عسى الديره ومن فيها فداك / الحلقه الثانيه.

[منقاش]

عسى الديره ومن فيها فداك / الحلقه الثانيه. عسى الديره ومن فيها فداك / الحلقه الثانيه. عسى الديره ومن فيها فداك / الحلقه الثانيه. عسى الديره ومن فيها فداك / الحلقه الثانيه. عسى الديره ومن فيها فداك / الحلقه الثانيه.

تذكرون في الحلقه ألأوله أن ولد حياة شلوموا أبى من عزيمتي , وقال أن قهوته ألسماح له يشيل البلاوي (البترول) من تحتي وتحت مزرعتي قبل تجي الفاس في الراس وتميد ألأرض وتبتلعني ويغرق الجمل بما حمل في الزيوت , ويصبح المناقشه (آل منقاش) مضحكه للعربان وسالفه للركبان .
وتذكرون أني بشرته وقلت له عسى الديره ومن فيها فداك يا ولد شلومو.
بعدها سرحت وانا جالس معهم في أفكار وقلت في نفسي والله أسرجت في وجهك يا منقاش , ولو كانت مجاديك تمجدك وعندك كم قرش كان أشتريت محطة بنزيم وحطيتها في طرف واديك وركبت على البير مكينه ديزل سطحيه تشفط بها البترول من تحت الارض وتبيع على الرايحين والجايين بنص القيمه وتكسرعلى أهل المحطات .
وحد ما أنا في هالأفكار أصب واحقن فيها واضرب أسداس في أخماس الا وسويد الوجه رويعي الغنم طاب علينا , سلام وجلس في وسطنا وأقر أذنه كما المحقن يتسمع في كلامنا هو وقلال الخاتمه الثانين المشاكس والمخاوي ..
مالكم في طوالها ,, ناظرت في ولد شلومو وقلت يا ولد عمي , ويش تبون تعطوني من قروش البترول بعد تطلعونه ؟, جاوبني وقال : فالك السعد يا منقاش , البترول نبي نأخذ نصه على تطليعه حتى فم البير , ثم ناخذ نصف النصف الباقي على نقله حتى مواني الشحن , ثم ناخذ نصف النصف ألأخير على نقله في سفنا وتسويقه في أسواق البترول , يعني يصفي لك نصف نصف النصف .
قلت : يا ولد شلومو تراك برمت براسي حتى دخت ولا قدرت أفهم حسابك ,, تكفى فهمني الحسبه بالبداوي ,, يعني قلي مثلا يصفي لك نصف والا ثلاث أرباع .. رد عليه وقال : يصفي لك الثمين بشرط أنك تحفظه في بنوكنا بالدولار حتى لا ينسرق عليك من ربعك الحراميه .
كان رويعي يميل عليه ويحط فمه في أذني ويهمس فيها ويقول : لا يضحك عليك ولد بني كينكاع ,, قل له الثمين عندنا ورث المره أذا مات عنها رجالها , وانا ما أنا مرتكم مرمرتك مروه بنت مريمر ,, وان كان تبون البترول طلعوه ولكم الزفت بس ,أما البنزيم والديزل وباقي البواقي تبقى لي , والا خلو بترولي في أرضي لورعاني من بعدي . وترى بقاه مخزون يبي يزيد في غلاه مثل الشاه اللي تسمن في المعلاق .
ويوم قلت كلام رويعي لولد شلوموا وهو يزعل ويزبد ويربد ويتهدد ويتوعد ويقول : قبلك يا منقاش صدام يوم لوى ذيله وعصعص علينا قطعنا راسه , وبعده بشير السودان يوم تعكعك معنا وراح للصوانيه شوفنا نعكعك فيه .
كان رويعي يقوم وياخذ شلومو بيده ويقول : وسع بالك يا ولد عمنا وتعال أبغيك بيني وبينك في هرجة راس نصلح بها بينك وبين منقاش .
غابوا عنا شويه ولا ندري ويش قالوا لبعضهم , ثم عودوا علينا وتكلم رويعي وقال : شلومو أقنعته يروح لشركاه ويشاورهم في النصيفه لمنقاش ويرد علينا بجواب , والبترول يا منقاش ذهب مكنوز تحت ألأرض ما هو رعية غنم تبي من يسرحها ويضويها ويحميها من الذياب ويضرمها ,, لالا , هذا كنز وكلما بقى كلما زادت قيمته .
