منقاش المتصهين/ الحلقة ألسابعه

[منقاش]

منقاش المتصهين/ الحلقة ألسابعه منقاش المتصهين/ الحلقة ألسابعه منقاش المتصهين/ الحلقة ألسابعه منقاش المتصهين/ الحلقة ألسابعه منقاش المتصهين/ الحلقة ألسابعه

يا وجيه الرفاقه والعواني تذكرون في الحلقه اللي راحت قصة الفجوع اللي سرت عليه في ليل أقشر واحرمتني من لذيذ المنام ,,, أحلام الرعب اللي شفت فيها غرله أفريقيه باركه على المبرد وتخنق فيه ,,, وكنها يا دافع البلا ناظرت يمي وقالت : يا خايب الرجا أنت وراه في السرى وجايتك قريب يا منقاش .. وتذكرون أن ديفد ولد حياة صوموئيل يوم شكيت عليه من الساحره الزنجيه وخوفي أنها هي الغرله طمني ووعدني يرسل عليه مندوب ياخذ الحلم لواحد من المعبرين يفسره لي ...
وكما وعد ديفد جاني مندوبه وكتب الحلم على ورقة (من كيس سمنت) وصر عليها في خيشه وحطها على ظهره ومشى من عندي بعد دهنت سيره بكم دولار وأتفقت معه أنه لا يعلم أحد بالتعبير وخاصه ديفد ... وبعد 123 دقيقه ونص دقيقه بالضبط رجع عليه المندوب , ومن يوم جلس قلت : هات علومك يا نديبي ,, رد عليه وقال : وديت حلمك لمعبر كبير راعي صلاح وعلم ويبغيك تروح الى عنده ,,, وقال لي المعبر : بلغ منقاش أن هذا حلم ما يتعبر حتى أشوف راعيه مع أني أرجح أن تفسيره أرزاق تبي تنكت على منقاش ما يقدر يلملمها ولا يعدها ولا يضمها ويمكن بلاوي وبهاذل تنتف ريشه نتف حتى يظلي مثل الدجاجه الجرباء المقصره اللي من ما بها يعافها أبو الحصين ولا ياكلها..
رديت عليه : يا دافع البلاء ,,, تكفى يا نديبي عجل بي وورني مكان المعبر , وعساه ما يكون بعيد ؟؟,, رد عليه : قريب واجد ,, وكلها مشوار نص ساعه مشي وانت عنده ,, ثم أخذني المندوب حتى عند المعبر ولقيته رجال يجتمع فيه العلم والحلم وصالح العمل وحسن الخلق ,,, ثم أنفرد المعبر بي على حده وطلبني أعلمه ويش جابني وجرجرني لدارفور وعلمت له بالحقيقه,,, ثم نبه عليه بالحذر وقال : يا منقاش لا تفتح قلبك لأحد وانتبه من المندوب ومن ديفد وغيرهم لا تعلمهم بتعبير رؤياك ..
يا منقاش : الغرله اللي شفتها في المنام هي الصهيونيه , واللي تخنق فيه ما هو رفيقك المبرد ,,, لالالا , المخنوق هو السودان ومعه السودانيين وأهل دار فور ,,, ومن قبلهم خنقت الصهيونيه أهل العراق وغيرالعراق , واختطفت فلسطين ,, واللي توعدته الغرله وقالت أنها مقبله عليه ما هو أنت ,, لالالا, هم بقية ربعك من المسلمين في كل مكان ..
لكن يا منقاش : كيف تحط يدك في أيادي ألأعادي وتساعدهم على أخوانك المسلمين ؟؟, أنت ما تعرف عقيدة الولاء والبراء ؟؟ , وكيف تواليهم وتبتغي عندهم العزه ولله العزة جميعا , وتخون الله ورسوله والمسلمين وانت تعرف حرمة موالات غير المسلمين , وأن المؤمنين لا يتخذون الكافرين أولياء من دون المؤمنين ؟؟, يا منقاش وراك ما تعرف أن من أعان ظالما سلطه الله عليه , وانك بعملك هذا تساعد الظالمين على سلب حقوق المظلومين وقتل ألنفس البريه اللي بناها الخالق ولعن من هدمها وجعل حرمتها أشد من حرمة هدم الكعبه حجرا حجر ..
يا منقاش الظالم اليوم كافر والمظلوم أخوك المسلم اللي أذا دعا عليك يرفع الله دعوته فوق الغمام ويخاطبها جل شانه ويقسم لها بعزته وجلاله ويقول : وعزتي وجلالي لأنصرنك ولو بعد حين ..
يا منقاش : الطريق اللي سحبك فيه الصهاينه وقالوا لك هو الصحيح تراه هو اللي يوديك لنار سقر ,, وملكهم المنتظر اللي يخططون لمجيه ويبغون يبنون الهيكل ويذبحون القرابين حتى يظهر هو المسيخ ألأعور الدجال اللي ما يبي يحل بأهل ألأرض فتنه أعظم من فتنته منذ خلق الله السماوات والأرض , واللي أكثر أتباعه اليهود والنساء ,, واللي يدعي كل صالح منا ربه ممسي ومصبح أن الله يعصمه من فتنته ومن فتنة المحيا والممات ..
