من هو ابو نشقه

[شااااعر]

من هو ابو نشقه من هو ابو نشقه من هو ابو نشقه من هو ابو نشقه من هو ابو نشقه

(( مقدمه ))

اذا كانت المعارك قد توقفت بين الأسلام واعدائه ,, بفضل انتصار الاسلام العسكري الحاسم في القرن الأول لظهوره ,, فلم نعد نسمع للسلاح قرقعه ولا للسيوف صليلاً ,, ويا وش بقى بأعطيك مني ولا جاك ما باقي إلا روحي احيا بها لك ,, ثم أما بعدين ,,
البطاقه الشخصيه لابو نشقه
الاسم : سليمان ابو نشقه
العمر : لا عيب مايصحش اوع كده ( ليلى علوي مو ابو نشقه)
الحاله الاجتماعيه : اعزب وليس لديه اولاد ( قال يعني المجتمع ناقص)
الهوايات : جمع الطوابع والمراسله وكتابة المواضيع في النت وعلى الجدران

((
ولادته ونسبه :

ولد سليمان ابو نشقه والملقب بأبانشقه,, في مدينةالطائف وبالتحديد في مستشفى للصحه النفسيه في شهر ربيع الأول من العام 1404 هـ الموافق 1984 م لأسره كريمه اشتهر افرادها بالخبال والهرطقه وما الى ذلك من انواع الاستهبال اللي مال امه سنع بس انهم فله وتحطهم على الجرح يبرى وناس راعين واجب وكرم ,, حتى اذكر مره جاهم واحد من عيال عم ابونشقه من الديره ومن زود الكرم اللي بابونشقه خلاه ينام معه بنفس الغرفه ,,

تحصيله وتعلمه :

حفظ الحديث والتجويد وفقه المعاملات وتوحيد الالوهيه والربوبيه والاسماء والصفات كما درس الادب العربي والشعر الجاهلي والمعلّقات السبع والسيره النبويه والتاريخ والادب الانقليزي والفرنسي كما تعلّم كرة القدم ولعب البرجون والكيرم على يد كبار والمدربين فما ان انتهى من تعلم جميع هذه الاشياء حتى جائته والدته تبي تشوف وش عنده من العلم فقالت له سمّع لي واحد من اشعار امرؤ القيس ,, فما كان منه إلا ان ردد النشيد الوطني على مسامع والدته وأردف ذلك النشيد بكسرات لأبو سراج ,, فلم تتمالك والدته نفسها ذيك الحزّه وخّرت مغمن عليها لانها عرفت ان ولدها ثور الله في برسيمه وان ما وراه إلا الدجه وانه بيطلع داشر اذا كبر
بعد هذه الحادثه قرر والديه ان يدخلانه مدرسه داخليه حيث ان والدته كانت من متابعي فلم كرتون سالي ( والله ياعليها اغنيه البنت سالي ) بشكل مفرط ومتأثره فيه بقوه لدرجه انها ذاك اليوم يوم جاء الشتاء وكانت سالي تنتفض بغرفتها اللي فالسطح قامت امه تبكي ( رأفتن بحالها) قسم بالله حسيت اني نجيب محفوظ على ذي الكلمه ,,

(()


(( انجازاته ))

- اول من اخذ كأس العالم

- حاصل على الدكتوراه الفخريه من الوليد بن طلال على مساهمته في حل مشكلة سالم الهندي مع رابح صقر

- معطينه وسام الملك عبدالعزيز لأنه مشارك بالجنادريه

- فاتح مقهى انترنت وحاط الساعه بـ5 ريال والسرعه عنده مب صاحيه ,, 2048 ميقا وعدد 20 جهاز وكوفي شوب مافيه إلا موكا وسنكرس ويمكن يجيب أوريو ( صح يالدعايه )

((
=-=-=-=-=-=
=-=-=-=

(( حينما خرج من بطن أمه ))

