ســـؤال لم أطرحه ؟؟ ( الحلقة الثالثه )

[ابوسيفين]

ســـؤال لم أطرحه ؟؟ ( الحلقة الثالثه ) ســـؤال لم أطرحه ؟؟ ( الحلقة الثالثه ) ســـؤال لم أطرحه ؟؟ ( الحلقة الثالثه ) ســـؤال لم أطرحه ؟؟ ( الحلقة الثالثه ) ســـؤال لم أطرحه ؟؟ ( الحلقة الثالثه )

السلام عليكم ورحمة الله وبركاته ، وكل عام وانتم بخير ، ولو ان الواحد يحس بمراره عندما يقولها وهو يرى مايحدث من انحدار مستمر على كافة المناحي ....الله المستعان .

تذكرون في الحلقة الثانية من موضوع "السؤال الذي لم اطرحه " انني قلت لكم عن التلفون اللي جاني واني تواعدت مع صاحبي غبشه عند المطار ، الحقيقه اني تعينت وليا المسافه بعيده وراعي التكسي اللي انتم خابرين جبان من يصلي المغرب مايخرج في الظلما وابن عزاب جفعان على طيارته

المهم اني من حب البر لصقت لهم في المطار الين سهل الله رحله ولاجا الموعد الا وانا عند صاحبي في مطار " الرياض " خرجت من المطار اتلفت يمين ويسار وليا ماعني وذيك الددسن من الموديلات القديمة وصندوقها مليان عفوش وعلى الطاره جالس رجال كبير متين متلطم ولحيته طالعه من تحت لطمته مخلوطه نصها شيب كأنه فالخمسين من العمر وعيونه غايره عليها نظارات سميكه جدا وعليها اطار أسود عريض ويوم شافني اتحقق فيه ناداني
ويوم فتحت الباب قال لي انت مشعان قلت أي والله انا هو قال اركب وصك الباب زين قالها بصوت اشج مرتفع اخافني لدرجة ان احنا مشينا يمكن خمسه كيلو وانا ماقدرت اسأله عن شي الا اني طالعته من تحت لتحت زي مايقولون واول ماحاولت اهرج معه وقلت له وين طرقتنا يالنشمي لبدني بيده على صدري قال مالك هم حط راسك في قلص قلت وينهوالقلص قال يعني ماتعرف كلامي ولا تتمسخر عليه و هز بايده!! قلت الاّ عرفت ، وانا ماعرفت شي لكن قلت أبسأل حليفي ليا رجعت وان كان اني اظنها تعني خلك اثول والدبره عند غيرك
قلت فخاطري هذا امر ملازم غالبيه العرب ولاهو ضارك ،قلت له الله يقويك ونمشي لنا ممكن مية كيلو ماواحد يهرج الثاني أنا خايف وهو يبغى يفرض سلطته ويوم انه طفش قال الخميس والجمعه هذي ابدور بك فالبر وبنروح لام رقيبه نشوف البل ونبعد عن المدينه ودخاخينها قلت والله ان هذا اللي رماني فايديك قال نعم . قلت انت الخوي اللي مابعده مادام هذا علمك ، ومشينا الين تعدينا المجمعه ، قال هاه ودك نوقف نفطر قلت تعدينا المطاعم قال اعقب يالطرطور ، البر ماله الا عيشته وفلحظه وهو ناقز من الاسفلت للبر فالوادي الذي تشاهدون بعض صوره




وصوره أخرى




والحقيقه اني ماقدرت أصوّر خوفا من الرجّال ، ويوم نزلنا فالوادي مد ايده لصندوق الونيت وطلّع منه سحّاره حديد وليا نّها مليانه قرنشع (( براريد وقدور وصحون وفناجيل و00و00ومجرفه 0قلت ياولد لازم أبين لخويي اني راعي بر 0 قلت خلّ النار عندي ابكسّر حطب من هالطلح واثرني جبت الطامّه !!!
قال الطلح ماينبت فها الديار وبعدين أنت ماتفرق بي الطلح والسلم وماتفرّق بينهم والسّمر وقعد يمكن نص ساعه يبربر بعلوم ماعرفتها ؟ قلت لاوالله الا نكّد علي الطلعه أنا شارد عن المنتدى وشلته وطحت فها العلّه 0

ماطول عليكم رمى عليه كم عود وقلّي شب النار نسوي فطورنا وقهوتنا، عز الله اني شبيت النار وهو طلّع مجرفته وعجينته ، والصق قرصه وهو يشرح لي عن أنواع القرصان وأن منها الخميره والفطيره وأن جداتنا كانوا يتركون جزء من العجينه حتى يخمّرون به عجينه الوجبه ا للي بعدها ،وطالع فيّه وقال وش اسمها ؟؟؟ قلت له بسرعه (( راقوبه ))قام وشال له وصله من العجين واخبطني بها على وجهي وقال أنت ماوجهك وجه برّ 0 قلت يارجل احنا فتمشيه يعني حرام نمزح وصدقني وسكت (( وأحيل ترجمه العبارتين للمخاوي والواد طرطشلي ))

