عقد ولقيت حلالها / منقول

[منقاش]

عقد ولقيت حلالها / منقول عقد ولقيت حلالها / منقول عقد ولقيت حلالها / منقول عقد ولقيت حلالها / منقول عقد ولقيت حلالها / منقول

هذي الموضوع على ثلاث حلكات لجهبل من العلماء , وأحبيت أنقله لكم بدون زياده ولا نقصان حتى أحافظ على الأمانه العلميه ..
وهيه لا أضيع وقتكم , سموا الله يحيكم :
هاك أليوم عصير وأنا قاعد في فية الحده أعترط من مشريه متلقيتني , واحيان أهنهن بغنايا وأتقهوى من خمرة جنبي , وأتذكر أيام شبابي , وافكر كيف أحفر كم حفره واوقع فيها بعض الناس اللي هم على بالي وعارفين أنفسهم بدون أجي على ذكرهم ,,, ألا وهاك الورع اللي جاء يسعى يمي ويبرشت من بعيد بكلام ما عرفته ,,, بعد وصل عندي قال قوم يا عم منقاش ,,, عمرو موسى ومعه ناس جالسين هناك في فية الوغيفه اللي في ناقع الركيب , ويقولون قل لمنقاش : تبي تجي الى عندنا والا نجيك ؟؟ طبعا جوابها معروف ,, ما أبغيهم يجوني يكلفون عليه ويخسروني وانا ما أمديني أسوي كرم وانا كنت أطرد الكلب واربض مكانه ...
مالكم في الطوال والسواعده , قمت من مكاني وتعممت بعمامتي وتغرزت واحتزمت بقياد حماري وحطيت نعالي في رجلي وبتلت على أولي ألى عند الجماعه , ألا وهم عمر و ولد حياة موسى الله يرحمه والسنيوره ومعه مرته المغروره , وكنتليزه رز حقت أمريكه, وعلي ولد حياة عبدالله ولد صالح الله يرحمهم عن اليمن , وابن ابي محمد عن ثماله , وبرويز مقرف , ومحمود ولد حياة عباس حق السلطه الفلسطينيه , والمقطف , ورويعي الغنم , وابن لادن حق آل ساعد,,, سلمت عليهم بالوجيه كلهم ألا كنتليزه رز صافحتها بروس أصابعي خايف أني أستاثم واطب طبه ما ترقع , وبرضه كني مستحي من صاحبها ابن داخل ...
يوم شفت معهم كنتليزه رز قلت لهم : ما هذا مكان علوم يا ربعي ومعكم هالمره ألأجنبيه اللي مكان العلوم معها في البيت ,, أعتذروا يقولون أنهم عجالى ,, رديت عليهم وقلت : أنتم معذركم يالباقين بس أنتي يا كنتليزه رز أجنبيه ولك واجب لا بد تعودين عليه تاكلين واجبك في البيت , وتقدرين تجيبين معك نسوان قد ما تقدرين , ردت وأعتذرت ,, قلت في نفسي , في مية داهيه , ما عليك حسافه ..
بغى رويعي الغنم يبربس ويهرج ورد عليه عمرو ولد موسى وقال له : خلك يا رويعي في مكانك حشيم ومبرطم وانطم ,, أنت مكبور ولا أنت مجبورعلى الثرثره ..ثم ألتفت يمي وقال : نحنا ناصينك وناخينك يا شيخ منقاش , وارسلنا عليك من ورانا من العربان , وهم جامعة الدول العربيه وهيئة ألأمم , وترانا داخلين عليك يا رفيقي أنك تحل مشكلتنا مع اليهود اللي من يوم نحنا ورعان الى اليوم نحنا شيبان ما أنحلت , وكل ما بغينا نفك عقده منها زادت تشربكت علينا , وهالحين تلوت على رجلينا وعلى كراعين أصحابنا المريكان والانقليز والطليان وبقية خوياهم البقر والحمير..
قلت ما فيه مانع ,, بس تحطوني في وجيهكم وتحفلوني وتكفلوني يا من حضر باسمكم واسم من وراكم من رجال ونسوان أن اللي أسويه من صلح ما أحد منكم يحور والا يدور عنه والا يطلع وينزل فيه,,, رد عمرو موسى وقال : تم وانا أبو عمريه ,, ما جيناك ونصيناك يا منقاش ونبي نخرص في جابه تسويها تطفي بها بيننا وبين عيال عمنا اليهود فتنه دخانها ما عمره خمد ..
