ظاهرتا الآكلة والشبكة مرئياتكم لابن فنحاص(معدل)

[منقاش]

الله يمسينا ويمسيك بالخير يبن فنحاص
ولا اقول الا حسبي الله عليك , والله يهديك وبس ,,, ماضوعك هذا أثره اعقد من ذنب الحمار ويبي يعر بناس واجد ويدخلهم في مشاكل ووجع راس هم في غنى عنه..
والحكيكه أني كنت اليوم مع سيد الرجال ألاقشر المدشر ومع كمال ثانين مثل المتغضب والمعتم بالشر وملاطم ذبان خشمه وابن قطيل وساري الليل وطلبوني أبلغك تايدهم لعلومك كلها ,, وقالوا سلم لنا على ابن فنحاص وقل له أحلم على الجماعه وقدر ظروفهم الحيث أن أغلبهم ما يقدرون يردون عليك بخير والا غير خوف من نسوانهم ,, كنت أقوم واقف واعتزي واقول : يا دافع البلا , أفا أني منقاش اللي ما ينحاش , عز الله أني ما أخاف الا من الله ..
ردوا عليه وقالوا : أقعد عساك بالقعدود , وهو من اللي جاب طاريك والا عناك يا منقاش ؟؟, أنت رجال رفضوا النسوان يتزوجونك ,ودارك ما دخلها شر , ولا عندك أحد تخاف منه والا يخاف منك..
والزبده يا رفيقي يبن فنحاص وراك تحط العقده في درب المنشار وانت عارف حالة النجار ؟؟ , وخليني أبينها لك أكثر , تطلع حواليك وناظر وين الكمال أعضا المنتدى فلان وعلان وفلتان ؟؟, الربع حبسوا أنفاسهم وادخلوا رقابهم بين علابيهم وتغطملوا في هراسينهم ,, وكل واحد فيهم يقول خلني سويكت ويا روحي ما بعدك روح , وسلامتي أنا وياك...