تبرشموا بالعافيه .

[منقاش]

تبرشموا بالعافيه . تبرشموا بالعافيه . تبرشموا بالعافيه . تبرشموا بالعافيه . تبرشموا بالعافيه .

البارحه اللي ما عقبها الا اليوم كنت معزوم أنا ورويعي الغنم عند ساري الليل ,,, وسرى عندنا ليل سمرنا فيه وسولفنا وحشينا في عباد الله يمنه ويسره وشرق وغرب حتى خلصت حسناتنا (أن كان عندنا حسنات) وتحملنا من ذنوب غيرنا ,, وكان من ضمن ما هرجنا ودرجنا فيه فاكهه أشوفها هاليومين أبتدت تنزل السوق ,,, وهي عطايا الله الشفوي (البرشومي تبرشمتكم العافيه) ,,, وفي طرف هرجتنا سعلت ساري وقلت :
عساني فداك يا رفيقي يا ساري ,,, أنت رجال يسمونك بحر العلوم لأنك دايم دافس راسك في الكتب ولا بقي شي الا قريته حتى السحر وتجميع وتفريق الجن ما خليته .. واظن أنك تعرف من وين جاء للطايف البرشومي ؟ , وعسى ما يكون جابه أجدادنا معهم يوم رحلوا من مارب بعد سيل العرم وموتة جدتنا الملكه بلقيس الله يرحمها وينزل البركه في ذريتها ؟..
جاوبني ساري وقال : شوفوا يا طوال الشوارب ,, البرشومي ومعه القوطه ما عرف عنها لا عرب ولا عجم لا في روبيه (أوربا) ولا اشويه (آسيا) الا بعد أنطرد المسلمين من الأنتلس (الأندلس) .. قاطعته وقلت : عساهم هم اللي جابوا البرشومي والقوطه معهم ؟, رد عليه ساري بزعل وقال : يخسون وانت ما تخسا , بس ثاني مره خليني أخلص جابتي ولا تقاطعني ,,, اما ربع الأندلس ما جابوا معهم الا الهزايم مثل هزايم المسلمين في زمانكم , ويستاهلون هم وكل مسلم يحط يده في ذنب الثور ويرمي منها بالسيف وينسى سنام الأسلام (الجهاد) ..
قاطعته وقلت : تكفى يا ساري , أنا داخل عليك تخلينا في حزه رحمانيه , ترا مرة عوانينا (كونتليزه رز) لها أذاني في كل مكان ,, واترك عنك بعض الهروج اللي تضر ولا تنفع ,وتكفى لا تسري علينا وتجيب طاري الجهاد وتودينا في مية داهيه وتجر علينا مصايب وتهم بالأرهاب وما أدراك مالأرهاب ,, دخيلك خلنا في جهاد البرشومي وشوكه ونشايبه وخلنا منها وجاي وليتنا نفلح .
كان يضحك الرويعي وساري من كلامي حتى مالوا في أقفياتهم وبغوا يفطسون, ثم استقعد ساري وقال :
يالوجيه الغانمه الديرة الأصليه للبرشومي والقوطه مكانها في محلات بديار بعيده عني وعنكم , وبينكم وبينها بحور تلاطم ومفازات من الديار ما فيها شباب الضو ولا بها الا الذيب العاوي والبطن الخاوي في أرض يسمونها الأمريكتين وبالأخص الجنوبيه منها , واهم الديار الأصليه لعطايا الله البرشومي هي ديار المكاسكه (المكسيك) , قاطعته وقلت ونعم وستة أنعام بالمكاسكه ,, (خصرني وواصل كلامه) وقال : في هاك الديار ماهم مثلنا اللي ما ناكل الا الثمر ,, لالا , المكاسكه ياكلون الثمر في الصيف ويطبخون الورق أدام طيلة أيام العام , وبعضهم يستخدمه في الطب الشعبي ويعالجون به مرض السكر والكلستلور والتوتر وغيرها .
يا منقاش ولا مهونه برويعي الكلاب : الأسبان بعد طردوا العرب الرخوم من الانتلس (الأندلس) أخذوا عنهم العلم والسير في الأرض والأكل من مناكبها , وفعلا سيروا على أمريكا بدعم مالي من حرمة أميرهم ومن عيال عمنا اليهود اللي كانوا يبغون الذهب واللي بقيوا في هاك الديار وتنصروا بالظاهروبقيوا على يهوديتهم في الباطن .
ومن ضمن الحاجات اللي جابتها فيما بعد بعثات المستعمرين الأسبان لأسبانيا البرشومي والقوطه , ومن هاك الديار أنتشر الشفوي والحمراء حتى وصلتنا ووصلت غيرنا ,,, فهمتوا والا بعد ؟,, رديت عليه وقلت فهمنا وعساك سالم وغانم ..
الخلاصه : أني أصبحت اليوم وتذكرت سوالفنا البارح مع ساري عن البرشومي, وتذكرت سالفه سارت على المخاوي قبل سنين وقلت في نفسي ليه ما تقول في هالمنتدى المبارك كلمتين للمغفلين أو قولوا للغافلين .
الأوله , يا جماعه أذا أحد منكم أحد سكينه وطب بها في حوطة من حوط البرشومي والا تحوفز قدام المكاتل وهي ملي بالمكعبر لا يسير مثل خالد بن الوليد الله يرحمه يوم أندقت في يده يوم مؤته تسعة أسياف ولا بقي فيها الا صفيحة يمانيه ,, لا لا , بسلامتكم ما أنتم أهلها وخلوكم لغيرها ,, يعني كلوا بعقل وتروي وحكمه وحساب لعواقب الأمور , ولا تكثرون وتجيبون العيد والفضيحه .
الثانيه , تحمطوا مع التبرشم لأن المخري يخريكم الله يكرم من يسمع ويسلك البرشومي , واللي فيكم غبي يتفكر ليش يحين ويستوي الحماط والبرشومي سوا مع بعضهم في وقت واحد ؟ , وليش سموالأثنين تين ؟ , ويعرف أنه ما سار كذه الا حتى يوكلون مع بعضهم ويا زينها لو أتبعتوهم بشوية من الماء .
وبهالمناسبه أتذكر قبل خمسطعشر سنه أني أرسلت هديه على مخاوي منقاش (كم كرتون برشومي) من باب المكيده والنكايه فيه ما هو من باب الحب والمبريه , وفعلا الخبل (المخاوي) أبتلع الطعم وسار ياكل من المكعبر حتى لكت عنده العلوم وسار يشوف النجوم قايله والنفر نفرين وجاتك عيونه طالعه من راسه .
أتصل المروح عليه يستغيث ويشكي ويبكي , عودت رديت عليه بأعصاب بارده وخاطر مرتاح وقلت : داوها يالمخاوي بالتي كانت هي الداء, يعني كل برشومي زياده حتى بعضه يدف بعض ,, ولا قصر مشى بالنصيحه حتى دخل في حالة غيبوبه ولا شاله من بيته الا الأسعاف وغاب عن عمله بالمستشفى أسبوع كامل تحت أشراف الدكتور زملوق زميلنا في المنتدى , أما عمله فكادوا يفصلونه بسبب غيابه وسبب غياب العذر من خجيلته اللي منعته لا يعلمهم بعذره والا يبرز تقريره (الطبي) اللي ربما كشف حاله الله لا يكشف لنا حال خصوصا عند ربعه أهل حايل ...
ولأني عطوف واجد ولا أحب أذية الناس كفرت يومها عن ذنبي وتوسطت له عند رؤساه حتى غضوا الطرف عن سبب غيابه ودفنوا مصيبته في بير والا كان أمدي حديثها سرت به الركبان .
الزبده : تبرشموا كما تبون , بس تبرشموا بعقل وحكمه ورويه ومعها تحمطوا أذا تبرشمتم , ولا تنسون تستفيدون من الورق تستادمون به مثل يوم أستفاد منه قبايل المكاسكه , وسلامتي أنا واياكم ...

