القروش ولعبة الفقاعه / الحلقه الأولى .

[منقاش]

القروش ولعبة الفقاعه / الحلقه الأولى . القروش ولعبة الفقاعه / الحلقه الأولى . القروش ولعبة الفقاعه / الحلقه الأولى . القروش ولعبة الفقاعه / الحلقه الأولى . القروش ولعبة الفقاعه / الحلقه الأولى .

بسم الله الرحمن الرحيم
يا كم نحنا مغفلين , ويا كم نحنا قطعان بشريه أذا تركت حبل الله المتين تلوت عليها الحبال وكثرت بينها المنخنقه , أو ضلت وكثر فيها النطيحه والمترديه والموقوذه وما أكل السبع .
نعم الناس مغفله كلها , في أرض المريكان وأرض الطليان , وارض الفرانسه وارض العربان الجربان , الجميع مغفل بدون أستثناء , مغفلين مره ومرتين وثلاث أن ما كانت عشرات المرات ولا يستوعبون الدروس وخصوصا في دنيا المال اللي نحبه حبا جما, المال اللي أصبحت أحابيل سلبه في زمانكم مثل ألعاب السيرك اللي فيها كل فنون البهلوانيات واشكال الحيل والخداع المخلوطه بشي من الحقيقه .
والحقيقه المره أن الحياة (بما فيها من مال وزينه وتكاثر والا غيرها من مفاتن الدنيا) كلها لعب ولهو ونهايتها ضعف وموت , والحياه الحقيقيه ماتجي الا بعد الموته الثانيه اللي ما بعدها موت , والعجيب أن وقت التاسيس للحياه الحقيقيه هو في حياة اللهو واللعب والتكاثر والزينه والتفاخر اللي أنتم عايشين فيها , الله يجعلني وأياكم ووالدينا وذرياتنا من اللي يفوزون برحمته في الدارين وبجنه عرضها السماوات والأرض .
نعود لعالم القروش والفقاقيع واقول :
حتى تعرفون ويش سدك يا جبل , تعالوا معي لهالسالفه عن أزمة المال العالميه اللي من علو ضجيجها صمت الآذان وحارت الألباب .
والقصه من بدايتها أن مجموعه من الجماعه اللي مغفلين مثلي ومثلكم جوني في ليله من الليالي في حلة منقاش العامره في فرعة ثماله , جوني بعضهم واجم صامت منكس الراس , وبعضهم له نويح وثيابه شليح , والكل منهم يقول : يا شيخ منقاش , ألحقنا أن قدرت , تكفى أنت كبير ثماله ولا كبير بعد الله ألا أنت , وقروشنا شي منها صفى عليه الماء في لعبة بطاقات سوا ولعبة الأسهم , واللي بقي في البنوك نخاف يجيه من صروف الزمان صرف ويروح كما اللي من قبلها راح , وانت بعد الله مزبن لكل من يدخل عليك يا وجه الخير يبو نقشه .
نصيناك طلابة نصيحه وطلابة فزعه , ونسأل ويش تشير به علينا يا شيخ منقاش ؟.
قلت : الله يحيكم ويحي علومكم , لكن ليتكم بدال ترك قروشكم في البنوك حولتوها ذهب وفضه وحطيتوها عندي أمانه في الحفظ والصون (ناوي ألطشها عليهم) , لكن خلوني باكر آخذ القداحي (بندق بارود) واهبط على البنوك , وهي واحده من ثلاث , أما جيتكم بحقكم كله ومعه الغنيمه من اللي ألقاه في البنوك من حقوق غيركم , والا جيتكم بروس مدرا البنوك في واحده من الخياش , والا أستشهدت ووقتها أظنكم ما ترقدون عليها وتتركون ألأخذ بثاري .
مع تباشير الضياء في اليوم الثاني تحفلت بأحسن المصبغات من الثياب وتغرزت بالبعيثران والدوش والريحان , ثم أخذت بندقي على جنبي , وركبت رفيق دربي (حماري) وحودرت مع بلاد ثماله ناصي الطايف وبنوكها أبغي أفترش والتحف من خلق الله حتى أرد على ثماله حقوقها أو أموت دونها .
كتيت وادي جفن وصوتي يلجلج في الأوديه ويتكسر صداه على جنوب الجبال بعذب الطروق وجميل اللحون من الزهم والحدايا والانشاد اللي من طربها يهوي الطير من أعالي السما سكران , ومثلكم ما يخفى عليه أني أذا قاطرت بعض القرى أرفع الصوت شويه .
ويوم وصلت الصخيره ديرة رفيقنا الحجاج ولد حياة يوسف الله يرحمهم عند الحدود التاريخيه بين ثماله الفانيه وبقية بني عمومتها من ثقيف , ألا وانا على ساري الليل على راس ذود من الجماله طالعين في مصدارهم من الطايف ومعهم واحد من عيال عمنا الصهاينه أسمه شلومو ولد مائير .
تعلموني وعلمت لهم بموجز علومي , ثم رد عليه ساري الليل وقال : يا منقاش , أنت ساري في ليل ما فيه مسرى , والأفعى اللي تبغي تقطع راسها والا تبتر ذنبها وتترك راسها بينك وبينها بحور تلاطم في ديار ما هي ديار المسلمين , وبينك وبينها فوت وحياه وموت , أما اللي أنت ناصيهم في الطايف من بنوك والا غيرها تراهم مغفلين مثلكم فيهم النطيحه والموقوذه وما أكل السبع .
لكن يا سبع ثماله , عود دربك معنا يم ربعك وديارك , ويكفي القبيله خسارة قروشها لا تزيد تخسر واحد من كبارها مثلك يا منقاش اللي أن راح ما بقي في القبيله من يسد ماقفه , عود يا منقاش حتى نفهمك أنا وشلومو ولد مائير ويش سدك يا جبل ؟.
وحتى لا أطولها عليكم نتوقف من دون الجبل , خلوكم معي في الحلقات الجايه حتى تعرفون ويش قصة الأزمه الماليه العالميه الحاليه؟ , الأزمه اللي ماهي ألأوله ولا تبي تكون الأخيره , وتعرفون ويش سدك يا جبل ؟ .
خلوكم معي حتى تعرفون من اللي يمسك بخيوط اللعبه , وتعرفون أن عالمكم اليوم عالم مليان بقروش من قروش البحار ما هي من قروش الدراهم , قروش ياكل كبيرها صغيرها بلعبة القروش في محيط المال والأعمال , وسلامتكم ....