حدثنا والد ابو نشقه قال لقد كانت والدته وهي حامل فيه تتوحم على ابو فروه مما أثر على الجنين واللي هو ابو نشقه زات نفسوووه فأصبح رأسه كأبا فروه من حيث الشكل أما الطعم والله ما ذقناه لين الحين ,, ولقد قيل ان ابو نشقه يوم طلعوه كان مغمى عليه مما اضطر الدكاتره انهم يختمون راسه بكويه حتى يفيق من غيبوبته فلما افاق ونقلن عن الدكتور اللي كان شايله قال : فلما كويتُهوو أفاق من غيبوبتهوو وما كان منهووو إلا انهووو بصق على وجهي ورمقني بنظره وقال يالدلخ ترقع لستك انت ولا تكوي !؟
والحين اللي يشوف راس ابو نشقه يجد الكويه والتي اصبحت مزاراً للسياح (الله يالكويه ياشيييخ صارت مدائن صالح مو دماغ !!! )

(( عندما فطمته امه ))

قال الراوي ( واللي هي امه ) انها يوم فطمته ساورها شعور بانها خلاص ما ودها تحمل مره ثانيه فلما سألوها ليش ؟! قالت اخاف يجيني المولود الجديد ومايلقى شي يشربه !!! مما يدل على ان ابو نشقه ما وفّر شي وحلل ام الحليب الذي وهبه الله لوالدته ( ياهوو لعييين ذا الادمي حتى من يومه بزر )

(( يوم قرصته امه ))

فلما سألو والدته ماذا كان من ابنها ابو نشقه عندما بلغ من العمر 5 شهور ( بدايات الزحف ) ,, تنهدت وقالت ايييييييه ( ياحبيلها ),, فأردفت قائله : لمّا بلغ الخمسة أشهر الأولى من عمره طلب مني ان اشتري له سيكل لأنه شاف عبدالرب ولد جيراننا معه سيكل ,, فما كان منّي إلا ان ألبي طلبه بحكم اني احبه رغم انه عله ,, فقررت بأحد الايام ان اذهب انا وهو لأقرب محل يبيع سياكل والذي كان يبعد عن منزلنا مسافة كيلو رجليّه ,, فاخذته مع اخوته فيصل وبدر ( فيصل اكبر منه بسنه وبدر اصغر منه بسنه ,, قولو مشالله هاه ,, ادري ان الوالد ماعنده وقت الله يرجه ) فلما دخلنا المحل شاهد ابو نشقه سيكل بجنوط نيكل وبثلاث كفرات ,, كفرين صغار مع الجنب وكفر كبير في النص.... تقول والدته انه ما ان استلم السيكل وهو اللي يدزّها للحاره وسحب عليها وعلى اخوانه لانه كان متحمس بقوه ويبي عبدالرب يشوف سيكله وهو مشخص فيه
وعندما وصل ابو نشقه للحاره وشاف سيكل عبدالرب انصدم وضاق صدره لان سيكل عبدالرب مزبط والدينه وحاط على اسيام الجنط لزقات حمرا وخضرا ( ملاهي الله يهديه مب جنط ) ,, انقهر ابو نشقه ومن اليوم الثاني دخل السيكل تحت الدرج حق بيتهم ويمسك العدّه ويقعد يفك الكفرات عشان يركب زي عبدالرب وزياده عليها يبي يقلد سيكل اخوه سلمان اللي كان اكبر منه بـ 7 سنوات حيث ان سلمان كان مركب نسّافه وأنتل وعلب زيت العربي على الجنب ( الله يالدنياااا )
فلما سمعت والدته مايحدث تحت الدرج قامت وطلّت عليه من فوق الدرج فلما شاهدها ابو نشقه وايقن انها قفطته ومايمديه يصرّف قرر الفقعه فلما همّ بالفقعه ( يعني النحشه ) وكان بابهم حديد وثقيل يالله ينفتح وإلا أمه ناويته وتجيك مدحدره مع الدرج وتحجره في الزاويه كنه قطوو حاجرينه عيال الحاره بخشبه
وبما ان امه نظامها امريكي وما تحب تطق قبل لا تتفاهم مسكته مع التي شيرت حقه وشقلته فوووووق وترميه على الارض همن تطلع على الزاويه وتنط عليه كنها سنوكا !!!!!!
انني العب عليكم فلم تنط عليه بل قبصته على فخذه من الجهه الداخليه يعني فصفاقه
ومن ذلك اليوم وابو نشقه ماكلن تبن ومتعقد من السياكل