حاول المشاكس والمخاوي يتلقفون ويقولون كلمتين لكني ألتفت عليهم لفته شينه ونهرتهم وهزأتهم وقلت أنطموا ولا كلمه يا برابسه , وترون منقاش رايح يشره الناس كلها ويعطيهم منايح من البترول الا أنتم يا هالأثنين ياللي ما أنا قايل محرم عليكم نقطه واحده من بترولي , وخلوا أبو العوينتين صاحبكم أبو أمجد وباقي الشله ينفعونكم .
أفترقنا على هالكلمه , وبعدها ركبت حماري ومشيت في دربي , وزاد لحقني في السكه المتاعيس المخاوي والمشاكس ياخذون من لحيتي وخشمي ويسلمون ويترجون فيه للمسا وواجبي ,, قلت لهم تنحوا عني بعيد ,, وهو من متى يا مروحين عمركم عزمتوني والا وجبتم لي قبل تعرفون أن عندي بترول؟.
أنتشر الخبر كما يوم تنتشر النار في الهشيم وجلست بعدها أشهر وأنا أعيش عيشة الملوك معزز مكرم من القاصي والداني ما أحد يرد لي كلمه ولا جاه , ويداروني الناس كما يوم تداري البيضه لا تنكسر , ويتنقلوني ربعي ومعارفي من غدا على ذبايح عند هذا الى عشا ذبايح عند هذاك , واذا سولفت الكل ينصت وينعم لي, وتغير حالي لأحسن حال وانا ما عمري في ما مضى لي من عمر وجب لي أحد والا أستجنبني والا قبل جاهي . ولا أخفي عليكم أني أحسيت بزود في نفشي , وسرت أشوف الناس كما الذبان والصراصير, وكنت أهوجس وأقول أول ما تمتلي يديك يا منقاش قريشات أترك الديره واهلها وأرمي عليها ومن فيها بسبعه حصى وروح عيش مع ناس مريشين مثلك حتى لو كان عند عيال العم في تل أبيب وحيفا ويافا .
وبعد أنتظار كم من شهر الا وولد شلومو يدني في معداته ويكوم فيها في مزرعه لرويعي الغنم يفصلها عن مزرعتي جبل (منحيه عني مسافه بسيطه) , حسبتهم في البدايه غلطانين في المزرعه لكن بعد سعلت شلومو طمني وقال : أول نبي نشفط شوية بترول ماهي كثيره عند الرويعي أبلشنا فيها وهي ما تستاهل أتعابنا ثم بعدها نبي نحول يمك .
أثر رويعي الكلاب غدر بي مع ولد بني كينكاع يوم أختلى بشلومو بزعم أنه يوفق بيننا ,, واتفقوا يحفرون من مزرعة رويعي بالمايل (يعني على جنب كما يوم سوا الكويت ببترول العراق) ثم يشفطون بترولي وانا يا غافل لك الله , ويعطون رويعي نصف الثمين بدل الثمين اللي أبيت منه ..
وشهر وراء شهر وسنه وراء الثانيه وولد شلوموا يصبرني ويمنيني ويواعدني بقرب الفرج , وبعد مده طالت الا وهم هاك اليوم يرحلون في معداتهم بعذر أن الشركه حلوها وباعوها ويبي يجيبون غيرها ,, وبعد مراجعات ومرافعات وحدره وسنده وتعوب طالت وعرضت أكتشفت أن البترول أنسرق من تحتي وشفطوه كله بالمايل من مزرعة رويعي الكلاب الخاين , وتركوا مكانه تجويف فاضي تحت مزرعتي يمكن ينهار بها يوم من ألأيام ويبتلعها . واكتشفت أن العمده كان عميل لبني كينكاع وان له نسبه حطوها له في حسابه في بنوك الخارج .
صحت ونحت وشلحت ثيابي ولا خليت باب حاكم ولا محكوم الا طرقته أطالب بحقوقي لكن انبح صوتي بدون فايده , وبعد تعبت وفترت أستخلفت الله , واللي زادني غم على ما بي من غموم أن الناس أول ما عرفوا المقلب اللي وقعت فيه كثر عليه الشمات والمتشفين , وتنكر لي القاصي والداني وهجروني بعد العزايم والولايم يوم كان في وادي منقاش بترول.

