الكابتن عنتر

[ابو نشقه]

الكابتن عنتر الكابتن عنتر الكابتن عنتر الكابتن عنتر الكابتن عنتر

بسم الله الرحمن الرحيم

في كتاب ( معجبه مغرمه انا بئى مش عاوزه الا هوه) للاديب كليب بن عجرم المجلد الرابع:


ولد عنتر بحي السلامه بالطائف وترعرع فيه
رباه اباه وعمه و جده ولما بلغ سن الثامنه أشتهر بالفروسية
وقد بارز عدد من الفرسان وفاز عليهم جميعا بالضربة القاضية ( نسيم حميد مو عنتر)
عشق عنتر عبلة عندما نظر إليها وهي تروي من البير
وبدأ يكتب بسيفه الأشعار بها على الاشجار المجاوره


وقي احد الايام شاهد إخوة عبلة الكتابة فذهبوا بحثاً عن عنتر فلم يجدوه ووجدوا اخوه شيبوب فسألوه وين الدب الأسود ؟
فقال ذهب يقنص ليصطاد غزالاً لأختكم عبله امممممم عليها ( قليل ادب شيبوب)
فأوسعوه ضرباً وتبقيس واصيب بفلقة بالترقوة مع حموضه بالوجه .

ولما جاء عنتر وشاهد الفلقة سأله من الذي فلقك؟ فقال: لا عليك يا عنتر لاعليك أرجوك أرجوك
فسل عنتر سيفه ولحط اخوه لحطة قوية وقال قل وإلا لشطتك ثانية فقال اخوه هذولا إخوة عبلة
فقال بعد بعد؟ هاذا وانا ما سويت شيء لعبلةالااني غازلتها عند البير؟
هع هع هع ( استنزل الخال) سوف اقتل سبعة ولا ثمانيه منهم لاشفي غليلي واخذوو بثارك

إلا ان الجماعة لزموا على عنتر يهدي السالفه ووعدوه يزوجونه عبله

ودارت الايام ودارت دارت الين جاء يوم الزواج
وفي ذاك اليوم.... (زواج عبله وعنتر )
كانوا جايبين ثور يبغونه ذبيحة فهج الثور
فقال عنتركلمته المشهورة (مادرى ها الثور ان عنتر موجود؟)

ثم نظر إلى عبله فغمزت له . فطمر طمرة اذهلت الحضور
قال عنتر اعطوني شماغ حتى ( أموه ) على الثور واقضي عليه
فاعطوه شمغاً وسحب عنتر الشماغ سحبتين وكاد أن يشقه
ثم انطلق الى الثور ..

وبينما كان الثور يركض هاربا .. التفت ووجد عنتر يركض وراءه ..
فوقف وقال : ما عاد الا هي هالخال يلحقني؟ إلا برجع أوريه شغله ها الكحله
رجع الثور على عنتر قبل ان يتمكن من التمويه عليه بالشماغ......
فنقز عنتر بأعجوبه ونجا...

فأرتفعت الحراره المعنوية للثور بالفوز على عنتر
لكن فجأة يستعيد عنتر قواه ويستجمع نشاطه
وفل عنتر الشماغ وقال تعال يابقره
قال الثور : دقيقه بس ياعنتر ( باغبر شوي تكفى )........
ثم انطلق .. الثور متجها لعنتر ..
وبدلا من ان ينطح الشماغ .. نطح عنتر .. .
وسقط عنتر مغشيا عليه ..فصرخت عبله عنتررررر اهع اهع اهع ( قال يعني حزينه؟)

ثم تقدمت عبله ورشت مويه على وجه عنتر فصحصح وإذا بالثور ينتظرهما
وفجأة تقدم الثور مسرعاً فهربت عبلة يحملها عنتر
كانهم عدنان ولينا يوم انحاشوا من القلعه ....

