منقاش في وسط المصلين

[منقاش]

منقاش في وسط المصلين منقاش في وسط المصلين منقاش في وسط المصلين منقاش في وسط المصلين منقاش في وسط المصلين

تعرفون رفيقكم منقاش صليب راس ولا يتحلحل عن علمه أن كان خطا والا صواب ,,, ومن صلابة راسي كنت مقاطع محاضر الجماعه ولماتهم كلها حتى صلاة الجمعه ما أحضرها معهم ,,, يعني رايح في حالي لا آذي ولا أستاذي , أصلي اللي أقدر عليه من الصلوات ألأربع في بيتي واللي أتكاسل عنه والا أنشغل أصلي بعضه مع الباقيات لو بعد شهر والا شهرين..
وهاك السنيه واحد من الجماعه توفي ودفناه يوم الخميس بعد ثوره نطحه في الصبح ولا أمسى ألا في قبره , وثوره اللي نطحه ما أمسى الا في بطوننا بعد ذبحناه صدقه عن اللي خلفه .. اصبحت النهار الثاني ومن فجعة الموت قلت في نفسي ليه يا منقاش ما تروح اليوم تصلي الجمعه مع اللي يصلون , وان كان ما تبغي تصلي مع جماعتك روح للاجناب من القبايل اللي حوالينا وصلي معهم ..
أفطرت معروكه يومي هذاك وتلبست الثياب المصبغه وتحزمت بعمامه مصبوغه وتعممت بالثانيه وركبت حماري ومشيت تعج مني روايح الكده والريحان والبعيثران والدوش , واخذت عطيفي الممسك بيمنايه وبندقي القداحي على جنبي ومعها بارودها وبقية زهابها حزوه لو شفت الناس عرضت عند خروجها من الصلاه أو رزت طول الا وانا في أول البوارديه ..
مشيت في دربي وكنت مره أردد في طروق الانشاد والحدايا والزهم ومره أعمر غليوني بالتنباك وادخن حتى وصلت لمسجد الاجانب (قبيله ثانيه) .. وعلى طاري الدخان , ترونا أيامها كنا بقر ما ندري أن الدخان حرام ولا نعلم انه متلفه للصحه ومشوه للفم ومنفر بريحته ,,, لالا ,, ماكنا ندري مثلكم اليوم , وكل اللي نعرفه عن الدخان كلام الشعار الله لا يسامحهم من أولهم الى آخر واحد فيهم قلال الخاتمه اللي يقولون فيه : يا شارب الدخان شاربك ما طال ,, واللي يطول شاربه يقصرونه ,,,, شرابة التنباك فيهم سعة بال ,, لكن وين اللي يلف الصقاره ..
المهم أني وصلت الى عند المسجد وربطت زاملتي ثم دخلت عليهم المسجد وامامهم يخطب ورديت عليهم السلام بأعلا صوتي لكن ما فيهم اللي بغم ورد عليه ألا بعضهم تشابحوا فيه بشبحه ما هي زيته ,, كنت أخصرهم وأركز بندقي جنبي والعطيف جنبها واصلي خمس ركاع سنه (أبغي أزودها شويه قدام ألاجناب) ,, وبعد سلمت من السنه الا والخطيب منفك بكلام كله عليه , أذكر منه سب في اللي يفارق الجماعه وان اللي يتركهم شذ ومن شذ شذ في النار , وانه مثل القاصيه من رعية الغنم اللي ياكلها الذيب , ويوم سمعت خطبته تنوشني ويشبهني فيها بالقاصيه اللي تفترسها الذياب فاض عندي الكيل وامتلا صدري كنت أقوم واقف واعتزي واقول: الشرهه ما هي عليكم يا رمم , الشرهه على اللي جاكم ونصاكم وانتم أجناب وجيز معدي وصلى معكم ,, كان الخطيب يرد عليه ويقول : أصمت يا منقاش , لا تلغي وتلغينا معك وتفسد علينا جمعتنا كما لغيت وافسدتها على نفسك ..
رديت عليه ما فاسد ألا أنت واللي يصلي وراك ,, واعود التقط بندقي وعطيفي واجي خارج من المسجد , ولا منهم من رد عليه لو بكلمه غير نظرات من عيونهم كانت تقادح بالشرار وامامهم مواصل خطبته فيهم ,,, ويوم وصلت عند حماري الا وانا أذكر أن الغليون بقي ورايه في مصلايه ..
كنت أعود دربي وادخل المسجد أبغي آخذ الغليون , وانا ماشي أتخطى الصفوف تعنقلتني رقبة واحد من المصلين واطيح على الصف اللي قدامي وبندقي تطير من على جنبي طوالي على روس بعضهم وتثور ولا توقع رصاصتها الا في محاشم الخطيب ... وبعدها لا تسعلوني عن شي ,, ثارت عليه الخلايق اللي في المسجد كما يوم يثور النحل , واحد يشيلني سما والثاني يرقع بي أرض حتى ذهلت وأغمي عليه ولا صحيت ألا في المستشفى بعد أسبوع في غرفه العنايه والعسكران محوطيني يحرسون فيه ,, واشوف قبالتي الخطيب منوم في العنايه ولا يتنفس الا بالكسجين ..
قلت لواحد من العسكران : يا ولد ويش موقفكم على روسنا وتاركين عيالكم ومهاملكم .. رد عليه وقال : تقوله يا منقاش بعد سدحت بالخطيب وبغيت تقتله غير المصاويب اللي فقشت روسهم ,, لكن كم يوم ويودونك المحكمه وتدخل السجن ويظلي المطرق في ذنبك حتى تكب عنك اللبايش وتعرف كيف تصلي وتصمت ولا تلغي والأمام يخطب ,, رديت عليه وقلت : وانت من لقنك هالباطل ؟؟, ردعليه وقال : هذا الكلام من أقوال الشهود اللي صلوا معكم في المسجد ...
كنت أرخي نظري وانكس راسي واسكت ,, وباقي القصه أظنه ما هو خافي عليكم من سجن وجلد وشماته من القاصي والداني ,, وازين ما فيها أن الجماعه فرقوا القدار وفكوني من الخساره ,, والطيب أنهم فهموني في السجن أن الجماعه جماعة المسجد وجماعة المسلمين ما هم جماعتي وربعي كما كنت أظن ,, وان المصلي ما يلغي بكلمه والخطيب يخطب ولو قال وقتها لأحد أصمت فسدت عليه جمعته...