يا منقاش هذي المعامع بداية الفتن والملاحم اللي تسير في آخر الزمان واللي يحاصر فيها العراق وقد حوصر ثم يعرك في حروب مثل عرك ألأديم ,, وارجح أنها رايحه تنخبص أكثر ويدخل في الفتنه أطراف كثيره منها الجيش العلماني التركي ..
يا منقاش فتنة أرض الرافدين وراها الصهاينه وتبي تبلغ ذروتها عند أنحسار نهر الفرات عن جبل من ذهب ,, واذا انحسر أنبهت الصهاينه اللي أرصدتهم خزنوها على مر الدهور بالذهب لأن ذهب الفرات من كثرته يرخص ويكسد كل ذهب ويخسر الصهاينه أرصدتهم دفعه واحده ,, ثم تكبر الطامه ويتقاتل على ذهب العراق أهل ألأرض حتى يتفانون ,,, ثم تدلهم الفتن أكثر واكثر حتى يجي وقت يكثر فيه الهرج ويصبح الرجل فيه مؤمن ويمسي كافر يبيع دينه بعرض من الدنيا زهيد من طمع في منصب تافه أوحفنة من مال أو تحسين أحوال مثل يوم فتنوك بالفلوس اللي أكيد أنها مزوره , وفتنوك بالنساء وبالوعود الكاذبه ,, وهذي الفتنه نفسها تبي تصل ذروتها بخروج مسيح اليهود الدجال ولا تنجلي الا بقتله على يد المسيح الحق عيسى بن مريم عليه السلام ,, وهذي الفتنه هي نفسها اللي يحاصر فيها أهل الشام الحصار اللي شوفه مطبق على غزه والضفه والباقي في الطريق , ومصر وبلدان غيرها مقبل عليها نصيبها من الحروب والفتن ..
كنت أقاطع المعبر واقول : تكفى وقف يا شيخ أبسعلك عن القروش اللي أعطوني أياها يعقل أنها مزوره ,, وخطيبتي اللي وعدوني أتزوجها يعقل يكذبون عليه ؟؟. رد عليه وقال : وهم عمرهم صدقوا والا عرفوا الصدق ؟؟, يا منقاش الدولارات اللي تقول كتوها عليك ودفنوك بها وانت زدت أخفيتها ودفنتها في حوش عنمك سبق أنهم دفنوا بها غيرك قبلك وطلعت مزوره ,,, وان كان تبي تأكد خليني أكتب لك رساله لأهلك ياخذون منها مية دولار ويعطونها لثقه من معارفهم يفحصها وتشوف النتيجه ..
يا منقاش الصهاينه ماهم مخلينك تزوج مدرستك اللي وقعوك في حبها ومنوك أنك تزوجها حتى لوكانت هي راغه تزوجك ,,, والشغله تمثيليه من أولها حتى تنتهي ,, والخطيبه اللي بغيتها يبي يخلونها سراب تطرد وراه ما دام أنك تقدر تخدمهم واذا أستغنوا عنك رموا بك كما يوم ترمي بالهرس ثم صفوك بعملية أغتيال على يد واحده من عصاباتهم ,, وبعدها تسجل الجريمه على مجهول ,, ويا كم سبقك يا منقاش من مجاهيل لقيوا هذا المصير ..
كنت أهطش ببكوه واعود أتمالك نفسي واقول : وامصيبتك يا منقاش بالمصيبه ,, أنت ويش دهورك في هالدهويره اللي لها راس ولا لها قاع ... واعود أسعل المعبر واقول: تكفى تراني داخل على الله ثم عليك أنك تساعدني أهرب من هالورطه المجلجله .. رد عليه وقال : لا يا منقاش ,, خليك طبيعي لأنك هالحين مراقب وخطاك معدوده ,,,لكن استمر في حضور دروس ديفد وتظاهر له برغبه ومحبه للصهينه ,,, وفي نفس الوقت تعال يمي في بعض ألأمسيات أعطيك دروس توعيك أحسن من دروس ديفد , واذا أنتهت دروسك وحولوك للعمل وقتها أساعدك تقلب اللعبه عليهم وتهرب من أيديهم ,, بس الله الله في الحذر والتكتم ..
والى عند الحذر والتكتم وقلب اللعبه عليهم والهروب من أيديهم نتوقف ,, وتروني متعسف اللي ما علمت لكم عن درس ديفد عن الخصخصه خايف من التطويل عليكم ,, لكن خلوكم معي وتبي تعرفون في الحلقات الجايه كما عرفتم في هذي الحلقه دروس المعبر اللي صحاني بها من الحلم اللي كنت أحلم به وانا صاحي ومفتح عيوني ,, حلم الصحيان اللي ما نبهني وصحاني منه الا تاويل حلم المنام ,,,, وتبي تعرفون كثير من علوم ديفد والصهيونيه ومنها الخصخصه ..
بس خذوا في حسابكم أن قلة القراء ممكن تدفعني أوقف مسلسل الحلقات ,, وسلامتكم ...

