زواج سيراميكه صديقي

[ابو نشقه]

زواج سيراميكه صديقي زواج سيراميكه صديقي زواج سيراميكه صديقي زواج سيراميكه صديقي زواج سيراميكه صديقي

االسلام عليكم ثم اما بعدين ....

كيف الحال وشلخبار ؟ وشلعلوم ( شلعلوم؟ ماكأنه اسم اسرائيلي ؟) عساكم من عوّاده
(وش هذا اللي مسبق للعيد ؟!!!)

هههههههههههههههههه ,, تباً للدلاخه

اجل تبون تسوقون يالبنات؟ ..قابلوني ان سقتووو خخخخخخخخ

اذكر مره جماعتنا عازمين راشد الماجد وابو نوره عشان يغنون بحفل تعيين ولد عمي اللي توه متخرج برتبه عريف فني بمصلحة المياه والأمن القومي ( اف بي اي ) فما كان من ابو نوره إلا انه يتغنى بأغنيته الشهيره اللتي يقول فيها :

كووول مررره بشوفك فيها ببأ نفسي أ أ .. أشوتك وأولك انك كولك على بعضك عندي بالحياة

طب أ .. أ

كولو إلا دااااه .. اياااك تسبني لا لا لااااااااا .. تيرا را تيرا را تيرا را



( قال يعني هذي مقدمه يابو الشباب؟)

المهم هذا يا طويلين العمر والسلامه واحد من الشباب اسمه سيراميكه ولا جاه اللقب من فراغ ,, الحقيقه اول شي يتبادر الي ذهنك اذا شفت وجهه هو السنجاب .. وقد تجد ان السنجاب مظلوم في هذا التشبيه بس ماعلينا :19:


طبعاً اذا شفتو ضروسه تقولون اللهم لا اعتراض كنها طوفريات ( وبلهجه اخرى "صينيات" وللاغبياء هو الشي اللي نحط فوقه الفناجيل وللي مايعرف الفناجيل هي الكاسات الصغار اللي نحط فيها الشاهي وللي مايعرف الشاهي هو الشي الذي يأتي بلون احمر وعند المصاريه اسود ( اخلص لا تتلطش ) . " لاحول ولا قوه الا بالله اللهم لا اعتراض سامحني يارب " الزبده .. تدرون عن المحش الي يقول : ضروسك كنها ضومنه ؟ بالنسبه له هذي مدحه .. بس هذا مايعني ان باقي وجهه زين ? هو مقشع بس ضروسه مغطيه على باقي العيوب الي فيه لو يوقف جنبه واحد من مدغشقر ولا تدرون خلوه واحد من تنزانيا ( على كيييفي انا المؤلف) .. المهم بيصير التنزاني كنه لبناني خخخخخخخ .. برضوو ماعلينا ,,

) بعد ايش ماعلينا ؟ بعد ما استاثمت في الادمي !!؟(

الحاصل انه في يوم من الايام التي لم تظهر فيها شمس , جاني يسحب خشته قال بالله يا سديقي ( الصاد ماسحه عنده) تعال ابيك في موضوع !! الكلام هذا الساعه 12 الظهر وجيعان وراجع من الدوام ومواصل يعني في هالظروف لو يتبادل ابوي اطراف الحديث معي لفخته بمرفقي وجبت له لحميه .. بس اني تقبلت هالولد الشنيع بصدر رحب وقلت ماذا تبغى ايها الضرس الناطق؟ (ترى امدحه الحين) قال تعال واعلمك .. المهم انا شكيت في نفسي لوهله ( امووووووووت على كلمةوهله احس كأني متصور مع توم كروز) ثم قلت خل اشوف وش عنده ؟ مع أني خابر ان ما وراه الا الدجه .

والله واروح انا وياه في الهايلكزس حقي وانواع الدوران وهو يحكحك في راسه وانواع الغنم الصغير يطيح من راسه ( يعني قمل بس هو القمل عنده اقرب للغنم منه للقمل ) وانا حواجبي بتدخل في خشمي من زود التعصيب واحتريه يطلّع هالدره المكنونه الي بيقولها ... اخر شي قفلت الاخلاق وقلت له يخوي اخلص علي بروح انخمد ترى توني طالع من الدوام ومخي يؤلمني ( امش يالتشخيص) قال طيب ياخي وراك عصبي ؟! .. قلت اخلص ولا يكثر وحاول تختصر انت وذا الضروس الي كنها سبائك نحاس !! قال طيب .. الحقيقه يابو نشقه انا بتزوج وابشرك تراني خطبت .. طبعاً انا ماأقشعر وجهي ولا ضاعت علومي .. وانا اللي التفت عليه وارمقه بنظره حاقده (ترى ارمقه احس انها كلمه بنت كلب) قلت انزل من سيارتي قال ليش اش حصل ؟!! .

