( ثرمده ) من هنا وهناك 1

[أبو خولة]

المشاركة الأصلية كتبت بواسطة المنديالي

ليه يابو خوله
تراك ونا اخوك رجال عاقل وتاخذ العلم وتعطيه وش صابك الله يصلحك ياخوي ترى كوره لاراحت ولا جات وحنا هنه متجمعين نتعرف على بعض ونساعد بعض ناخذ ونعطي .
اما قولة اهلي وهلال اتحاد وشباب ونا اخوك ترى هذا ميول يعني انت وميولك للفريق الي تبي لكن ماتوصلنا لدرجة ان احنا نخسر بعض ولا نخبص في بعض ليه ياخي احنا قبل كل هذا لنا عقول ورجال نميز بين الغث والسمين واعقلنا من ترفع ونا اخوك واخذ بيد سفيهنا وساعده على التمييز بين العلم الزين والعلم الي مش ولا بد .
انت رجال املنا فيك كبير وترى غلطتك ماهي مثل غيرك يعني لو غلط عليك احد ارفع نفسك عن الرد عليه وعلمه قله تراك رجال غلطت وحنا عيال عم مانبي مثل هذي العلوم تخرب علينا نتختلف ونتناحل مع بعض بس ماتوصل ونا اخوك للغلط والشتم والقطيعه الله لايقطعنا من بعض .
تبي الصدق والله العضيم لتكابرتها منك وما توقعتها من مثلك وربي اهرجك صادق

ياخوي والله ماعليه من احد ولاني خسران شيئ ان حصل زعل ولا غلط بين احد لكن يعز عليه الرجال امثالك وفي لحضة غضب يصدر منهم مثل هذا التعليق ماحبيتها منك مره .
ياهيثم ياولد العم ترى ابو خوله من الرجال الي ينشرون والله ماعرفته الا بالمنتدى لاتحسب اني اعرفه من اول بس الرجال الضاهر زعلتموه ولا تلحقتم الاهلي وهو رجال مريض وجاي من الحج والضاهر انه زعل وجا مدهر وكت علومه هنا صدقوني انا متأكد اذا رجع وقرى الي كتبه بيقول الله يلعنك ياشيطان وبيربط حميره وتعود العلوم زي ماكانت .
يا اخوان خلونا نشيل بعض والله اتمنى يجي يوم مايلقى المشرف شيئ يعدلله ولا يحذفه اتمنى .

الله يعطيكم العافيه حشمونا ياجماعة الخير تاركين اشغالنا ومتأكد انكم اكثر خاصه المشرفين يابو خوله ترى ماياخذون رواتب يعني شغلهم فزعه مع جماعتهم ان غلطو نتحمل وان غلطنا عليهم فلهم الفضل علينا لانهم قامو بعمل اكثر منا وفوقها تحملو مغثتنا .

الله يصلح احوالنا

أولا / بشركم الله جميعا

ثانيا/ ماهو من طبعي أغلط على أحد.. لكن والله زودوها
وانا ما أتكلم عن نفسي ولا عن الكورةفقط .. اتكلم عن جميع من في المنتدي
أذا مالمشرف ما بيفعل المنتدى ويحركه ..ينسحب أحسن ويقول ما أقدر!

ويكون في معلومك أنه عرض علي الإشراف وامتنعت<< لأنه عارف امكاناتي

ثالثا: هيثم له معزة عندي ومقدر جهوده وقلتها في وجهه ومن وراه مرارا
وما عاتبت إلا من محبه..
ولـ أكثر من مرة فكرت أني انسحب من المنتدى
ثم اتراجع لمحبتي لكم!

في الجعبة ثرمدة كثيرة لكن بكتفي بذي!!!

أن حكينا ندمنا وان سكتنا قهر!!!!

[المنديالي]

المشاركة الأصلية كتبت بواسطة أبو خولة

أولا / بشركم الله جميعا

ثانيا/ ماهو من طبعي أغلط على أحد.. لكن والله زودوها
وانا ما أتكلم عن نفسي ولا عن الكورةفقط .. اتكلم عن جميع من في المنتدي
أذا مالمشرف ما بيفعل المنتدى ويحركه ..ينسحب أحسن ويقول ما أقدر!

ويكون في معلومك أنه عرض علي الإشراف وامتنعت<< لأنه عارف امكاناتي

ثالثا: هيثم له معزة عندي ومقدر جهوده وقلتها في وجهه ومن وراه مرارا
وما عاتبت إلا من محبه..
ولـ أكثر من مرة فكرت أني انسحب من المنتدى
ثم اتراجع لمحبتي لكم!