[أبو عبدالرحمن]

يعطيك العافية يا عم منقاش

والله كلام جميل هذه المرة..وفوائد وثقافة أستفدت منها..

يا منقاش : كيف تحط يدك في أيادي ألأعادي وتساعدهم على أخوانك المسلمين ؟؟, أنت ما تعرف عقيدة الولاء والبراء ؟؟ ,
وكيف تواليهم وتبتغي عندهم العزه ولله العزة جميعا , وتخون الله ورسوله والمسلمين وانت تعرف حرمة موالات غير المسلمين , وأن المؤمنين لا يتخذون الكافرين أولياء من دون المؤمنين ؟؟,
يا منقاش وراك ما تعرف أن من أعان ظالما سلطه الله عليه , وانك بعملك هذا تساعد الظالمين على سلب حقوق المظلومين وقتل ألنفس البريه اللي بناها الخالق ولعن من هدمها وجعل حرمتها أشد من حرمة هدم الكعبه حجرا حجر ..
يا منقاش الظالم اليوم كافر والمظلوم أخوك المسلم اللي أذا دعا عليك يرفع الله دعوته فوق الغمام ويخاطبها جل شانه ويقسم لها بعزته وجلاله ويقول : وعزتي وجلالي لأنصرنك ولو بعد حين ..

ونحن بانتظار الحلقة القادمة..وانتبه من الغفلة واحذر من عدوك
وعلى فكرة : المبرد هذه اليومين حلقه مبحوح ـ ما أدري ما هو السبب ـ

[abonayf]

كيف تحط يدك في أيادي ألأعادي وتساعدهم على أخوانك المسلمين ؟؟

المخنوق هو السودان ومعه السودانيين وأهل دار فور ,,, ومن قبلهم خنقت الصهيونيه أهل العراق وغيرالعراق , واختطفت فلسطين .

ملكهم المنتظر اللي يخططون لمجيه ويبغون يبنون الهيكل ويذبحون القرابين حتى يظهر هو المسيخ ألأعور الدجال اللي ما يبي يحل بأهل ألأرض فتنه أعظم من فتنته منذ خلق الله السماوات والأرض , واللي أكثر أتباعه اليهود والنساء

هذي المعامع بداية الفتن والملاحم اللي تسير في آخر الزمان واللي يحاصر فيها العراق وقد حوصر ثم يعرك في حروب مثل عرك ألأديم ,, وارجح أنها رايحه تنخبص أكثر ويدخل في الفتنه أطراف كثيره منها الجيش العلماني التركي ..