يستفاد من القصه:

اياكم وأكل المطبق من عند الهنود اللي في شارع عكاظ

[admin]

أسعد أيامك يا كابتن أبو نشقه

[الحجاج بن يوسف الثقفي]

طيب وش رايك في بن عزاب ومنقاش

[المبرِّد]

ممكن نعرف تاريخ الطباعة للمعجم وفي اي حارة طبع
عاوز نسخة ترسل على البلوتوث

[@ بن سلمان @]

انا قايلها
ما لكم الا مطبق الغامدي

[منقاش]

يا رفيقي يبو نشقه ذكرتني هالقصه بفضايح رفيقنا راعي السواني من قصه له أعطانا اياها على حلقات .
وخذ الحلقة ألأولى ( الكاتب : راعي السواني) .
سالفه حماطيه للرجال الراشدين فقط


--------------------------------------------------------------------------------

سالفه حماطية للرجال فقط
الرجاء ايضا ان لايقرأها مرضى القلب والضغط الجوي والحالات النفسية والعصبيه ومن هم دون الخامسة عشر والسيدات .
هذي السالفه من سوالف الاولين أبغيها اول قلطه لي في المنتدى وان كان ما حطيتوني بسببها ثمالي والا متبرز فلا عدالة عندكم ولا خير في منتداكم .

القصة : هاك السنيه قبل يعرفون الناس السيارات لا في بر ولا بندر ولا بحر او جو كان عندي زامله- حمار كرمتوا – وكنت متمعني فيه وفي بردعته وتبعه وشداده ورشمته – هذا غير الجلاجل والخلاخل( الدنادش) اللي تملى الوادي موسيقى وانا عابر رايح وجاي – وهاك اليوم كنت مصبغ ثيابي ومحتزم بدسمال ومعتم بعمامه مصبوغه والغرزه من الريحان والبعيثران والدوش والشار تضرم دابه من كبرها والكده -(طيبنا زمان)- تفوح من ثيابي من مسافه ومنتعل بنعال مشغول وحاط السحكل على جنبي وفيه الغليون والتنباك – لكن مشكلتنا هاك الايام ما نلبس سراويل نحنا وباقي القبايل ونعتبر السروال للمرأه وعيب وشق جيب وفضيحة ما ترقع على الرجال يتسرول ويتشبه بالنساء .
ركبت يومها حماري بهاك العصريه وسيرت على أهل اوديه حوالينا – وعلى طريقي شفت شغل في جرينين متلاصقة – جرين فيه كدن و دياس والثاني فيه ذرى - وكانت الجرينين مليانه بالمذريه واللي يديسون- حوالي ثلاثين رجال مفتولين السواعد الواحد منهم يمشي التيس على ذراعه– وما كان مني الا ان ميلت عليهم ابغي استعرض حفلتي ومتعاطي فصاحه وقاله وطاله ومدة ذراع لكن عندي عقدة خوف من الثيران اللي فيها قرون من بعد نطحة ثور وانا صغير- وتوسطت الجرينين عكس اتجاه الريح حتى لا يجي السفو والتبن على ثيابي– رديت بصوت يسمعه اهل حي في زمانكم - سلام يا وجيه الرفاقة والعواني – اختلطت الاصوات بالترحيب – نزلت ومسكت زاملتي بخطامها ووقفت متكي عليها وعلمت لهم واستعلمت منهم والعمل ماشي لا يتوقف لان الرجل منا كان اذا تكلم يتكلم بصوت يعلى على جميع الاصوات تسمعه من بعيد – ختمتها وقلت- عن خاطركم يا ربعي انا عجلان - والحقيقة ما انا عجلان لكن بدأت ارتبك وافقد اعصابي وركبي تتناطح واتوتر من رؤية ثور خبتي من اللي يديسون عليها عليه عيون وقرون يا ساتر وعرض خشمه يجي شبر ونفيخه يحرك القصيل والتبن وثيابي من بعيد.
ها ثم احبيت استعرض امام الحاضرين بركوب الزامله بالقفزه الحره الجانبيه بعد انطلاقها في الجري – غزيت الزامله – الحمار- بالخلال حتى جرت وكررت وانا مقفي - خلفي طيب – ابغي الانظار تركز عليه وتنشد يمي - ثم سقت نفسي بقفزه على ظهر الزامله- ويا ليتني ما استعرضت – زاد العيارشويه وانحشت على راسي في الجنب الثاني وتعلقت بواحده من رجليه في تبع الحمار واستحبني وصاح الصائح وتقدمه الناس يريدون انقاذي وفك رجلي من التبع فهرب منهم مذعورا الى وسط الدياس والجرين والتبن بين الثيران _ وهم يطردون والحمار يسحب فيه وانا معلق بكراعي ومفرفر وسط التبن قدام اللي يسوى واللي ما يسوى.

