القروش ولعبة الفقاعه/الحلقه الخامسه .

[منقاش]

القروش ولعبة الفقاعه/الحلقه الخامسه . القروش ولعبة الفقاعه/الحلقه الخامسه . القروش ولعبة الفقاعه/الحلقه الخامسه . القروش ولعبة الفقاعه/الحلقه الخامسه . القروش ولعبة الفقاعه/الحلقه الخامسه .

بسم الله الرحمن الرحيم
يتأسف فخامة الشيخ الشريف منقاش على المهاوشات والمناوشات اللي سارت في الحلقتين الماضيه , ويقول لكم , لا تستغربون , هذا حال الدنيا الدنيه وحال البشريه , كلها تدافع أو تبادل منافع , والشيطان نعوذ بالله منه ما ريح أبونا آدم في الجنه , ولا ترك عياله قابيل وهابيل يعيشون بسلام مع بعضهم .
لكن المهم هو النهايه , النهايه اللي بها تعود المياه لمجاريها وتعود القلوب لسابق صفاها ونقاها , وهذا ما حدث على يد واحد من أعضاء المنتدى ما كنت ما أثق فيه يربط حمار , ولا حتى أعتمد عليه ينتف دجاجه من دجاج فقيهه , لكن هذا زمن العجايب , زمن لا تعاف فيه أحد وتقول فلان أو فلتان ما يصلح طبله ولا طار .
تدرون من هو بطل السلام هذا ؟, ما فيه غيره , كوندليزا رز الأستراحه , أو مخاوي منقاش , هذا المخاوي اللي أن وجدتم فيه فضيله من الفضايل صغرت أو كبرت قلت أو كثرت فلا لها مصدر أكتسبها منه غير منقاش , هذا المخاوي اللي فيه ما قال مالك في الخمر تحققت على يده ألأعجوبه وعادت المياه لمجاريها في ظرف سويعات ,,,, سحر ؟ , ما فيه شي مستبعد , وكل الأحتمالات وارده , وممكن أن الرجل يتعاطى السحر والكهانه , ولا هي بعيده عن شوارب شرواه .
أقول يا جماعه لا تحقرون أحد , لآآآآآآآآآآآلآ , والدليل أن البركه نزلت على يد قليل البركه المخاوي , وألتم على يده شمل أعضاء المنتدى من جديد بعد كان في مهب الريح وكاد يروح في عين العاصفه .
وبعد هالمقدمه الضروريه لتفسير عودتي عقب ما نقلت قدمي من عندكم وحطيتها على أول طريق المغادره فلا بقي شي أذكره ألا نعود لموضوعنا وكلام ابن عمكم شلومو ولد مائير اللي يقول فيه :
تذكرون في الحلقه اللي راحت أن خوياكم العرب المريكان, (أخو محماس , وابو كرداس , ونجر , وكريشان) , ومعهم ملايين غيرهم أشتروا بيوت بالتقسيط , وعرفتم كيف أنهم رهنوها في قرضين , قرض شرا العقار أولا , ثم قرض شرا الأثاث والسيارات ثانيا , وعرفتم أنهم قبل شراهم للعقار كانوا قد حطوا أطراف أصابعهم في شبكة من الديون الربويه الثانويه اللي لها علاقه بفوايير الخدمات وبطاقات الائتمان .
وعلى الرغم من دخولهم المتدنيه , ومصاعبهم الماديه لقيوا من يمول شراهم لبيوت أو شقق سكنيه , وفعلا شروا ووقعوا على عقود شرا بيوت مثل الملايين من أمثالهم , وقعوا ولا أنتبهوا أن فيه فقرات مكتوبه بخط صغير في زوايا متفرقه من صفحات العقد الكثيره تقول :
إن أسعار الفائدة متغيرة ولا هي ثابتة، وانها تكون منخفضة في البداية ثم ترتفع مع الزمن ، وفقرة ثانيه تقول إن أسعار الفائده تبي ترتفع كلما رفع البنك المركزي أسعار الفائدة ، وفقرة ثالثه تقول إنه إذا تأخَّر العميل عن دفع أي دفعةٍ تضاعف أسعار الفائدة ثلاث مرات. وفقره رابعه تقول إن دفوعات الأقساط الشهرية خلال السنوات الأولى تروح كلها لسداد الفوائد , وفقره خامسه تقول أنه أذا تأخر المقترض عن تسديد ثلاث دفعات يحق للبنك الحجز على البيت وعرضه للبيع واستيفاء حقوقه .