(( والله واصبح كبيراً ))

أسترسلت والدته في اكمال ماتبقى من بدايات حياته ,, فقالت انه عندما وصل عمره الى 24 شهراً ( اقساط سياره هو !؟ ) اي سنتين عاماً ,, طلبها سياره ( عاد من جد لو اني امه قلت له تولّم ,, ما ينعطى وجه ذا المدلع ) فقد كان يريد سياره ام ريموت لكي يغبن عيال عمه الذين كانو يكشخون عنده بالسيارات الصغيره ام ريال ,, فأشترت له ما يريد ومن بوادر الدشاره التي لاحظتها عليه منذ الصغر كان عند اخته لعبة باربي يوم انها صغيره وكان ياخذها ويحطها على المركى ويجي بالسياره جنبها ويقعد يحاول فيها عشان تركب (الله يرجه ) ,, فهذا في نظره كان بحد ذاته بلوووغ الله يصلحه

=-=-=-=-=-=-=-=-=-=-=-=
=-=-=--=-=-=-=-=
=-=-=-=-=-=
=-=-=-=

(( سنه اولى تمهيدي ))

عندما بلغ السنتين كما ذكرنا قبل قليل قررت والدته ان تدخله التمهيدي كي ينشأ على العلم منذ نعومة اظافره ,, ففي احد الايام شقلته معها للمدرسه اللي بتسجله فيها فلما دخلت على المديره ورأت اابو نشقه قالت المديره خلّص التسجيل عندنا !!! فقالت لها امه ,, ماذا دهاكي ايتها المعلمه فلا يغرنّكي شكل ابني فهو كما يبدو لكي شيطان وينخاف منه لكن صدقيني انه سبهه وسبيكه ومافي راسه شي
فقامت المديره تشاور نفسها واتخذت قرار الموافقه على تسجيله لديهم

(( اول شرداته ))

تم تسجيل ابو نشقه في المدرسه لدراسة المرحله التمهيديه !! ومما لا شك فيه بأن هذه المرحله كانت خليطي وفله ,, العيال مع البنات ( فله اجل !! ) عاد ابو نشقه اشتهر منذ الصغر بأنه انسان خجوول ويستحي ( اي هين ) وما يحب البنات من يوم انه بزر ,, واكبر دليل على ذلك هو ماحصل في اليوم التالي ليوم التسجيل ,, حيث انه ولما أخذته والدته الى المدرسه ودخل وشاف البنات راح على طوول وجلس جنب وحده وقام يوريها ساعته اللي تنوّر ,, فخقت معه البنت وصارت صديقته ويوم شاف الدعوه كذا قال خلني اجمع البنات كلهم واقعد اورّيهم الساعه عشان يخقون معي الزبده انه فلها ,, حتى انه في اليوم الثالث قرر ينحاش من المدرسه ,, وبالفعل تم ذلك حيث انه عط من المدرسه وراح لبيتهم الذي كان يبعد عن المدرسه مجرد انه يطلع من الباب ويدخل في الباب الثاني ,, يعني مهنا شي بينه وبين البيت ,, فكانت هذي اول شرده من المدرسه يسويها

(( والله مب سهل ))