[أبو عبدالرحمن]

لا حول ولا قوة إلا بالله...

أهم شيء تعرف قدر الجماعة يا منقاش..وتراى ما يقف المواقف معك إلا ربعك..

فليتك تنتهي عن ما تفعله بهم..وليتك تعرف قدرهم..

فمنهم الشاعر ..ومنهم النحال...ومنهم الراعي...ومنهم المحامي...ووو

[@ بن سلمان @]

منقاش
تراك لخمتني مرة تقول حمار ومرة زاملة
فيه أحد ما يعرف خويه
دامك عرفت قيمة جماعتك ودنا لو تجمعهم وتكرمهم بأم الشحم وتنادي خوياك راعي النحل ورويعي الغنم وراعي السواني وابو امجد وابو عادل وحسن عابد وتشور عليهم يفرقون لبن عزاب وانت اخبر مني وتعرف الرجال وش مقدم عليه .

[ABO TURKI]

كيكيكيكيكيكيكيكيكي

[منقاش]

الرفيق ابو عبدالرحمن : مشكور , وبالنسبه للجماعه أنف الواحد منه لو كان أعوج ..
أما الشاعر وراعي النحل تكفى لا تذكرني بهم , الله يستر عليه وعليهم ,, واذا كفوني شرهم ما أبغي من خيرهم كثير ولا قليل ..
الرفيق ابن سلمان : مشكور , وحماري هو زاملتي مثل يوم تقول فلان زميلي في العمل والا في التراسه , أما صاحبك ابن عزاب فهو رجال ما عاد يمر على كنفيوتر ثماله ولا على غيره ومشغول يحد في سكينه ..
وتدسيم شوارب اللي ذكرت كلهم يستاهلون لكن أذا جيت الطايف حتى تحضر معهم ...
الرفيق أبو تركي : الاوله أشكرك على الكيكي , والثانيه وينك يا رجل من فتره طويله ما عاد تعلق على كلام شيخكم منقاش الله يطول في عمره وعمر السامعين...

