من يجيب علم منقاش وعنديله اربع مقادم

[منقاش]

الشيخ سلام سلمه الله وابقاه : يا ابن عمي القدر ما يمنع منه الحذر , والأثفيه الأخيره طلعت شرانيه من احدى سلالات القايد المغولي جنكيز خان ولا تقبل من احد يرد عليها الكلام كائنا من كان حتى لو كان ابو نقشه بجلالة قدره , يعني دكتاتوره جماء من جبال القوقاز طاحت في دكتاتور صليب راس من علو بلاد ثماله , والنتيجه بدون ادنى شك تبي تصبح فتاكه ..
والجماعه بهالديار أذا شيلوك أثفيه من اثافيهم يشربون من دمك لو حاولت في يوم من الأيام تريعها من على قرتوبك , الا أن كان تسوي مثل ابو عبدالرحمن اللي اختطفها من هالديار بليل اظلم وهرب بها لديار الحرمين بحجة تحجيجها , او مثل الشيخ ابن همام اللي يوم يقدم رجل ويوم يأخر الثانيه , وكل ما حجز وقلنا قرب يجينا حتى نرمي على ظهره بأثفيه ادعى بظرف وحابس حبسه في آخر لحظه حتى يأجل سفره وتقعد الأثفيه طايحه في التبجه ..
وارجيك ان كان في مقدورك توصل الخبر لشاعرنا سهيل تبلغه ان مطلوبه جاهز بكل المواصفات والمقايس اللي طلبها في رسالته اللي جاتنا على بريدنا التكروني , اما الشيخ ابو سيفين فهذا رجل متهور بحق وحقيق الى درجة انه قال في طلبيته انه مستعد يشتال ثلاث اثافي دفعه واحده ويسد بها بقية الشواغر الوظيفيه اللي باقيه عليه حتى يكمل بها دينه , يعني يبو الفيت يبي يسوي سواة حليفه الشيخ ابو نقشه ..
بقي انت يا رفيقي , اشوفك تحوم حول الحمى وتوشك ان ترتع فيه , وان كان تقبل نصيحتي سم واقحم مثل من قحم من قبلك واللي عقد روس الحبال يحلها , وسلامتك انت ومن يسمع الا المخاوي فيخسى الرويبضه عدو الشيخ وانتم ما تخسون ..