القروش ولعبة الفقاعه / الحلقه السادسه.

[منقاش]

القروش ولعبة الفقاعه / الحلقه السادسه. القروش ولعبة الفقاعه / الحلقه السادسه. القروش ولعبة الفقاعه / الحلقه السادسه. القروش ولعبة الفقاعه / الحلقه السادسه. القروش ولعبة الفقاعه / الحلقه السادسه.

بسم الله الرحمن الرحيم
عرفتم في الحلقه اللي راحت أن البنك اللي مول شرا العقار لأخو محماس وخوياه باع باقي أقساط الدين اللي عليهم على مستثمرين جدد , وأخذ من المستثمرين عموله وأتعاب ؟, ليش باع الدين , ومتى ؟ , هذا لغز فسرناه لكم في الحلقه اللي راحت .. كيف باعه ؟ , ورق الدين بتحويله لأسناد (سندات) .
من هم المستثمرين الجدد اللي أشتروا الدين ؟, رايحين تعرفونهم في هذي الحلقه , ويش الضمانات اللي خلتهم يشترون الدين؟, رايحين تعرفونها في هذي الحلقه .
وقبل ندخل في صلب الموضوع أقول : على طاري جلستنا مع شلومو وما دار فيها , كان الماخوذ المشاكس جالس على يساري وهمزني في أصبع رجلي الصغير ثم مال يمي وهمس في أذني وقال : تكفى يا فخامة منقاش , ودي أولع الغليون واتنبك شويه حتى أعدل راسي , لكني خايف من صاحبك هذا اللي جالس على يمينك (يعني ولد حياة مائير) , أخاف يقوم يهزءني ويطردني من المجلس قدام الرجال كما يوم هاك المره هزأ وطرد المخاوي على توليعة صقاره واحده .
ألتفت على ولد مائير وقلت : يبن عمي يا شلومو , تراكم ياليهود فضلكم علينا كبير , لأنكم أنتم اللي أكتشفم التنباك وسوقتوه وطورتوه وحولتوه من ماش لسلعه تجاريه ما هي بلاش , ونحنا يالعرب والمسلمين أخلص وأوفى زباينكم , وشوفونا في حشمتكم أنتم وتنباككم عصينا الله وأطعناكم وأعطيناكم المال اللي أستخلفنا الله فيه , وشربنا دخانكم حتى علت عجاجته روسنا , ثم مدحناه في أشعارنا بعد ضيعنا فيه صحتنا ودراهمنا وديننا .. صحيح والا لا ؟.
جاوبني وقال : صحيحين ما هو صحيح واحد , لكن ويش المناسبه ؟. قلت المناسبه أن المشاكس ابو عوينتين هذا اللي جالس جنبي مخه في راس غليونه من يوم هو ورع حتى شب الشيب في راسه , ويترجاك تغض الطرف عنه حتى يولع الغليون ويستوعب علومك .
رد وقال : تقول يا فخامة الشيخ أنكم يالعرب مدحتم الدخان وشرابته , وابغيك تعطيني مدح واحد وحقيقي غير بيت الشعر اللي يقول ::: شرابة الدخان فيهم سعة بال @@@ واللي طويلن شاربه يقصرونه .
رديت عليه وقلت : كان فيه شيخ قبيله من شيوخ العرب أسمه لباد , وكان الشيخ لباد يدخن الغليون , واذا دخلت بيته من كرمه على ضيوفه تلقاه مركز الغلايين على أطراف المنقل وبعضها معلق مع السلاح على الحداد (حيطان البيت) , وأذا جاه الضيوف أول ما يباشر عليهم بالغليون والتنباك .
وبسلوكه هذا تعلم كل ربعه على تنبكة الغلايين وساروا كلهم تنابكه , وسارت أوديتهم أذا قربت عليها وناظرتها من بعيد تشوف الدخان معسكر عليها مثل البقيع , وتظن أن الديار عمتها حرايق أكلت الأخضر واليابس , وهي حرايق بحق وحقيق , لكنها حرايق في صدور جماعة لباد .
مات الشيخ لباد بسرطان اللثه والبلعوم والريتين بسبب التدخين وخلف وراه تركه من الغلايين بقيت مفخره له ولربعه , وبعد مماته رثاه الشعرا من ربعه بالمراثي , منها معلقه (من الزهم) للشاعر ابن فنحاص يقول في مطلعها :
الله يرحمك يا حي لباد @@@@@ عقب ثلاثين غليون غير الذي في الحداد .
رد ولد مائير , وقال : ربعي اليهود ما حرم عليهم تلمودهم بيع الدخان , لكن دينكم يالمسلمين حرم عليكم تلحقون الضرر بأنفسكم أو بغيركم , والدخان فيه ضرر على النفس والمال والغير وبالتالي حرام عليكم , وأذا كان المشاكس يبغي يضر نفسه يطلع برا ولا يدخن بيننا ويلحق الضرر بجلساه , وبالحرام من رقبة مرتي اللي دفنتها بسبب صقاره دخنتها لو ولع غليونه في مجلسي لا أكسره على راسه حتى يروح غليونه وراسه طيبان , ولا يمسي الا في العنايه المركزه في المستشفى اللي يقول صقر قريش أنها أنسرقت أدويته .
وبالكاد نهدي ولد مائير وناخذ بخاطره , ونقفل موضوع التدخين , وينجي المشاكس بجلده وغليونه .
وهالحين خلونا نترك فتن التنباك والتنابكه ونعود لموضوعنا اللي قال فيه شلومو :
شوفوا يا من حضر , كما يوم ضربنا الأمثله فيما سبق للمشترين للعقار بأخو محماس وربعه , نمثل هالحين للمستثمرين لسندات الدين بالمخاوي وزملوق ورويعي الغنم , ونقول :
المخاوي كان شيخ دولة مخاويستان في وسط آسيا , وزملوق كان شيخ دولة زملوقستان في وسط أفريقيا الأستوائيه , ورويعي الغنم كان زعيم دولة رويعيستان في جنوب شرق آسيا .
