أستراحه مع سارفه من السوارف..

[منقاش]

أستراحه مع سارفه من السوارف.. أستراحه مع سارفه من السوارف.. أستراحه مع سارفه من السوارف.. أستراحه مع سارفه من السوارف.. أستراحه مع سارفه من السوارف..

بسم الله الرحمن الرحيم

سلام يا ثماله , والله يسعد صباحكم ومساكم , وكل أوقاتكم , وبعد :
ما كان في نية بدر الدجى يريحكم في هالتوقيت , لا مع هالسارفه ولا مع العلوم الفارهه , لكني يوم أستبطيت جديد جهابذة الحياه الفطريه , قررت أني ألهيكم وأشغلكم بشوية هروج عن سارفه من السوارف في عرض قصة الرحله الميمونه لحليفي الرحال الشيخ أبو سيفين , كثر الله من أمثاله , ومن أمثال كل من كان في معيته من رفاقه , وفي مقدمتهم عميد منتدى الحياه الفطريه , الشيخ سلام , سلمه الله .
أقول , قرر بدر الدجى وعرعرة المنتدى أنه يلهيكم بسارفه من السوارف , لبينما يجيكم أهل هشيم المحتظر بعلوم واحده من هشيمهم اللي مالي الصعدان .
وقبل أتكلم عن موضوع أستراحتكم هالمره , أحب أذكركم بالطيب من الذكريات في أستراحاتكم السابقه , اللي كانت أولاها مع هامه من الهوام (العفن ألأسود) , وثانيتها مع آفه من الآفات (الدبر ألأسود) , وثالثتها مع داب من الدواب (ألأمحوه) , واللي ما أطلع منكم عليها , هذي روابطها :
http://www.thomala.com/vb/showthread.php?t=53942
http://www.thomala.com/vb/showthread.php?t=56476
http://www.thomala.com/vb/showthread.php?t=57188

أما هالحلقه , فهي عن سارفة من أسرف السوارف أسمها العلمي (Latrodectus mactans), وهي العسوده السوداء اللي منتشره في أغلب أصقاع ألأرض كما تشوفون في الخريطه أعلاه , العسوده أجارني الله وأجاركم يا ربعي منها ومن قرصتها, ويوم أقول السوداء فهذا وصف لواقعها , ولا هو من باب العنصريه الجاهليه وبواعثها البغيضه .
لا لا , لكن العسودات أسم جنس يطلق في ثقافة الثملان على كل ألأنواع السامه من فصيلة هالسارفه , أما اللي مافيها سم من فصيلتها , فهذي نسميها عنكبوت للمفرد وعناكب للجمع .

وحتى يفرز الفارزين سارفتنا هذي عن ما عداها من السوارف , وصفها الواصفين بالسوداء , وقالوا العسوده السوداء , وهذا أسم على مسمى , لأنها سوداء اللون ألا من نقطه حمراء قريبه من مؤخرتها , وسوداء العمل من قوة قرصتها .

أما الربع اللي جملوا التسميات , وأدخلوا فصيلة العسوده في قايمة العناكب , من المترجمين والمسقفين(بالسين) المتأثرين بالثقافات ألأجنبيه , الربع اللي سموا كل فصايل فصيلة العسوده بالعناكب , فلا نعترف بهرطقاتهم ولا تسمياتهم ولا تبويباتهم , ولا نعتبرهم ألا مجموعه طفيليه أرتقت مرتقا صعبا , مجموعه مكونه من مجاميع من المغفلين المصابين بعقدة التخلف والأنهزاميه , مجموعه هرفت بما لا تعرف , وقالت ما قالت في غياب أهل التسميات الحقيقيه , التسميات النابعه من البيئه والتراث والأصاله .
وهذا سبب من ألأسباب اللي تبي تدفعني مستقبلا , حتى أكون رابطه برئاستي أسميها رابطة ألأصاله , حتى نعيد كل الشعاب لفراعها ونسمي ألأشياء بأسمائها , وبعدها , نشكل محاكم تفتيش لمحاكمة كل أدعياء الثقافه اللي غربوا ثقافتنا وطمسوا بعض ملامح ومعالم هويتنا وسوارفنا...

العسوده السوداء , أسمها عند الخماجات , ألأرمله السوداء , لأنها تعشى بزوجها ليلة الدخله نسأل الله العفو والعافيه, وتستمر في ألأنجاب بقية حياتها من دون حاجه للزواج مره ثانيه .
يعني تبقى العسوده أرمله لكنها منجبه , وهذي من غرائب هذا النوع من ألأرامل , وتبقى في حداد على زوجها بقية عمرها .
والمؤكد أن حدادها يبتدي من أول ساعة تولد فيها وتفتح فيها عيونها , والدليل لون السواد أللي يتشح به كل جسدها من لحظة ميلادها حتى وفاتها وساعة مماتها ..
العسوده السوداء باقعة البواقع , سمها ناقع وقريصها فقيد وضايع, ولا فيه عسوده سامه غيرها , يقارب ضرر سمها من سم هالسارفه اللي ربما فاقت بسمها كثير من الحنشان.



وياكم من قريص عضته عضة الردى , ولا أمسى ألا وحيد في بيت الوحشه والديدان , وهذا الخطر المستفحل الخطوره , كان قبل أكتشاف الطب الحديث لأمصال سمومها , أما اليوم , ففرص الحياه كبيره بعد مشيئة الله , بشرط وصول قريصها بالسرعه القصوى لأقرب المستشفيات حتى يعطى المصل المناسب .
ألأولين من جدودكم , كانوا أذا فقد قريصها صوابه وضيع جوابه , يكتفون القريص ويجودون وثاقه , ويحطونه في وسط عيبه يوكونها عليه حتى ما يطل منها ألا راسه , ويشلونه في بير من أطول البيار , ويوهمونه أثناء الشل في البير والجبيد منها , أن الحبل أنقطع , وانهم غروا منه , حتى يفزعونه ويدخلون الرهبه في قلبه , بزعم أن صدمة الفجيعه تستحث حواس بدنه على مقاومة سم خبيثة الذكر العسوده , وهذي خرافه من خرافات ألأولين الله يرحمهم ويتجاوز عنا وعنهم..
ولا أظن أني بحاجه حتى أنبهكم عن أماكن وملاذات العفنه السوداء , لكني أحذركم ثم أحذركم أنكم تخلون كناتركم وكناتر ورعانكم واللي خلفوكم واللي جابوكم برا البيت , ترونها تحول الكنتره لملاذ آمن , وأنتم تعرفون الحروب اللي قايمه هالأيام في شرق الدنيا وغربها , وكلها على الملاذات الآمنه , أنتبهوا لا تحول الأرمله كناتركم لملاذات آمنه , وتودي القدم اللي تدخل عليها في مية داهيه .
العسوده يقول عنها القواله , أنها تبيض ميات البيض في الدفعه الواحده , وتحطه في وسط كيس بحجمها والا أكبر منها , ولا يتفقس ألا بعد شهر تقريبا , ويقولون أن صدقوا , أنها تعيش لفتره ممكن تصل في بعض الأحيان الى ثلاث والى أربع والى خمس سنين , رجيجيلها الرمه الهابي ,كما تشوفونه في الصوره , رخمه وصغير , وبالكاد يجي نص حجمها , ولونه وشكله يختلف عن لونها ..
هذا بعض ما عند أبو نقشه عن العسوده , كفاني الله وكفاكم شرها , وشر كل من فيه شر , وكما يقولون , أحسن ما في الكلام زبدته , وخير الكلام , ماقل ودل , وسلامتكم ...