قلت لايكثر ,, انزل دام النفس طيبه .. قال وش فيك انت !؟
قلت اقول وش وضعك انت مع كف يمدد وجهك على ذا الزفلت في تالي هالظهيره الموشمسه اللطيفه !! قال وش بلاك انت احاكيك من جد انا .. قلت وخر لا الفخك بركبتي في جبهتك لين والله ماتعرف وين القبله معه انزل لا انشّب الدركسون بين عيونك يالجعري ( أي سلوقي صغنن ) هذا اللي ناقص سماجه في هالشموس .

والله وهو اللي ينزل يسحب ضروسه وانا الي ارد السياره بنمره لين بغت تطلع البواجي مع فتحات المكيف من قوه الدعسه واروح بيتنا وانخمد واروق ويوم جت الساعه سته المغرب وانا اللي اقوم واتقهوى واعاين من الله خير وتجي امي علي تقول ودني بيت خالتك وهي خابره انه مافيه امل اروح بيت خالتي لان زوجها ما يحبني يقول اني اقطع النخل الي في بيتهم عاد من زين النخل الي عندهم لو انه زارع نعناع كان اصرف له من ذا النخله الي هو زارعها !! انا اول ماشفتها احسبها مغسله من مغاسل الرجال ناطلينها برى مادريت انها نخله الا يوم جتني خالتي مشخصه تقول وش رايك في نخلتنا ؟! قلت ريّحي بس !! ذي نخله ولا مسواك مطوع متشدد؟ وخري الله يصلحك


المهم بعد التفكير قلت والله جد ,, لايكون بينكب بنت الناس ويتزوج ذا المتنح .. بعدين من الدلخه اللي بتاخذه !!؟ والله وانا اللي افكر تفكيراً غويطاً (يعني عميقاُ) وقلت خلني ادق عليه يجي يشرح لي الوضع !! وازهم عليه .. طبعا ما امدا الجوال ينوي انه يرن الا هو راد عليه
( ياعالم تحسون انه يفرح اذا رن جواله ههههههههههههه تباً له ) .. قلت اقول تعال مرني اشرح لي الوضع ترى مخي مهوب معي يوم تتكلم الظهر ,, قال طيب ..انا سكرت السماعه والتفتت على امي اقول لها وين فنجالي ؟!!

(من هوايات الحريم ان الواحد اذا صد عن فنجاله شالته وودته المطبخ)

المهم ما امداني اسال الا هو يدق بوري عند باب بيتنا (ابدا ماهو مسنتر عند الباب) والله وانا الي اطلع له وقلت وش الحاصل يا فتى قال ابد والله خطبولي اهلي وبتزوج ,, عقبالك .... المهم انا مافي بالي الا ذي الضعيفه الي بتاخذه وشلون بتصبر على هالضروس بيصيرون نايمين في الغرفه وضروسه طالعه مع الشباك ( ترا والله ضروسه ماخشت مزاجي ابد كنها ألواح سيراميك ) ومالها داعي يتقلّب وهو نايم ثم يطيح المروحه من السقف ثم تروح فيها بنت الناس ثم يسجنونه بتهمة قتل متعمد ثم يقعد في السجن زمن وقدره ثم يطلع ثم يصير داشر ويستقعد للناس )-( ثم كمل مالت عليك وعلى سيراميكه معك ..هع هع هع هع) ! .. والله واباغته بسؤال قلت هي شافتك قال لا مذكور لها !! قلت خيــــــر ؟! علاج من الصيدليه انت !؟ وش اللي مذكور لها : رح خلها تشوفك لعل وعسى انها تستخير الله لا تلعب على البنت بس .. قال شايف كذا انت ؟ قلت أي والله قلّها خلها تشوفك !