ثم صفوك بعملية أغتيال على يد واحده من عصاباتهم ,, وبعدها تسجل الجريمه على مجهول

الظالم اليوم كافر والمظلوم أخوك المسلم اللي أذا دعا عليك يرفع الله دعوته فوق الغمام ويخاطبها جل شانه ويقسم لها بعزته وجلاله ويقول : وعزتي وجلالي لأنصرنك ولو بعد حين ..

كنت أهطش ببكوه واعود أتمالك نفسي واقول :
عقيدة الولاء والبراء ؟؟

معذره على التلاعب بالتنسيق بين الجمل بشكل لايمثل سوى تصوري فقط

متابعين

[الشيهان]

اقول يامنقاش لن قطعت السالفه بعد وصلتنا لهذا الحد لااصلط عليك بن داخل ويربطك في صدام سيارة النحل ولايخلي بك ديره

واذا استقريت في ديره موحشه مابها شباب الضو فك عليك النحل يعطيك من التقريص الين تنتفخ وتغدي مثل الغرله اللى شفتها في الحلم

هيا حط عقلك في راسك وتمم علمك ونكون لك من المتابعين الشاكرين

[@ بن سلمان @]

ابو امجد
تخوفون انتم يا لحكومة
تبون تجرجرون هذا الضعيف لين يجي على راسه

[abonayf]

فقط لمحاولة معرفة موقع منقاش

[منقاش]

يا الله مسى خير ,أمسينا وامسى الملك لله
يا الله تكفينا شر عيال الحرام وبنات الحرام
أبو عبدالرحمن : يشكرك الشيخ منقاش على ردك اللي يبي يقهر ناس كثير ,, لكن نقول لهم أخسأوا وموتوا بغيضكم وانكتموا ...
أبو نايف : مشكور على المتابعه والتعليق والخرايط , واضافاتك زادت الموضوع جمالا على جمال , وهذا سيقتل الحساد في قمصهم ويزيدهم غما على غم ..
أبو أمجد : ومن هو هذا النكره اللي تطريه ببن داخل وراعي النحل ,,, الشيخ منقاش ما يعترف بهؤلاء المجاهيل ..
والحقيقه يبو أمجد أنت من قراء منقاش اللي يتشرف بتعليقاتهم بس ذيلك أعوج ويومي يمين ويسار , ويا ليت صاحبكم رويعي الغنم يلحقه ذنب الذيبه في رحلتكم يا العوارشه ...
ابن سلمان : مشكور على التعليق ,,, بس ترى ما ضعيف الا الشيطان ..

[بنك المعلومات]

بس ترى ما ضعيف الا الشيطان ..
اذا قورن بكيد النساء وخبث منقاش

[النتيف]

منقاش
علمك وافي وتم السالفه الى نهايتها
ولا تنسى تبعد حمارك عن ديفيد حتى نسمع علومه زين في الدرس الجاي

بس لا يكون تبطي علينا

[الشيهان]

العين ماتعلى على الحاجب يابن سلمان اذا كنا احنا حكومه اجل وش خلينا لكم

منقاش الله لايكثر بلاويك
ترى والله كلامك ( زين زين زين ) بس عاد ماتكب بعض الحركات المنقاشيه اللى تخلى الواحد وده يمحطك بذيك العجرى اللى تخلخل ضلوعك
ولو ماني خايف ان باقي القصه الجميله المثيره يضيع كان تهورت ورزقي على الله مع اني والله ماودي لك بالشر بس انت تتنقز له

اقول وش اخبار حمارك العربي سمعت ان فيه فرص عمل تتناسب مع قدراته خل الصهاينه عمانك يدبرونه مع واحد من المتصهينين امثالك تراهم يحبون هذي الاشكال واليومين هذى الشغل نشيط وفرصة حمارك قويه للفوز بعمل بدل السرتحه وراك على غير فايده على الاقل يضوي له قرشين دام الاقصاد العالمي في ارتفاع وكل شي مرتفع معه