في الجعبة ثرمدة كثيرة لكن بكتفي بذي!!!

أن حكينا ندمنا وان سكتنا قهر!!!!

بيض الله وجهك باو خوله وبشرك الله بالجنه يارب

يابو خوله اذا انت تعي وانا اعي وغيرنا يعي اجل تبي من يجي يخدم البقيه

يابو خوله الجود من الموجود يجب ان يعلم الجميع هذا

وترى ونا اخوك والله ما نجي ونقعد نتهرج هنه الا محبه وفرحه ان الواحد بين جماعته وربعه ان غلط وجهوه وان سوى حاجه زينه مدحوه وشجعوه .

اضن الموضوع كذه انتهى ياهيثم وصافيه لبن

[ابومهنـــــد]

ياجماعة الربع خلونا نقوول stopشوية

الدعووة من بدايتها زي ماتفضل المنديالي توسيع
صدوور وثرمدة واكل واحد يثرمد بلي عندة من علوم
زينة وبدوون تجريح للأخرين..
لكن انا اشوووف المووضع اخذ منحنى اخر (الضعيف المنديالي
مالحق يتهنى بالتميز الا وانقلب من ثرمدة للعلعة)
انا والله اني انبصطت من المووضوع جدا لان فكرة المووضوع
جدا فلة وانا حاولت اضيف للمووضوع شوية بهارات واجاري حبيب قلبي المنديالي وعلى قولهم (بغيتها طرب رجعت نشب)
وبالنسبة لابوخولة (لايكوون تقصدني بالكلام)
ههههههههههههههههههههههههههه
اذا تقصدني بالكلام تراك مسمووووح
ويالربع ابوخولة من الرياجيل الي ياخذ العلم
ويعطية على قولهم يعني
الرجال بشركم بالحق وترون الرجال الي يصارحكم
احسن من الي يشيل بالقلب (بس على الخاص احسن)
عموووووما شكل ابوخولة فهم الثرمد غلط
واعطانا الخط الساخن ومسمووووح
وكل واحد يصلح سيارتة

[المنديالي]

المشاركة الأصلية كتبت بواسطة ابن رابع

انت مافيك حيلة
بس ابقولك شي (يا إنت تغير لونك بلوني يا أنا أغير لونك بلوني)
على شان نسوي حزب جديد ونسمية حزب الثرامدة وننصبك رئيس للحزب
ومن حطابوتركي نائب الرئيس وبنرسل لابوخولة على الخاص لعل وعسى ان ينضم لنا ولو اني اخاف منة لكونة من ذوي الدم الاخضر وانا بدعمكم اعلامياً..
وكل هذا عشان ما يجي هيثم الا والحزب جاهز ونطير حكومتة ونرفع راية
المنديالي والعلم حقة الي فية صورة تيموون..

ذكرتني انت واتغيير الالوان بسالفة واحد يشيل في يده ( مكتل ) وحاط فيه قوطه ومغطيها ببرسيم قابل واحد قله تعرف وش في المكتل واعطيك منه قوطه قال خويه عرفتها قال وشهي قال طماطم قام اعطاه بندوره .
الحزب وتشكيله فكره جميله لكن الانقلابات اول يسون تنظيم سري وهذا مانقدر نسويه لين نجمع عدد من الحلفاء ونفهمهم ان هيثم ماكل حقوقهم واعتقد انسب واحد ممكن يجند لنا اعضاء هو ابو خوله وتراه جاهز ينقلب لو على ابو عبدالرحمن بس فهمه ان هذي مرحله ثانيه بعد هيثم وبعدين اذا صار هناك قاعده كبيره نبدأ نبين علومنا والمرحله هذي الان بناء قاعده بس والباقي خس <<< لاتقول وش دخل الخس هذي كود عشان الاعداء مايعرفون وش نقصد
فكرة العلم منتازه ولو نضع صوره للبس والفار بعد وايديهم متقاطعه عشان نبين التلاحم داخل التنظيم يكون شغل غير .