[فارس الظلام]

الأخ منقاش
حقيقة رواياتك فيها من الإبداع والطرافة والجرأة الشيء الكثير كما أنها تحتوي على أهداف سياسية واقتصادية ترسم بإيجاز ماقد يحصل في هذا البلد, وهذا يدل على أنك شخص مثقف وملم بأمور كثيرة في هذا الشأن قد تخفى على الكثير منا.
ولكن نود ان تبتعد عن الكتابة بلهجتك العامية البحتة وان تكون كتاباتك باللغة العربية الفصحى حتى يتسنى لكل من يدخل الى مواضيعك فهم كل ماترمي اليه هذه الشخصية الفذة ذات العقلية الجبارة المتخصصة في هذه الأمور من وجهة نظري وشكراً.

[مخاوي منقاش]

وانا انصحك بالمغفل وطول عمري اقول انك مغفل ولا انا عمري ما خضعت للعم سام ( يد الصهابنه الطولى حول العالم)وانا لي اهداف استراتيجية ماني مثلك الدولار يلعب براسي مثل مايلعب رولاندينو بمدافعي ريال مدريدانا عدو الصهاينه وامريكا وهمي القدس وتحريرها والي يبييسوي اتفقات تكون ورا الابواب المغلقة على شان مايجي سقط القوم ويقلبون الطاولة علي فالصداقة عندي مصلح والاعلام وحربه هو الغطاء نتدثر بة واحيانا نوصلها للخشوم اما الناس ومندوبيينا يلعبون البوكر في ادغال صالات لاس فيجاس ومن رفع راسة لوحنا له بالننووي السياسة يا ابو نقشة لعبة كبار وانت الغب مع الصغار واتركني للمهمات الكبيرة اقلها افضحهم اما الشيخ شبلي والمشاكس

[الشيهان]

الحمد لله رب العالمين اللي اعطاك على قد نيتك يامنقاش
حذرتك وانذرتك في مداخلاتي على الحلقه الاولى وقلت لك لاتبيع ربعك وديارك للصهاينه يامتصهين
وقلت لك ان نهايتك لن تكون على قدر عالي من الجمال والبهاء
لكن انت اصوك ولاتفهم وهذي مشكلة البدوا اذا طفحت كروشهم من النعمه ماعاد يلهمون خط الله ويحسبون انهم اللي ماكماهم وهم فنش في فنش
بسبب الخيانه اللى نويتها سلط الله عليك من هو اخون منك وشفطوا زيوتك من تحتك وانت فاتح فمك ولاهي غريبه عليك طلعت مثل حمارك عربي اصلي وهذا مثال حي للحمير العربيه ومستوى عقولها يوم انها تخلي الغريب يلصغ عليها وتنكع بربعها
حلال فيك ماجاك ولكل خاين نهايه والهبلان اللى ضيفوك وكيفوك وقضوا حياتم يضربون لك السلام مع البيبان والشبابيك تراهم اول الشامتين عليك لانهم ماحبوك الا لمصلحه وانت عارف ليش تزعل من هجرانم وانت خاين لهم من قبل
وحده بوحده والبادي اضلم

[مشاكس]

يامنقاش ماللحب المسوس الا الكيال الأعور
وبعدين قل للمخاوي يامكثر مقاتيلك
أول الدروس فيك من زمان بس مسوي انك فهلوي

