بطل التطبيع / الحلقه السادسه .

[منقاش]

بطل التطبيع / الحلقه السادسه . بطل التطبيع / الحلقه السادسه . بطل التطبيع / الحلقه السادسه . بطل التطبيع / الحلقه السادسه . بطل التطبيع / الحلقه السادسه .

اللي فيكم قرا مداخلاتي على الحلقه الخامسه لابد انه عرف أن غارة المداس اللي قام بها عيال الفقيه على آل الرويعي , وغارة الكنتره اللي أغارها المخاوي على المشاكس ولعتها حروب وثارات وعداوات بين آل الفقيه وآل الرويعي , وبين آل المشاكس وآل المخاوي , وكذه دارت عجلة المشاكل والمصارعه والمفارعه بينهم , وولعت نار ألأحقاد في قلوبهم وعسكر دخانها على روسهم وساروا هم حطبها ولا بقي لهم أمل في أحد يطفيها بعد الله ألا الشيخ منقاش .
وكذه غفلوا عن قصة منقاش مع الصهاينه , والتهوا بأنفسهم واصبح اللي فيهم كافيهم , ونجحت سياسة فرق تسد , وأثمرت خطة المداس والكنتره أحسن ثمره , ولا بقي شي نحتاجه ألا شوية من ذر الرماد في العيون حتى تعمى عيونهم بعد عمى قلوبهم ,ويفقدون البصر بعد البصيره .
تجمعوا عندي الجماعه في العزيمه كلهم , وأغلبهم ما جاء ألا على أمل أن منقاش يطفي لهيب الفتنه اللي شبت بينهم ,, والمساكين ما هم دارين أن منقاش شبابها , وأن عشاهم اللي على النار من أسبابها ..
جلسوا يتشابحون في بعضهم والشرار يتقادح من عيونهم يهمون يتناقزون على بعضهم ويتفارمون من الكرهه اللي حلت بينهم .
والحقيقه أن فترة ما قبل العشى خيم عليها الهدوء وعمها السلام ألا من حادثه واحده في اللحظه اللي كانوا يفرغون فيها العشى , والسبب أن المشاكس والمخاوي تلاسنوا مثل عادتهم على توزيع اللحم , ونهرهم قايد الطابور وزادوا تلسنوا عليه ولا كان منه الله يهديه مع الزعل ألا أشتال ألأثنين سما بيديه الثنتين كل واحد في يد ورمى بهم , ولا وقع المخاوي ألا في القدر الكبير اللي طبخوا فيه الحاشي , ومن حسن الحظ أنه كان نصفان مرقه وخالي من اللحم ,,, والمشاكس ما وقع ألا وسط صحن كبير مليان رز سليق حار يتوقد وفوره يصل السما .
طبعا ما تعشوا وارسلناهم للمستشفى في عربية المشاكس , وبلغني فيما بعد أن المخاوي أنزلط من محزمه ونازل , أما المشاكس يروي لي أبو أمجد وهو ما يكذب الا نادر , يقول ألراوي أنه شاف المشاكس مصلوخ أحمر كما قياح (قرد البابون) , وشاف له عويل يصيح ويطلب الممرضات يرفعون عليه المروحه ويوجهونها حتى تبرد عليه .
وقبل أنسى , ونحنا جالسين في العزيمه كان قاعد قبالتي غليم من الجماعه يسمونه ابن داخل ويقولون أنه رزين وعنده شوية معرفه ,,, سعلني بعد شاف الليله القشراء اللي سرت على المخاوي والمشاكس وقال : أقول عساني فداك , يا صبرك ويا حلمك يا شيخ منقاش علينا يا ربعك ؟, رديت عليه وقلت : ويش السواه يبن داخل ؟ , أن رفعناها في الشارب وان أرخيناها في اللحيه , والمثل يقول خشمك منك ولو كان أعوج .
