المشاركة الأصلية كتبت بواسطة منقاش
يا شيخ سلام الله يسلمك ويسلم الجميع , أشوف طلبات ألأعضاء كثرت , ولا هي خاليه من التعسرات ودورة النشايب , واللي فتح باب هالمشكله واحد ما غيره ,وهو الحكم اللي على بالي وبالك عسى ربي يهدينا ويهديه .
واقول يا شيخنا ليت التعسرات وقفت عند السمر ,, لالا , العلوم من وجهة نظر بدر الدجى تعدت السمر ووصلت للوتر وبعده عمت كل الشجر .
من أجل كذه عزوتك أبو نقشه يبي يقف موقف يكون عند حسن ظنك , يبي يقف جنبك ويساهم معك في صد هالهجمه الشرسه الغاشمه اللي وراها ما وراها من المكايد .
بعباره فيها بعض الوضوح والكثير من الغموض , خلنا نبتدي المناوره برمي بالكره خارج الملعب , ثم نقترح خطه مثل خطة حياة بوش ونقلبها خارطة طريق نخلط فيها ألأوراق من جديد , حتى نكسب الوقت , ونشتت ونشوش على تفكير الحكم والخصوم , ونوزع الواجبات على هوانا ماهو على هوى غيرنا .
وبعباره فيها الكثير من الوضوح والقليل من الغموض , خلنا في أول خطوه نفرق بين السمر والسلم من بدية الطريق , وبعدها يجي واحد ثاني يمشي بنا شويه في الدرب ويفرق بين شجرتين ما سبق أحد فرق بينها , وثالث يسوي مثل اللي قبله , وانت ماشي .
وفي النهايه نخليك تقول كلمة الفصل في التقريب بين المتفرقات ووجهات النظر المتناطحه , وتفرز الصحيح من اللي ماهو مليح , وأقل المكاسب من هالخطه أننا نسحب البساط من تحت أقدام الحكم ونرده لعبنجي وأنت تصبح الحكمنجي تحت أشرافي .
وهالحين خلنا نبتدي بسم الله ونقول :
1 - السمره أكبر من السلمه , بعباره ثانيه , أكبر السلم دوبها تساوي في أرتفاعها أوسط السمر, بعباره ثالثه , السمره أذا طالت زادت شويه على 7 م , والسلمه نادر تجاوز 4 م .
2 - السمره في الصيف لها ظل ما يخلي من البروقه , لأن ورقها ماهو كثيف ويحت بعضه في الصيف , والسلمه مالها ظل في الصيف ولا في الخريف لأن أوراقها تساقط في أواخر الربيع وتصبح جرداء في الصيف والخريف ولا تبدا تطلع من جديد ألا في نهاية الشتاء .
3 - السمره زهرتها أصغر من زهرة السلمه , وتزهر من أول الربيع وبعضها من منتصفه , ولونها وشكلها شبيه بشكل ولون زهرة (بله) الطلحه لكنها أصغر منها بقليل ,, أما السلمه فزهرتها صفراء أو يغلب عليها الصفار تطلع مع الورق في نهاية الشتاء (قبل دخول الربيع بقليل) في شكل وحجم بلة الطلحه لكن تختلف عنها في اللون.
4 - السمره الكبيره لها ساق كبير أعرض بكثير من ساق السلمه الكبيره أن ما كان ضعفها , ويفرز الساق في بعضها سائل لونه ضارب للحمرة ويسود مع التقادم , أما السلمه ساقها صغير وفروعها نحيله ويغلب على بعضها ألأستقامه والملاس , وتغطيها قشره خفيفه ضاربه للصفره .
5 - السمره يطلع على نواميها نوعين من الشوك في الشجره الواحده , نوع وهو الأكثر , أشواك طويله ومستقيمه ومعها (نوع ثاني) قليل من ألأشواك القصيره المحجنه (منحنيه) , أما السلمه مافيها ألا نوع واحد من الشوك ابيض وطويل .
6 - شكل ثمرة السمره يشابه أعلا علامة الأستفهام , يعني مقوسه ولولبيه , وثمرة السلمه تاخذ من التحدر والأستقامه أكثر من ما تاخذ من شكل الهلال .
|