هالنشاما الثلاثه , أو القروش المفترسه الثلاثه , أو الثلاثيستان , لطشوا خيرات بلادهم في مخاويستان وزملوقستان ورويعستان , وقرروا يهربون المليارات اللي لطشوها لمصارف سويسرا وتركها هناك ودايع لورعانهم ونسوانهم حتى يسيرون مليارديرات من بعدهم , حطوها ودايع مع شوية فوايد ربويه تعطيها لهم مصارف السواسره .
(وبالمناسبه , اللي ما يعرف ليش سويسرا محايده في كل الحروب ؟ , وليش هي المقر الرئيسي للمصارف والودايع العالميه يرجع لحلقات ما وراء الأكمه للمستعين بالله)
لكنهم أكتشفوا فيما بعد أن الفايده الربويه اللي يكسبونها تاكلها نسبة التضخم السنويه , واكتشفوا أن مصارف سويسره تستثمر ملياراتهم أو تقرضها بفوايد أكبر وتعطيهم الفتات , واكتشفوا أنها تنتقصهم ولا تحترمهم لأنها حاطه أرصدتهم تحت مسمى رؤوس ألأموال الجبانه بسبب هروبها من أوطانها الأصليه بصوره غير مشروعه .
بعد فتح الثلاثه (الثلاثيستان) عيونهم شويه (الرويعي وزملوق والمخاوي) قالوا , يا ولد , وين عقولنا ؟, ليه ما نطب الميدان وننمي ثرواتنا بأنفسنا , ليش لا ؟, وهذي العولمه نظامها المالي يسمح بحرية حركة رؤوس الأموال وانتقالها بكامل الحريه من مكان للثاني في لمح البصر , ويعطي لراس المال مرونه بعد أخذ أشكال كثيره منها تحوله لأرقام على الشاشات وبطاقات ممغنطه وغيرها من الصرعات الماليه .
وفعلا , الثلاثيستان (المخاوي ورفقاه) دخلوا سوق السندات بعد سألوا ويش أريح وآمن أستثمار , جاهم الجواب , أن سندات ديون العقار من آمن ألأستثمارات ؟, زادوا سألوا , ويش الضمانات ؟ , جاهم الجواب : لأن السندات اللي تشرونها مدعومه بعقارات مرهونه فيها , وعوايدها مصدرها تحت السيطره وهو الأقساط الشهريه لعقار أخو محماس ورفقاه .
وزادوا طمنوهم أكثر بعد قالوا لهم أذا تبغون ضمان على ضمان أمنوا على سندات الدين عند شركات التأمين حتى تكون ملزمه بدفع ألأقساط لكم لو حصل شي ماهو متوقع على العقار المرهون مثل الكوارث الطبيعيه .
تبسم الثلاثيستان (المخاوي ورفقاه) أبتسامة الرضى , وفركوا أيديهم في بعضها ثم أشتروا بكثير من المليارات كثير من سندات دين الرهن العقاري , ثم أمنوا على بعضها عند شركات التأمين وتركوا الكثير بدون تأمين بعد وثقوا في السوق .
قاطعت شلومو وقلت : يعني ما أشترى سندات دين الرهن العقاري غير حرامية الثلاثيستان ؟, وليه ما أستثمروها في بلادهم حتى تكون تحت نظرهم , ويعود بعض نفعها على جماعتهم ؟.
تدخل معزبنا ساري الليل وقال : خليني أجاوبه يا ابن مائير .
يا فخامة منقاش , نعم معهم آلاف غيرهم مثل صندوق تقاعد أهل بلاد الهبالستان , وصندوق التأمينات الأجتماعيه لبلاد العميانستان, ومعهم رؤوس أموال لشركات من بلاد الخبالستان واليابان والتركمانستان, ومعهم , ومعهم كثير غيرهم من أمريكا وخارجها, فيهم المفتح وفيهم ألأطرش , واللي يديرون اللعبه حاطين العين على الجميع ولا عندهم لحيه أغلا من لحيه .
لكن صندوق تقاعد بلاد الهبالستان ما دخل العمليه الا لأن المسؤولين عنه طلبوا يدخلونها بحجة أستثمار مدخرات الصندوق وتنميتها لمصلحة اللي تقاعدوا واللي لا زالوا على راس العمل وفي مقبل الأيام رايحين يتقاعدون أذا ما ماتوا وهم على راس العمل , هذا في الظاهر , وفي الخافي كانوا يسعون ورا العمولات والمصالح الشخصيه .
والثلاثيستان ما يقدرون يستثمرون المال المنهوب في بلادهم لأن السرقه وقتها تبي تنكشف , وأن قدروا يحمونها في حياتهم يخشون عليها توخذ من ذراريهم بعد مماتهم .
الى هالحد تخلص البنك الممول من الديون الخطره وحطها في طرف المستثمرين الجدد , والى هالحد نتوقف حتى لا نطيل عليكم , خليكم متابعين معي في الحلقات الجايه حتى تتابعون اللعبه وتشوفون كيف يزيد يتملص اللاعبين الكبار حتى من البنك الممول ومن شركات التأمين , وتشوفون شراسة القروش المفترسه , وكيف القروش الكبار تلتهم بنهم كل القروش الصغار ومنهم قروش الثلاثيستان .
خلوكم معي , وخذوا في الحسبان أن راس المال ما يتبخر أبدا , وكل مافي الأمر أنه ينتقل من يد خسران ليد كسبان والشاطر من يعرف يلعب ويكسب ,, وخذوا في حسابكم كذلك أن اللاعبين الكبار اللي يديرون اللعبه دايم وبأستمرار يحولون راس مالهم من الورق الى الأصول والذهب والفضه , أما العملات الورقيه من دولار والا غيره فهي عندهم وسيله ولا هي غايه , وسلامتكم .

