الصبر (بكسر الصاد والباء) .

[رويعي الغنم]

الصبر (بكسر الصاد والباء) . الصبر (بكسر الصاد والباء) . الصبر (بكسر الصاد والباء) . الصبر (بكسر الصاد والباء) . الصبر (بكسر الصاد والباء) .

يا ربعي البارح كنت في الديره في مناسبه (في الفرعه) , وكان معزبنا فارش لنا برى على نور عقد من مصابيح الكهربه , وكان الجو يميل للبروده لأن المكان مشعف وعلى مشراف .
ومكان مثل ذاك المكان ما يستغرب فيه الهوام صغارها وكبارها , لكنها ما تجي على بال أحد منا خصوصا اللي كانوا يعرفون مساري الليالي بدون ضو ولا حتى حذا في أقدامهم , ومعها كان بعضهم يحس كأن الدنيا حيزت لهم بحذافيرها , يعني ترون الغنى ماهو بكثرة الحطام , لكن الغنى غنى النفس والقناعه , والنهايه في يوم من ألأيام كل ما فوق التراب تراب .
ومثل عادتنا , كنا نسولف بعلوم بعضها صحيح وبعضها مملوح من اللي على بالكم , والبعض أغلب كلامه بهارات هنديه , ومصادرهم قيل وقال وبالسمعاء وانت رايح , وناسين أنه كفى بالمرء كذبا أن يحدث بكل ما سمع , وتقدرون تقولون , أن أبو نقشه هو الوحيد اللي من بينهم كان كلامه مثل ذوب الخنيفات (عسل النحل) ومصفى من كل أنواع البهارات 100%.



ما هذا المهم , أنما المهم , أنه مر على الفراش من قدام عرقوب بدر الدجى سارفه أعرفها , وأعرف أنها تقرص لكني نسيت أسمها , عدا بها أثنين من ربعي حتى ضلوا في يدين الفراعه , ما أدري حميه والا عنتريه , وعدى بها ثالث يبي يكسر عليها وعلى عرقوبي ترمسة شاهي , والظاهر أنه ناوي يدغلني في الطوشه بزعم أنه أخطاها واصابت الترمسه رجلي .
الخلاصه , بالشفاعات والرفاعات قبل الحاضرين شفاعتي فيها , وبالكاد أنقذتها ووقفت دونها , لبينما واحد من الصبيه الصغار جاب علبة فارغه (بلاستك ماء صغيره) وأصدرت توجيهاتي بحبسها فيها وربطها في تبع حماري حتى أجري عليها فيما بعد بعض ألأبحاث النوويه مع البسيسات اللي تخبرتوها .
رمقني بعض الحاضرين بنظرات فيها ألأستغراب وفيها الأنتقاد , لكن هيهات , وشرهتكم على اللي يعير أحد بال والا أهتمام في شي يرضي الله ولا يجلب سخطه , وينور لعباد الله من الجيل اللي ما يعرف الا الصراصير .
يا سيداتي وسادتي , حشرتنا هذي من الحشرات اللادغه , كبرها في حجم الدبر ألأحمر لكنها ما تطير ولا لها أجنحه , سألنا عنها الحاضرين وذكرونا بأسمها وهو الصبر .
لسعت الصبر تماثل تقريبا لسعة النحله , يعني ماهي خطيره للي ما عنده حساسيه , لكن المشكله أنه من الهوام الدابه اللي تعيش في البر وتدخل المنازل المنعزله عن بقية العمران على غره وبدون ينتبه لها أحد خصوصا في فترات الظلام والليل واختلاف الحيل .


وفي صباح هذا اليوم ألأغر صورت لكم الصبر , وأطلقت سراحه خارج البيت أبغيه يوسع صدره ويتمشى لبينما أجهز المختبرات بأدوات التشريح والمجهريات والمحاليل النوويه, لكني بعد رجعت للمكان اللي تركته فيه ما لقيت الماخوذ , يبدو أنه هرب وضاعت علينا فرصة الدراسات المخبريه .
والى هالحد نتوقف , أما بقية المعلومات عن الصبر أناشد ألأخوان المتداخلين وخصوصا الشيخ سلام والدكتور مشعان وابن همام وابو عبدالرحمن أنهم يعطونا من ما أعطاهم الله عن هذا الصبر من النت والا من الكتب اللي تبي تاكلها العثه في مكتباتكم وهي ما أحد لمسها , وشكرا ..

[رويعي الغنم]

[صقر قريش]

بيض الله وجهك علومك كلها غانمة
بس ياشين الرجال ابو شنب ويخاف من صبر

[الحاج سلام]

الله يهديك يااخي رويعي .

هو بدر الدجى اللي اخذ السارفة والا انت . او انني مافهمت القصة .

