بطل التطبيع /الحلقه الأولى.

[منقاش]

بطل التطبيع /الحلقه الأولى. بطل التطبيع /الحلقه الأولى. بطل التطبيع /الحلقه الأولى. بطل التطبيع /الحلقه الأولى. بطل التطبيع /الحلقه الأولى.

هاك اليوم أضحى عليه النهار وأنا في راس واحده من عطايا الله (البرشومي) , وكان في يدي مكتل أجمع فيه شفوي وأتبرشم وانا فوق (يعني آكل برشومي) , وكان المروح مخاوي منقاش تحت البرشوميه يتنظرني أنزل حتى أعطيه كم حبه من بكاير الشفوي المكعبر , ويوم أغثاني بالدوخه وانا أسوقه بهاك الحبه البرشومي اللي ما تقول ألا قنبله يدويه وعل أولها ولا أنطشت ألا بين عيونه , ويوم شافني ناويه بالثانيه وهو يعطي سيقانه للريح ما تقول ألا غزال ويذلف عني .
وكنت أحيان أوقف وانقي ألشوك من جلدي واقتل بعض القذان اللي تخرج من أكمام وترقيبة ثوبي , وأحيان أقلبها طرب وأردد في الحدايا والقيفان والزهم والطروق اللي كل طرق ما يشبه الثاني.
وحد ما أنا على هالحال ,,, وعلى غفله مني ألا وهاك الرجال ألأحمر اللي باتغني من ورايه وينادي من تحت البرشوميه اللي كنت في راسها ويقول سلفو بيا منقاش .
كنت أسمي بالرحمن وأتعذبل من الشيطان وارد عليه واقول : يا مودماني أنت أنس والا من الجان ؟, وويش الرطانه اللي بربرت بها عليه ولا عرفت منها ألا منقاش؟ .
كان يلتفت وراه ويزيد يرطن ببرشته ما عرفتها , أثره ينادي على خوياه , ألا وهم مقبلين , رجال لبناني (مترجم يترجم لهم) وثنتين من النسوان الخماجيات وثالثه سوداء سويدة وجه .
ويوم شفت النسوان بكل ألألوان ولابسات القصير اللي من فوق الركب وزياده مشقوق من على جنب وأنا أهشت لهم بالتحيه وأقول : يا يوم السعد , لا بالله أسفرت وأنورت , يا مرحبا بكم تراحيب المطر من يوم مشيتم حتى لفيتم.
وجيت أبغي أنزل من البرشوميه ومع الربشه والعجله وانشغال عيوني يم النسوان , أو قولوا من عين جاتني غريت من نفسي واتكهون (يعني أطيح طيحه قشراء) , وعلى أولي أتكثلب من راس البرشوميه بمكتلي مليان برشومي ولا أوقع الا تحتها على قرارة ظهري وأسفل ما مني أعلا ما فيه والبرشومي عليه نثاير والمكتل مكفي على راسي تقول طاقيه سوداء .
ما أطول عليكم ,, جوني ورشوا على وجهي شوية مويه حتى صحصحت , وبعد فقت وفتحت عيوني تشهدت وقلت لهم أنا في سما والا أرض يالعواني؟ .
رد عليه المترجم وقال : يا منقاش ما أنت في سما ولا أرض , أنت طايح في قعر برشوميه , وهذا الرجال اللي زهمك ولا عرفت كلامه أسمه سركوزي وتراه شيخ فرنسا كلها , وهالحرمتين الشقر واحده منهم شيخة أسرائيل والثانيه شيخة المانيه والمره السوداء كوندليزه رز مرسولة بوش .
قاطعته وقلت : فهمهم يا ترجمان أن الماثل قدامهم في قعر البرشوميه هو أبو نقشه شيخ ثماله كافه, وقل لهم هذي الحزه المباركه اللي جمعت الشيوخ مع بعضهم , وترون ما فيه هرجه ولا درجه ألا من على الفراش وبعد المعاش , وبعدها ألقيكم جاه الله أنكم تمسون عندي الليله وتهرجوني وأذا أصبحنا باكرالله يادعكم .
رد المترجم وقال : سركوزي يقول معذرينك في قهوتك ومساك , ونبي نعطيك علومنا ونمشي , ونحنا عارفينك من قبل نجيك أنك شيخ ربعك من أجل كذه نصيناك نبغيك خطام ربعك للتطبيع مع عيال عمكم وجيرانكم وشركاكم في الديره واصل العشيره من قبل ثلاثة آلاف سنه وهم الشعب المختار بني أسرائيل .
رديت عليه وقلت : أنت يا سركوزي ومعك المترجم معذورين تروحون , أما هالنسيونات ما أعذرهم حتى يدخلون حلتي وياكلون واجبهم , وهذا أول التطبيع حتى لا تقول الناس أن العرب ما يعرفون حقوق المره.
الى عند التطبيع وحقوق المره نتوقف , وباقي السالفه أكملها لكم في الحلقه الجايه , خلوكم متابعين معي حتى تعرفون ويش سدك يا جبل , وتعرفون أن منقاش علمه يريع ويبدي في كل ريع , وسلامتكم .