المشاركة الأصلية كتبت بواسطة مخبر سري

اخي المنديالي وفقك الله للخير دوما واعجبني الموضوع كثيرا وثرمد حتى تطفش
وهو اسلم لك (ههههههههههههههههههههههههه)
فانت في قلبي ايه الثرمدي

وكل عام والجميع بالف خير

ترى الحركات الي بالي بالك ماتمشي علينا يعني تطمنا الين تورطنا
لكن نقول
الله يوفقك يعني الان امورنا ماشيه تمام اطمن الشله اننا شبكنا الحكومه وبقينا نسايب وشغلنا في السليم
الله يسلم قلبك يارب ومحبتك واحترامك موجوده انت ومعرفك

المشاركة الأصلية كتبت بواسطة رفيق دربه

ياحبي لك يالمنديالي
موضوع رووووووعة الثرمدة وما ادراك ماهي؟؟؟
مشكور على الثرمدة بإنتظار الجديد
والشكر موصول إلى أبو خولة عند حسن الضن بإذن الله
يعطيكم ألف عافية جميـــــــــــــعآ

مرحبا بك في نادي الهريجين

واديها يعم ما احد ماخذ منها حاجه

اهرج براحتك شبكنا الحكومه وبقينا نسايب

[سنا الهجرة]

ما شاء الله عليك يا مونديالي
موضوع كايف بالحيييييييييييييل
صراحه وبدون حزبيه ولا شلليله على قول أخونا أبو خوله >> الموضوع مسكت وممتع لأبعد حد
ولا أقول الا تسلم أيدك على هذي الثرمدة الماتعه

ما تلاحظ انه في حزبية في المنتدى كل ثلاثة أو اربعة

مع بعض واحد يثبت والثاني يشوت والثالث يناول !! وبقية الأعضاء

لا حول لهم ولا قوة<محد معطيهم وجه لا بنصيحة ولا بفائدة

ولا حتى بعتب!!!تقول ان المنتدى محصور على العدد ذا

واذا حاولت تشارك وتدخل معهم عرض..اصيب الجميع بالصمم!
والمصيبة لا جات من المشرفين

وأبو خلوله >> الله يسامحه يوم يعمم كذا على كل اللي في المنتدى . . ما أدري من وين جات هذي العلوم

لكن لعلها من باب الثرمدة الفضفضيه

[ABO TURKI]

متبع لثرامدكم من بعيد وحاولت ما أثرمد لكن أبو خولة بدأ يجيب العيد حق رمضان بدري
مدري ليه حاط دوبه دوب المشرفين من يوم جا من الحج وهو مختلف وصار أهلاوي متعصب
وانت يا ابو خولة قايلها بلسانك انك ما رجعت للتعصب الا من يوم دخلت قسمنا الرياضي
يعني امورك كانت سالكة ليه تدخل القسم الرياضي
عموما انت يا ابو خولة لك وضعك واحترامك وتقديرك ومن يوم المنديالي فك علينا ثرامده هذي
وانت ما تثرمد الا في المشرفين

المهم ما علينا امس قبل امس في الديرة شفت منظر ما لحقت اصوره منظر غريييب تخيلوا
شفت ديك داشر يسوي قلة أدب مع كلب أعزكم الله في البداية ما صدقت وبعدين الا والله العلم صدق
أصلا الديك هذا داشر من يومه وما عنده دجاج كل الدجاج اللي عنده باعوووه وبقي هو لوحده ما قدروا يمسكونه وتركوووه وصار اذا قرب المغرب يطلع في سدرة وينام ومو بس كذه كل ما جيت الديرة وهو يتمشى جنبا إلى جنب مع الكلبه أعزكم الله .

[المنديالي]

المشاركة الأصلية كتبت بواسطة @ بن سلمان @

يعطيك العافية
مررت من هنا من باب الفضول وقد أشبعته والحمدلله وقد ذكرتني زاوية سليمان الفليح ( هذر لوجيا ) في صحيفة الجزيرة
متابع لكل الثرمدة و الثرمتة و الهذر

يامرحبا تراحيب المطرر ببن سلمان
زارتنا البركه واستهلت وامطرت
احس اني معنوياتي ارتفعت بعد التشبيه بردك الله يجبر بخاطرك
يسرني انك تتشبح علينا بن وقت والثاني فهذرنا كثر والفائده مدري وشهي لكن العوض على الله

المشاركة الأصلية كتبت بواسطة كبريآء

يآعيني عليك يالمنديآلي
قسسسسمآ بالله حبيت الموضوع ورآق لي بالحيـــل<<طيب لاتحلفين
مــآآآآآرا استانست على السوآلف .. فكرة الموضوع عجبتني والمدآخلات عجبتني
وحبيت قصة الخبل ذآك اللي انتقم من الآعمى
حسيت ان عقله اللي في رآسه حرآم فيه لانو ما استخدمه صح

