القروش ولعبة الفقاعه / الحلقه الرابعه.

[منقاش]

القروش ولعبة الفقاعه / الحلقه الرابعه. القروش ولعبة الفقاعه / الحلقه الرابعه. القروش ولعبة الفقاعه / الحلقه الرابعه. القروش ولعبة الفقاعه / الحلقه الرابعه. القروش ولعبة الفقاعه / الحلقه الرابعه.

بسم الله الرحمن الرحيم
بعد سنسف شلومو ولد مائير لمخاوي منقاش وخلى راسه قد حبة السمسمه والا أقل شويه ( لأنه كان يتتن في وسطنا ويسوي حركات مش ولا بد) طرده برا طرده بنت كلب على ما قال المكاويه , (وخليه وليته له وأنا عليه من الشامتين) , حتى عشاه ما خليناه يقلط معنا وأعطيناه أياه لوحده على شامس البيت (الدكه) .
بعدها دخل ولد مائيرفي حديثه مباشره في أزمة الرهن العقاري اللي تسببت في الأزمه الماليه العالميه الحاليه وقال :
شوفوا ياللحى الغانمه , حتى أبسط لكم موضوع هالحلقه وما بعدها من حلقات , واهون عليكم فهم المشكله , رايح أسردها لكم على شكل قصه , لكنها قصه مطابقه للواقع 100% , ووقايعها على النحو التالي :
هذا رفيقكم أخو محماس , ومعه أبو كرداس , وخاله نجر , وابن عمهم كريشان عايشين في أمريكا , ويشتغلون فتره صباحيه , وأذا أنزنقوا ماديا أشتغلوا فتره مسائيه على الصباحيه , وأذا أنزنقوا أكثرزادوا شغلوا زوجاتهم معهم .
هذا الحشد العائلي في العمل يحقق مستوى دخل شهري للأسره يتراوح من (2000) الى (3000) دولار تقريبا .
ومع كل هالجهد والمكابده عسى ولعل أنهم يعيشوم مستورين .
لكن يا صعب المعيشه في هاك البلد اللي يحسبونه الناس بلد الأحلام ومستوى المعيشه المرتفع , لا , هذي الأحلام كانت في الغالب صحيحه قبل ما يزيد على ثلاثين سنه وورى , نعم كانت كذه واكثر , أما اليوم الخير واجد لكن الشفط واجد , والظلم المالي على رؤوس الأشهاد وحسب القانون .
كيف ؟, أولا يا كثر الفواتير الشهريه , فاتورة قيمة ألمياه الوارده للمنزل , فاتورة الصرف الصحي , فاتورة الكهرباء , فاتورة الغاز , فواتير الهاتف , فاتورة شيل الزباله , فواتير التأمين على السيارات , فواتير التأمين الصحي , فواتير التأمين ضد الحريق , فواتير بطاقات الأئتمان , أيجار المنزل , وفواتير أقساط السياره والأثاث وغيرها .
كل ها الفواتير اللي تصلك على صندوق بريدك , تجيك مكتوب في طرف كل واحده منها : أذا ما تقدر تدفع كل المبلع أكتب شيك بنسبه بسيطه والباقي نقصده عليك (طبعا بفوايد ربويه مركبه لصالح مصرف ممول) .
وهذا غير ضريبة الدخل , وضريبة التملك , وضريبة المشتريات , وضريبة المبيعات , ومستقطعات التقاعد , ومستقطعات التأمينات الأجتماعيه . وأغلب هذا اللهف (بأستثناء الضرايب ومستقطعات التقاعد والتأمينات الأجتماعيه) كله يروح لجيوب أصحاب المصارف وملاك الشركات , والمواطن الأمريكي يلهث ولا هو ملحق يرضي نهمهم .
وعليها يحمل هموم مستقبليه لتكاليف دراسة عياله في الجامعه ويحاول يوفر لها من بدري , هذا غير التوفير لتكاليف تحهيز دفنه اللي يضطر أغلبهم يدفعها مقسطه بفوايد ربويه وهو حي حتى يشتري قبره وتابوت دفنه من بدري , واذا ظروفه الماديه صعبه أكثر , وقتها لكل حجره أجره , وأقلها كلفه , يقدر يدفع تقاسيط حرقه في فرن وذر رماده في الهوا .
