دخول العريس في الشبكة أو الزواج

[منقاش]

أني أبو نقشه ؟, هو الكلام اللي تقوله يبو تركي حلم والا علم ؟ , وبعد :
ألأوله , أشكرك يبو تركي على غيرتك وشيمتك , وهذا العشم فيك وفي كل ثمالي رباه رجل ابن رجال , وكل سيده بنت سادات .
والعمليه عباره عن صراع أراده , وشد حبال بين فئتين من الناس , فئه تشد الناس معها فوق يم الشيمه والقيمه , وفئه تشد فيهم على أسفل يم ألأرض والتقليد ألأعمى .
وفيه فئه ثالثه مع القوم يا شقرا وهم ألأكثريه , مساكين , أمعات , أن أحسن الناس أحسنوا , وان طبوا في الهوان هانوا معهم ...
الثانيه , العلوم بلغني أنها تطورت أكثر , وقام واحد من الحمقى في قرى من ألأقريات ودخل عياله مع ولده العريس وعروسه , كلهم ذكران (بالغين) وأناث وهو معهم , دخلهم على محارم الناس وانتصوا, ويا ليل ويا عين , ويش بلاهم يسون هالفضيحه المخجله ؟ , الجواب : يبدو على قول الزهارين أنه جاهم غزله .
ولا تنسون أن جوهر المشكله أن بعض الحريم متصلخات , يعني , تحضر للقرى بعبايتها ما تحتها شي (من باب الشفافيه) , وولي أمرها عباره عن سواق , ولا يدري كم تحت السواهي من دواهي ...
الثالثه , بليه والله يبو تركي تهون كل البلاوي جنبها , وهي فضيحة مفتولين الشوارب اللي يدخلون محارمهم على حمار مثلهم أسمه طبيب النساء والولاده , ويتركون ورى ظهورهم طبيبات النساء والولاده اللي موجودين في المستشفيات الخاصه والعامه .
الرابعه , ليش تجيب طاري الشبكه ؟, هذي أصلا ما يسويها ألا المساكين المغلوب على أمرهم , المساكين اللي المفروض نعذرهم في كل ما يصدر منهم , أما الرجال الدنادين اللي حاوينها علم وعقل ورجاله وثقه بالنفس ما يسون شبكات , اللي مثلهم يرفض الشبكه ويخليها هي وأهلها .
وأهل العروس العقال , يرفضون الشبكه , ويقولون , يكفي يا من ناسبتنا القرى , وترانا يا عريس الهنا نعين ونعاون , ونكمل القاصره اللي تغلب عليك ولا تقدر تكملها , والعبره بحسن العشره ماهو بكثرة الهبلشه , وأكثر النساء بركه أقلهن مؤونه .
والزبده , بصرف النظر عن كلام ابو نقشه , أنسوا كل اللي قريتوه فوق , وزبدة الزبده هي : اللي ما يرضي الله , المفروض نتجنبه , واللي يجيزه الله المفروض ما نعترض عليه , وسلامتكم , وسامحوني أن كان قسيت عليكم .