وبعدين لأول مرا في حيآتي اسمع بــ كلمة ثرمدهـ وافهم معنآهـآ
حتى مدري فهمت المعنى صح والا شلت السلم بالعرض كالعآدهـ
يعني كنت اشوف عنوان الموضوع قبل ما ادخل واقرآهـ
وآقول في نفسي آكيد هذا موضوع نبته في الحيآهـ الفطريه اسمها ثرمدهـ
ومدري عاد هي كلمه معروفه والا انت مخترعها .. بس ماعلينا

الأكيد انك جبت موضوع شيآكه وفكرته مبتكرهـ ويونّس
بكون متابعه .. كملوا ثرثرهـ قصدي ثرمدهـ

حياك يابنت العم
قسم اني فرحت بوجودك طاحو فينا شواكيش المنتدى على قول ابو خوله واحد يثبت والثاني يشوت وانا مسكين ماني قدهم
المعنى فهمتيه صح بس الغريب انك تحسبينه ( نبته ) اما نبته واسمها ثرمده أنتي بتورطينا مع حقين الحياة الفطريه يحوسون مريري هنه لو اخذت نبته من عندهم .
اذا كان اذا شافو صوره لواحد قالع نبته ولا بالغلط قاتل حيه كسرو مجاديفه لين يعلن التوبه تبيني اتعدى عليهم واخذ نبته .
الاسم الله يسلمك معروف من زمان وهو زي مافهمتيه لكن ( مجنونها ) شككني بالاسم يقول يضنه ( ثرمته ) وارى ابن سلمان يلمح لنفس الموضوع اتصلت على الوالده الله يعطيها الصحه وسألتها قالت ياوليدي تجي تجي ويوم الحيت عليها ايت فييهم قالت ( وش تبيني اقلك ) لكن فيه مثل يقول ( خليها على مبنى الشايب ) فببقى الحال على ماهو عليه وعلى المتضرر اللجوء لاحد المشرفين عشان يقلون له طير المنديالي صديقنا مانسوي شيئ لين يقلنا .
انا ماعلمتك اننا شبكنا الحكومه وبيقينا نسايب يعني انا الان ممكن تقولون عليه ( الواصل ) خخخخخخخخخخخخخخخ

المشاركة الأصلية كتبت بواسطة H Y T H A M

.



ماشاء الله عليك

أسلوب روعه سلس وسهل الهضم وعندك حِكمـه أحسدك عليهآ بصرآحـه
وآصل بدون فآصل . .

الموضوع مراقب بالرادار واي وآحد يحش في حكومه المنتدى يآويله


.

حي الله كبيرهم الذي علمهم الحكمه
مرحبا بهيثم وترى صوت لبرشلونه في الاستفتاء <<<< واحد يبغى سوي جماله
حكمة مين ياعم طير غلبنا نحلها يادوب نهدي وطالع ثرمده ثانيه وماغير ( نشيل زبادي ونحط صحون ) على قول الحظري يوم سألوه كيف العزيمه قال اي عزيمه واي صلح كل ماجيت عند واحد من ذول البدو قال يواد شيل الصحن وجيب زبادي لين غلقو وكل واحد راح اتكى يقول هات علومك طيب هات قيمة الزبادي اللي ببطنك اول .
الفاصل ماقريته باول الموضوع ( هجوله ونرجع هروله ) يعني مايمدينا شغلنا على السريع
راقب ياعم وخذ راحتك انتم احلى حكومه وهو فيه احد يقدر يقول الحكومه مو كويسه مدري ليه تذكرت سالفة مجموعه راكبين مع واحد مسؤول بالسياره ونقلبت السياره عليهم طبعا السواق هو المسؤول قام واحد من الركاب قال طال عمرك كان يمديك تهدي وماتقلبنا طالع عليه المسؤول وزعل قال بقية الركاب طال عمرك اتركك منه هذا ( دبش ) مايعرف يهرج الا طال عمرك سواقتك زينه مافيها شيئ بس احنا اللي مانعرف نركب بالسياره زين .
تشاوووووووووو

[مجنونها]

دام للمنتديات عطاءك
أحياناً كثيرة تأخذني حكة يد على الكيبورد
لا يعنيني كثير أن أكتب لأحد وأنتظر أن يقرأ أو يتداخل أو يفهم فالمهم أن أمارس جنوني حتى وإن إصطدم بعاقل.
على فكرة لا أختلف معك حول العنوان وربما يأتي اليوم الذي أستأذنك فيه فمادامت ثرمدة فلن يأتي من يقول لنا لا تطولها وهي قصيرة .
مبارك عليكم إستمرار صرف ال15 % , طبعاً لا يدرك قيمتها إلا من ذاق حلاوتها ولنرفع أكف الدعاء لخادم الحرمين الشريفين بأن يلبسه ثوب الصحة والعافية وأن يعيده سالماً معافى .