بعد ما انحاش ابو نشقه من المدرسه جاه تشويت لين عرف ان العلم نور ,, فعاد في اليوم التالي الى المدرسه وهو ماكلن تبن من التشويت اللي جاه ,, فذهب الى خويته ( خلااااص صارت القيرل فرند حقته ) وحكى لها ما جرى من والدته التي لعنة خيّره ,, فقام يصيح عندها عشان تحن عليه وتقول له تعالاااا ياحبيبي بالحووووضن ,, فحصل ما يريد وقامت صاحبته بالطبطبه عليه مع ترديد اغنية نانسي اللي تقوول فيها :

ياطبطب وادلع يا أول انا اتغيرت عليـــــه

=-=-=-=-=-=-=-=-=-=-=-=
=-=-=--=-=-=-=-=
=-=-=-=-=-=
=-=-=-=

(( اولى جيم ))

تم ترقية ابو نشقه من التمهيدي الى الابتدائي والتي كان ابو نشقه يشوف انها ابيخ مرحله عاشها بحياته فلما سألوه عن سبب هذا التذمّر قال :

كله من ابوي الله يهديه يعني كل ما تعرفت على عيال الفصل ينقلني من المدرسه !!!

فهذا كان السبب اللي مضيق صدرابو نشقه حيث انه كل ما تعرف على عيال الفصل نقله ابوه من المدرسه وضاعت حياته الدراسيه دون اصدقاء

(( القفطه ))

يوم استقر ابو نشقه في أخر مدرسه ابتدائيه والتي كانت المدرسه السابعه اللي ينقل لها اطمئن قلبه وارتاح لانه بيكوّن صادقات مع عيال الفصل والمدرسه ولكن وش عقبه يوم وصل خامس ابتدائي !!
لكن يقول المثل : عصفور على الشجره ولا عشره على اليد ( لعد تقول امثال واللي يرحم امك )

وذات يوم من الايام الدراسيه نسى ابو نشقه ياخذ المصروف من والده أو بالاصح ابوه كان طفران ذاك اليوم وما عطاه شي ( طبعن ابو نشقه من حينه وهو متعود ياخذ مصروف بدال سندوتشات الجبن اللي تسويها امه ) مع انه ياخذ مطّاره بس هذا لا يعني انه ياخذ ساندوتش من البيت ( طيب وش فيها اذا اخذ !؟ ) فلما جائت الفسحه وصف طابور عند المقصف ( ابي اعرف ليش اسمه كذا ؟ ) ويوم وصل عند شباك المقصف قال عطني واحد كبده واثنين شكشوكه واثنين عصير ربيع طبعن هو يدري ان مامعه فلوس بس انه عبيط إلا يفطر ,, اخذ الطلب وسحب على راعي المقصف بالفلوس ,, طبعن راعي المقصف يناديه ويقول له تعااال وهو كنه ما اخذ شي ,, وراعي المقصف متوهق مايمديه يطلع بس عشانه ابو نشقه اللي سحب عليه طلع الملعوووون وقام يلحقه ,, كانت المدرسه كبيره وكان فيها ملعب تراب كبييير قام ابو نشقه وطق امها سبرنت والهندي راعي المقصف وراه ومافيه إلا قوة مطارد ,, كنهم ارانب يلعبون حبشه !!
المهم اابو نشقه ضيّع راعي المقصف وراح ياكل الفطور وهو مستانس انه فخت من الهندي ,, بس تحسبون الهندي قال خيره ومنها اكسب اجر فيه لان شكله طفران ,, اي هين ,, اشوا انه قام يدور على الفصول لين دخل فصل ابو نشقه ويوم شافه ابو نشقه التفت على شنطته العلاقي اللي كانت وراه على الكرسي على باله بيطلع الكتب عشان ما يشوفه الهندي بس على مييييييين ,, يوم شافه مسكه وخذاه للوكيل وتسطر هناك لين جى بكره وهو جايب 200 ريال وحاسب الهندي من الخوف