هذا نصف القصه وباقيها مع الزامله والثور الخبتي والمذريه واهل الدياس نكملها في المره الجايه – لا تفوتكم ترون الموضوع يبي يكبر ويطول ويعرض وترون العلوم تبي تعود من جرف في دحديره ولا تنتهي الا على يد كبار ثقيف ....

[منقاش]

الحلقة الثانيه لراعي السواني :
اذا طاح الجمل من على الحمار كثرت سكاكينه - تكمله لسالفه حماطيه


--------------------------------------------------------------------------------

اذا طاح الجمل من على الحمار كثرت سكاكينه – تكملة لسالفة حماطيه للرجال الراشدين فقط
ما ابغي اعيد ولا ازيد – اول السالفة عرفتوه في الحلقه الماضيه – الحمار جفل من الفجعه قدام الطراده يسحب فيه بواحدة من كرعاني النشبانة في التبع والباقي مني في الارض ومر بي من وسط التبن والحب في الجرين الاول ودخل الجرين الثاني ولاقى صف من عشرين ثور وجها لوجه تديس في الجرين عكس اتجاه عقرب الساعه ودخل في وسط صفها متعاكسا معها – اي في اتجاه عقرب الساعه – انلك الدوران وانبرم صف الثيران اوله على اخره حتى تحول من صف الى دائره روس الثيران فيها للداخل في منتصف الدائره واذنابها للخلف في محيط الدائره واصبح راسي في نقطة المنتصف ووجهي وجها لوجه مع وجيه الثيران لا يفصلها عني سوى سنتمترات – فيا للهول ها انا ذا امام قدري - امام الثور ابو قرون اللي هربت منه قبيل الاستعراض ومعه قرون اخرى – وهاهي رجل مني معلقة في تبع الحمار بين السماء والارض والاخرى واجزاء من جسمي تحت اضلاف الثيران – هنا تذكرت في موقف الرعب هذا انني عندما كنت ورعا يصك الغنم سالت والدتي - على ماذا تجلس الارض ؟ فقالت لي انها ليست جالسه وانما واقفة على قرن ثور ثم سالت ابي واخبرته بجواب امي فسخر منه وقال لي لا يا بني امك ما عندها خاتمه - الارض تحت ضلف ثور – اخذتني اغماءة من شدة الرعب افقت منها على صوت احد الحاضرين وهو يقول- بسرعه فكوه وطلعوه برى يا نشامى لا يموت في الجرين ويحملونكم ديته والثاني يقول خليه ينعثرلا قام كل يوم يتمخطر من وادي في الثاني – والثالث يقول اسحبوه ما عليكم منه اهم حاجه ترفقوا بالثيران لا توجعونها – والرابع يقول استروا العفن بعمامته ويرد عليه خويه عمامته مليانه ضفاع وروث وتبن – هاثم طالعت قي قرون الثيران فوق راسي فتذكرت مكاني ودخلت من شدة الرعب في الغيبوبة من جديد ..
هذا نصف النصف من باقي السالفة والباقي نكمله في الحلقه المقبله – لا تفوتكم - المشكله تبي تكبر وتطول وتعرض ولا تنحل الا على يدي كبار ثقيف وخماس ثماله .

[منقاش]

الجزء الثالث من قصة راعي السواني :
#1

راعي السواني
مشارك



تاريخ التسجيل: Jul 2006
مشاركة: 130
لا حالكم بحالي- الجزء الثالث من سالفة حماطيه للرجال الراشدين فقط .