وهنه لي معكم وقفه ألفت نظركم فيها الى أن ملاك البنوك اللي مولت الشرا ماهم مغفلين , لا لا , وكيف يكونون مغفلين وهم صناع اللعبه , والمخططين لها , وأصحاب الخبره التراكميه على مدى قرون في شؤون الصيرفه والمداولات الماليه ؟ .
مثلهم ما يمكن يجهل وهم اللي يطبعون الدولار ولا تكلفهم طباعته ألا خمس سنتات ويبيعونه على العالم بما فيهم ألأمريكان والأوربيين والصينيين بمية سنت , أو بمكسب 95% ,.
عمركم شفتم بساطه في جني الأرباح بهذا القدر من السهوله ؟ , وعمركم شفتم أستسلام عالمي لنهب ونصب نصابين بهذا الأسلوب وهذا الحجم ؟.
ربما تستغربون أو حتى تشكون , لكن لا غرابه أذا كان اللاعبين للعبه هم من أخذ حق أصدار العمله رغم أنوف البريطانيين والأمريكان واعتراض حكوماتهم , ولا غرابه وهم أصحاب نظرية أعطني حق أصدار العمله وبعدها سن من القوانين كما تشاء ومتى تشاء .
واذا كان بينكم من يرغب في معرفة خلفيه عن هذا الموضوع , ومعلومات موسعه مبنيه على مصادر محدده ما عليه ألا يقرا حلقات ما وراء ألأكمه اللي كتبها في منتداكم المستعين بالله أبو عبدالله .
نعود لأخو محماس ونقول : بعد سنتين رفع البنك المركزي سعر الفايده , وارتفعت معه أقساط الدفعات الشهريه من الف(1000) الى الف وميتين(1200) دولار كما نص العقد , وبعد فتره ثانيه وثالثه تكررت العمليه حتى أصبحت أقساط الدفعات الشهريه 1600 دولار تسديد في عقار كان يمكن يستاجر مثله أخو محماس ورفقاه بأقل من هالقسط .
وهنه بدت الهواجيس والكوابيس , وتحولت الوناسه لتعاسه , ومع كل اللي حصل نقدر نقول أنه الى هاك الحد القسط لا زال مقدور على تسديده على حساب ضروريات ثانيه للأسره من باب شد الأحزمه وعلى أمل أنه في يوم من ألأيام بعد أنتهاء مدة الثلاثين سنه للأقساط يصبح العقار ملك شاريه .
والى ها الحد خلونا نترك محماس وربعه على الوضع اللي هم فيه , الوضع اللي يبي يتدهور لاحقا , خلونا نتركهم ونعود عليهم فيما بعد , وتعالوا تشوفون البنك الممول ويش سوى ؟.
البنك الممول أنتظر عدد من ألأعوام حتى قبض مجموعه كبيره من أقساط أخو محماس وخوياه , وكان يتابع كل شارده ووارده حتى تأكد من حصول أمرين مجتمعه , ألأول , أن أخو محماس وربعه قربوا على المستوى اللي أذا زاد أرتفع فيه القسط الشهري يصبحون على عتبة الأفلاس , يكونون وصلوا للدرجه اللي ماهم بعيدين فيها عن ألأنهيار والعجز عن الوفاء بدفعات التقسيط , والثاني أن العقار أصبحت قيمته بسعر السوق وحركة العرض والطلب ما يغطي اللي بقي من أقساط لو حجز عليه وبيع بالكاش .
أذا أتضح أن هالأمرين حاصله لا محاله مجتمعه , وقتها آن الأوان للداب يخرج من جلده , وتجي مرحله من مراحل المناوره الماليه يسمونها التورق , بعباره واضحه , يعود يحول البنك باقي الدين اللي على محماس ورفقاه الى سندات حتى يتمكن من بيع دينهم على مستثمرين ويخرج خارج المخاطره ويحطها في وجه غيره بعد يزيد يكسب من الزباين الجدد (المستثمرين) عموله ورسوم خدمات , وهذا هو بيع الدين .
من هم المستثمرين الجدد المغفلين ؟ وويش بقية المناورات الماليه ؟.
جواب هالتساؤلات مقبل عليكم في حلقات قادمه , خلوكم مع أبو نقشه في روايته لكلام ولد مائير اللي من مكه وهو أدرى بشعابها .
خلوكم معي حتى تعرفون أن أهل الملايين المملينه المستثمرين في شرا السندات ماهم ألا قروش بحريه ألتهمت في أماكن نائيه من ألمحيط قروش أصغر منها , وأنه ما من ظالم ألا سيبلى بأظلم بقرب الوقت اللي تلتهمها فيه قروش أكبر منها .
وفي الختام أحب أوجه التماس لمشرفنا العام العزيز ابو عبدالرحمن وبقية المشرفين الأعزاء أقول فيه : تروني أشوف المخاوي أبتدا يغازل فيكم ويلولس حواليكم طمع فيكم عساكم ترفعونه وتعطونه نجمه رابعه , ومنقاش من هذا المكان يظهر أعتراضه ويقول لكم كفى مهانه أنكم ساويته بي واعطيتوه ثلاث نجمات , كفايه على هالأهانه اللي تجرعتها تجرع , وآلمتني ومغصتني واجد حتى أصبحت تاكل وتشرب معي مصبح وممسي , وكفايه ترقيات لواحد ما هو كفو من أمثال المخاوي , وان كان به ترقيات فأنا لها .
وسلامتكم , أنتم وسنا الهجره والدكتور مشعان وفخامة الشيخ الشريف منقاش , علما أن اللي ما يهنوني بسلامة عودتي رايح أصرها لهم واخرجها عليهم في يوم أسود , ومن أنذر فقد أعذر , ولا تقولون بعدين ما قالها لنا منقاش.