حملة ابو عهد الثالثه للمليون رد

[ابوعهد]

هجوس الشعر مثل الخيل وانا الفارس الخيـال
وقرطاس الورق ميدان والساحه هي الساحـه
اقود الخيل بلجام الهـوى فالحـل والترحـال
واشوف خيول شعري عن خطايا الوقت جماحه
خيول اسرجتها ماقفيت عنها مستريـح البـال
تعبـت وجبـت اصايلهـا ولادورت للراحـه
يحول الحول في عمر السنين وحولها ماحـال
نهايتها علـى يـد الزمـن لاصـوّب سلاحـه
مطارقها خيال وركضهـا فالقاصـي المدهـال
عوايدهـا ولامـرت حوافرهـا علـى واحـه
وانا الخيال يابن الشيخ والعقـده لهـا حـلال
ابوس اليد قفاهـا واتجنـب صفحـة الراحـه
ولاتنقص ميول القلب شي من قيمـة الرجـال
ميول القلب سبحـة والرجـال زنـود قداحـه
وهي ماعاد تنشد تعرف اللي قيل واللـي قـال
وتعرف كيف قلبي تجرحه وتـداوي جراحـه
وانا احداها واخليها تجينـي تشـرب الفنجـال
تقهـوى مـن عنـا خيالهـا وتلـفّ مسباحـه
ولاتقصر خطاويهـا بدربـه والليـال طـوال
يواعدها بمشرافه ومضوى الذيـب مسراحـه
كريم الوقت ماقصـر حليلـه وافـي المكيـال
عطانا كلنا وش هـي خسايرنـا مـع ارباحـه
تولعنـا بدنيانـا وضحينـا بــراس الـمـال
توهقنـا وحنـا نـاس زرّاعــه وفـلاحـه
ترى الدنيا غدت صندوق يابراهيم لـه مقفـال
ولو دورت مفتاحه مـن الصنـدوق مفتاحـه
وانا ما اعدها الا خيل فيـد الفـارس الخيـال
يروضها على صدره ويدرجها علـى الساحـه