بطل التطبيع /الحلقه الرابعه.

[منقاش]

بطل التطبيع /الحلقه الرابعه. بطل التطبيع /الحلقه الرابعه. بطل التطبيع /الحلقه الرابعه. بطل التطبيع /الحلقه الرابعه. بطل التطبيع /الحلقه الرابعه.

تذكرون في الحلقه الثالثه أني طلبت من شيخة أسرائيل تزوجني حتى يسير بيننا وبين عيال عمنا اليهود حسب ونسب ورحامه وتطبيع يطابق فيه القول الفعل ,, وتذكرون أنها رفضت وقالت : خل السعه في بالك قدام شويه , وخلي حتى يكتمل التطبيع وتفتح الحدود بيننا وبينكم ويومها أتجوزك أنا وبنتي مائير على أزواجنا (يعني أنه مسموح عندهم تعدد الأزواج والجمع بين البنت وامها وبعدها الطرح) .
وبعد أشترطت عليها النظره الشرعيه لبنتها مائير قبل الموافقه على زواجي منها , زدت سعلتها وقلت : سمعت أن ألشيوعيه واشتراكيتها ولت الى غير رجعه أن شاء الله ,, ويقول القواله أن صدقوا أن الرأسماليه اليهوديه مقبله علينا تحث في خطاها حثيث , وانها راكبه على العولمه وتشيل على راسها في الخصخصه , تكفين فهميني ليش الراسماليه يهوديه ؟ , وويش معنى الخصخصه ؟(لا خصك شر ولا جاك قشر) حتى يوم يوم أتربع واتوسط مجلس ربعي وامدح الخصخصه ما أبربس في كلامي عنها ويشكون أني ماني فاهم .
ردت عليه وقالت : لعلمك الشيوعيه واشتراكيتها والراسماليه وخصخصتها يهوديه 100% فكر وتنفيذ .
لكن قبل أجاوبك على الخصخصه قل لي يا منقاش ويش اللي عندكم اليوم بلاش ؟ , رديت عليها وقلت : العلاج عندنا بلاش وهو أقل من المطلوب واجد , والتعليم بلاش وهو أقل من المطلوب واجد , وشيل الزباله بلاش , والقبور وتغسيل ودفن موتانا والصلاه عليهم بلاش , والسير بالسيارات على الطرق بلاش , والهوا ومعه الكلا والماء في الخلا بلاش .
ردت عليه وقالت : عليك نور , خصخصة الراسماليه المعولمه ما فيها شي بلاش البته غير الهواء ,,, يعني كل شي تعرفه اليوم باقي بلاش يبي يعود بكره بفلوس .
وخذ مثال من بلاشكم اليوم اللي بكره مع الخصخصه رايح يعود بقروش وهو القبور ودفن موتاكم ,,, يعني بكره تطلع لك شركات تمتلك المقابر وحق دفن الموتى بما فيها مقبرة العباس والقيم ,, ووقتها ما يسمح لك بدفن ميتك الا عندهم , ولا تحصل على صك أثبات الوفاه الا بعد تجيب ما يثيت من الشركه أنهم دفنوا ميتك عندهم وأنك سددتهم .
ويجيك يومها لشركات دفن الموتى فروع وتخصصات ما عمرك سمعت بها مثل أقسام الحرق بالأفران للفقره المفلسين , واقسام تجميد ألأعضاء للأغراض التجاريه , وأقسام فرزنة الجسم كامل أو الرأس منفصل للزباين المقتدرين (الأثرياء) حتى يسير لهم بصيص أمل وفرصة في العوده للحياه مره ثانيه من جديد فيما لو تقدم الطب في المستقبل وقدروا يردون الحياه للأجساد,, وقيس عليها غيرها من أستثمارات الشركات في خصخصة أمور الأحياء والأموات .
يعني يا منقاش مع الخصخصه تنتهي دولة خدمات ورفاه المواطنين اللي تقدم لهم رعايه صحيه واجتماعيه وتعليم بلاش , واللي تدعم هذي السلعه حتى تحمي هذاك المواطن ,,, لا لا , كله هذا الحكي ينتهي.
الدوله في عهد الخصخصه تقصقص أجنحتها الشركات الأحتكاريه , وتعود دولة تشريع (سن قوانين) , ودولة فرض للنظام الداخلي وحارسه لمصالح الشركات واستثماراتها في الأحياء والأموات .
وتراك محفول ومكفول في سد لحيتي اللي ما عمرها طلعت يا منقاش أن حطيت يدك في أيدينا وسرت في ما يرضينا واصبحت بطل من أبطال التطبيع أن الصهيونيه لتدعمك حتى يظلي عندك شركات مثل شركات بعض أعضاء السلطه الفلسطينيه اللي ريشوا وساروا من أهل الملايين بعد مساهمة شركاتهم في عقود بناء الجدار العازل والمستوطنات اليهوديه في الضفه الغربيه .
ما أطيل عليكم ... حديثي معها طال وتشعب وكان منه أني حذرتهم وأنذرتهم من أعداء السلام والأنسانيه أمثال رويعي الكلاب والمخاوي والمشاكس الناكس .
لكن الختام كان لوعه , لوعه ساعة ودعتهم بعد أجهشت بالبكاء على فرقاهم يوم حل ممشاهم ولا خلفه ألا الأنين والحنين على لقياهم .
وبعد مشوا مسحت الموع من على خدي وألتفت على قايد الطابور وطلبته يفتح عيونه سته على سته ويشمشم يمنه ويسره وأذا لقي أي واحد غيري يجالس والا يحاكي بني صهيون أو يعتب يمهم بكراعه عساها الكسر , أو يروح ويجي عليهم , أذا لقي أي خاين من هالنوعيه يمسكه بترقوبه ويجره بعرقوبه ويعلقه بواحده من كراعينه في أطول وغيفه في الديره وينتف شنبه شعره شعره ,ويمنع عنه كل الماكولات ألا البرشومي حتى يكون عبره لكل الخونه من أمثاله .
وقلت له يحاول يلفق تهمه لمخاوي منقاش ويلبسه أياها , ثم بعد يقبض عليه بليل أسود ينتف ريشه حتى يسير أمعط في البرد والهزل , لأني شاك أن الرجل مصاب بفنزويلا الطيور مع شوية عدوى من حمى شافيز وأحمدي نجاد .
والى عند نتف ريش المخاوي أللي يستاهل حتى نتف رمش عيونه أتوقف بكم , خلوكم معي في الحلقات الجايه حتى تعرفون باقي سالفة بطل التطبيع شيخكم وشيخ اللي خلفوكم الشيخ منقاش حفظه الله , والسلام عليكم ...