النتيجه , يكتشف الأنسان بمجرد ما يستقل عن أسرته ويصبح راشد أن الحياه رخيصه وبائسه , ولا لها معنى بعد نزع منها التكافل والرحمه والأنسانيه , وبعد يكتشف أنه يعيش للماده وبالماده اللي تلاحقه حتى يوم دفنه في قبره , وبعد يكتشف أن الرق اللي قالوا أنه أنتهى حل محله رق ألعن منه مية مره , رق وعبوديه ما يشوف فيها العبد سيده اللي يشغله هو وزوجته راغمين .
طبعا المستعبدين (ملاك العبيد) هم القله القليله القابعين في بروج عاجيه من أصحاب المصارف (البنوك) الربويه وحواشيهم والشركات العالقه فيهم , والعبيد هم الطبقه العريضه من الشعب ( الطبقه المتوسطه والفقيره) .
أمام هذا الواقع المر ترخص الحياه وتصبح بلا قيمه , ويقرر الكثيرين تجنب ألأنجاب أذا ما أنتحروا حتى لا ترهقهم على ما هم مرهقين تكاليف تربية عيالهم وتعليمهم , وحتى لا يواجه عيالهم من بعدهم تكاليف الحياه الشاقه اللي قابلتهم وعانوا منها ألأمرين .
كيف وقع الناس في هالفخاخ والشبكات الجهنميه المنصوبه بأحكام ؟, الجواب : الخصخصه الرأسماليه اللي ما تقل لعنه عن أشتراكية الشيوعيه السوفيتيه ,, الخصخصه اللي ما كان مخفف من غلواءها ووحشيتها ألا وجود معارضة من النقيض لها قبل ينهار المعسكر الأشتراكي الشيوعي .
لكن بعد أنهارت الأشتراكيه والكتله الشيوعيه تفردت الخصخصه الرأسماليه بالساحه , وبعد تفردت كشرت عن أنيابها وبانت على حقيقتها وزادت وحشيتها في غياب خصمها اللي أنهار , وأنتهت دولة الخدمات ورفاه المواطن اللي كانت تقدم دعم للسلع الأساسيه , وتقدم رعايه صحيه واجتماعيه وتعليم بالمجان .
كل هذي الفضايل أنهتها سياسة الخصخصه الأقتصاديه , وانحصر دور الدوله في فرض النظام الداخلي والدفاع الخارجي , وتشريع وسن القوانين اللي بعضها مكنت مجموعه قليله من أصحاب المصارف والشركات من نهب البلاد والعباد بضغط من لوبياتها في مجلس الشيوخ والنواب , , ودولة دورها حارسه لمصالح المصارف والشركات واستثماراتها في الداخل والخارج وفي الأحياء والأموات , وأحيان تقيم حروب في الخارج لصالح المصارف والشركات يموت فيها اللي يموت من الطرفين بمئات الألوف , ولا هم مهمين وفي مية داهيه , أنما المهم تحقيق مصالح المصارف والشركات سلما كان أم حربا وآخرمثال أحتلال العراق .
هذا هو الجو الرأسمالي المتخصخص المتلصلص اللي لقيوا فيه أنفسهم خوياكم الأربعه (أخو محماس , وأبو كرداس , ونجر , وكريشان), ومعهم الملايين من مثلهم , واللي قصتهم فيه قصه , القصه اللي يبي ينبني عليها هرم الرهن العقاري اللي يبي ينهار فيما بعد ويتحول الى أزمه تسمى أزمة الرهن العقاري اللي تسببت في الأزمه الماليه العالميه الحاليه .
والقصه من بدايتها , أن أخو محماس مستاجر شقه مع عايلته ب(1200)دولار , وبها وبغيرها مع نهاية الشهر يصبح جيبه فاضي , وياكم تمنى وحلم أنه يمتلك في يوم من الأيام شقه يعرف أنها ملكه وينفك من ألأيجار , ولكن هيهات , ومثله بقية خوياه الثلاثه مع فروق بسيطه مختلفه .
وهاك اليوم قابل أخو محماس رفيقه أبو كرداس , وتعلمه عن أحواله وبشره أبو كرداس أن أحواله زانت بعد أشترى شقه بالتقسيط , وكانت مفاجأه مدهشه لأخو محماس .
كيف أبو كرداس اللي مفلس مثله وأحوالهم متشابهه قدر يشتري شقه ؟.
بعد سأله , فهمه أبو كرداس أنه يقدر يشتري شقه والا بيت مثل ما شرا , وأعطاه عنوان وتلفون المكتب العقاري اللي أشترى منه شقته .