[رويعي الغنم]

http://www.naseemnajd.com/w/?p=97

[سنا الهجرة]

الله أكبير على ابليسك يا منقاش

انا اشهد انك مفضوح ويا ويل من تطيح له على سريره

الصدق اني متعاطف مع المخاوي هذا اللي سوالفك انت واياه تذكرني بالبس والفار

ومبروك عليكيم البرشوووووووومي والحماط

وعساني الحق ولو على العقبي

[غضنفر]

منقاش الله يعطيك العافية

الله يرزقك بحوطة تشتريها وتجمع البرشومي اللي فيها وتهبطه السوق على حمارك
ولا تنسى تقل لخويك ينقشك من الشوك

[أبو عبدالرحمن]

سالم وغانم ...أيها الشيخ المبجل ...

أضحك الله سنك ...وفكك...

تصدق تستاهل نجمة إضافية على ما سطرته يداك...

نسيت تذكر الممرض ملحوس المرافق للدكتور زملوق...واش سوى مع المخاوي!!!

[المبرِّد]

لكنه نزل غالي ب 180 ريال.متى ما سار ب 20 الله يعيننا على البرشمة والمويه

[منقاش]

رويعي الكلاب : مشكور .
مخاوي منقاش : ورا ضوك طفا مثل طفية ضو ابو أمجد ..
سنا الهجره : أنا رجال على نيتي وصداق , واللي أتذكره أكتبه عن المخاوي والا عن بوش ..
ابو غبدالرحمن : واضحك الله سنك ,,, بس هات النجمه وخلك عند وعدك لأني ما خبرتك أذا وعدت تخلف ..
المبرد : أحرص على البكاير ولا يردك السعر ,, العمر مره واحده وخذ بيوم السعد حده ..
مخاوي : كل برشومي وانطم واقطع واخس ...

[منقاش]

غضنفر : نسيتك , سامحني .
ونصيحتي لك , جرب تعطي هذا الأسد اللي عند معرفك برشومي من البكاير اللي تكون غضه شويه لمدة ثلاث أيام , ولا تقول لي الأسد ما ياكل برشومي , بس لا تعطيه مع الشفوي شي ثاني وشوف كيف يعود يزأر زئير ...

[أبو عبدالرحمن]

يا ابو نقشه ...انا قلت تستاهل ..ما قلت نعطيك!!!

[غضنفر]

منقاش عزالله يا الاسد لو ياكل برشومي نه ليزأر زئير ولا يخرجه من بطنه الا طططططططططططططططط