هو عندك حمار انت الاخر ؟

المهم الذي اعرفه ان الصبر الذي يؤخد من نبات الصبر المشهور بمرارته هذا الصبر يستخدم علاج للدغة الحشرات .
فربما ان الناس سموا هذه الحشرة صبرا
لانها تستدعي جلب الصبر الدواء .
هذا مبلغي في علم الحشرات .ربما لدى المختصين علم آخر ,,,,

[ابوسيفين]

ماشاء الله عليك ياشيخنا ، هذا التّقرير اللي تقول إنّه فُقِد منك جايبه صاحبك ومع العجله نسي يعدّله ، والآن إنكشفت مؤامرات الرُّويعي وأبو عبدالرّحمن ، والله كنت أحب الرّويعي إلين تبيّن لي إنّه يكيد لك 0والحاج يطبلّه عشان يضيّع الموضوع 0

[أبو عبدالرحمن]

أنا دخلت على ان الموضوع نبات الصبر!!!

وأكرر بالدعاء لك بالهداية ..

يا سيداتي وسادتي

واش اللي حصل في مخك يا رويعي الغنم لما تقدم السيدات عنا ..وتخاطبهن !!!
أكيد أن أبو نقشة سارق معرفك
وما هو اللي أنت سارق الموضوع

لكن طالما الحديث عن الحشرة..فهذا اختصاص لا أفكر فيه أبدا!!!

وخذوا هذه الحشرة من وادي الضيق!!! ونحتاج معلومات من رويعي الغنم عنها ـــ قبض عليها أحد أفراد الرحلة..

[منقاش]

أني أبو نقشه , يا مشرفين من متعاطي الدنقه اللي غير أسمي وحط بداله أسم رويعي الكلاب ؟ .
تكفى يبو عبدالرحمن يا عزوتي , غير الكاتب من رويعي الغنم لبدر الدجى , ولك مني أني أدهن سيرك من أول زيت وتمر يهديه عليه الزفت المخاوي ....
عجل يبو عبدالرحمن , وبلاشي فضايح ......

[أبو عبدالرحمن]

ماش يا بو نقشة..لا سير ولا دهن..ولا حتى شجرة العدين

يداك اوكتا وفوك نفخ..

علمي وسلامتك,,,

[منقاش]

حسبي الله عليك يا رويعي , كنت أسمع عن الهكر , وأسمع أنهم بحبشوا حتى في ملفات البنتاقون في ديار أمنا أمريكا .
لكني ما كنت أدري أن ثماله فيها هكرها اللي يقدرون يغيرون أسم الكاتب ويحطون بداله كاتب ثاني , وآخر شي كنت أتصوره أن ابو نقشه يكتب وغيره يلطش كتابته حتى بدون يغير لو حرف واحد منها , ولا نقول , ألا ان الساعه قربت تقوم .
عموما , أنا تقدمت بشكوى ضد المشرفين والرويعي على الست نانسي , وعلى عمر ولد حياة موسى .
وهالحين بعد هالمقدمه المختصره عن الفضيحه اللي بجلاجل نعود لصوابنا ونعطيكم جوابنا :
اخويه صقر قريش : ووجهك أبيض , وانت سالم وغانم أن شاء الله , ومشكور على الرد , أما الرجال فيها من يخاف من الصبر وفيهم اللي يدخل الثعبان في سرواله ولا يحرك شعره من راسه مثل بدر الدجى وعرعرة المنتدى في قصة غزة العزه .
باحثنا الشيخ سلام : بطلك من اللف والدوران والمؤامرات اللي تشترك فيها مع الرويعي وابو عبدالرحمن واعترفوا بالجريمه , وبلاشي تقتلون القتيل وتمشون في جنازته , وثاني مره وجه كلامك لبو نقشه واترك صاحبك رويعي الغنم .
وهو من متى فيه بدر دجى غير ابو نقشه ؟, ومن متى فيه أحد عنده حمار غير عرعرة المنتدى ؟ .
وعلى كل حال , مشكور يا باحثنا على المعلومات اللي أضفتها , ولا أقول الا ,
تجمعت الحشرات على خراش @@@ فما يدري خراش ما يصيد ..
حليفي الدكتور مشعان : صدقت , التقرير فقد مني بعد ما كتبته , لأني نزلته أول مره في البيت الكبير , وبعد ساعه دخلت البيت ولا لقيت التقرير في مكانه لكني لقيت مسحبه ولقيت جرة الحرامي, وبعد قعدت أتصرفد من منتدى للثاني لقيته مجدوع في منتدى الفطريات وزياده مغيرين الكاتب لرويعي الغنم , ولا أتهم في هالجريمه النكراء ألا الثلاثي اللي ذكرتهم .
لكن ما علينا منهم , وكما يقولون , حبل الكذب قصير , واللي ما ينكشف اليوم ينعرف بكره , ومشكور على ردك , وعلى حرصك على دعم حليفك وكشف الحقايق , وفضح المتلاعبين .
ابو عبدالرحمن : رايح تعض على أصابع الندم أصبع أصبع , وتمنى لو أنك سويت كل اللي قال لك بدر الدجى وعرعرة المنتدى , وألأيام بيننا , وخلي حليفك الرويعي يومها ينفعك ...

[ابوسيفين]

يارويعي الله يصلحك ، أرجو بعد أن توضّح الأمور حول بعض المفردات اللتي أثارت الشُّبهه حول من هو مُعد الموضوع الحقيقي أن ترجع الى الشّيخ وتسأله هل هو (( الصِّبر بالباء)) أو ((الصّمر بالميم )) ويظهر لى أن الأخيره هي الصحيحه 0