=-=-=-=-=-=-=-=-=-=-=-=
=-=-=--=-=-=-=-=
=-=-=-=-=-=
=-=-=-=


=-=-=-=-=-=-=-=-=-=-=-=
=-=-=--=-=-=-=-=
=-=-=-=-=-=
=-=-=-=

(( عرفات النحراوي ))

نجح ابو نشقه بالمتوسط وانتقل الى الثانوي واصبح ذو شأن بعد ما طلّع بطاقة احوال وصار سعودي وفي ذات يوم وعندما ذهب ابو نشقه بالملف حقه عشان يسجل بأحد المدارس الاهليه لأن ابوه فجأه صار كاش ودخلابو نشقه على الوكيل واللي كان اسمه عرفات النحراوي والملقب بمعلم كرشه لان حزام بنطلونه ما تشوفه من كرشته الله لا يبلانــا ,, دخل عليه ونطل في وجهه الملف وقال له ابي ماصتي أخر الفصل قدام المكيف ولا تقعد تقول مافيه عشان لا العن ابو الطيب فيك !!! ( هو فاهم انه اذا دخل مدرسه اهليه يحق له يسفل على العالم) ,, ناظر فيه ابو نحراوي وقال : اللّهْ هوا انا واحد من صوحااابك ولا إيــه !؟ دنته واد أليل أدب وماتربيتش ,, اُخرُق براااا أبل ماندهش البوليييص ,, لانته ابني ولا اعرفك ,, اخرررررص ولا كلمه ياسافل ياعربَقي ,, كل هذا وابو نشقه ساكت بس انه شوي شوي يمد يده للطفايه اللي على الطاوله من غير ما ينتبه ابو نحراوي ,, وذاك مكمل في الشرشحه لين وصل عند ... واللهي إزا ماخرقت دي الوأت لأوم اشرّحك بالمطوه دي ( وش عنده محمود المليجي؟ ) يوم توه قايل ديييي إلا و الطفايه تسولف مع جبهته ذا المصري الارعن ,, وفي الاخير قبل ابو نشقه وهو مايشوف الدرب

تقرير الطبيب الشرعي يقول اصابه بجسم غريب ادى الى تهتك الجمجمه ( هذا حاذفه بمنجنيق؟)
تم ارسال ابو نشقه الى الاحداث حتى خروج عرفات النحراوي من المستشفى وبتدخل اهل الخير واهل القلوب الرحيمه تم اخراج ابو نشقه من توقيف الاحداث ومن يومها اخذ عهد على نفسه انه يصير ذوق وماشي في الطريق المستقيم حتى انه يفكر يتزوج هالايام من نانسي وهبي ........

[شااااعر]

قد يتسائل البعض ليش كتبت هذا الموضوع؟
الاجابه لان صديقي الاديب الكبير الدكتور ابو نشقه راح يكون من اعضاء هذا المنتدى وراح يكتب لكم مواضيع ادبيه شيقه

[H Y T H A M]

ههههههه
ابشرك الرجال سجل .. في أنتظار مايخط مداد قلمه
دمت بدون نشقه ايها الشاعر

[أبو عبدالرحمن]

أقول ما شاء الله عليك وعلى صاحبك

مرحبا بك ...

وحقيقة أسلوب كتابتك رائع وبديع ..على ما تحويه من أسلوب عامي..

[@ بن سلمان @]

مرحبا الف بزيوت قلف

[الحجاج بن يوسف الثقفي]

ياهلا والله بصاحب ابونشقه
لا يكون يقرب لمنصور البعره واحمد الصامولي وسامي المنفلت
هههههههههههههههههههههههههههههههههههههههههههههه

[بنك المعلومات]

والنعم والله
بس ما عرفنا خواله

[ABO TURKI]

الله يحييك يا شاعر انت وصاحبك ابو نشقه

[abonayf]

مرحبا الف نشقه ونشقه

اشوف اسمه مسجل بس وينهو قله الريجال ينتضرونه نبي نعرف علومه

[ابو نشقه]

شكرا جزيلا