي, لكن ساري تدخل وهدى الحضور وقال , يا جماعه اللي منكم يبي يسري ولا له شف في هرجتنا الله يادعه وهو منا في وسيع العذر , واللي يبي منكم يسمع باقي العلوم مثل شيخنا ابو نقشه الله يحيه في الرحب والسعه يسمر معنا , ومن طلب العلم سهر الليالي ..
ثم يواصل ساري ويقول : أنا ما أستغرب كلام أي واحد من أضراب المخاوي يظن أن الأمور تبي تبقى تراوح مكانها , والأحوال تبي تستمر على ماهي عليه .
يا ربعي التصدع بدا يظهر بوضوح على جوانب السفينه ألأمريكيه , وكثير من العالم من أمثال المخاوي مثل جن سليمان عليه السلام اللي مات عنهم وهم غافلين في عناهم ومستمرين في السخره والعذاب المهين , ولولا الله ثم دابة ألأرض كان أستمروا في غفلتهم وعذابهم الى ما شاء الله ..
يا ناس السفينه ألأمريكيه الوالغه في الديون الربويه أصبحت على وشك الغرق , وكل الزوارق والقوارب المقطوره فيها ما تبي تسلم من الضرر ...(أنتهى كلام ساري) ..

والى ها الحد نتوقف , وفي الجلسه الجايه نعرض عيكم بمشيئة الله الدلايل اللي تشير لقرب غرق السفينه ألأمريكيه المثقله بالديون الربويه , ونعرض عليكم مناورات السفينه اللي تناور بها حتى هاللحظه للنجاه من الغرق , المناورات اللي لو أخفقت في واحده منها في أي لحظه وقع الفاس في الراس وأجتاح العالم سونامي ألأنهيار ألأقتصادي ...
تابعوا معنا حتى تلمون بالعلوم من أقصاها , وتقدرون تستخلصون العبر وتشاركون معنا في النقاش و تبادل الأراء في الحلول للتقليل ما أمكن التقليل من أضرار ضربة الفاس على المستوى الفردي , مستوايه أنا وأنت وأنتي وأنتما وأنتم وأنتن , فيما لو حدث ما يخشى عقباه لا قدر الله .
ومبروك عليكم العيد السعيد , وكل عام وأنتم بخير, وشكرا ...

[أبو عبدالرحمن]

سلمك الله يا شيخ منقاش

وكل عام وأنت بخير..

استمتعت بقراءة المقال والأخذ والقيل...

والله يكفينا شرهم

[ابومهنـــــد]

بارك الله فيك ياشيخنا الفاضل وسدد خُطاك ومسح خطاياك
مع نهاية هذا الشهر الكريم،، ونفع بشعرك بلاد القوقاز..
احببت ان ابلغك تحياتي من بلاد العطوات وانني من المتابعين للحلقات,,,,
استمتعت كثيرا بقراءة هذة الحلقة
بيض الله وجهك يوم تبيض وجوه وتسود وجوه
وسجلني احد المتابعين لحلقاتك..

وكل عام وانت بخير اية الخــال العظيــم
ومن العايدين..

[منقاش]

مشرفنا العام ابو عبدالرحمن : وأنت سالم وغانم أن شاء الله , وكل عام وأنت بخير , ومشكور على أطلاعك وردك ..

ابن أختي ابو مهند : آمين لنا ولك على دعاك , وعيدك سعيد أن شاء الله , ومشكور على أطلاعك وتعليقك , ورجايه تحط من ألألقاب لأبو نقشه كما يحلي لك ألا لقب العظيم فلا تقربه مهما كنت مازحا , فلا عظيم سوى الله , وخالك منقاش بلاف طقوع ما أطقع منه ألا المخاوي , وعبد مسكين محب للمساكين ومبغض للجبابره المتكبرين ...

[الحاج سلام]

• الشيخ المبجل ابو النقوش
  
• قرأت حلقة مسلسلتكم وخويك ساري الليل ولي وقفات موجزة وسطحية أيضاً لان مالي في الكتابة الاستنباطية ولا في التحليلات التكهنية يا ولد عمي .
  