قلت هي أنتم أخمدوا ,,, وانا تعرفوني ما مثلي في الرجال,, أن بغيت أولعها أقدر أشعلها وان بغيت أطفيها أقدرأنهيها ...
وحتى ما نطول عليكم , الحلقه الجايه تبي تشوفون الشيخ منقاش وهو يحاول يقلب الحصى ويبني جدار السلام ويهدم الجدار العازل ويصلح بين عيال العم , العرب واليهود ,, وسلامتكم ....
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,
ودعت ابن موسى وابن عباس وخوياهم تحت الوغيفه بعد أخذت بخطرهم ووافقت على التدخل لحلحلة العقد اللي بينهم وبين اليهود , ثم أنكفيت ورايه وضويت بيتي , وبعد راح من الليل ساعه ألا ورويعي الغنم وابن داخل عند سدة الدار يصوتون : يا منقاش , معك ضيوف يا معزب الرحمن .. قلت في نفسي لا مرحبا بكم يا قلال الخاتمه ,,, , هشيت وبشيت بعد حطوا أقدامهم على عتبة داري ,, ويش أسوي؟ ,, مرحبا ياغصيبه.
وبعد جلسوا قلت لهم : يا رفاقتي متى تفهمون دلايل وسلوم العرب ؟؟ ألأوله , من متى أنا معزب الرحمن وهو سبحانه خالقنا من العدم ومعزبنا كلنا يا الخلايق؟؟ . قالوا صدقت في هذي ,,, والثانيه, أنتم ما تعرفون أن ضيف ألعشا مكروه ؟؟. هذا وقت نوم والا وقت سريه وطبيخ ونفيخ يا قلال ألخاتمه ؟؟ كنت أقوم على ضو السراج وألقط هاك المخباط (شون) أبغي أكرمهم به على علابيهم ...
تصايحوا العفنى وردوا عليه : تكفى سمح خاطرك يا منقاش , العشا جاي ورانا مع أبو أمجد وابن عزاب على زامله ,,, ذبيحه على كيفك مع جمالها وكمالها جايبينها واجب لك بمناسبة قرب سفرك لبني صهيون.. كنت أرمي بالشون في زوة البيت وأعود عليهم واجلس...
قلت : طيب ياللحى الغانمه أنتم ما عمركم وجبتم لي في بيوتكم , وكيف الليله تغير الحال وكبر مقداري عندكم وسار يجي واجبي الى على حدي ووسط بيتي ؟؟ , ردوا : دخيلك لا تكثر ألفتشه , وترى الحي يتقلب ,, أدمحها , واللي فات مات ونحنا عيال اليوم ..
قلت : أجل هاتوا علومكم من هالحين وبدري قبل يسري الليل,, أنا ماني منتظر الى بعد تعشون ثم تسهروني بخرامطكم ,,, بكره ورايه مسراح من غبيش أتفقد مهاملي قبل أسافر لتفكيك النشايب اللي بين ألعرب وعيال عمهم اليهود ,,,, ردوا عليه : أخوتك تشترى يا منقاش والرفيق قبل الطريق ,, تكفى خذنا معك في القبل (الوفد) وترى أن ما أعناك ما أهناك ... رديت عليهم : دوروا غيرها ,,, أنا خويي ألرحمن ثم بيضان الوجيه ما هو أنتم ..
قال ابن داخل: عذرناك في هذي ,,, لكن ليتك يا ولد عمي تطلب أليهود يخلوني أدخل نحيلاتي عندهم في فلسطين , أبغي النحل حيله وعذر , يسير أقعد سردادي مردادي رايح جاي عليه , أربني أتصدف يا رفيقي وأتصيد هاك اليهوديه اللي تكون غنيه وحسناء وما يضر لو كانت مدهوكه شويه عساني أتجوزها وأرمي على هالديره واهلها بسبعه حصى ,,, رديت عليه : أبشر .. وانا في نفسي كنت أتمنى أنه يلقى مطلوبه ويخفي عنا حتى ما عاد نشوفه ونرمي في مقفاه بسبعين حجر ..