[abonayf]

, أصلي اللي أقدر عليه من الصلوات ألأربع في بيتي واللي أتكاسل عنه والا أنشغل أصلي بعضه مع الباقيات لو بعد شهر والا شهرين..

يامنقاش تراها خمس ماهي اربع الله يصلح الحال .
يبغالك هالحين تقضي الي راحت كلها .
وبعدين الله لايعيده من غليون ورطك وانت مانت ناقص مشاكل وبعدين ترى بيت الدخان يقولون انه عكس ماذكرت يعني يقولونه كذه
شرابت الدخان فيهم سعت بال ... والي يطول شاربه يقصرونه

يعطيك العافيه

[منقاش]

يبو نايف في هاك ألأيام ما ظنيتها كانت خمس كما اليوم ,,, واذا تبي الحقيقه أنا فيه النسيان يمكن أنك صادق بس ادمحها وبلاشي تغرس عندها وتفضحنا مع الجماعه ..
واما الشعر حق الدهان فيمكن اللي سمعته لشاعر ثاني غير الشاعر حقي ,, والحقيقه لا خير في شاعرك ولا شاعري , كلهم ما أطقع من هذا الا هذاك ...
بعدين يبن عمي هاليومين فقدت بعض الرفاقه , واحد فيهم ابن عزاب ونعرف عذره أنه مشغول ويحد في سكينه ليوم مدري ليله ماهي سهله , الله يعينه ويعديها على خير ,, والثاني أبو عادل مدري ويش مغيبه عنا , عسى خير وودي كان أتطمن عليه عساه يزيد يمدحني بقصيده ثانيه مثل اللي نتف بها ريش أبو تركي وخوياه عدمته وعدمت خوياه , والثالث أبو أمجد مدري ويش شاغله في هالدنيا الظاهر أنفتح حلقه للطمع وقلة الخاتمه , والرابع الناطس أبو هاشم والخامس أبو ثنتين خلف عبدالعزيز والسادس الرمه رويعي الغنم والسابع وهو اللي له وحشه من جد وطال غيابه وهو يسوى عندي ثماله كلها شيخ مشايخنا الله يرده لنا من الطيبين أبو منصور الله ينصره على عداه ألشيخ ألأقشر المدشر طالب الشر .....

[الشيهان]

, والثالث أبو أمجد مدري ويش شاغله في هالدنيا الظاهر أنفتح حلقه للطمع وقلة الخاتمه ,

يامنقاش والله اني حاظر غايب يعنى اقراء لك ولا ودي اعلق على علومك المهرمطه من بعد صرت ماعاد تدري كم عدد الفروض لكن ماهو منك والله من مشيك مع الصهاينه لانك الضاهر عهدك بالصلاه يوم اقفيت مع الاعرج .

الحقيقه ان بطني مغصني يوم تخيلت الرصاصه في محاشم الفقيه وقلت في نفسى الله لايجعل واحد من رعيتي كماك يامنقاش

عجل علينا بباقي العلم الله يعجل لك بكل خير

[ما عندكم أحد]

تدري عاد يا منقاش
جماعتك مثل جماعتي
وجماعتي مثل جماعتك
ولو جمعناهم تفرقوا الجماعات
لكن تدري يا منقاش اخاف اللي تنشد عنهم زعلانين
هالايام الرجال منا اذا ما تمدحه يبي يزعل عليك
جامل يامنقاش واعطهم من راس الكيس

[منقاش]

رفيقي أبو أمجد : يا حبك للمشاكل ودورة الشر ,, بعدين من قال لك أني من رعاياك ؟؟ ما بقي الا تسوي نفسك حكومه ...حسبي الله عليك أنت وراعي النحل ....
رفيقي ما عندكم أحد : لو جمعنا جماعتي مع جماعتك ساروا جماعتين ونحنا ما نبغي نشقر عصى القبيله ونفرقهم نبغيهم جماعه واحده وبس ,,, ولو نقصنا جماعتي من جماعتك ساروا جماعتك نقصه ..
والله مشكله ولا لها حل الا نخرج أنا وياك عنهم ونخليهم حيث ألقت ... أما المديح فأنا مودماني طبيعتي أستقبل ولا أرسل مديح مثل الرادي ..