خاتمة الرد في جواب : من بنى السد ؟

[منقاش]

الجرعه الرابعه
بسم الله الرحمن الرحيم
سلام يا وجيه الرفاقه والعواني
يا أخواني المواطنين الثملان , نحنا في العشر الأواخر من رمضان , الله يعيده علينا وعليكم من الطيبين ويتقبل من الجميع , لأجل كذه نبي نخفف من مقدار الجرعه ولا نكبرها , وأن قدرنا ندسمها مع صغرها يكون أحسن .
على كل حال , خلونا تواصل التبحثات على بحث ابن همام حتى يسفر الصبح وينجلي الظلام وتبقى الحقوق في أيدي أصحابها ولا أحد يشكك في أحقيتهم بها, ونقول :
قال بعض العقال من الأعضاء : يبن همام أرسي على بر , أنت وراك تاخذ بعض نصوصك وترفض أو تحرف بعضها ؟, أنت وراك تورط في الأنتقائيه يوم أنك ترفض كلام الهمداني في تسلسل السروات وتقبله في وادي جفن ؟, يا رجل كلام الهمداني صحيح كله أذا عرفت أن ثماله من ثقيف بالحلف , وأن ذكر القبيله ألأم يغني عن الفرع , يا رجل هذا تناقض صارخ منك ولا يقول به من يدعي أنه راعي أستدلال بالأدله.
والأدهى والأطم , أنت وراك تنص علينا كلام الصحاري اللي صحيح وتبدله بكلام من عندك ماهو صحيح ؟, ترى فعلك هذا ما سبقك له أحد من الباحثين .
أصم الحارث آذانه واستغشى ثيابه , وواصل يقول : بصرف النظر عن اللغط اللي رايحه تسببه بعض تصريحاتي , ترون نتيجة أبحاثي اللي أعتمدتها من كلام الهمداني تثبت أن وادي جفن لثقيف ما هو لكم , وأذا وادي جفن لثقيف ولا هو لكم معناها أن السد لثقيف ولا هو لكم . ونصيحه لا تاخذون وتعطون معي , هذي نتيجة بحوث بعضها له عندي خمسه وعشرين عام .
أعترض من أعترض وتمعرت وجيه من تمعرت لأنهم يعتبرون ديارهم وآثارهم جزء من هويتهم الخاصه , وتشفى من تشفى وهلل من هلل عن درايه والا جهل, وقالوا نصر من الله وفتح مبين, وشهدوا أن ما قاله ابن همام هو الحق , وأنه بحث علمي ما يخر منه الماء , وأنهم يعرفون أن شهادتهم تبي تكتب وعنها يسألون.
وحتى يضمد ابن همام الجراج , حط الملح على الجرح ووقف يخطب وقال : يا ناس وين ألبابكم ؟ , والله أن الديار والآثار من العلم اللي ما ينفع العلم به , والجهل اللي ما يضر الجهل به , وبعدين وادي جفن يمكن ما يتعدى السد والباقي نعطيه لأجدادكم يرعون فيه جفارهم , بس أنتبهوا لنصيحة مشفق عليكم مترفق بكم , ترون أن قلتوا وادي جفن يلقي ويتعدى من فوق السد فمعنى هذا أن اللي فوق السد ما هو لكم.
قلت في نفسي , أما آن لك يا منقاش أن تترجل من على حمارك ؟ , وتربطه في قعر وغيفه والا عاقد , وتقول لبن همام كفايه تسفيه لأحلامنا , وكفايه عبث بالأدله ورمي هذا وأخذ هذاك وتحريف لذاك .
وفعلا نزلت من على صهوة حماري واعتزيت وقلت : أني أبو نقشه شيخ الأستراحه اللي يورد القول الفعل , كنت أنصى هاك الرادف وانا متجهم الوجه وأمشي الهوينا واتعكز على ذبابة سيفي بيميني والرمح بيساري , وبعد أعتليت الرادف نزلت طرف العمامه من على ذبابة أنفي وخطبت خطبه بتراء موجهه لأبن همام وشيعته ومن سار في ركبهم , ومن ما قلت فيها:
يوم أن اللي كتبته يبن همام من العلم اللي ما ينفع العلم به , والجهل اللي ما يضر الجهل به , ليش قضيت خمسه وعشرين حول , حول من ورا حول تجمع في حكي الهمداني والصحاري وتأبط شرا وقطاع الطرق , ثم جاي بعدها توردها على غير مواردها وتصدرها في غير مصادرها .
ليش يبن همام جمعت الجن على ما قلت أنت وولد أم محمد (ابن أبي محمد) وارسلت جني البحار على القفار , وجني الجبال على السهول والوديان , وحبست بعضهم في القمقم ولا خليته يطلع ياخذ له شمة هوا والا قات .
أنت وراك تاخذ من الشاه أذنها وتعشيها لضيوفك وترمي بباقي الذبيحه في المكبات يوم كبيت كلام رفيقنا الصحابي ابن قرط اللي يقول فيه للصحابي ابن العاص أنه من ثقيف ومن جيران ثقيف ومن حلفا ثقيف وبالتحديد من ثماله ؟, ليش أخذت الجوار وتركت باقي الحوار.
يبن همام النصوص اللي جبتها كلها صحيحه , ثماله من ثقيف , ومنازلها مع ثقيف في السراه وفي وادي جفن أخذوها كما قال لك الهمداني و الشاعر البارقي بالباس والثبات , ووادي جفن أدناه لقبايل من ثقيف ومنتصفه من الصخيره الى أعاليه لثماله الثقفان, , وان لقيت لهم بعد كذه منازل في نجد والا كثبان تهامه من ما يلي الساحل تراها مضارب باديه , لأن ثماله قبيله مستقره لكنها أذا أجدبت ديارها يرحل بعضها بحلالها ورا الكلا والماء ثم يعودون لها أذا أروتها غوادي المزن وكسا الحيا وديانها والجبال .
وحتى لا نطول عليكم , نكتفي بهذا المقدار من الجرعه , خلوكم متابعين معي في الجرعات الجايه , والسلام