ألتفت على رويعي الغنم وقلت : وأنت يا طويل ألبقا والسلامه تبغي يهوديه ثانيه ؟؟ رد عليه : لالالا , يهوديات العرب سادينا ومطلعين الشيب في روسنا,,,, بس أنا خايف ينضحك عليك وتعطي اليهود شي ما هو لهم ,, ترى يكون في علمك كل فلسطين ما يجوز تنازل عن شبر واحد منها , ويا ليتك تطيعني آخذك الى عند الفقيه يوريك بعض ألدروب .. رديت عليه : تراني يا رويعي ما نسيت فتاوي حمير الوحش , ولو ما ألفراش أللي أنت عليه حاميك مني لحط الشون وسط راسك ,, مالك شغل بي , وروح عني في السعه , ويا نحله لا تقرصيني ولا أبغي لك عسل ..
بعد وقت ما طال جانا ابن عزاب وابو تركي وابوخالد وأبو أمجد والنتيف بالعشاء ودخلوه في صحن بكبر المغطس بالكاد يقلونه بينهم ,,, قلت : يبو أمجد , أخبرك أحيان يجي الصدق بالغلط على لسانك ,, قلي ليش كلفتم على أنفسكم واجد وجبتم هذا العشا؟؟,,,, رد عليه : الكلفه في الروح , وهذا حسيل (عجل) مربرب لحمه مثل الزبده نبي نتهرج ونتونس معك عليه الليله والدنيا رايحه هي وحسلانها ..
كنت أفرش لهم هاك الشمله واحط لهم عليها التكايا والخمره والفناجيل على دكة ألشامس , أبغي أخرجهم من البيت, ثم ناديت عليهم : لا هنتوا يا ربعي تعالوا على الشامس حتى تبردون وتعشون في القماري أحسن لكم من كتمة البيت ,, والله يحيكم ويحيي ما جبتم..
قاموا الرجال وانا عقبتهم وصكيت باب البيت بالضبه على ألعشا وأخذت بندقي ألقداحي وتنبرزت بعيد عنهم في الظلمه واعطيهم هاك ألداخن وأصيح عليهم : آآآآك , ربعي يا هلي , جاكم القوم الحراميه , أنحشوا لا يقتلوني أنا وياكم ,,, وازيد أفك وراهم كلب لي مغلوث ختول ما يطرد الحجر وينحاش كما السهم حتى يطعم الدم واللحم من الطريد .. شردت الرجال , ويا زينهم في المشاريد وأكل المثاريد , وتركوا عمايمهم ومدسهم وعصيهم وعشاهم وراهم واعطوا الساق لحقه بعد زدت ألحقتهم بكم داخن ..
بعد شويه تليموا جيراني عليه يحسبون جاني شي ينكد الخاطر,, طمنتهم وحيت بهم , واتعشى أنا وياهم ألعجل ,, وبعد أصبحنا اليوم الثاني ألا وواحد من الجيران جايني يصيح وثيابه شليح ويقول : عينت يا رفيقي يا منقاش الجحيش حقي اللي يسير حمارك جده؟؟ سرقه رويعي الغنم أمس , وجاني لبهة علم أنه وداه للطباخ وعشاه ناس البارح ..
واحط يدي على راسي واصيح : واعارك يا منقاش اليوم عاراه ,, وش وجهك بكره عند عيال عمنا اليهود لو يدرون أن الرخوم أكلوك الجحيش ,, لكن اللي برد كبدي شلاوي من ثيابهم وسراويلهم لقيناها صبح قطيع وريانه دم ولويخ ,, قد الكلب أعتثى فيهم ..
نتوقف عند الجحيش والكلب اللي أعتثى فيهم,,, وحلقتكم الجايه تبي تقرون فيها فتوى مفتي ثماله ساري الليل, وتشوفوني أمشي لأصلاح ذات البين بيننا وبين عيال العم , ومعي وفد من كمال ربعكم على راسهم رفيقكم ألأقشر , وقضام العظام , وابن قطيل , وقليل المروه وغيرهم ,, وسلامتكم ..
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,
ما ظنيت أن أحد فيكم نسي ويش سار في الحلقتين اللي راحت ؟ , ولا أظن أحد منكم نسي ألليل ألأقشر وما سرى فيه على المقاشير أللي عشوني الجحيش, وكلبي اللي شلح سراويلهم وثيابهم حتى أصبحت قطيع في السياح وخلاهم في هاك الليل الأظلم لهم غويث مثل ألضان الضايعه ؟؟... والحقيقه , يا ليتني ما لقيت يوم أصبحت ألا عظامهم ..
