دروس خصوصيه(ح1) .

[منقاش]

دروس خصوصيه(ح1) . دروس خصوصيه(ح1) . دروس خصوصيه(ح1) . دروس خصوصيه(ح1) . دروس خصوصيه(ح1) .

بسم الله الرحمن الرحيم

منقاش يازبن الرفيق وياعمـى عيـن العـدو @@ منقـاش يادبـل الكبـود الحاسـده والحاقـده
منقاش ياقصر الحضر منقـاش ياخـدر البـدو @@ منقـاش يـا راس المراجـل كلهـا والفايـده
منقاش ياسبق القدم بيـن الرجـال ليـا عـدو @@ بالمختصـر منقاشـنـا شعبيـتـه متـزايـده
هذا وانا ادري بالرجال اللي امدحوا واللي انقدوا @@ مانقصـوا أو زودوا بفعـال شـيـخ كـايـده
أما بعد :
قبل مده جاني ولفاني مخاوي منقاش برساله شفهيه , أو كما يقول القايلين كلام من الراس ماهو من القرطاس , وزعم المخاوي أن اللي مرسله بالرساله متحفظ واجد , وفضل ما يكتبها على الورق حتى يحافظ على سريتها .
الزبده : ذكر المخاوي فيما ذكر أنه رسول من عند ولد عمنا النتن (نتنياهو) شيخ أسرائيل على شيخ العرب والبربر بدر الدجى وعرعرة المنتدى الشريف منقاش دام ظله وقدس سره , وعنوانها , يبو نقشه بل يدك أو حتى رجلك ولا تجف ألا عندنا .
قاطعت المخاوي وقلت , قبل تعطيني فحوى الرساله يا رسول الصهاينة فهمني ويش رقاك لأعلا السلالم حتى وصلت لعلية القوم من عيال عمنا ؟, ثم قل لي كيف تحول بك الحال وأصبحت اليوم حمال رسايل لبني صهيون وأنا خابرك أمس تنبح عليهم حتى أنبح صوتك من كثر ما تصايح وتنايح ليل ونهار وتسب في الصهاينه وتوعدهم بالويل والثبور وعظايم ألأمور ؟؟, رد عليه وقال , كيف تسعلني هذا السعال يا بدر الدجى وانت تعرف أنك أستاذي اللي علمني أولى أبجديات السياسه وكذوبها .
بأختصار , يكون في علمك يا فخامة المنقاش أن الصهاينه وعملاهم أهل تقيه , يعني في علانيتهم يظهرون العداوه والبغضاء لبعضهم وفي السراير تلقاهم سمن على عسل , والسب والنب اللي صم أذانيك وسبق وسمعته مني مجرد جعجعه لذر الرماد في العيون وخرطي في خرطي أقوله كما قاله غيري للأستهلاك المحلي حتى نخدر به المغفلين والسذج .
وأذا تبي مني اللعب على المكشوف يكون في علمك أن كثرة سفراتي لوسط آسيا ومعها سفرتي المقبله اللي رايح أسافرها بعد أيام لموسكو كلها من أجل عينيك يا صهيون عشقت الهوى .
قلت , طيب عرفنا هالحين أن المثل المكاوي اللي يقول أذا شفته يسبه توقع أنه يحبه ينطبق على كثير من اللي يتعاطون السياسة في هذا الزمان من أمثالك يالمخاوي وأمثال أستاذك أبو نقشه وأمثال بعض رموز السلطه الفلسطينيه في رام الله وبقية جماعة حسب الله .
لكن قل لي بدون أمانه لأن ألأمانه ضايعه في هذا الزمان , قل لي , نتن ياهو ويش فحوى رسالته لأبو نقشه ؟, رد وقال , سمعته يذكر أن بعض الحمير العربيه ألأصيله اللي تناسلت في صحراء النقب سارت مشعه وأصبحت تشكل خطوره على الشعب المختار الأسرائيلي من كثر ما رعت في العلفان اللي جنب مفاعل ديمونه , المفاعل النووي اللي بفضله ثم بفضل فرنسا (وقبلها بسلط من الله على العرب اللي نقضوا كثير من عهودهم مع الله) كوم اليهود أكثر من ميتين راس نووي في ترسانتهم العسكريه.
ويقول أنه يبحث عن تاجر حمير عربي لامع مثلك ياخذها بلاش ويلمعها ويستثمرها على أمتداد الوطن العربي الكبير , ويضيف النتن مع العرب النظيف مع شعبه (نتنياهو) أنه نما لعلمه أنك يبو نقشه ألمعي ولك شهره ذاع صيتها بين تجار الحمير وهواتها , ويبغي يخصك بهالصفقه على متن صابرك من باب صلة الرحم بصفتك ابن عم , ومن نافذة التنفيع ودهن السيور حتى تسير بصفتك من بني يعرب اللي يسيل لعابها أذا سمعت بأدنى مصلحه شخصيه لها حتى لو كانت شوية تمر والا زيت على حساب أهلها وأوطانها .
رديت على المخاوي وقلت , يا ولد أفهق عني وروح وراك كم يوم عساني أحسب المكسب من الخساره وبعدها يجيك مني جواب .
