خاتمة الرد في جواب : من بنى السد ؟

[منقاش]

تعقيبات منقاش تعقيبات منقاش تعقيبات منقاش تعقيبات منقاش تعقيبات منقاش

الجرعه الأولى
سلام يا مسلمين
هالحين انتهت بحوثكم الله لايبحث لنا خفى , وجا دور منقاش البدوي حتى يبحث معكم , وأبغي أعطيكم تبحثاتي على شكل جرعات , جرعه ورى الثانيه في ضيافة معزبنا رفيقنا ابن همام , وبعد ذكر الله والصلاة على رسول الله ,أقول :
الأوله : وين عقولكم ؟, وهو من متى آثار والا ديار والا أنساب القبايل الأحيا منهم والأموات ما تحدد ولا تنعرف الا ببيت يتيم من الشعر والا مقوله من هنه والا من هناك ؟, لا , وبعد , اللي يجيب البيت والا المقوله يقول هذا أثبات , وبعض اللي يقرون يهللون ويقولون لا بالله ثبت .
أذا كان هذا حالكم ما أقول ألا البيض تغشاكم .
الثانيه : أحب أذكركم أن الشعار أهل مبالغه وعيارهم طايش ولا ينوزن عليه علم , ويقولون ما لا يفعلون ويتبعهم الغاويين , وتأبط شرا الحرامي المصبح اللي ما خلى للناس جلال , واللي لو عاش حتى زمانكم ما وقفه عند حده غيرك يا منقاش , هذا المتأبط اللي فيه النون وما يعلمون لو ما لقيت في ألأرض الا كلامه آخذه ولا آخذ كلام عشره شعار .
وبالله عليكم لا تزعلون عليه يا شعار المنتدى لأن ماركتكم تختلف عن غيركم من الشعار , ولأنكم مفلتريين من المشرفين حسب ما جاني من علوم .
الثالثه : يالأجواد , العباره اليتيمه والبيت اليتيم والا العشره أبيات ما يمكن تستنتج منها علم وتحديد أوطان وهي مبتوره عن سياقها ولا عندك خلفيه بسبب مقالها ولا الظروف اللي أنقالت فيها ولا خلفيه جيده عن عقلية قايلها .
يعني أستدل بها على لسان العرب وبلاغتهم وشي من بيئتهم لكن الأستدلال بها على منازل الناس , حال المستدل بها مثل الأعشى اللي يمشي في الظلماء ويبغي يهتدي على الطريق , وفي الجرعات الجايه رايح أوضح لكم أكثر .
الرابعه : أنتم جيل ما تعرفون حال المجتمعات اللي قبلكم بمية عام , كيف به حال اللي سبقوكم بالف والفين عام , واذا تبون تقشون أي كلام تلقونه وتحولونه لأدله تصبحون مثل حاطب الليل.
يعني بكلام ثاني أقول أن القبايل كانت تجير بعضها أفراد وجماعات أذا جار الزمان على غيرها , وينزل ولد الشام في اليمن وولد اليمن عند أهل الشام سنين وشهور حتى تغير الأحوال ثم يعود كل ولد لبلده , هذا غير السفر والعمل اللي يودي هذا عند ذاك , وأحيان يقول الشاعر المجار والا المار كلام يذكر فيه ديار المجيرين , ويذكر فيه منازله هو وربعه فيها واذا قرا جيل من بعده بدهور كلامه يبي يتوهم أن ديار اللي أجاروه هي دياره .
وحتى لا نطولها وتقطع حبالكم , خلونا نتوقف , وموعدي معكم في الجرعه الثانيه , وسلامتكم ...

[منقاش]