ما صدق أخو محماس يسمع كلام أبو كرداس , ولا كحل النوم عينه هاك الليله حتى أسفر الصبح , ومن يوم شع النور راح ووقف على باب مكتب العقار ساعة زمان حتى فتح .
تفاجأ أخو محماس بحرارة ألأستقبال , وفهمه المكتب أنه رجال منتف , وأنه بسبب تدني دخله ما فيه بنك يمكن يقرضه , لكن مكتب العقار رايح يساعده يحصل قرض لكن بمعدلات فايده (ربويه) عاليه , ورايح يساعده حتى يخلي الفايده في الفتره ألأولى منخفضه حتى يقف على رجليه.
كل هذا الحكي والتفاصيل ما كانت تهم أخو محماس بعد عرف أن الدفعات ألأولى تبي تكون في حدود (1000) دولار شهريا (يعني أقل من ألأيجار ب200دولار) . وافق حالا واشترى شقه مقسطه على ثلاثين سنه مع رهن الشقه حتى نهاية السداد , وكان في غاية الفرح والسعاده هو وزوجته ويدعون بالبركه للوسيط واللي مول شراهم لبيتهم .
سمع نجر وكريشان بالسالفه , ولا صدقوا يسمعون الخبر حتى سووا مثل أخو محماس وابو كرداس واشتروا بيوت .
وبعدها أنتشر الخبر مثل النار في الهشيم , وكلا سمع وكلا شرا , وزاد الطلب على العقار وزادت الأسعار , وأصبحت الشقق والبيوت اللي أشتراها رفاقتكم ألأربعه تساوي قيمتها اللي أشتروها بها مع زيادة (20%) على قيمتها ألأصليه في ظرف سنين والا ثلاث .
وسمع هذا وذاك بهذا المكسب اللي بسببه زادت أستضرمت النار في الهشيم , وزاد الطلب على شرا البيوت وزادت معه ألأسعار وزادت معها فرحة أخو محماس وبقية ربعه .
ما طال الوقت وزاد بلغهم خبر مفرح ثاني , وهو أنهم يقدرون يسعرون بيوتهم وياخذون مقابل نسبة الزياده اللي زادتها أسعارها قرض مقسط بفوايد من بنك , بشرط رهن جزء من البيت , وكانت أخبار ساره مكنتهم من قرض جديد جددوا منه أثاث بيوتهم وغيروا سياراتهم القرنبع بسيارات جديده , وسارت حياتهم تبرق وتلمع ويغلب عليها البهرج , وغيرهم سوى مثلهم .
لكن الكل بما فيهم خوياكم الأربعه ما كانو منتبهين أن فيه فقرات مطبوعه بالخط الدقيق في أماكن متفرقه في أسفل بعض صفحات العقد الكثيره تقول :
إن أسعار الفائدة متغيرة ولا هي ثابتة، وانها تكون منخفضة في البداية ثم ترتفع مع الزمن ، وفقرة ثانيه تقول إن أسعار الفائده تبي ترتفع كلما رفع البنك المركزي أسعار الفائدة ، وفقرة ثالثه تقول إنه إذا تأخَّر العميل عن دفع أي دفعةٍ تضاعف أسعار الفائدة ثلاث مرات. وفقره رابعه تقول إن دفوعات الأقساط الشهرية خلال السنوات الأولى تروح كلها لسداد الفوائد , وفقره خامسه تقول أنه أذا تأخر المقترض عن تسديد ثلاث دفعات يحق للبنك الحجز على البيت وعرضه للبيع واستيفاء حقوقه .

الى هذا الحد من قصة أخو محماس وابو كرداس ورفقاهم نتوقف , خلوكم متابعين معي في الحلقات الجايه حتى تعرفون الفقاعه ومن نفخها حتى فقعها وراح ولا رقعها بعد قبض ثمنها, وتعرفون ويش وراك يا جبال من ألأهوال وما يتعس الحال؟ .
خلوكم متابعين , ورجايه من أخواني المشرفين اللي فضلهم علينا كبير وسراجهم بيننا منير واللي ما نقدر نكافيهم الا بالدعاء لهم على عناهم معنا وسهرهم في خدمتنا وبدون مقابل الا حرصهم على ما يدخل السرور على قلوبنا , رجايه أنهم لا يحذفون من الحلقه شي كما حذفوه من بداية الحلقه الماضيه (1) نزول عند رغبة عضو ما هو محق في رغبته , ولا عنده برهان على ظنونه .