المهم ,, أتركونا منهم , أنا رجال قلبي طيب وأكره ألشماته والتشفي ولا أحب الهرج في الناس حتى لو كانوا أنطس الناس مثل اللي على بالي وهم يعرفون أنفسهم بدون أسميهم ,, وكما يقول المثل , لا تهزأ بدبرة حمار تجي في ظهرك ,, واللي جاهم هناهم .. بس يا حسافه , آه يا كلبي آه اللي ما تعشيتهم وريحت البلاد والعباد منهم ..
نعود لموضوعنا .. بعد الليلة أم المشاكل والجحيش سرحت صبيحتها مع شقة النور ونصيت حليفي راعي السواني وعلمت له بكل علومي ثم قلت له : يا رفيقي يقولون أنك في جهلتك يوم كنت غاوي درست كم شهر وضيعتها في القرايه ,,, صحيح والا أنا غلطان ؟؟, رد عليه : مثلك ما يغلط ياشيخ منقاش ,, صحيح في جهله مني وفضاوه قريت ثلاثه أشهر بالوفى والتمام ما تنقص ألا سبعين يوم ..
قلت : فيها البركه يا راعي السواني,,, بس ياليتك تدللني على الدروب اللي ما توثمني مع ربي ولا تنقدني مع القبايل , وقصرها ويش أعطي لليهود من فلسطين وويش آخذ منهم ؟؟,,, رد عليه : بس يا رفيقي يا منقاش , ترى ما بقي معي من هاك القرايه والخرامط ألا تلاطيش هروج ما أظنها تبي تقضي غرضك وتجاوب على سعالاتك اللي جيتني من شانها , لكن هيا بنا على ساري الليل اللي تنحط فتاويه على الجرح ويبرى , واللي قرى على يد فقيه سنتين وزود ..
رديت عليه : ساري الليل اللي حرامي مصبح تبينا ندور عنده فتوى ؟؟ ,, رد عليه راعي السواني : أنت تبي علمه والا عمله ؟, قلت لا بالله نبي علمه ,,, قال , أجل هيا بنا ننصاه لكن خذ معك دهان سير للرجال حتى تيسر الفتوى..
أخذنا معنا عكتين واحده سمن والثانيه عسل جابها لي ابن داخل هديه ليلة عشوني الجحيش , ثم ضوينا على ساري وسلمناه الهديه وعلمنا له من على فراشه , وطلبناه يفهمنا ويش الحلال من ألحرام بخصوص الصلح مع بني أسرائيل .. قال ساري الليل : الله يحيكم من يوم مشيتوا ألين جيتوا ,,, وانا تروني ما أحب أصكك كل البيبان , يعني أخليها على وزن سددوا وقاربوا .. بس يا منقاش أنت ما قلت لي تبي الفتوى بالدين والا تحبها بسلوم العرب والقبايل وقلة الدين ؟؟ . قلت : كلها عساني فداك , حتى أن ما مشت واحده تمشي ألثانيه ..
رد عليه ساري وقال : شوف يا طويل البقا والسلامه , بالدين ما يجوز لك ومحرم عليك تنازل لليهود لوعن شبر واحد من فلسطين , ولا يجوز لك تنازل عن حق كبير ولا صغير للفلسطينين المشردين ,,, يعني تقدر تقول يا عيال عمنا يا بني أسرائيل , أنحشوا , كل واحد فيكم يحزم عفوشه وياخذ مرته وورعانه وعلى أول سفينه يعود فيها للبلد اللي جا منه , وكل ما يبقى وراكم ولا تشيله سفينه الركاب معكم خلوه تعويض للمشردين الفلسطينيين ,,, يعني اللي من بلاد الطليان يعود للطليان واللي من ديار رعاة البقر يعود عند البقر واللي من ديار ألنصارى يعود على ألنصارى والا من ديار المسلمين يعود لديار المسلمين واللي من فلسطين يبفى في فلسطين ,, وترى ما يجوز لك تحابيهم والا توادهم والا تواليهم والا تغمز وتهمز معهم والا تظلمهم ,, خلك عادل وخل ولاك لله ولرسوله وللمسلمين وأعطهم اللي لهم ولا تجاملهم في اللي عليهم ,,, وأن شفت بني صهيون معصعصين ويلون في الحبال كما عادتهم عود دربك على ربعك وتفاهم مع ولد حياة موسى وابن عباس أن كان يبون فلسطين يلمون القبايل ويسرون عليهم في ليله ظلماء غاب قمرها بعد يشجعون العربان ويعلمونهم أن هذي فرصه للي منهم يحبون التسري بالأماء..