• والأولة هذه الأيام ايام عيد وأيام فرح وسرور ولا هي ايام نكد وفوس وروس كفانا الله شر الأشرار
  
• والثانية اتوقع ان ساري الليل يخبط خبط عشواء ولقيكم سهرانين وما منكم من يجيب العلم وسرى يثرمت عليكم بعلوم ما لها خاتمة
  
• والثالثة حسب تخميني من علومك اللتي ترويها ان المخاوي داخله علم وما هو سهل من يوم انه اعترض على علوم ساري
• والأخيرة يقول المثل خذو الحكمة من افواه الخويا ولا تاخذ علوم ساري الليل تراه حاطب ليل جاك علمي وسلامتك يا سيد العارفين .

[منقاش]

عميد منتدى الحياه الفطريه , الشيخ سلام سلمه الله وأبقاه , ومن الشر أذراه :
مشكور يا شيخنا على ألأطلاع والتعليق , ولي على تعليقك تعليق على تعليق على وزن قول على قول , وتعليقي ينقسم لقسمين :
القسم ألأول , أبو نقشه كان مثلك ما هو مصدق بكلام ساري الليل ومبخص في بعض علومه حتى سير عليه (قبل فتره) يم الديره مسعول الخزانه ألأمريكي يدور له شوية ذرو وشوية بقايل حتى يتلحق بها وسم وبغره جات عندهم .
وبعد قهويت الرجال من الخمره حتى كرم , تعلمته عن سبب ماتاه جهتنا , وعلمت له بهروج ساري الليل ,وبعدها سعلته عن رايه ,,, لكنه دنق عني براسه وهنن شويه ثم مسح بطرف عمامته شوية عرق كان يتصبب من صنته (صندحته) وقال وعيونه تدغرق بالدموع :
خلها على الله يبو نقشه , خلها على الله , وصدق من قال ما بعد الطلوع ألا النزول ودوام الحال من المحال , وأن كان قال لكم ساري أقاويل وذكر فيها أن سفينتنا تصدعت فهو صادق لأنه ما شاف ألا طرفها اللي يعتلي الماء ولا دري عن اللي تحته , البلا يا عانيه اللي تحت الماء أكثر من اللي يعتليه ...
يا بدر الدجى ويا عرعرة المنتدى سفينتنا مخروقه من تحتها , والناس ما تشوف خرقها لأنه خافي عنها جهة غطسها تحت الماء , والمشكله أنه كل ما جينا لها بسداده نكتشف أن الشق أكبر من الرقعه .
يبو نقشه , أمريكا اليوم ينطبق عليها المثل الأسكتلندي حق الغار اللي أضيق من غار ابن رخمان : يعني أن قامت دقت براسها في الغار , وأن قعدت قعدت على ..؟.. ,,, وان راحت يمين راحت طحين , وان راحت يسار راحت كسار .
ويبدو أنه كما قال جدك الرندي , لكل شيء أذا ما تم نقصان ....

القسم الثاني من تعليقي : نبدي لكم أستغرابنا وامتعاضنا بل واستهجاننا الكبير من مسحة الملاينه والملاطفه اللي ظهرت في ثنايا ردكم للماخوذ المخاوي .
ولا أجد تفسير لهالملاطفه في هذا الوقت بالذات ولهذا الشخص بالذات اللي ليته يوم تلاطفونه كان واحد من أبناء الذوات ألا نوع من محاولات رمي طوق النجاه للمخاوي بعد خفى ذكره وطفى سراجه وأختفى خوف من ترديد اسمه بالأحرف ألأنجليزيه اللي ينقلب فيها الخاء الى كاف .
ولا أدري لا يوم من مقبل ألأيام أتفاجأ ويجيني خبر من هنه والا من هناك بوصول زيوته لأماكن ما كنت أظنها تصل لها , ولرفاقه وعيال عم كنت أكبرهم وأظنهم فوق كل الشبهات.
ولا نقول ألا نسأل الله العفو والعافيه , ,, وسلامتكم ....

[منقاش]