[أبو عبدالرحمن]

الحمد لله أنا ريحت بالي..وأتنزه في بلاد ثمالستان..ومريح دماغي من هذه السندات..

وما أظن صاحب الغليون إلا أنت ما هو المشاكس المسكين

[لنمرالناري]

http://www.forexegypt.com/forum/showthread.php?p=9511
موضوع جميل وطريف يستحق القراءة للاستزادة

[منقاش]

الأخ , ابو عبدالرحمن : أشكرك على الرد , والحقيقه أني أشوفك في ألآونه ألأخيره أستمالك المخاوي وبقية المشاكسين , وهذا خروج على الحلف اللي كان بيننا , فلا تشمت بنا ألأعداء ..
الاخ النمر الناري : أولا أشكرك على المداخله والأضافه المفيده .
ثانيا , بالله عليك تشوف حل مع المشرفين يضيفون ألألف المفقوده من النمر لأن قراية النمر بدون ألف تسبب للقراء الصداع .
ثالثا , بالله عليكم يا مشرفين تشوفون وين يكتب من أسمى نفسه الدكتور أنس الحجي لعلي أقيم عليه دعوى في سرقته لأفكاري وتبنيها بدون يقول للقراء أنها لفخامة الشيخ الشريف منقاش .

[مخاوي منقاش]

منقاش/ كل العرب تلطش جت على انس الحجي
النمر الناري/ من اداب الاستراحة عدم افساد الموضوع الا بعد فترة مناسبه
اسير الصمت لو اني احب ان تكون جميع الاقتراحات نابعة مني شخصيا الا انني اقول على بركة الله ولك مني الضوء الاخظر

[الفين]

موضوع جميل والنمر الناري على اسمه خطير شبك منقاش فالحجي والتاريخ مكتوب

[زملوق]

ياشيخ منقاش
جميلتك وماقفك معي مايننسي
وترى الغليون ماهو بس تنباك رزه

[منقاش]

ألأخوان , مخاوي منقاش , ألفين , زملوق : مشكورين على الردود .
والحقيقه أن التفاعل مخيب للآمال في هذي الحلقه , فلا ردود حاره ولا قراء كفايه . وعلى كل حال بعد الحلقه الجايه أقيم الوضع , يستحق المواصله والا لا ؟.

[ابن محمود]

منقاش

ارجو ان تتقبل شكري على ما امتعتنا به على مدى هذه الحلقات التي كتبت بأسلوب رائع واحتوت على معلومات اروع

والتي اضطرتني ان اراجعها على صفحات المنتدى منذ بدايتها


ولك كل الشكر

[سنا الهجرة]

الله يهديك يا النمر الغازي

الحين وين الدكتور هذا عن الشيخ المبجل منقاش
وش جاب لجاب بالله .. طبعاً مع إحترامنا للدكتور

لكن الفرق كبير مررررررررررررره

تدري اني قريت بموضوعه ما كملت ثلاثة سطور والا وطفشت
أما الشيخ منقاش لو تقرا له من الصبح للمغرب ما تشعر بالملل

الله يخليلنا منقاشنا وبس .. لولاه وش نسوي بشوك البرشومي

وأنت يا الشيخ يا طويل العمر .. لا تهتم لكثرة الردود . ترى الناس من حلاوة مواضيعك

تقرا وتطلع .. وحايان تنسى ترد ..

بس انت واصل واحتسب الاجر من الله لا تناظر لمدح ملثي وشرواي