تعشت ربعي وشفتهم يبون يبثون علومهم عليه وهم ما يدرون أني أبغيها تعقد عقد من ورا عقد ولا يخرجون من مشكله ألا وهم في أطم منها.
ما أعطيتهم وقت بعد تعشوا ,, كنت أتنحنح وأتسيعل شويه وأقوم واقف في وسطهم وأتعذبل من الشيطان واسمي بالرحمن ثم قلت : يا ربعي ويش بلاكم وانتم كنتم من أحسن القبايل وعوتم ترتكبون أكبر الخبايل , يا ناس أكلتكم الحروب والعداوات والشحناء اللي شبت بينكم , وترون الليله ما فيه طلايب عندي ولا دورة مذهب من على فراشي ,, أنا عزمتكم وجمعتكم ووجبت لكم محبه فيكم ,, وفتشة الفتن اللي جات بينكم بعضكم غايب في المستشفى عنها وهو طرف فيها مثل المشاكس والمخاوي ,, وحتى لو كانوا حاضرين ما هذا مكان أخذ وعطى ,, ودعاويكم على بعضكم يبي لها ليالي في سد ليالي ومجالس تعقبها مجالس على فرش وفي بيوت المتخاصمين حتى ننظف الطرفين.
وبعدين عساكم سالمين , وهو فيه صداقه ما يسبقها عداوه ؟, خلوا السعه في خطركم والمشكله اللي ما تنحل اليوم تنحل بكره , واللي راح عليكم من بقر والا جمال والا غيرها ما راح عند أجنبي ,, ما راح ألا عند عيال عمكم ,, يعني من سمنكم في يديمكم ومنكم فيكم دامت عوافيكم ..
واهم شي شوفوني أحذركم ثم أنذركم من العماله للصهاينه وبيع دياركم على اليهود مخلين الوعود وناقضين العهود .
كنت ألتفت على الفقيه واقول : تكفى يا فقيهنا أبغيك تخلي خطبة الجمعه الجايه عن سرقة الرفيق لرفيقه وعن فتن الجماعه والدنفسه والدغفسه اللي ماتنتهي بينهم , وابغيك تحذرهم من الغيبه والنميمه حتى لو كانت في اليهود ,, وانصحهم عن اللسلسه والفسفسه واللولسه عند بني صهيون .
وتراني رايح أحضر خطبتك بنفسي حتى أزيد أقول معك كلمتين أن قدرت , ويا ليت بعض شعارنا يطلعون معك بين الخطبتين على المنبر ويلقون كم بيت من الشعر يسبون فيها أسرائيل ويلهبون مشاعر السامعين .
رد الفقيه وقال : يا شيخ منقاش أوافقك ألا في اللغو من شعر والا غيره والأمام يخطب , هذا يفسد على اللاغي جمعته ,,, والمسجد للعباده ما هم للزياده , أما الطلايب والأشعار خلوها في بيوتنا ماهو في بيت الله .
لكن أبشر بسعدك , الخطبه رايح أخصصها عن الفتن ما ظهر منها وما بطن , وعن صلة وقطيعة الرحم , وعن فلسطين السليبه واليهود الملاعين واعوانهم المتصهينين والعملاء الخونه المندسين في وسط ألجماعه.
رديت عليه وقلت : يا فقيه قول في العملاء واليهود اللي تبي , بس أنا داخل عليك لا تدعي عليهم يمكن الله يهديهم يوم من ألأيام ونسير نحنا واياهم كما عيال الرجال الواحد .
الى عند عيال الرجال الواحد أتوقف بكم , خلوكم متابعين مع منقاش حتى تستقصون سالفته الى النهايه في الحلقات الجايه , وسلامتكم ..