[منقاش]

تكفون يا مشرفين واحد منكم يكبر الخط حالا حتى المواطنين ما تتعب عيونهم .

[سنا الهجرة]

ليتني مشرف يا منقاش كان كان خدمتك لكن اكيد المشرفين بيقومون بخدمتك

خليني أرجع للحقة الرابعة واشوف وش عندك من جديد

[سنا الهجرة]

لله درك يا منقاش

أعتبرني من الان ومن قبل واحد من قرائك المتابعين لما تكتب ومن أشد المعجبين بما يخطه قلمك ويرسمه فكرك النير , حتى ولو تطاولت على بعض الناس اللي أعزهم وأقدرهم ما يهم

لانك بكل أمانه مدرسه وببلاش الى الان !!!!!!

بس الله يكفينا شر الخصخصة لا تغيرك علينا وتخصخص وتصير من ظمن شركات المقابر

وأنت خابر......

دعواتي لك بطولة العمر الين تنتهي من مسلسل
( الطريق الى كابل )

[@ بن سلمان @]

هي لا تنساها لي يا منقاش كبرنا لك الخط حتى يقراها لك القاصي قبل الداني وهذه أخر مرة أكبرها لك بلاش و بكرة مع الخصخصة نبي ناخذ على الكتابة عندنا في المنتدى أجرة و أي تعديل بيضاف عليه رسم خدمه و أي حذف أو تعديل بيفرض على اللي يكون ضده رسوم تستحصل منه

[سنا الهجرة]

المشاركة الأصلية كتبت بواسطة @ بن سلمان @

هي لا تنساها لي يا منقاش كبرنا لك الخط حتى يقراها لك القاصي قبل الداني وهذه أخر مرة أكبرها لك بلاش و بكرة مع الخصخصة نبي ناخذ على الكتابة عندنا في المنتدى أجرة و أي تعديل بيضاف عليه رسم خدمه و أي حذف أو تعديل بيفرض على اللي يكون ضده رسوم تستحصل منه

فتحت علينا باب كان مسكر يا منقاش الله يهديك

وعلمت اللي ما يدري

[أبو عبدالرحمن]

ما دام علومك هذه يا أبو نقشه ..ننفض أيدينا منك..

يعني فرحان بالخصخصة!!علشان تلهف من فلوس الولاياه !!!

[زيد الخير]

أنا الحمد لله اشتريت معزه .ولا بارك الله في الخصخصة والمتخصيصي.
هذه المعزه تسدني وتسد عيالي

[شبلي أبو الونات]

عوذة
الله من ونين يبي يونونه ربعك يا شبلي إن تم لهذا الخبل علمه
إححه أقول يا بن عمي يا منقاش أنت شيخنا ولا لنا مقام في الديرة إلا بك والديرة ديرتك بخيرها و عيرها حتى معزى زيد الخير ونحل بن داخل و غنم الرويعي و غروب راعي السواني وجايزة أبو عادل وفلوس قصيدته وعربية مشاكس و زيادة كل خامس من أخماس ثمالة يتنازل لك عن مقبرتهم ونبي يتنازلون لك عن البزايع ويبيعطونك عورش تسوي فيها منتجع وتستغل طيارة أبو تركي هناك وتحول مكانها في إستقطاب السياح من مختلف أنحاء العالم .
أقول أقبل وخلنا هنا في الحلقة الرابعة و أوعدك نبي نتطابع معك ترانا راضين بقردنا لا يجينا أقرد منه .

[قائد الطابور]

سيدي منقاش تمتع بالامن وكن على ثقه اني معك وخلفك وعن يمينك وعن يسارك ، وسوف اسد افواه الملقف اللي طالع لهم اللسنه زايده زي ( مشاكس والناكس ) وامثال المعارضين ولا يخفاك يا سيدي ان بن سلمان مثل العقرب اللي تلسع بذنبها ، ولا تنسى التعبان هذا ابو امجد والله لن ما تمشي صح لأصحح لك عقلك , والمتخلف هذا مخاوي منقاش وان سمح لي سعادتكم ان نغير اسمه لأنه كان نسميه مخاوي والان نبي نسميه المعارض الكبير , لكن اشير على سعادتكم تسمح لي اروح له في ديرته واقفصه قفصة عصفور واجيبه وارزع به في السجن عندنا في احد الخربي اللي في الديرة حسب معرفتك وازيد الحقه ابو امجد لا رحمو .

سيدي / سر وعين الله ترعاك الامن مخاويك ما تخاف .