--------------------------------------------------------------------------------

لا حالكم بحالي – الجزء الثالث - تكملة سالفة حماطيه للرجال الراشدين فقط
الحلقه الثانيه –اعني الماضيه- تذكرون اني دخلت في الغيبوبة الثانيه ولا صحيت منها الا اليوم الثاني ضحى اناظر واسمع لكن ما اقدر على كلام ولا حركه - صحيت وشيخ خامسنا ابن رماح لا ذكر بخير يكوي فيه بميسم كبير من اللي يكون به الثيران والجمال وامي تصيح وتقول - ليه عليه ليه تقوي الكوايا يا ابن رماح والله لو ابن شداد بصحوه ما تحرقون فيه كذه – قليل الا والفقيه داخل عليهم وعليه- ويردد – سلامتك يا ابن شداد - صفقوك الخباث بعين اردتك – عز الله انك ما انت ردي والقبيلة بعدك موتها خير من حياتها – وهذا الفقيه كان يصلي بنا ويعقد الملكه ويفك الاسحار ويحضر الجن ويفرقها ويداوي المرضى وعليه جوز عيون اذا طالع فيك تحسبه يطالع وراك – ناظر فيه الفقيه عينونه في عيوني كما يبدو لي - وقال لا بالله الرجال به عين وملبوس بجنيه عشقته – كان يدفل في وجهي ويصرخ - اطلعي يالملعونه ويعطيني كفين ويبتركني ويخنقني وركبه في بطني ومع الخنق والضرب والجروح القديمة ادخلني في غيبوبه ثالثه تمنيت قبلها اني قدام الثور ابو قرون ولا قدام الفقيه والشيخ .
عصير قبل غروب الشمس بساعه صحيت الا والمكان مليان ضيوف ومعهم الشيخ والفقيه واسمع الفقيه يقول جنية ابن شداد عنيده - جنيته ما تبي تطلع الا بذبح فديه عنه – فدية ثور كبير احمر صافي بقرون - ثم نشد عليه ابن شداد ونربطه بحبل على ظهر الثور – ثم نفك الثور يعتفص به ونطرده من هالمكان حتى الجرن اللي سحبه الحمار فيها وتوطته الثيران فيها – ثم نحتاش الثور طرد مرة ثانيه على رجلينا من الجرن حتى نظوي دار ابن شداد – ثم نطرح الثور ونذكيه وبعد الذكاه نفك ابن شداد من على ظهر الثور – قالت امي من وين لنا بقيمة الثور؟ - ابوه ما خلف له الا بندق وحمار والنعجتين اللي تصدقنا بها البارح وعشيناكم اياها – قال لها الشيخ ابن رماح – هاتي البندقه تجيب ثور وزياده - ويوم سمعت هالكلام انطلق لساني – قلت لا بالله ما تذبحون ثور ولا تبيعون بندقتي - وانا ترون ما بي نظره ولا جنيه ولا طيحة من على حمار– انا ما بي الا الرجال اللي في الجرين اعترضوني في السكة السلطانيه وكنفوني وضرابوني وسحبوني ورموني تحت ثيران الدياس وعددهم ثلاثين رجال وانا واحد والكثرة تغلب النجابه – قال الفقيه شايفين الملعونه عودت تكلم على فمه – قال الشيخ اتركوه لي – كان يتناول المكوى ويعرقي راسي بكيه من الاذن للاذن ومن الصنه الى قفايه والفقيه جنبه يصيح ويقول بسرعه خليني اتوطى في بطن الملعونه – هو خلص الشيخ الا والفقيه ناط عليه يدفل في وجهي ويلمخ ويخنق فيه – وادخلني في الغيبوبة الخامسه .
بعدها بثلاثه ايام صحيت وجنبي امي تبكي ولا احد عندها – قلت لها يا امي من جابني من الجرين من تحت الثيران ؟ - قالت يا وليدي المذريه واللي يديسون حطوك على زاملتك بطنك على ظهرها ورجليك تدلى من جهه وراسك من الجهه الثانيه وربطوك وستروك بقصيل ما كان عليك ثياب وارسلوك انت والزامله علينا مع ورعانهم – قلت طيب عسى سلمت البندق ؟ – قالت – عساها ما تعود يا ولدي – راحت هي والحمار في قيمة الثور- ولا همني الا الحال اللي سار لك من الثور يوم شدوك عليه – شرد بك يا وليدي وخش بك مع البراشيم والشياكين ونقز بك من على العقمان وطاح بك في هباه واذكوه في اسفلها ما قدروا يطلعونك انت وياه – احسبك يا ولدي مت .
قلت لها – يا امي انا مايت مايت على يد الفقيه والشيخ ان كان ما دسيتيني – قالت وين اوديك يا ولدي – قلت لها – دسيني في صفة التبن حق حماري – وادفنيني في التبن حتى ما يبقى الا راسي وردي باب الصفه عليه وصكيه بالضبه ولا تجيني الا بليل - وان كان ما حواليك رشوف والا زاد لا تطلبين احد ثكشفيني – خذي القدح وروحي حوش الهوش حق جيراننا – ولا اسمع كلمة حلال والا حرام - حمارتهم اخت حماري اخبرها ولدت قبل ايام احلبيها لي في القدح وجيبيه لي - وانتبهي لا احد يشوفك حتى اطيب واذا احد سأل عني قولي لهم شردت به الجنيه – تكفين يا ام ابن شداد الحقيني لا يقتلوني الشيخ والفقيه واللي وراهم .
اخذتني امي للمخبأ – صفة التبن – ولا ابغي اطيل عليكم – هذا نصف الربع من باقي السالفه والثمين الباقي نكمله في الحلقه الجايه .
احرصوا على المتابعه – ترون السالفه ما هي بعيد وتنتهي – ولا تبي تنتهي الا على يد كبار ثقيف وخماس ثماله – وتراكم تعبتوني في الطباعه .