جلست أيام أقدم رجل وأخر في الثانيه , وفي النهايه قلت في نفسي , يبو نقشه ما خاب من أستشار , ولا لها ألا مستشارك وحليفك ساري الليل , أستشيره في هالخاتمه اللي جابها الخاين المخاوي بعد توضح لساري أن هذا زمن علو بني أسرائيل , وأنك رجال تخشى الدواير وتبغي تبقي شعرة معاويه ممدوده بينك وبينهم .
بعد بثيت علومي وشكيت همومي على مستشاري ساري الليل قال , شوف يبو نقشه , ما أشك أن هذا زمن علو بني أسرائيل , لكنه علو يبي يسخر الله له عباد يتبرونه ويدمرونه تدمير ويدخلون المسجد ألأقصى كما دخلوه أول مره في زمن خلافة أبن الخطاب رضي الله عنه .
لكن هذا النصر بينك وبينه فتن وأحن ومحن , بينك وبينه ما بقي من مدة فتنة السراء وبعدها فتنة الدهيماء اللي ما تترك أحد من هالأمه ألا لطمته لطمه , واللي كل ما قيل أنقضت تمادت , اللي يصبح الرجل فيها مؤمن ويمسي كافر , ولا تنتهي ألا بعد ينقسم الناس لفسطاطين , ثم تسلمهم لأم الفتن وأكبرها فتنة المسيح الدجال .
وأن كنت تبيها فصيحه ونصيحه صريحه , فأياك ثم أياك أنك يوم من ألأيام تواد أو توالي أحد من اليهود والنصارى اللي لن يرضوا عنك حتى تتبع ملتهم وتخون الله ورسوله وتخون المسلمين .
لكني ما أرى مانع أنك تسوي مثل نعيم بن مسعود في معركة ألأحزاب , يعني تجتهد في تخذيل وشق صفوف أعداء المسلمين من اليهود الصهاينه وحلفاهم من النصارى والمنافقين العرب .
وتقدر تعرض نفسك للخطر وتلعب بالحجر والبيضه مع النتن ياهو , بس أنتبه لا تروح للصهاينه وأنت شيخ من شيوخ العرب وتعود علينا وانت متصهين وشيخ من شيوخ المنافقين .
أعتزيت وقلت , أفا , فشر وعلم أقشر أن كان أبو نقشه في يوم من ألأيام يرتكس ويبيع دينه وربعه ويوالي اليهود واعوانهم من دون المسلمين , لكن ويش رايك ؟ , البيض أنواع وأحجام , ويش ترى أحسن بيض الفقيه والا القاضي ؟ .
ضحك ساري وقال , يبو نقشه أنت أثرك بحاجه لدروس خصوصيه بعد ثبت لي أنك في وادي والسياسه في وادي ثاني .
يبو نقشه , كلامي ما قصدت منه لا لعبة الحجر والبيضه ولا الزقيطه ؟ , لا , اللي قصدته فهلوه سياسيه في حدود سددوا وقاربوا وحدود المقبول , وحتى تفهم لعبة الحجر والبيضه أذكرك بالمبادره العربيه اللي عرضت السلام على الصهاينه بشروط أولها عودة اللاجئين لفلسطين المحتله عام الثمانيه وألأربعين , وألأنسحاب من ألأراضي المحتله عام سبعه وستين بما فيها القدس .
وهذا العرض مناوره سياسيه تضطر اليهود يرفضونها ويصبحون أمام الراي العام العالمي هم الرافضين للسلام وترجح شويه في كفة العرب السياسيه وتحفف من الضغوط اللي عليهم , لأن الصهاينه لا يمكن يقبلون بعودة اللاجئين حتى لا يفجرون أسرائيل من داخلها , ولا يمكن ينسحبون من القدس لأنها أهم شي قامت أسرائيل من أجله .
ومثال ثاني على لعبة الحجر والبيضه وهو حل أسراطين اللي أقترحه واحد من زعماء القوميه العربيه وهو صاحب الكتاب ألأخضر, واللي أقترح فيه أقامة دوله يهوديه فلسطينيه أسمها أسراطين ,حتى يكون حل شبيه بالحل اللي طبق بين البيض والسود في جنوب أفريقيا .
وهذي حلول فهلوه ولعب بالحجر والبيضه أبت لا تمشي على الصهاينه , لأنها من جانب تأجل الصراع فتره من الزمن وتنهي الحلم الصهيوني من الجانب الثاني .
لكن هذي الفهلوه ما تبرا بها ذمه , لأن تحرير فلسطين واجب على المسلمين ولا يجوز التنازل عن شبر منها , ولانها ما تنطلي على الصهاينه , والشغله مجرد مشاغله وشد حبال وتأجيل مواجهه.
ثم ختم ساري كلامه وقال : هاه يبو نقشه , بعد سمعت الدرس أنت جاهز تلعب بالحجر والبيضه والا لا ؟ , رديت , جاهز , لكن بعد زياده في الدروس الخصوصيه .
والى عند الدروس الخصوصيه نتوقف حتى لا نطيل عليكم ونتسبب في مللكم , خلوكم متابعين مع أبو نقشه في الحلفات الجايه حتى تعرفون قواعد لعبة الحجر والبيضه , وتشوفون كيف أبو نقشه يلعبها لعبة الشنقلي, لكن شرطي عليكم أني أشوف تفاعل وردود وقراء حتى أستمر في اللعب , وسلامة اللعاب بدر الدجى , وسلامتكم وسلامة المشجعين ..

