القروش ولعبة الفقاعه / الحلقه الثالثه.

[منقاش]

القروش ولعبة الفقاعه / الحلقه الثالثه. القروش ولعبة الفقاعه / الحلقه الثالثه. القروش ولعبة الفقاعه / الحلقه الثالثه. القروش ولعبة الفقاعه / الحلقه الثالثه. القروش ولعبة الفقاعه / الحلقه الثالثه.

بسم الله الرحمن الرحيم
تخبرون في الحلقه اللي راحت يوم تدخل ساري الليل وقاطع حديث شلومو, وقال بصوت حاد :الوقت ضيق والليل سرى يا ولد , وأغلب العرب اللي مقرين أذانيهم لك ما يفهمون كثير من اللي تقوله , لأن ذكاهم معطل ولا هو مستغل ألا في الدسايس والنخبسه والدنفسه ما ظهر منها وما بطن على الجار والقريب والصاحب والرفيق وعلى أعضاء منتدى ثماله وعلى كل بني جلدتهم .
في هذا المجال خذ معك رجال , أما في غيرها , الله يرحم الحال .
أدخل يا ولد مائير في موضوع الأزمه الماليه العالميه الحاليه مباشره , وفهم السامعين ويش سد الجبل الأول ؟, ثم بعدها فهمهم ويش سد الجبل الثاني ؟.
رد شلومو , وقال : أبشر يا معزب الرحمن ... قاطعه ابن أبي محمد وقال : حرام عليك تقول هذا الكلام يا ولد بني صهيون , الرحمن سبحانه وجل شانه معزب لجميع خلقه ولا يعزبه أحد .
واصل شلومو حديثه بعد تأسف على غلطته وبررها أنه سمعها من أفمام بعض المسلمين , وقال : شوفوا ياللحى الغانمه , الأزمه الماليه العالميه الحاليه سببها لعبة فقاعة الرهن العقاري في دوله واحد (فقط) من العالم وهي أمريكا اللي ريسها يسمونه بوش ووزيرة خارجيتها عمتكم كنترة الرز .
هذي الفقاعه بدت صغيره ونفخ فيها النافخين عن عمد وعن سبق أصرار حتى كبرت ثم كبرت ثم زادت في الكبر حتى أنفجرت في وجيه الجميع الا صناعها خرجوا منها سالمين وراحوا عنها غانمين , وتسبب أنفجارها في أمواج عاتيه هاجت وماجت وانطلقت بسرعة الطايره النفاثه وضربت كل شواطي الكره الأرضيه , وخلفت دمار أقتصادي في كل مكان عرفنا أوله ولا ندري عن آخر عواقبه .
واسمحوا لي قبل الحديث عن فقاعة الرهن العقاري في أمريكا , أقول لكم بأختصار :
لو المسلمين خاصه والعالم عامه طبقوا مبادي الأسلام الأقتصاديه وضوابطه الماليه اللي تمنع المقامره والربا والأحتكار والغش والتدليس والخداع والجهاله والغرر والغبن وشراء وبيع الدين كان ما شافوا هذي الأزمه ولا شافوا أي أزمه ماليه أو اقتصاديه غيرها .
وحتى أكون واضح أكثر , أقول لكم : أن كل المعاملات المحرمه في الأسلام اللي ذكرتها لكم من الربا والقمار الى ببيع وشراء الديون , كلها كانت روافد لأزمة الرهن العقاري المسببه للمشكله في ظل أنعدام الشفافيه والأمانه.
ولا تستغربون أذا كان هذا الكلام صادر من يهودي متصهين , لأني أعرف أن ألأسلام دين حق من الله, ودين مكتمل شريعه وعقيده ينظم حياة الناس من الميلاد حتى ملاقات رب العباد , وفيه أسعاد لكل البشريه , لكني باقي على يهوديتي ومتمسك بأهداب صهيونيتي لأن تلمودنا ومشايخنا (الأحبار) يحللون لنا كل شي في كسب المال خصوصا منكم يالأغيار (غير اليهود), يعني , أحبارنا يسددون ويقاربون أكثر من ربعكم , ويراعون الخواطر , وفيهم مرونه أحسن من مشايخكم واجد .
قاطعه ساري الليل وقال : اسمح لي يا ولد مائير , قبل تدخل في الحديث عن فقاعة الرهن العقاري خليني أذكر السامعين بفقاعه محليه أغلب أهل الطايف عامه وثماله خاصه أكل فيها مقلب أذا حلم به الواحد منهم فز من لذيذ المنام وجفاه الرقاد باقي ليله كله .