[منقاش]

نهاية قصة راعي السواني :
وصي الوصيه يا مضيع وصاياه - ختام سالفة حماطيه للراشدين فقط


--------------------------------------------------------------------------------

وصي الوصيه يا مضيع وصاياه – ختام سالفة حماطيه للراشدين فقط
اسألوا من جرب - التبن ادفى لحاف وانعم فراش - واللي ما يصدق ابن شداد يدور صفة تبن ويجرب - دفى ونعومه ومرونه ورخص – ثلاثة اهله وانا في الصفه ما يعرف مكاني غير ام ابن شداد – الشيخ والفقيه واعوانهم تحسسوا وتجسسوا وفتشوا وقلبوا كل حجر عن الثاني يدورون عليه ناوين يزيدوني كوايا وضرب وخنق - لكن تاهوا ولا عادوا بغير الخيبه .
ربع عام حتى تعافى ابن شداد ووقف على رجليه ونفض التبن عن كتفيه – وفي ليله مظلمه اختفى قمرها وغاب شاهدها قلت يام ابن شداد ولدك ساري الليله وناصي الشريف عون الرفيق - وان ما انصفني مالي الا شد الرحال للباب العالي سلطان المسلمين واشكي على الله ثم عليه العصابه اللي قطعوا السكه السلطانيه واعترضوني في السبل السالك وكنفوني وكتفوني وضربوني - ثلاثين رجال ما رحمنوني وخلوني في حالي وحال سبيلي – لا – سحبوني وجردوني وسلبوا سحكلي اللي كان فيه ثلاثمائة ريال فضه وسبعاطعشر جنيه فرانسي ورموني بعد لعطوني تحت بقر الدياس _ وابشتكي الشيخ والفقيه في اللي سووه فيه قدام باقي الرفاقه – وجريمتهم باقيه فيه شاهد لي ما هو عليه – هذي قبلها قيمة فرس ابويه اللي سرقها ولد الشيخ في حياة ابويه وجحدها خايب الفال .
حزبي لي قطيف دقيق وعكة سمن وسقى مويه لزوم الدرب - ردت عليه امي – يا وليدي اني ما خبرت عندك الدراهم اللي تقول – رديت عليها – يا ام ابن شداد اللي قالوه هو الصحيح - لكن ما لي حيله الا ادعي عليهم واكذبهم وانكسها على روسهم حتى لا تقول الناس الزامله والثيران هي اللي مرغت ابن شداد .
ثم بكره بكري على ابن قطيل وشارب الدم وساري الليل وتأبط شرا وقولي لهم رفيقكم ابن شداد نصى الباب العالي - وعلميهم بدعوتي وبلغيهم يشهدون لي على ما ادعيه – وقولي لهم اليوم وقت الوقفه والحاجه ورد السلف كما وقفت معهم امس وشهدت مرات كثيره في اللي يبون – وبعد خمسة ايام من سفري انذري الشيخ والفقيه وبلغيهم اني مندس في الجبال وناوي اريح الشيخ والفقيه من الدنيا - قولي لهم الرجال ما يرتاح حي وانتم معه احيا – يا انتم يا هو - وبلغيهم بها الابيات =
ثلاثة اشهر في التبن واتهيض بالاشعار ........لا واه واغبني من الشيخ غبناه
لا يا أبن رماح ما عاد ابنساك ................بعد الكوايا اللي في جلدي معرقاه