والله ما كذّب خبر الرجال ويتصل على البنت وقبل لا يرعص السماعه الخضرا قال غمض ترى بأكلم محارمي !! .. لا يجي في بالكم انها هفتني نفسي اريح وجهه ببقس لين اخلي وجهه من عجائب الدنيا السبعه بس اني تريثت بالله ( حلوه تريثت صح ؟ .. ادري حلوه وضحكتكم بعد !! ) المهم .. قلت طيب كلم وبلا دلاخه .. والله ويكلم وقال اسمعي يا بنت ترى انا شين وابيك تشوفيني قبل لا نتزوج ويصير الوضع منضجع والامور في دبور !!! قالت ليه ,, انت خايف ما اعجبك ولا وش الموضوع ؟! قال لا البلا فيني انا ... وفي اثناء ذلك انا كبدي تفوح واتل ( تل من التل اي شد بقوه ) ام الجوال من يده واكلمها قلت اسمعي يا بنت الناس : الولد عليه ضرس لو شافته وحده حامل ولدها بيجيه بهاق من شين المنظر اللي هي شافته وفيه من الدلاخه اللي يكفيه ويكفي ثلاثه هنود واقفين جنبه وعيونه كنها اثنين متقاطين في بيجر ومتلاصقين في بعض عاد عقب هالكلام كله انتي وضميرك ؟ وتلخمني بنت اللي ماني قايل وتقولي مالك شغل انت ,, انا راضيه فيه قلت في نفسي يا مال مفك العجل اللي يفقع مخك ويامال الضربه القاضيه من يساريه خاطفه لنسيم حميد ( ابد ماطاح وجهي) قولي امين ,, يارب انه اذا اخذك وجبتوا عيال يستأجرونهم لمبات مخيم هم وضروسهم ( منغبن) .. المهم ,, وانا اللي القط وجهي واقول له اسمع يا هيه خلنا نروح لعياده دختور اسنان يشوف لك حل لا تدخل على بنت الناس كذا!!!


قال تقوله صادق ؟! اجل يالله .. ونروح للعياده قلت انتظرني بدخل اكلم الدختور .. وادخل على الدختور واقوله معي واحد نبي نسويله بتر لثه ( يسمع بالعلاج) .. قال ايش ؟ قلت المهم عليه خشه مصابه مدري وش تبي ونبيك تتفاهم معها .. قال هوا المريز فين ؟ قلت بناديه لك دقيزه .. واروح لسيراميكه يوم وصلت عنده قال لي هو يوجع؟ !! قلت اييييش؟ .. مابعد بدينا يابو الشباب !؟ اصلا تونا رايحين نسأل وش اللي يوجع وما يوجع ادخل على الرجال دخلك جني قل امين ( طبعا انا منفقع قلبي ان هالشين بيتزوج وانا لا ) ويروح للدختور ويدخل عليه يوم رفع الدختور راسه بيناظر ولا اخونا في الله طاق ذيك الابتسامه كنه يسوي دعايه سقنل توو ,, قاله الدختور بزمتك دي ضروس ولا قلة حيا ؟! قال سيراميكه : لا والله و قسم بالله ضروس ! قال الدختور اطلع برا يا حيوان مش وقت استهبال !! قال سيراميكه وشو استهباله والله هذي ضروسي .. قال الدختور مشكلتك ياحبيبي رح شف شركة مقاولات ولا مهندس ديكور يشوف لك حل فيها ,, هنا عياده محترمه يالله اطلع برا ياعربقي ياوحش ( لايق عليك يامحمود المليجي)

المهم انا قاعد برى واسمع انواع السب ولا ادري وش الطبخه شوي الا اسمع !!!!!! طرخ قربع قربع توت توت انا القطار السريع امشي ولا استريح ( خيـــــــــر ؟!!)
المهم .. مادريت الا سيراميكه خويي طالع ومكتوب على جبهته ( شويه عليه جسر الملك فهد ) قلت افا عسى ماعورك التقويم يوم جا في جبهتك ؟ قال لا بس انه جرح مشاعري حقيقتن ,, (تكفى يالحساس).. طلعنا من المستشفى وانواع الهم اللي في الولد باقي على زواجه اسبوع وضروسه يبيلها تقويم مدته اقل شي 300 سنه ويالله تصير ضروس انسان ولا ادري وش اسوي وانا اللي اقعد اتقلب في فراشي ومافيني نوم مدري وش اسوي ؟ والله وانا اللي اعقد العزم واقوم من الفراش

