من لهذا الشرف ؟؟؟....

[منقاش]

مراسلنا العزيز هدانا الله واياه الى سواء السبيل :
ليش تحرم ما أحل الله لك ؟, وليش زدت طبلتها على ماهي مطبله واخذت العهود والمواثيق على من اخذت من الأخوان الأعزاء ؟. ثم يوم انك أخذت العهد على نفسك ليش تحنث بعهدك ؟ ؟, ثم ليش تغدر بالمعاهدين وتنكث عهودك معهم ووعودك لهم ؟.. هذي الأوله ...
الثانيه , الأمور كلها هروج تروح وتجي وتطلع وتنزل ولا توجب احد منا يقاطع الثاني او يحرض الثالث على مقاطعة الرابع , يعني ما فيه لا دم منثور ولا عظم مكسور , وكفر عن يمينك وافعل اللي هو اخير , ورد على ابو نقشه وعلى الرويعي ولا حرج ..
الثالثه , تقول أنك بينت لي السبب أكثر من مره , وهذا بهتان بسيط , وان كنت واثق من كلامك ومتأكد من بيانك من فضلك وريني ولو مره واحده بينت لي فيها سبب والا سبيب؟؟..
الرابعه , حليفنا العمده المقداد اعرفه بمعرفه واكن له موده لكني والله ما أعرفه بشخصه , يعني مثلك سواء بسواء , من أجل كذه كيف تبيني أسأله ؟, وليش تطلب مني أسأله والسؤال موجه لراعي الشان وهو أنت؟؟ ..
والزبده : ذكرت لنا أنك نزلت أسماء مواقع على القوقل , والمطلوب منك هالحين أنك تعطينا رابطها حتى تبرهن لنا على كلامك وحتى نستفيد من تجربتك , والا اسحب كلامك واعتذر من الرويعي واعتذر لبقية القراء , والا حولناك للمخاوي لأجراء اللازم حسب المعتاد في مثل هالمناسبات , وشكرا....