[أبو عبدالرحمن]

والله يا ابو نقشه ..ضاعت علومنا بين الجحر والبيضة..اقصد الحجر .

بس أول مرة أشوفك لطيف مع المخاوي!

[مخاوي منقاش]

اسمع يبو نكشة/تخيل نفسك اسرائيلي هل ستفرط في كيان يحتمع فيه ربعك؟ وماذا ستتصرف وانت في كيان تحف به اسود مكبلة باقفال مفاتيحها بيد حكام تخاف على مكتسابتها 0فماعليك الا ان تلعب بجميع اوراق الكوتشينه(لو ان وجهك ماهو راعي ورقه)واللي تكسب بوه العب بوه0
لكن نصيحتي لك ايها الشقي ان تنتبه لحلفك المتداعي وتترك اسرائيل فالله اوجدهاليدخل بسببها اقوام الجنة واقوام النار والعياذ بالله واحب ان اطمئنك ان في الارحام ماتخشاه اسرائيل وغير اسرائيل والله اعلم
هل فهمت ياغبي؟

ابو عبد الرحمن /منقاش يعيش مرحلة الصدمة وهاتفني ليلة امس عارضا علي التحالف ولكني اجبته بضحكة فيها تهكم ولا اخفيك ممزوجة بنوع عالي من التكبر لئن التكبر على المتكبر تواضع
حتى جاب سيرتك بكلام لم استطع تحمله واغلقت السماعة في وجهه00يستاهل الخبيث00
ابو سيفين /امرت نجار المنتدى بعمل نخلة تليق بمقامك لكي تنصبها بين السيفين وانت رايح وجاي لكي لا يتعرضلك احد وعلى فكرة وشوش احد العملاء انك تعمل في حراج الحمام (احذر ترى ماتقبل شهادتك)

[منقاش]

ابو عبدالرحمن : قبل الحكي في الحجر والبيضه , أذكرك أن الساعه هالحين ثنتين بعد منتصف الليل وأشوف بعض ألأخوان ما يطلعون علينا ألا بعد الساعه 12 في الليل , وأكيد أنهم ناوين يرقدون عن دوامهم ويمغطونها نومه حتى الساعه عشره ويضيعون حقوقنا يالمواطنين .
من أجل كذه رجايه تقفل المنتدى بعد الساعه 11 في الليل عن جميع ألأعضاء ما عدا المتقاعدين ورجال ألأعمال مثلنا يا أهل الغنم والزراعه, لأنهم أحرار ويستاهلون يتسلون ويسلون غيرهم .

[ابوسيفين]

واقول وش اللي رفع سعر الموز رغم إن البطيخ كثير

[منقاش]

أنذار :
يا قراء عددكم قليل , ويا أعضاء تفاعلكم عليل .
وترون أذا ما عدلتم سلوككم ولقيت المجلس قدامي مليان رايح أتوقف عن تكملة بقية الحلقات , ووقتها نقول لكم على نفسها جنت براقش , لأني عارف القصه من أولها حتى آخرها ولا أنا بحاجه لقرايتها أو كتابتها , ولا يبي يخسر ويتحسر غير أنتم يا مساكين .
ومن أنذر فقد أعذر , وشكرا .