واروح لبيتهم الساعه 2 في الليل وامزع الباب ( مداهمه يابو الشباب؟ ؟! ) ولا هذا ابوه نايم في الحوش على باله يتذكر ايام الديره قال وش بلاك يالملتسع قلت وخر لا الفخك بكعب رجلي على جبهتك اطير ماتبقى من حواجبك يالعراقي ( والله ابوه كنه إياد علاوي ) يالله وخر ياقليل الادب !! قال ياحمار انا قد ابوك !! قلت طيب ابتعد واغرب عن وجهي لا اتفاهم معك !! وين الضرس الي انت مربيه في بيتك !؟ قال: سيراميكه ؟ (لااااااا لااااا تبون الصدق ابوه يحش )
قلت ايه اخلص علينا وفي اثناء ذلك ولا وجه العنز يطلع لي بشورت ومن تحته شد !! قال وش الحاصل قلت اركب ركبتك ذنوبك قل امين ,, قال بغيّر ملابسي وانا اللي اتله مع رقبته وانطله في حوض الهلي ( دلع هايلوكس ) وامر اثنين من العيال لي تسع سنوات اعرفهم ماقد قلت لهم شي الا قالوا قدام في أي وقت وفي اغلب الاحيان يجون معي وهم مايدرون وش الطبخه ,, (تقولون لي ماهم سنايديه اقولكم معليــــــش . استريحوا )

ونروح للاستراحه وانا اللي اسدحه واقول لخويي الاول يمسكه زين ,, وخويي الثاني لبس غطاء الوجه حق مسدس اللحام ,, وانا جبت المنشار الكهربائي وانواع القصقصه والصنفره وماتسمع الا انواع القربعه .. اللي جنبنا يحسبوننا نبني ملحق في الاستراحه خخخخخخ ,, المهم ما اذن الفجر الا وحنا نليّس .. قصدي نلمع ضروسه ( مصدق انه ملحق ) ما اقولكم ضبط فاه ( فمه وفي روايه ثمه ) بس صار وجهه وجه اودي 2007 !! . قال واحد من العيال ياخي لو قلعنا ضروسه وسويناله تركيبه مهوب اصرف انت وراسك ؟!
قلت لا مهوب اصرف هذا ضروسه متصله بالعامود الفقري مباشره ولو قلعناها بيجيه شلل ,, روقنا بس ! قال أي والله صح عليك .


والله ونروح وننطله في بيت ابوه ونروح ننخمد يوم جا عقب اسبوع وتجيني امي تقول : شفت خويك وش حليله تزوج وانت ماتزوجت يالداشر
يالصايع بتقضي كل عمرك في الدشره والانترنت( والله قويه من الوالده) قلت اقول اركدي بس انا ما اتزوج لين يتزوج ابوي معي في ليله واحده يوم تغير وجهها قالت تبي قهوه ولا شاهي قلت لا ابي ببسي قوارير ام نص ريال تعبئة الجميح ..


يستفاد من هذه الروايه ( تكفى يانجيب محفوظ على غفله)

1- اصلا نانسي عجرم كل جسمها سيليكون يعععععع عليها ( بالله صحيح؟)

2- محمد حمزه من جد مصدق انه ممثل؟ احلى مافيه الثياب اللي بياقات قيطان ( ابووووووك يالتراث)

3- احلى مذيعه في القنوات الفضائيه هي لونه الشبل في قناة الجزيره ياليتهم جيراننا في الحاره( امممممم ايش قصدك؟)

4- صديقي سيراميكه قاعد جنبي يقول لي اما مايستفاد كلها مالأمها داعي ( مالك شغل يابو ضروس)

[ABO TURKI]

هههههههههههههههههههههههههه
ههههههههههههههههههههههههههه
هههههههههههههههههههههههههههه
ههههههههههههههههههههههههههههههه
وربي يا ني فطست من الضحك
لا تطول علينا عجل بواحده ثانية

[أبوخالد]

ابونشقه
ههههههههههههههههههههههههع

[ما عندكم أحد]

ما تجي الا تحط لك موضوع وتمشي
ياخي شارك الناس واقرا معهم واكتب حتى يشاركونك
انا هالمرة مريت وقريت لك عشان ابكتب لك هالسطرين وابقفي واخذ الباب معي

[حسن عابد]

ابو نشقه انت حي سلم على الاخ سيراميكا ولا تطول الغياب

[ابو نشقه]

شكرا لكم على المرور