مشروع هدم المحاجي (ح1).

[منقاش]

الشيخ ابن همام حفظه الله : ألأوله أشكرك على التفاعل والرد , والثانيه , أهل المحاجي ماهم بحاجه لتوعيه , لأن هالهوايه أذا تمكنت من صاحبها تصبح مثل عادة التدخين اللي ما يتركها راعيها حتى يجني شي من ثمارها المره.
يعني , التوعيه مهمه , لكن فايدتها محدوده , والحل يبدا بالمناصحة المباشره والجاده لهواة الصيد المعروفين بالكف عن الصيد .
والثالثه , الحادثه اللي أشرت لها , راعيها عرف على نفسه , وتهدد أكبركم سنا , وسيارته أوصافها معروفه لخويكم , وهذا أنتم تسترون على أسمه , والمتستر على راعي الجرم لابد يلحقه طرف من المسئوليه .
والرابعه , نطلب منك أولا , ومن حليفي ابو سيفين ثانيا , تقولون لنا من أبطال الصيد اللي تهددوا خويكم حتى يكون هذا من باب التشهير بهم , ومن باب معرفتهم لو أستدعى ألأمر مستقبلا توقيف هالظاهره بنصح والا بغيره .
والخامسه , خويكم جاه تهديد ووعيد , وأذا تأكدتم من صحة ودقة كل ما ذكره لكم , وتأكدتم أنه ما زل على الرجال وزهق عليهم بلسانه حتى تسبب في أستفزازهم واستثارتهم , وقتها أدنى ردة فعل منكم أنكم تطلبون الخاتمه من عقالهم ,, والمطلوب , ماهو جلوس وتحاكم بالمذاهب المحرمه , لكن على ألأقل أعتراف بالخطا , وتقديم أعتذار عن ما حدث , ووعد أنهم ما عاد يعرجون على الحمى بسلاحهم .
وأذا كان ردهم رد مكابره فيه أصرار ورفض للأعتذار , يوكل خويكم وكيل أن كان ما يحب المشاغبات وجرجرة الدواير الحكوميه , ويسحب الجناه وسلاحهم , وأقل ما يوخذ منهم يمين أذا أنكروا , وهذا رد كفيل بردعهم هم وكل من يمشي على شاكلتهم ..
والسادسه , الحمى يحتاج لمراقب يبلغ عن اللي يحدث فيه من صيد والا رعي , وبدونها مافيه فايده , وسلامتك أنت وكل ألأخوان ....