[أبو خولة]

تصدق يامنديالي أني ما استوعبت موضوعك الا الحين..

شفت التعريفات ذي>>الديمقراطية : تتضح عندما نجد الجميع وقد علق على الموضوع والا فهذا دليل على ان لاديمقراطيه .
القانون : طريقه يعزفها المدير العام ويساعده بقية المشرفين ليرقص على انغامها الاعضاء امثالي .
الحرية للجميع : لنا ان نقول مانريد وللاداره ان تفعل ماتريد .
الصراع الطبقي : يتضح في ما نشاهده بين فتره واخرى بين عضو ومشرف .
قلت بس الرجال يحش في حكومة المنتدى..بس لا تضيع الفرصة وثرمدمع المثرمدين
وطلع المستخبي ..واشف غليلك من أهلاوي التقنية لعله يتحرك ويحس ويترك الأنطوائية
وجبت العيد على قول أبو تركي....لكن الحمدلله من الله علي بالصحة والعافية وقريت واستوعبت الموضوع ..ولكن ربما تكون فيها فايدة للمنتدى ..ورب رميه من غير رامي!
المهم اعتبرو ا ثرمدتي الأولة مزووووح تجي وتروح وابشروا بالجمل وماحمل ....
وبزود في المزوح ..لأني احب الوناسة وسعت الصدر..أدري بتقولوا هذا المطوع كل يوم
جايبلنا آية وحديث وشله وشل الوناسة والضحك والكورة وتوسيع الصدر....اللي ماتعرفوه أني أتونس بالكفشات والمناحلات والضحك وكل ابوشيء المهم ماتؤدي إلى حرام<يعني مطوع متحرر..
وقدوتنا كان يمازح الصحابة..وبإذن الله راح أطرحلكم موضوع عن مزاحه

المهم الثرمدة الجاية ما تأخذوها من جد وتزعلون<<اليوم مروق آخر روقان

المشاركة الأصلية كتبت بواسطة المنديالي

الحزب وتشكيله فكره جميله لكن الانقلابات اول يسون تنظيم سري وهذا مانقدر نسويه لين نجمع عدد من الحلفاء ونفهمهم ان هيثم ماكل حقوقهم واعتقد انسب واحد ممكن يجند لنا اعضاء هو ابو خوله وتراه جاهز ينقلب لو على ابو عبدالرحمن بس فهمه ان هذي مرحله ثانيه بعد هيثم وبعدين اذا صار هناك قاعده كبيره نبدأ نبين علومنا والمرحله هذي الان بناء قاعده بس والباقي خس <<< لاتقول وش دخل الخس هذي كود عشان الاعداء مايعرفون وش نقصد
فكرة العلم منتازه ولو نضع صوره للبس والفار بعد وايديهم متقاطعه عشان نبين التلاحم داخل التنظيم يكون شغل غير .

سم طال عمرك صاحب العظمة بسكون الظاء..انت تامر سيدي..الحلفاء منتشرين في المنتدى سؤحدد لك معرفاتهم وانت أوكل من تراه مناسبا لتدريبهم<لأن مشكلتي محد يعرفني بالمنتدى ولو حاولت أوصلهم ربما يرتابون مني

لكن بالنظام السابق عناصر ربما نستطيع ضمها لتنظيمنا السري
أولاالحبيب سنا الهجرة يحسبني أقصده في ثرمدتي الأولة<ما يدري اني مادخلت المنتدى
إلا لوجوده وأعجابي بإبداعه..وطبعا رفيق الدرب وبن رابع انضمو حديثا للنظام فهم يعتبرون من تنظيمنا ..والساحل الشرقي حاله حال نفسه و دوبه ودوب الأسهم ينفعنا
ومن الأعضاء ارشح مجنونها وانتقام الورد واسهلاوي وسمير.. ومن يراه معاليكم
كما هناك عناصر نسائية قوية اولهم المرأة الحديدية كبرياء اما ثمالية خوافة ما تلزمناش
ومن العضوات واثقة الخطى وملاك الروح اذا بتترك الخوف ممكن تفيدنا اعلاميا
وبالنسبة لهيثم والله قلبي ما يطاوعني نشيله من قيادة الحزب بنخليه رئيس صوري والأمر والنهي لسيادتكم! أما ابو عبد الرحمن فهو دولة عظمى ما نقدر نقله ثلث الثلاثة كم؟
سنتودد له ونقرب له القرابين حتى يعطينا الضوء الأخضر للإنقلاب!وممكن نستعين
بدول مجاورة كدولة الشيخ ابو نقشة لتمدنا بالمال والعتاد للإطاحة بالحزب السابق
وأول عمل سنقوم به هو أسر الهلالي وأهلاوي التقنية ..الأخير خلوه علي انا اكفيكموه
اما الأول فما ينقدر لسانه متبري منه ..ارى ان توكل مجنونها وانتقام الورد والسهلاوي
لأسره..سأذهب الآن للنوم وسأعود الرابعة فجرا تقريبا يكون قد اعددت الخطة العسكرية
للإنقضاض على الحزب البائد..

