شجرة الرنف

[منقاش]

أراك يبن همام أبتديت تحيقر بصيدة ألأمحوه وتحيقر بصيادينها , وكأنك تبي تفيخر بمغارة ابن رخمان بديار الهذلان , في الوقت اللي تمطقع فيه بزروب دجاج ربعك الثملان , وناسي أن أغلب أهل زمانك , ما نمت ولا عرضت أكتافهم ألا بفضل الله ثم بفضل بروتين صدور وفخوذ الدجاج ..
على كل حال , ألأمحوه أن صادها لكم بدر الدجى وعرعرة المنتدى , فلا هو صايدها ألا على ميرادها على واحد من موارد الماء , أو بالدخول عليها في أقصى جحرها وسحبها بذنبها بعد تتبعها بجرتها , وفي أسوأ الحالات ضبطها بالجرم المشهود في سط واحده من حظاير الدجاج.
يعني ما نقبض عليها ألا بالقانون والنظام وفي حاله من حالات التلبس الكامل بأكل الصيصان ..
أما الزروب اللي تدندن حولها , فهذي أصبحت من الماضي ومن التراث .
يعني ,أن أيام الزروب والراقوبه والتبريكه والدجاجه المكشه ولت مع أهل عصرها ,,, ومع العصرنه والحداثه والحداثيين أندثرت الزروب وحل محلها الحظاير , والدجاجه المكشه اللي تبرك على البيض حتى يفرخ أستغنوا عنها وجابوا مكانها الفقاصه.
وأجيال الدجاج اليوم ما عاد هي ألأجيال اللي على خبري وخبرك بعد تحضروا وأصبحوا ياخذون التطعيمات كامله عن ألأمراض كلها الى جانب المضادات الحيويه والفتمينات وهرمونات النمو ووو الخ .
وأذا أعدوا أهل ألأرض بانفلونزا الدجاج , وقتها يقاقي من خوفه وخوفها أهل الشرق والغرب دفعه واحده , وتعقد المؤتمرات والندوات والمناظرات والمحاضرات على أعتبار أن المشكله من أكبر المعضلات ..
بخصوص تهجمك على قردة حليفي العمده المقداد بن ألأسود , واختزالك لمشكلة أخراجها من أسفل السافلين في كريك وساعه من نهار , وتناسيك لمشكلة وجود المقداد ألأعظم وبيته اللي يعتليها .
هالعلوم اللي فيها ما فيها , أترك الرد عليك وعليها , والدفاع عنها (القرده) , وعن جهود أخراجها حتى ترى النور , للمقداد نفسه ..
وقبل أختم , أحب أرحب بطلة حليفي البطل الشيخ ابو سيفين , اللي أشتقنا له ولعلومه ,, وسلامتك أنت ومن يسمع .....