أنذار
شوفوا يا أعضاء منتدى ثماله
أبو نقشه أذا قال فعل , وأنا من البدايه طلبت منكم صفين تنقل القاف وترد على الكاتب , أي رد , مع العلم أن المعارض لأراءنا أفضل عندنا من الموافق , والمثل يقول : وبضدها تتبين ألأشياء , وابو نقشه متدقرط ويحترم الراي والراي الآخر..
لكني أراكم قوما تجهلون , وأرى ما رد منكم على سماحتنا ألا ثلاثه من ألأكارم في ثلاثه أيام تقريبا ...
وأمام هذا الوضع المتأزم بيني وبينكم , ما أمامي وأمامكم ألا حلين ...
الحل ألأول : أنكم تخزون الشيطان وتقولون بسمك يا رحمان وتمسكون الجاده ويرد عليه على ألأقل 12 عضوعلى عدد أشهر السنه , ولا تحتسب الردود المكرره من ألأعضاء ..
الحل الثاني : أذا ما أكتمل النصاب ب12 عضو يردون علينا , فنحن ابو نقشه نعلنها على رؤوس الأشهاد بأننا مضطرين لتوقيف نشر مذكراتنا والجلسات , والخاسر أنتم ما هو أنا ولا ساري الليل , تخسرون ألأطلاع على المناورات اللي تناور بها السفينه ألأمريكيه للنجاه من الغرق , وتخسرون الأطلاع على راي ساري الليل في الخلل القاتل في مناورات السفينه , وتخسرون في النهايه ألأستنتاج النهائي اللي ربما ينفعكم الله به ...
وتذكرو أن ابو نقشه أذا قال فعل , وتذكروا توقيفنا من قبل لحلقات عودة الشيخ ومرافقيه من رحلتهم ألى أرض الذهب , وأنا أن أوقفت هالجلسات فلاني بدع في هالسياسه التوقيفيه , أن وقفت نشر جلسات الفاس والراس فقد سبقني المستعين بالله يوم وقف عنكم حلقات ما وراء ألأكمه ..
اللهم أني بلغت ,, اللهم فا اشهد ,, وشكرا ....

[مخاوي منقاش]

الا اسمع ياكشوان(تطلق على كبير الكرش) هي غصب الناس ترد عليك في موضوع اسراره في دهاليز السياسة وهاقنة الاقتصاد وانت منزوي كما الجربوع في بورا بورا ثمالة وهذا لص تؤية وحرامي تقهويه وياليتك تنثبر قدام كي بوردك ولا تزعج خلق الله تطاردهم بشعبان اجأ وهم فالين الحجاج والله مافكروا بالديون السيادية ولا بالسندات الاوربية همهم متى يسدد اقصاط الجيب وكم سيارة ماسكة سرى عند تريلة الشعير ولو تسالة عن السندات قال ما اعرف الا سند الربع وانت لا منك شبعت وبديت تمسح على كرشك واتارغ من التخمة مسكت التلفون وبديت تزعج كبار المسؤلين امثالي وتنكد عليهم الاستمتاع بالاجازة
اما ابن اختك الي ازعجتنا انت واياه كل واحد يمدح الاخر قل له يضيف لخاله لقب جدير به وهو (مفرح) في رواية بني شهر وانت اسأل اي شهري قله على اي شيء تطلقون كلمة مفرح

[سنا الهجرة]

بسم الله الرحمن الرحيم .. ولا عدوان الا على الظالمين

بسم الله نبدأ تصفحنا لمسلسلات شيخنا منقاش أدام الله عزه وزادة من علمه وفضله

عاد يا شيخ منقاش .. أنا تراني مدمن كتاباتك ودايم أدور عليها في كل جحر في هذا المنتدى
ولو لم يكن فيها من الفائدة سوى فن اتقان أساليب التشويق الممزوجة بالدعابة لكفتني كـ قاريئ لمتابعة ما تكتب >> وما أخرني هالمرة عن قرائة موضوعك هذا الا العيد وما أدراك ما العيد >>
ولا حولي نت في الطائف ولا أفكر أمر عليه مررره من كثرة المشاغر

المهم في الامر .. تابع أنت وساري واسروا كيفما شئتم إن شاء الله ما تخلون شعب من شعبان حايل الا وتمشونه لا يهمكم مخاوي ولا غيرة .. علموا الناس وش مقبل عليهم من توقعات قد تسوئهم .. سلامتك يا طويل العمر

[أبو خولة]

عيد سعيد وجعلنا الله وأياك من المقبولين
شيخنا الهُمام ابو المناقيش أدام الله ظله الشريف
أشغلتنا الأعياد عن جلساتكم ومذكراتكم الأقتصادية بنكهة وطعم فاكهة المنتدى وربان سفينته....
ونعوذ بالله أن نكون من الملاقيف المخافيع من ضرب المخاوي واشباهه
الذين لا يعلمون ما يدور حولهم من أحداث..!!!
واصل شيخنا المبارك فلأسلوبك بالسرد نكهة خاصة لا يُجيدها
إلا شاعر وصقر القوقاز منقاش المناقيشوا
,,,