وبعد ان يستبد لنا الحكم ونوطد الدمقراطية بالمنتدى ويعم الرخاء والأمن لمنتدانا سأكتفي انا بمنصب رئيس هيئة الأمر بالمعروف وارشح بن رابع لرعاية الشباب.. ويتولى معاليكم
توزيع المناصب على الأعضاء..

هههههههههههههههههههههههههههههههههههههههههههههههههه هههههههههههههههههه

ترى كل ما سبق مزووووووووووووووح لا تاخذوها من جد وتزعلون علي!!!

ثرمد يخوي ثرمد يا بخت البيوت اللي تثرمدها....

[أستــــــــــاذه ملاك]

الموضوع روعـــة ومميز ونيـــآتي مره ..

<< صراحة الصراحة بعض الثرمدات فهمتها وبعضهــا لا بستعين بقوقل وأترجم المصطلحـــات

أعجبتني ثرمدات ابن رابع تجنن كان بودي أقيمه عليهـــا لكن ماسمحوا لي


ثرمديات بدوي وحضري

رسالة من بدوي: عزيزي الحضري بخصوص انك بتشوف خطيبتك قبل العرس وتطلع معها , فحص شامل مثلا ؟
رد الحضري على الرسالة: عزيزي البدوي بخصوص انك مابتشوف زوجتك إلا يوم العرس , اكشط واربح مثلا‌ ؟

تحفــــــــــــــــه

ثرمديات واحد مفقوع قلبة من الاتصالات

عزيزتي الاتصالات بالنسبة أنك كل ساعة بتبعثيلي مسجات , أصحاب مثلا ؟

تذكرت جوالي ...هههههههااي
حتى في المناسبات ماينسونــا يآآرب ماتحرمنا منهم .



عزيزي ماكدونالدز بخصوص ان البطاطس كاتبين عليه حلال , مقشرينه بإتجاه القبلة مثلا ؟


الظاهر والله أعلم يبغون يأكدون للناس أنه مو قالينه بزيت خنزير

عزيزتي مكتبة جرير بخصوص اعلانك "جرير ليست مجرد مكتبة" , في ديسكو بالدور الثاني مثلا ؟؟

أم الفضـــايح ذي المكتبه





عزيزي رئيس البلدية بخصوص الحفر بالشارع , نلعب ماريو مثلا؟

يالله ذكرتني بذي اللعبة أموت فيهــا
كل ماشفت حفرة تذكر ماريو



عزيزتي المدرسة بخصوص انك راجعه والناس ما تبغاكي , ماعندك كرامه مثلاً ؟

وي وي على الجرح
عصبت


عزيزتي الأخبار بخصوص انو كل يوم بنشوفك , مافي حلقة أخيرة مثلا ؟


ذكرتني بالنكتة مو عارفتها نصــاً
لكن عجوز جالسة تتفرج على الأخبـــآر طولت الأخبــار قالت شكلها الحلقة الأخيرة

عزيزتي زينب العسكري, نادية الجندي , ابراهيم الحربي .. بخصوص اسمائكم الحـرس الوطـني مثلاً ؟

هههههههههههههاااي حقوق التجنيد محفوظه

المشاركة الأصلية كتبت بواسطة أبو خولة

ومن العضوات واثقة الخطى وملاك الروح اذا بتترك الخوف ممكن تفيدنا اعلاميا

أبو خولة راح أتركه لكن إيش مهمتي
أبغى على مكتب وأوقع وأختم وبس
مافيني للأشيــــاء الصعبة << مو متعوده ..

قول قول بسرع إيش مهمتـــــي