[أبو (مفك)]

سااالم وغااااااااااااااانم يامنقاش
والله انت تصلح تكون العمدة عندنا كمااااااااان
وعلى يدك ترجع الحقوق بس لا يضحك عليك شلومندر ما أدري ايش اسمه
وإذا ينقصك حاجه اطلب معاك (ابو مفك)

[أبو عبدالرحمن]

يعطيك العافية أيها الخبير المالي..

وزين أن جماعتك ما حصل منهم إلا نويح وثياب مقطعة وتنكيس الرأس!!!

خفت تروح فيها !!يجي واحد من هذله الخسرانين ..ويطخ من في مجلسك وانت معهم ..وبعدين يختم على نفسه..وهذا اللي حاصل كل يوم في ديار الأمريكان!

وودنا نعرف واش سد الجبل...لكن ما أدري خويك عنده العلم!!ننتظره ونشوف..

[صقر قريش]

يعطيك العافية
ادخلت السرور الى قلبي
فعلا انت من الرعيل الأول بسوالفك وعلومك
الله لايحرمنا منك انت من اليوم جدي ان شاء الله ازورك وتقر عيني برؤيتك ودي ارسلك للجنادرية فانت من التراث النادر يجب المحافظة
عليه .
اسال الله ان يختم اجلك بعمل صالح ويكون في ميزان حسناتك

[سنا الهجرة]

الله عليك يا منقاش .. مبدع ولا شك

أنا أشهد أن قصيدتي المتعلقه في توقيعك ما راحت خساره فيك

تدري لو ان الامر بيدي كان حطيت لك زاوية يوميه في كل الجرائد

ونص ساعه بعد الفطور في التلفزيون .. وخاصةً في رمضان .( مثل ما كان الطنطاوي )

[منقاش]

اخويه ابو مفك : وانت غانم ومشكور على الرد , وونعم بك وستة أنعام بمفك , واستجابه لطلبك نضيف العمده لألقابي حتى تسير مجتمعه : الشيخ العمده الدكتور الشريف منقاش .
اخويه ابو عبدالرحمن : مشكور على الرد , ويعطيك عافيتين والا ثلاث على قدر ما عندك من الزوجات , وان شاء الله تعرف قريب ويش سدك يا جبال ما هو جبل واحد؟ .
اخويه صقر قريش : مشكور على الرد , ويعطيك عافيه قد ما يعطي ابو عبدالرحمن , والله يجعل كل أيامك ولياليك سرور , ويملا قلبك بالأيمان , واشكرك بعد حطيتني جداوي (يعني جدك) , واتشرف أني أكون جد لك لأن جد الصقر صقرا مثله .
أما زيارتك فهي شرف لي وبيتي يحي بك متى ما تكرمت بزيارتي , الا الجنادريه , تراني داخل عليك لا تاخذني لها .
وجزاك الله خير على الدعوه الطيبه والجميله اللي ختمت بها مداخلتك , ومن جانبي أقول أمين لي ولك ولكل القراء , ويا ربي تجعلها شهاده في تحرير أولى القبلتين .
اخويه الشاعر الكبير سنا الهجره : مشكور على الرد , وما عليك زود , وقصيدتك مفخره لمنقاش لأنها من شاعر كبير , وصادره من القلب للقلب , من قلب صادق لشرواك من الرجال أنت وبقية فحول الشعراء واساطينه وفي مقدمتهم الشاعر الكبير ابو عادل صاحب قصيدة فخر ثماله اللي تخط بماء الذهب والشاعر لبشه .