[منقاش]

تكفون يا مشرفين كبروها الله يكير قدركم ..

[سنا الهجرة]

لن أقرأها حتى يتم التكبير

[أبو عبدالرحمن]

الله أكبر عليك..أشوف الخط كبير..

راح علينا المشاكس!!!

[شبلي أبو الونات]

أنا بكره اليهود
هييييييييه
وأنا بكره منقاش
وسلام الخشاااش
الخشاش
الخشاش
هييييييييييه
أنا بحب العرب
وبغنيلهم طرب
وبدعي على اليهود
يصيبهم بالجرب
جرب
جرب
هييييييييييه
هذه قصيدة أعطيتها شعبولا شعبان عبدالرحيم يغنيها وقريب ان شاء الله تبون تسمعونها

[@ بن سلمان @]

البغيض منقاش
خذ هذا الرابط
http://www.thomala.com/vb/showthread...435#post138435

[سنا الهجرة]

علومك طيبة يا منقاش لو كان خافيك مثل باديك

ما أقول الا الله يصلح الشان ويختار ما فيه الخير

وترى القصيدة نزلت برعاية الله وحفظة وفيها من المدح في شخصكم مالله بهي عاليم

ولا تواخذني في القصور فأنتم أكبر من ذلك ولكن هذا ما جادت به القريحة وانت تعرف القيحة




فاصلة :


وااااا غبني عليك يالمشاكس


والله انك ما تستاهل اللي جاك

الله يصبرك على بلواك ( تخبرون السليق وهو حار كيف يلسع لسع )


أما المخاوي ما عليه خلاف يقولون يعرف يسبح زين في المياة المالحة

[منقاش]

أقول أقرا القصيده وموت بغيظك يا مخاوي أنت وحلفاك وبطانتك اللي خبلوا بك .
والحقيقه لو كنت مكانكم كان أنتحرت وتخلصت من نفسي لأن الموت أستر من الحياه في بعض ألأحيان ومنها هذا الحين.
صح لسانك يا سنا الهجره وكثر الله من أمثالك

إنحنى راس القلـم قـدام انامـل سيـدي منقـاش
والحـروف مروضـه فـي خدمـة الحـر الابـي
صانع الامجاد ... من أوسع ميادين الحضـارة داش
ماترك للمجد باب ... وملتزم فيما نهج هدي النبـي
هكذا رمز العلوم وصانع الامجاد لـو مـن مـاش
لو برز يبغى المراجل جـات ... لـو تحبـي حبـي
شهم عند السلم يعطي كاش وان خذ ماخذ الا كـاش
ما تأخر في اللزوم ولا توانى عن مسانيـد الضبـي
ضابط الحكمة على النغمة مبرمجها مسلسل طـاش
وانبرا للعلم حـرب وسلـم ... سهـم(ن) لولبـي
ماهو مثل اللي ليا شاف المصاعب مقبله ينحـاش
مجتهد في حل كل المعضلات يسوسها ماهو غبـي
عاش شامـخ راس يـوم ان الـردي مـا عـاش
مابدا منه انتكاسة ذل ... والا أعطى لخصمه مايبي
ممتطي صهوت (حمار) من التواضع لو بدا معتاش
والكرم بينه وبينه حلف لا جا الضيف قرم مجربـي
وان تلاماله خبل يصبر عليه ولا يهوش ان هـاش
لين تاصل في المواصل حدها ويثـور دم اليعربـي
واستبيحك في رسالة قلبٍ ابيض من بياض الشاش
مقصـدي فيهـا خصومـك ... مـا بـزل بمطلبـي
ماني اللي قال صاحب صاحبي(صاحب) ولو هو لاش
وخضم خصمي صاحبي لو هو ردي عنـدي صبـي
منهجي تقدير راعي العلم مثلـك سيـدي منقـاش
كل صاحب علم له تقرير يامنقـاش هـذا مذهبـي

[مخاوي منقاش]

اولا انت يامنقاش دايم تكرر ( ان رفعته للشارب وان خفظته للحية) ابي اسالك وش قصتها وان عجزت اسال راعي العلوم البرقةابوهبه؟
الفصة فيلم هندي يحتاج قصقصةيامنقاش 00
نكمل بعض مشاهداتي عن رحلة ام رقيبة00
ام رقيبةتجمع اعتبرةبورصة مفتوحة للابل يحتاج الى التنظيم والمراقبه والاهم التوقيت المناسب والمفروض يكون وقت الربيع وسلخ اي مظاهر عنصرية فوحدة الوطن فوق كل شيء 00
لاشيءيلفت الظر سوى الاسعار الكبيرة التى يتداولها الناس والتى قد يكون مبالغ فيها وقد قابلت ناس من الجماعة امام احد النياق وكان معهم مصري مدرس قران فقلت له شف ياستاذ مصطفى الناقة هذه بمليونين فمط برطمه(انبسط يابو هبه)من التعجب ثم سالني يطلع الكيلو كام؟
وللحديث بقية

[منقاش]

يا مخاوي لا تسعلني الليله وروح أقرأ أول قصيدة البطل سنا الهجره واحزن على حالك أنت واصحابك المشاكس وابو أمجد .
وسعالك أسعل عنه صاحبك ابن سلمان لا سامحه الله في ألأبيات اللي أفترى فيها عليك ومدحك بها ,