[مخاوي منقاش]

اخوي ابو امجد انت تنفخ في قربة مشقوقة وانا عرفت لمنقاش ما احسن من خصرة(اغفاله)00
المشاكس /حلوة الحب مسوس والكيال اعور يعني من الزبيل الى الارض وبعدين تراني متواضع جدا يمكن توجه الكلام لي مباشرة واترك الرمزية قبل ما اقول لك فك من خيلك (قصدي حميرك عشرة )ولا تخلي منقاش واسطة لان منقاش معروف بنشر الشر بين الخلق وهي بضاعتة الثانية بعد جمع الدراهم الخظراء0
الاخ فارس الظلام/ اولا هو لايحسن الا هذه اللغة وثانيا- تراه مامن عقل (ملعابة )اذا احد شجعةوالله ان تلقاه مشرشح اللي على بالي علنا والنتيجة الحبس

[منقاش]

يا الله مسا خير , يالله تكفينا شر عيال الحرام وبنات الحرام .
فارس الظلام : كلامك قهر الحساد وفقع قلوبهم وجا عليهم في مقتل , واشكرك على معرفتك لمعادن الرجال ولا هي غريبه على شرواك , لكن من يفهم الناس اللي ما تفهم ولا فيه أمل تفهم أمثال المشاكس والمخاوي وابو أمجد وباقي الشله التعبانه .
بخصوص سوالفي تراها ما تخص بلد معين أو شخصيه معينه , وغرضها ألأول الترفيه والتنكيت مع شوية مضمون , وموجهه لقله قليله يرتادون الأستراحه يبحثون عن الوناسه وتوسيع الصدر لا غير , وهذي القله القليله تفهم التقعر في العاميه ولا تحب الجد ولا اللغه العربيه .
الزبده : أشكرك على حسن ظنك بي ,ويسعدني أنك من اللي يقرون ما يكتب منقاش ويستمتعون بسوالفه .
مخاوي منقاش , أبو أمجد , المشاكس : ما أدري متى تعلمون الذوق والأدب وتصبحون أوادم وتحترمون سيدكم منقاش ,, ولا أدري متى تسيرون رجال مثل فارس الظلام وابو عبدالرحمن وابن سلمان وراعي السواني ومحدثكم منقاش وتتركون عنكم البربسه والمبربسين يا حراميه يا قطاع الطريق يا مشلحه. والشرهه ما هي عليكم , الشرهه على اللي يعبركم ويرد على خضارطكم .

[بن داخل]

مخاوي منقاش
والله ودي أطلع لك كلام زين بس لساني مايطاوعني
والسبب قليل الخاتمه خويك
تدري باصبر عليك أنت والاخويك ماله الا النار الموقدة

[أبو عبدالرحمن]

معوض خير يا شيخ منقاش..

شوف هذه المرة الثانية بعد المائة اللي الرويعي يضحك عليك!!!طيب إلى متى؟!!!

وبعدين ألف مرة قلنا لك ما لك إلا جماعتك خلك قريب منهم...شوف أش حصل لك الآن؟! القريب قبل البعيد طردك!!!

على العموم . لا تنس صلاة الجمعة تكلم الفقيه يطلب منهم السماح لك..

[شبلي أبو الونات]

يا منقاش المتعوس متعوس لو علقوا في راسه فانوس
اما مخاوي منقاش ملتم على المتعوس يعني خايب الرجا ومثل ما قالوا التم المتعوس مع خايب الرجا
عشان كذه يا مشاكس على قولة محمد رضا ( هي كلمة ) طول ما تدي ظهرك لمنقاش ومخاويه عمر العلوم الردية ما تجي دربك
هذا منقاش وهذا مخاوية ولا يهون ابو امجد والذي هو من شيعة مخاوي منقاش وبالتالي هو مخاوي منقاش اس 2
وكل ما يدور ما هو الا مسرحية فلا تكن حاجب الستارة او من يؤدي دور المصفق
اعرف انك لك من اسمك نصيب , لكن عند الحق أواب