الفقاعه اللي لعبتها ما كان تبي تنطلي عليهم لو راعوا ما بينهم وبين الله , وقال كل واحد منهم , يا ربي حبا في رضاك وبعدا عن سخطك ما أرضى يدخل عليه قرش واحد ماني متأكد أن مصدره 100% حلال .
يا ربي ترزقني من واسع فضلك يا واسع الفضل وتجعل مأكلي ومشربي ومسكني ومركبي وملبسي حلال , يا ربي أجعلها كلها حلال حتى أكون مستجاب الدعوه , ولا تجعلني مثل الرجل اللي يطيل السفر أشعث أغبر يرفع يده للسماء ويقول يا ربي يا ربي وأنى يستجاب له ومطمه حرام ومشربه حرام وملبسه حرام وغذي بالحرام .
لو كان هذا المبدأ مستقر في ضمايرهم وطبقوه حق التطبيق بجوارحهم ما حصل لهم ما حصل , لكنهم حاولوا يزلعونها وهم مغمضين وقالوا , خلي بينك وبين النار مطوع , والنتيجه أنزلعوا هم ومطاوعتهم , نسأل الله لهم العوض والمغفره جميعا.
ثم ألتفت ساري على ولد مائير , وقال : آسف على المقاطعه , وتفضل يا شلومو , واصل وتكفى فهمهم كيف الطريقة اللي أنلعبت بها هالفقاعه ؟.
رد شلومو وقال : هذي الفقاعه كان أسمها المحلي عندكم بطاقة سوا , واسمها عند علماء النصب المالي العالمي , الخطط الهرميه في كازينو الرأسماليه (1) , ويوصفها البعض بالرحله المجانيه في السفر من سترة الحال الى الفضيحه وفقر ألمال .
وكان من آخر البلدان اللي فضيت جيوب أهلها (قبلكم يالثملان) في هذي اللعبه هي أختكم المسلمه ألبانيا الأوربيه في التسعينات الميلاديه , وبعدها بنت عمها في المشرق البعيد اللي كانت في يوم من ألأيام كلها مسلمه تقريبا حتى نصرها المنصرين واصبح المسلمين فيها هم الأقليه , وهي الفلبين اللي لعب فيها اللصوص نفس اللعبه عام 2003ميلاديه .
وهذي اللعبه أن كان منكم أحد وده يلعبها في يوم من الأيام ترونها بسيطه وسهله , وبأختصار ما عليك ألا تسوي دعايه لكل من يبي يستثمر ويشغل ماله عندك بعايد (مكسب) نسبته ما بين 20 الى 50 بالميه شهريه او ربع سنويه .
ثم أذا دارت العجله وسلكت العلوم ما عليك ألا تستقبل اللي يدفعه المستثمر الجديد وتدفع منه نسبة مكسب عاليه للمستثمر القديم حتى تصل الى القمه اللي تلاحظ فيها أن اللي يبي ينصرف من نسبة المكاسب للمشتركين القداما يساوي أو يزيد على المبالغ اللي يدخل بها المشتركين الجدد .
أذا وصلت لراس الهرم , بهالمرحله ماطل في دفع المكاسب وقت ما يطول حتى تستقبل قدر ما تقدر من المشتركين الجدد وترفع الرصيد, ثم أهبر الجميع بسرعه وهرب راس المال للخارج , أو أهرب أنت وياه سوا , أو دسه وحول بعضه باسم المره والورعان والكرعان ولا تعطي أحد بعدها ولا فلس واحد وخلي الهوش تبقى في وسط الحوش .
وحتى لا نطيل عليكم نتوقف عند هالحد , وخلوا في بالكم أن الله يبتليكم بالخير والشر فتنه حتى يبلو أخباركم , فلا تأسوا على ما فاتكم ولا تفرحوا بما آتاكم أن الله لا يحب الفرحين.
وخلوكم معي في الحلقه الجايه حتى ندخل مع ولد مائير في وسط الفقاعه وصلب أزمة الرهن العقاري , ونعرف كيف حدثت ؟ , وليش تجاوزت آثارها البلد اللي لعبت فيه , وليه ما توقفت على حده ؟. وسلامتكم ..
.................................................. .................................................. ......................................
(1) مخاطر العولمه , لروبرت أسحاق , (ص 103 + 104 + 105) .