[مخاوي منقاش]

منقاش انا قلت سواها ابو عبد الرحمن ووقفك بعد ان تطاولت على اسيادك وسيد سيدك السيد انا ولكنك عدت تتشفى بربعك من مغفلي ثمالة الذين اصبحو مدمني خساير فتجد الواحد يقتر على نفسه ويرتفع صوته عندما تمد له المسكينه مقاضي اليوم او الاسبوع ولكنه ما ان يتوفر لديه كم قرش يقدمها وهو مبتسم ابتسامة الغباء لهوامير الاسهم وهكذا دواليك ويستمر وبكل بلاهه يقول كلتنا الاسهم ويصنفها خبراء الانفس بالادمان النفسي للخسارة فنجده يشتري وهو متاكد 85% انه خسران فيعيش على الامل ب25%0
وقد نما الى علمي انك تتمنى ان اكون مع الخاسرين ولكني ابشر ابن سلمان انني مع اول يوم من رمضان فكرت في حال الدنيا وما طراء عليها من متغيرات على المعاملات المالية وكيف كان ابوي غفر الله له ولموتى المسلمين يكد من الصباح الى المغرب لقوت يومه وكيف تحولت الامور الى درجة اني اقوم من النوم العاشرة صباحا واتكشخ واذهب الى صالة الاسهم معززا مكرما مع القهوة والشاهي واحيانا تصل الى درجةالعصير اذا ارتفع الرصيد وب ضغطة زر مرة او مرتين اطلع وقد جمعت قوت اولادي لسنة كاملة000 ماهذا الحظ ؟ لولا دخول الحرام من اي طريق وقد وضع الناس بينهم وبين جهنم مطوع بل مطاوعة فقلت بيني وبين نفسي قاتل الله الرباء مادخل في شي الا حاسه ولعن ابو سنسفيله لذا نرى الناس في امريكا واوربا وروسيا وفي موقف لم يكن في حسبان قادة اليهود يصبون جام غضبهم على اليهود وبدا المسلمون يتكلمون باستحياء عن الرباء-- فقلت العن الشيطان واطلع من السوق وبدل ما تقتر على عبالك اطلع قبل ماتطلع روحك وفعلا طلعت بلا رجعة وقلت لاولادي البسو ومريت مطعم مندي واخذت ربع تيس وقلت لهم هيا انبسطو والباقي شريت فيه ارض ومت بغيضك يامنقاش

[أبو عبدالرحمن]

تكفى يا المخاوي ...تابع معنا هذه الحلقات...

وان شفت شيء من منقاش ما ينبلع علمنا فيه...فالشريك يعرف سر شريكه!!

[بيقبن بن فنحاص]

أخي مخاوي , لست أدري مخاوي الشر أم مخاوي الشيخ الشريف العمده الدكتور منقاش . وأظنك للأولى أقرب .
أقول لك , لا تتطاول على ثماله , والذي تسول له نفسه التطاول عليها أنت أو غيرك كائنا من كان سنقطع لسانه .
منذ متى أيها ألأحمق بين الثماليين ولو مغفل واحد .
وأنت يا أبا عبدالرحمن عليك منا كبير العتب , فأين دورك في تقليم أظافر القطط التي تتطاول على القبيله ؟.

[رويعي الغنم]

أيها ألأخوة المشرفون , وعلى رأسهم ابو عبدالرحمن : صدق ابن فنحاص , فقد تطاول الشمري على ثمالة في عقر دارها .
فكيف تغضون عنه النظر وأنتم تعرفون أنه ما غزي قوم في عقر دارهم ألا ذلوا , أما أنت أيه المخاوي فالرد ما تراه وليس ما تسمعه , ولا تظن أن عنوان سكنك مجهول علينا وأننا لا نستطيع الوصول اليك ...