رديت عليه : هب يللي ما تخاف الله ولا في قلبك رحمه ... طيب , وان ما مشت هروج السعه هذي اللي تعلمني بها وانت متكي يبو بيبان مفتوحه؟, وراك تعسرها وتنشبها في الصفاه ؟؟ , ترى أن ما عدلت فتاويك رايح أرتد العكتين اللي أعطيتك أياها قبل قليل ...
رد عليه ساري وقال : وسع صدرك حتى تخلص الفتوى ...نعم لها حل بقلة ألدين وسلوم العرب وعليها يعطونك اليهود جايزه مسكته كما لو تقول يبشبشونك بملايين يحطونها في حساب باسمك في سويسره , ويشيخونك على ثقيف , ويدفونك في أول الصفوف حتى تظلي يا منقاش تهرج من راس خشمك وتشوف الرجاجيل مثل الذبان ,, يعني يا منقاش أذا بغيت ترمي بالطفر وراك سدد وقارب , وارخي لهم الحبل اذا شدوه منك , وشد عليهم اذا أرخوا لك , حتى يرضون وتلاقون أنت وياهم في نص الطريق ,,, وترى ألأرض لله واعطهم اللي تبي ,,, وديار العربان وتربانها وسيعه وما أكثر منها ولا يضرهم أن راح منها وصيله ,,, وعندهم مسجدين ولا يضرهم أذا راح ألثالث ..
رديت عليه : أما هذي يا ساري فهي قريبه من المقصود وأظنها هي اللي تبي تمشي معي ,,, واحب ازيدك من الشعر بيتين واقول ترى المساجد ماهي أثنين تبقى ويروح الثالث ,,, لا , بلاد ثماله لوحدها فيها مساجد كثيره بعضها مصكوك .. والديار اللي خليان موحشه ولا فيها شباب الضو كثيره , وكما يقولون , جنه بدون ناس ما تنداس ,,, وهذي جنبك عوارش وعلق وشث وتالب فاضيه ونقدر كان نعطيها للي يبيها والحسد ما فيه خير..
رد ساري وقال : بس يا منقاش ترى عمرو ولد حياة موسى ومحمود ولد حياة عباس موافقين على قلة الدين ولا هم مغلوبين لا يتممون علمهم لكن ناقصهم كبش فداء ,, رديت عليه وقلت : ويش تقول ؟, وويش قصدك ؟؟. رد عليه ساري وقال : أنت يا منقاش ذكي بس حمار أذكى منك في السياسه ,, العرب كلهم واولهم محمود ولد عباس موافقين على قلة ألدين , وتراهم جوك وكبروا براسك ومرسلينك يبونك تروح لليهود وتنازل وتعطيهم اللي ما هو لهم وبعدها يقولون هذي سواة منقاش ويبعدون أنفسهم عن الملامه وتجي في راسك لوحدك يبو العوينتين ,, يعني يحطونك على سير يسير بك حتى تلقى مصير السباعي والسادات ,, وهي كلها ما تزيد عن شهر والا سنه بالكثير ويرسلك أبو الهول والا أبو نضال أو حماس والجهاد الى الدار ألأخره ومعك حميرك , وتروح فيها روحة فقير اليهود اللي لا متاع في الدنيا ولا جنه في الآخره ..
بعد فتوى كبش الفداء فتحت عيوني وصحيت واعتدل عقلي وعود في راسي , وقلت : كثر الله خيرك يا مفتينا , لا بالله وش نبي بقلة الدين , ولا عاد أبغي ألا فتوى ألدين ,,, وأنت يا راعي السواني تكفى تبلغ أبن موسى وابن عباس أني مصخن وبطني يمشيني واخاف لا يكون عندي فنزويلا الطيور واعدي الناس , والا أستاثم اذا شفت نساء بني ألأصفر ..
ثم قول له يدورون غيري مثل رويعي الغنم وابن داخل والعمده وابو تركي وابو عادل وابن عزاب وابن سلمان وابو نشقه وابو عبدالرحمن والنتيف وابو أمجد وابو خالد ,, ويا ليت يسرعون ويرسلونهم كلهم دفعه واحده حتى يتعاونون,, أما أنا فلا عاد أسمع هالهروج , ويا يديه فكي حلقي وثوبي ما عاد ياسع ألا أنا , وسلامتكم ...