أبن شداد ما يرقد عليها ولو قيل............مليون قيل (ن) على قيل (ن) وقيلاه
لا ولا بنسى معك ناس (ن) اشرار ...............مثل الفقيه اللي خنقني بيمناه
لا بلله الا جايكم جيت احرار..............ارتد حقي منك ياالظالم في دنياه
عمر سلاحك واكتمن قبل مالقاك...............واقعد قعود الذيب ما ينختل من مقفاه
وصي الوصيه لا تشكك بلقياك .............. للموت بدري يا مضيع وصاياه
والشمس ما اشرقت وانا واقف عند باب ابن عباس – ايامها الطايف عليه سور وله ثلاثه بيبان يصكونها بعد العشا ولا يفكونها الا غبيش بعد صلاة الصبح – وكان مع باب ابن عباس باب الريع وباب شبره – ولجت مع الباب وطاح وجهي بوجيه اثنين من كبار ثقيف يعرفوني - قالوا لي من حين شافوني - حالك ما هو زين يا ابن شداد وش هباك ؟ - علمت لهم وقالوا والله ما تعدى ربعك ثقيف وتنصى الشريف والا الباب العالي – روح معنا وتراك زبنت.
رحت معهم على الشيمه والقيمه والسمن والسمينه ضيف حتى جمعوا بقية كبار ثقيف مع خماس ثماله واستاردوا اثنين من شهودي على دعوتي على اهل الجرن - المذريه واللي يديسون - والشيخ والفقيه اعترفوا بدعاويه عليهم يبغون السلامه لا اقتلهم – وحكم عليهم الحكامه بالقرار القبلي الآتي =
في سنة الدبى - سنه فيها العدو يهبى - ثبت لدى كبار ثقيف- ان الحصن المنيف- ابن شداد الحصيف- خلوه ربعه نتيف- وضربوه ضرب عنيف- واهانوه اهانات تخيف- وتقولوا عليه بكلام سخيف - ثبت لهم ثبوتا صحيح - انهم سلبوه زاملته وحصان ابوه المليح - بعدها جانا يصيح - وثيابه شليح - بعد الثبوت حكمنا له علي من كان في الجرين بثلاثين راس من الغنم ورد سحكله ودراهمه وتسليمه حرثة بلادهم عامين كامله - وحكمنا على الشيخ والفقيه بقيمة فرس ابو ابن شداد ورد زاملته عليه مع تغريم كل واحد منهم ثلاثه شطيان مسقوي وسقياها من بيرها على حسبة اراضيها – مع تكتيف ابن رماح والفقيه وتمكين ابن شداد من كيهما كية واحده مقابل الكوايا التي كووه بها .
بعدها كتفوهم لي وكويت الشيخ والفقيه من كية واحده في مكان حساس اضطرهما لاحقا لتطليق زوجتيهما – ثم سلموني كل اللي حكم به لي عليهم .
بعد هالسالفة اذا سيرت على اهل الجرينين وجيت اركب زاملتي يحلفون ما يركبني عليه الا هم خايفين عليه يحصل لي مكروه وادعي عليهم – وكل ما ركبوني ادور عذر واقول نزلوني حتى اتعبهم - مره يركبوني ومره ينزلوني ولا امشي الا بعد يفترون من التطليع والتنزيل – وسلامتكم .

[الحجاج بن يوسف الثقفي]

يامنقاش اللي يبغى يقرا القصه بيلقاها لا تقعد تعيد وتزيد