وفبل مايحط القرص على النّار قام وجاب له حزمه علف ورماها فالبراد !! قلت وش هذا ؟قال هذا شاهي البر (( الحندقوق ))قلت له عندنا منتدى ابصوره لهم 0قال ان شفتك صورت كسرت ايديك 0قلت اجل أبكتب اسمه لاأنساه مثل أبو عبدالرحمن يوم نسي الاسماء اللي علّمه جاره عباد بها ويوم شافني أكتب قال أكتب تحتها حندقوق بفتح الحاء ،والنون ساكنه ، وهي عشبه موسميه مماثله للبابونج في الشكل والطعم مهدئه للأعصاب لاينصح بالاكثار من شرب مغليّها لأنها مفتره للهمم، وابتسم وكانت اوّل ابتسامه اشاهدها منه واستغليت انشغاله بقرصه وحندقوقه واحذت لكم الصوره هذي وهو مادرى



وهذه صوره لنبات الحندقوق مأخوذه من الانترنت والحقيقه انه شاهي جميل وأفضل بمراحل من شربه الحرّيق اللي ورطني فيها الشيخ لكني لاحظت خلط بينه وبين البابونج وخويّ يقول ان بينهما اختلاف ونحيلكم فيه لاهل التبحثات كما قال شيخنا أو نفرد له موضوع مستقل ان أحببتم 0





[BLINK](( نكمل انشاء الله مع الحلقه القادمه وفيها أمسك نقطه ضعف في خويّ ساعدتني في باقي رحلتي مع بعض الصور الشيقه 00))[/BLINK]

[أبو عبدالرحمن]

ما شاء الله تبارك الله

واش ذا الزين...

والله ما قصر راعي العزبة..وتجمل معاك طوال الرحلة..
ويا الله من الضعفة اللي فيك..تبغى تأكل قشطة ومربي وعيش لبناني !! وتترك الملة والقرصان..

و أحسن ما سويت ...هذا الموضوع الشيق الجميل..
الذي نتمنى من كل عضو .. في حالة تنزه ورحلاته ..أن يحرص على كتابة وتصوير جزء من هذه الرحلة..

ولا شك أننا منتظرون بفارغ الصبر الحلقة القادمة وما تحويه من صور...

[@ بن سلمان @]

(( راقوبه ))

تبي تشوف العيد إن خليتها لطرطشلي
متابعين معك ومع باقي الصور

[سنا الهجرة]

والله يا دتكور مشعان ما ودي انك عرفت نقطة ضعف خويك
لانه عاجبني فيك

المهم ان موضوعك يفطس ضحك من اوله الا آخره

وصورة البراد شي صراحه .. المفروض حطيتوه في الجنادريه وانتم راجعين

حتى القرص أسود .. مدري كيف أكلتووه

هههههههههههههههههههه

[واقعي جدا]

مهدئه للأعصاب لاينصح بالاكثار من شرب مغليّها لأنها مفتره للهمم،

تذكرت من ينصح عن الاكثار من شرب النعناع لنفس الداعي ولعلها عذر البليد
يبدو لي انك مغامر والا كيف ترمي بنفسك لمجهول
أنا عن نفسي أبوي دايم يوصيني ما أركب مع واحد ما أعرفه
وخاصة اللي أوصافه مثل ما ذكرت وحاولت أطبق عيوني واتخيل صورته فقلت يا قو قلبك

[فؤاد طرطشلي]

ترى حنا كلنا عيال مكة والبدوي هدا اللي معاك لا يضحك عليك يعني موكل ما قلك حاجة تصدقها
والحندقوق هدا تلاقية عند العطارة وشكلك لما تشربه راح تتلطم انت كمان وزين تشربونه في البر دامك بعيد عن بزورتك وبيتك

بس اسأل هدا البدوي اللي معاك كيف يسوي تميس في البر

[مدهش]

أصبحنا و أصبح الملك لفالق الأصباح

يا مشعان لقد أسمعت لو ناديت حيا
لكن لا حياة للمخاوي حين تناديا

[ابوسيفين]

المشاركة الأصلية كتبت بواسطة أبو عبدالرحمن

ما شاء الله تبارك الله

واش ذا الزين...

والله ما قصر راعي العزبة..وتجمل معاك طوال الرحلة..
ويا الله من الضعفة اللي فيك..تبغى تأكل قشطة ومربي وعيش لبناني !! وتترك الملة والقرصان..

و أحسن ما سويت ...هذا الموضوع الشيق الجميل..
الذي نتمنى من كل عضو .. في حالة تنزه ورحلاته ..أن يحرص على كتابة وتصوير جزء من هذه الرحلة..

ولا شك أننا منتظرون بفارغ الصبر الحلقة القادمة وما تحويه من صور...

انا منأكد انك هالمره مبسوط اللي سلمت من بعض العلوم ،لكن ماكل مرّه تسلم الجرّه ، والبركه في فخامه الشيخ الدكتور ولاّ كان علوم !!!

[ابوسيفين]

المشاركة الأصلية كتبت بواسطة @ بن سلمان @

تبي تشوف العيد إن خليتها لطرطشلي
متابعين معك ومع باقي الصور

الواد يقول ان عندهم فالبيت عنزات ويعرف معنى الراقوبه بس ترك الاجابه للمخاوي 0

[ابوسيفين]

المشاركة الأصلية كتبت بواسطة سنا الهجرة

والله يا دتكور مشعان ما ودي انك عرفت نقطة ضعف خويك
لانه عاجبني فيك

المهم ان موضوعك يفطس ضحك من اوله الا آخره

وصورة البراد شي صراحه .. المفروض حطيتوه في الجنادريه وانتم راجعين

حتى القرص أسود .. مدري كيف أكلتووه

هههههههههههههههههههه

ليه الشماته ياشاعرنا ؟ لك عندي علوم تعجبك ان كان ماهو فالحلقه الجايه فهي فاللي بعدها 0 يابو 0000!!!!!!