الجرعه الثانيه
بسم الله الرحمن الرحيم
سلام يا ثماله
نواصل ما بديناه معكم في الجرعه الأولى من تبحثاتي على بحث ابن همام واقول :
جاب لنا ابن همام نصين عن الهمداني الله يرحمه , رفض الأول منها وقبل الثاني ,النص ألأول يعدد السروات مرتبه من الشمال للجنوب , سراة هذيل ثم سراة ثقيف ثم سراة فهم وعدوان ثم وثم ...الخ ,بدون يجيب ذكر لثماله .
وهذا شق كبر على الراقع ولا له عند باحثنا ألا التنصل منه بأي حيله من الحيل .
والنص الثاني يذكر أن وادي جفن لثقيف , وهذا اللي ركب في راس ابن همام وجاء على هواه , ويعتبره نص مقدس لا يقبل التفسير ولا التأويل ولا التنصل مثل يوم تنصل من اللي قبله, يبغيه ينقبل حرفيا وظاهريا وبس .
جاء المستعين بالله وقال : سم بالرحمن يا ابن همام , كلام الهمداني اللي جبته كله صحيح ألأول والثاني , لأن ثماله من ثقيف بالحلف , والقبيلتين مشتركه في السره وفي وادي جفن , وأذا الهمداني ما جاب ذكر لثماله تراه مصيب لأن ذكر القبيله ألأم وهي ثقيف أغنى عن ذكر فرعها ثماله في السراه وفي وادي جفن . وزاد المستعين قال , يبن همام تعوذ من الشيطان , وترى بعض نصوصك اللي جبتها تحمل حل للي أشكل عليك , وتشهد بصريح العباره أن ثماله من أيام الجاهليه من ثقيف وجيران ثقيف وحلفاء ثقيف , ويكفيك منها كلام أبن قرط .
أصر وابى لا يقبل هذا الكلام والا يرد عليه ,, ليه ؟ , ربما أنه يجد حرج في التراجع , وأن صح هذا التوقع فهذا يدل على أن ابن همام ما يبحث عن الحقيقه , ولا يبغي البحث يتفركش ويعود أغلب وادي جفن ومعه السد في بلاد ثماله .
طيب , أذا كانت أقوال الهمداني حجه في نظر ابن همام , ليش الأنتقائيه وأخذ واحد من أقواله ورمي الثاني في عرض الحايط حتى بعد نبهه المنبهين لمكمن الخلل في فهمه للنصوص ؟, الجواب : ابن همام راكب هواه وياخذ اللي يبي من الأدله ويرمي اللي ما يبي واللي ما يعجبه يشرب من البحر , وكذه البحث والا بلاشي .
طيب يبن همام , وين كانت ثماله خافيه أذا كانت نصوص الهمداني ما تذكرهم بالتحديد لا في سراه ولا في وادي جفن ؟ , قال يبدو لي من بيت شعر لواحد ثمالي أنهم كانوا بين الشث والطباق , ولا أقدر أجزم بموقع لهم في السراه لأني ما لقيت مكان نزلوا فيه الا قوسى .
والله عجيب , حتى قوسى اللي بغى يجود بها ابن همام على ربعه واضح من نص رفيقنا المبرد أن ثماله كانت تنزل فيها وترحل عنها , لأنه يقول بالفصحى : ( قوسى بلد تحله ثمالة بالسراه) , وهذا كلام كان صحيح الى قريب ويحمل معنى النزول والرحيل, لأن ثماله كانوا ينزلون فيه بحلالهم ويردون على ميراد الماء اللي فيه ويرحلون عنه .
وواضح من كلام المبرد أن قوسى في السراه لكن ابن همام حطها في تهامه وخالف في أستنتاجه النص اللي أستشهد به وهذا خطأ ما هو بعيد عن التناقض والكيل بمكيالين في أستشهاده واستنتاجه من كلام الهمداني .
طيب , فيه غيرها ؟ : نعم , بعض المتداخلين حاولوا تنبيه باحثنا عساه يترك التصلب عند ظواهر النصوص حتى يشبع خلفياتها تحليل وبحث , ولفتوا نظره لبيت قايله واحد من عيال عمنا شعار الجاهليه (مالك بن عوف) يقول فيه:
ألا منعت ثمالة بطن وج ٍ ... بجرد ٍ لم تباحث بالضريع
هذا البيت تبين لنا فيما بعد أن باحثنا كان على علم ودرايه كامله به وتجنب ذكره حتى لا يعكر عليه النتيجه اللي حطها في راسه مسبقا , ولو كان يجهله كان ألتمسنا له المعاذير, لأنه يوم ذكره واحد من البحاثه المتداخلين (واقول بحاثه لأننا كلنا بهالمعيار بحاثه) رد ابن همام وعلل ورود ذكر ثماله في هالبيت بالتصحيف.
والحقيقه أن البيت ما فيه تصحيف ولا تنحيف لكن العيب في الأنتقائيه واتباع ما تهواه النفس , والعيب أن البيت ما يراكب النتيجه اللي يبغي يصل لها كاتبنا , نتيجه سواء قصدها الكاتب والا ما قصدها نهايتها تقزيم ديار ثماله بالمقاس اللي يبعدها عن وادي جفن وبالتالي عن السد .
ولو أول كاتبنا البيت بتأويلات ثانيه كان تأويله معقول , كما لو قال مثلا , طبيعي الحليف يقاتل مع حليفه , وثماله من ثقيف بالحلف , وطبيعي أنها تمنع بطن وج من الغزاه حميه مع ربعها ثقيف , لكن وادي وج ما هو لثماله لا في ماضي الأزمان ولا حاضرها , وطبيعي أن الشاعر أستفرد ثماله بالمدح لأن العرق دساس وثماله من بني عمومة غامد قبيلة الشاعر, واصول القبيلتين كلها أزديه .
لو قال جواب مثل هذا كان بقى وادي وج لثقيف كما يعرف الجميع , والبيت يبقى على مبناه ومعناه .
والى هالحد نتوقف , واحب ألفت أنتباهكم أن نقد البدوي منقاش راعي الحمار لبحث بن همام الهمام من باب كفى بالمرء نبلا أن تعد معائبه , ابن همام اللي والله أني ما أعرفه الا بمعرفه ولا أدري الى هالوقت من هو ؟, لكن واضح من مجمل ما كتب أنه رجل تعصب لريه بصرف النظر عن الحقيقه , وأنه راعي خلق وأدب لكن جواده عثر عثره عثراء يوم عار من بعيد وجاء يشكك في ديار وآثار ربعه بدون برهان ولا سبب وجيه , ووين ؟, على الشبكه التكرونيه العالميه اللي يقرا فيها الجاهل والمتعلم , واللي أغلب من يقرون فيها ياخذون العلوم على عواهنها ولا يدققون فيها ولا في خلفياتها .
سلموا لي على رواد منتدى الأستراحه وقولوا لهم منقاش مشغول عنكم ومعود عليكم قريب, وخلوكم متابعين معي للجرعات الجايه , اللي رايح أزيد الطين بله وأبين لكم فيها أن ابن همام جمع اقول من بطون الكتب يشكر على جمعه لها لكنه ما عرف يفسرها التفسير الصحيح , وسلامتكم .